Musi ri tshi ḓivhetshela zwipikwa zwa u ita zwo engedzeaho tshumeloni ya Yehova, ri vha ri tshi khou shumisa nungo dzashu zwavhuḓi. (1Krt 9:26) Tshifhinga tsho salaho kha ḽino shango ndi tshiṱuku nahone zwipikwa zwi ri thusa u shumisa tshifhinga tshashu nga vhuṱali. (Ef 5:15, 16) Musi ni tshi ita vhurabeli ha muṱa, ndi ngani ni sa ḓivhetsheli zwipikwa zwa ṅwaha wa tshumelo u ḓaho? Kha tshino tshibugwana tsha muṱangano hu na thero dzo itelwaho u ni thusa u humbula na u rabela nga ha u ḓivhetshela zwipikwa zwo fhambananaho. —Yak 1:5.

Sa tsumbo, naa noṱhe sa muṱa ni nga thusa muraḓo muthihi wa muṱa wa vhoiwe uri a vhe muvulanḓila wa tshifhinga tshoṱhe? Arali ni tshi pfa u nga ni nga si swikise awara dzine dza ṱoḓea, ambani na vhaṅwe vhavulanḓila vha re kha vhuimo vhu fanaho na haṋu. (Mir 15:22) Khamusi ni nga ita nyambedzano na muvulanḓila nga tshifhinga tsha vhurabeli ha vhoiwe ha muṱa. Nahone nga murahu na ḓiitela mbekanyo yaṋu. Arali no vhuya na vula nḓila tshifhingani tsho fhiraho, ḓiṱolisiseni u itela u vhona uri naa vhuimo haṋu vhu nga ni tendela u ita nga u ralo zwino.

Naa vhaṅwe muṱani wahaṋu vha nga kona u dzhia vhuvulanḓila ha u thusa ṅwedzi muthihi kana u fhira? Arali ni si na nungo nga u tou ralo, ni nga kona u ita vhuvulanḓila ha u thusa nga u fhedza tshifhinga tshiṱuku ḓuvha na ḓuvha ni tsimuni. Arali ni na tshifhinga tshiṱuku tsha u shuma tsimu vhukati ha vhege nga nṱhani ha uri ni a shuma kana u dzhena tshikolo, khamusi ni nga khetha ṅwedzi une wa vha na holodei kana mafhelo a vhege maṱanu. Kha khaḽenda, ṅwalani uri ni ḓo dzhia lini vhuvulanḓila ha u thusa nahone ni ḓiitele na mbekanyo.—Mir 21:5.

ṰALELANI VIDIO INE YA RI: IVHANI NA TSHIVHINDI . . . MUVULANḒILA, NGA MURAHU NI FHINDULE HEYI MBUDZISO:

• Tshenzhelo ya Wahashu Vho Aamand i ri gudisa mini nga ha nḓila ine Yehova a ṱhogomela ngayo vhane vha ḓidzima zwiṅwe zwithu u itela u vula nḓila?