Ni lwisana na mini ḓuvha na ḓuvha? Naa ni ṱhoho ya muṱa ane a khou lingedza u hwala vhuḓifhinduleli vhunzhi? Na ni khou lingedza u ṱhogomela muṱa sa mubebi a re eṱhe? Naa ni ṅwana wa tshikolo ane a khou tambudzwa nga thangana dzawe? Naa ni na thaidzo ya mutakalo kana ni khou sedzana na vhuleme nga nṱhani ha vhulala? Muṅwe na muṅwe u na zwine a khou lwisana nazwo. Vhakriste vhanzhi vha khou sedzana na zwithu zwinzhi nga tshifhinga tshithihi. Fhedzi ri a zwi ḓivha uri ri ḓo vhofhololwa kha zwenezwi zwithu zwoṱhe hu si kale.​—2Krt 4:16-18.

Musi ri tshee ro lindela, ri nga khuthadzwa nga u ḓivha uri Yehova u a pfesesa zwine ra khou sedzana nazwo. U a dzhiela nṱha u fhulufhedzea na u konḓelela hashu nahone u ḓo ri fhaṱutshedza nga nḓila khulwane vhukuma. (Yer 29:11, 12) Na Yesu u na ndavha na riṋe. U fhulufhedzisa uri ‘u na riṋe’ musi ri tshi ita mushumo we ra ṋewa wone sa Vhakriste. (Mat 28:20) Musi ri tshi elekanya nga ha u vhofhololwa tshifhingani tshi ḓaho nga fhasi ha Muvhuso wa Mudzimu, ri khwaṱhisa fhulufhelo ḽashu na u ḓiimisela u konḓelela zwine ra khou sedzana nazwo zwino.​—Rom 8:19-21.

ṰALELANI VIDIO INE YA RI: DZULANI NO LIVHISA ṰHOGOMELO KHA YESU SAMUSI ḒUMBU ḼI TSINI!​—ZWA TSHIFHINGANI TSHI ḒAHO, NGA MURAHU NI FHINDULE MBUDZISO DZI TEVHELAHO:

• Vhathu vho ḓifhambanya hani na Mudzimu nahone ha vha na mvelelo dzifhio?

• Vhane vha fhulufhedzea kha Yehova vho lavhelela vhumatshelo ha hani?

• Ndi ngani honovhu vhumatshelo havhuḓi vhu tshi ḓo konadzea?

• No lavhelela phaṱhutshedzo dzifhio shangoni ḽiswa?