Ri na vidio nṋa dza pfunzo ya Bivhili dzine ra dzi shumisa musi ri vhuḓinḓani. Iṅwe na iṅwe ya dzenedzi vidio yo itelwa mini?

• Ndi Ngani Ni Tshi Fanela U Guda Bivhili?—Vidio Yo Fhelelaho yo itelwa u thusa vhathu uri vha vhe na dzangalelo kha Bivhili hu sa londwi zwine vha zwi tenda. I ṱuṱuwedza vhathu uri vha ite ṱhoḓisiso vha tshi shumisa Bivhili u itela u wana phindulo dza mbudziso dza ndeme vhutshiloni na u amba nga ha dziṅwe dza mbudziso dzine Bivhili ya dzi fhindula nga nḓila i pfalaho. I ṱalutshedza uri muthu a nga ita hani khumbelo ya pfunzo ya Bivhili.

• Ndi Ngani Ni Tshi Fanela U Guda Bivhili? (tshipiḓa tshipfufhi) tshipikwa tshayo tshi fana na tsha vidio yo fhelelaho, fhedzi yone ndi pfufhi vhukuma. I nga shuma nga maanḓa fhethu hune vhathu vha hone vha dzula vho dzhaya.

• Pfunzo Ya Bivhili I Farwa Hani? yo itelwa u thusa vhathu uri vha vhe na dzangalelo kha pfunzo yashu ya Bivhili ya mahala na u fhindula dziṅwe dza mbudziso dzine vhathu vha vhudzisa nga ha pfunzo yashu ya Bivhili u katela na uri vha nga ita hani khumbelo ya pfunzo ya Bivhili.

• No Ṱanganedzwa Kha Ngudo Yaṋu Ya Bivhili yo itelwa u sumbedzwa vhagudiswa vha Bivhili. Naho yeneyi vidio i tshi wanala kha siaṱari ḽa vhuvhili ḽa bugu Ḓiphiṋeni Nga Vhutshilo Lwa Tshoṱhe!, i nga sumbedzwa musi ni tshi khou haseledza bugwana Ḓiphiṋeni Nga Vhutshilo Lwa Tshoṱhe! Yeneyi vidio i amba nga ha zwine zwa wanala kha bugu na uri mugudiswa a nga lavhelela mini musi ni tshi khou haseledza.

Naho hu uri iṅwe na iṅwe ya dzenedzi vidio i na tshipikwa tshe ya itelwa tshone, iṅwe na iṅwe yadzo i nga sumbedzwa vhathu kana u vha rumela musi zwo tea. Vhahuweleli vha ṱuṱuwedzwa uri vha dzi ḓowele na u dzi shumisa nga nḓila i bvelelaho vhuḓinḓani.