Paseka ya Yesu ya u fhedza yo vha i tshi ḓo vha yo khetheaho. Samusi Yesu o vha e tsini na u fa, o vha o ḓilugiselela u ḽa Paseka na vhaapostola vhawe na u thoma Tshilalelo Tsha Murena tshe tsha vha tshi tshi ḓo itwa ṅwaha muṅwe na muṅwe. A mbo ḓi ruma Petro na Yohane uri vha lugiselele kamara ine vha ḓo farela khayo Paseka. (Luk 22:7-13; sedzani tshifanyiso tshi re kha gwati.) Zwenezwi zwi ri humbudza uri ri tea u lugiselela Tshihumbudzo tshine tsha ḓo vha hone nga dzi 27 dza March. Zwivhidzo zwo ita ndugiselelo ya uri ndi nnyi ane a ḓo vhea nyambo, vhurotho na waini na zwiṅwe. Fhedzi ri nga ḓilugisela hani ḽeneḽo ḓuvha nga muthihi nga muthihi?

Lugiselelani mbilu yaṋu. Vhalani na u elekanya nga ha muvhalo wa Bivhili wa Tshihumbudzo une wa wanala kha bugu U Ṱolisisa Maṅwalo Ḓuvha Ḽiṅwe na Ḽiṅwe. Ṱhumetshedzo B12 i re kha Ṱhalutshedzelo Ya Shango Ḽiswa Ya Maṅwalo Makhethwa i a sumbedza maṅwalo ane na nga a vhala. (Sedzani na Tshibugwana Tsha Muṱangano Wa Vhutshilo Na Vhuḓinḓa tsha April 2020.) Miṱa i nga ya kha Watch Tower Publications Index kana kha Research Guide for Jehovah’s Witnesses u itela u wana mafhungo ane vha nga a guda kha vhurabeli ha muṱa nga ha nḓila ine tshirengululi tsha vha tsha ndeme ngayo.

Rambani vhaṅwe. Shelani mulenzhe kha fulo ḽa u rambela vhathu tshihumbudzoni. Humbulani nga vhane na nga vha ramba. Ni nga ramba vhe na fhulufhedzisa u humela khavho, vhe na vha ni tshi guda navho Bivhili, vhane na shuma navho na mashaka aṋu. Vhahulwane vha tea u ita vhungoho ha uri vha rambe vhathu vho fholaho. Arali muthu a sa dzuli hune na dzula hone, u itela u wana tshifhinga na fhethu hune Tshihumbudzo tsha ḓo farelwa hone tsini na hune a dzula hone, iyani kha jw.org/ve, ni sedze nṱha ho ṅwalwaho uri NGA HA RIṊE, ni puṱedze ni nange tshiteṅwa tshine tsha ri “Tshihumbudzo.”

Ndi zwifhio zwiṅwe zwine ra nga ita u itela u ḓilugiselela?