Ṋamusi khombo dza mupo dzo no vha zwithu zwo ḓoweleaho u fhira naho hu lini. Musi khombo dza mupo dzi tshi bvelela, ndugiselelo dza u phalala dzi tea u itwa nga nḓila yo dzudzanyeaho. Ndi ngazwo Tshigwada Tshi Langaho tsho ita ndugiselelo dza uri hu vhe na Muhasho Wa U Thusa Vho Welwaho Nga Khombo kha davhi ḽiṅwe na ḽiṅwe.

Musi vhahashu vhane vha shuma kha wonoyo muhasho vha tshi pfa uri ho vha na khombo, vha ṱanganya vha kwama vhahulwane uri vha ḓivhe uri vhahuweleli vha khou ṱoḓa thuso ifhio. Arali tshinyalelo i khulwane lune vhahuweleli vha si kone u i tandulula, davhi ḽi ḓo khetha vhahashu vha faneleaho uri vha range phanḓa mushumo wa u phalala. Vhenevho vhahashu vha nga humbela vhathu vhane vha ḓo thusa kana uri hu ṋeelwe nga zwithu zwine zwa khou ṱoḓea kana vha renga zwithu zwine zwa ṱoḓea vha zwi ṋea vhahashu.

Zwi a vhuyedza vhukuma musi ri tshi ita zwithu nga yeneyo nḓila, nṱhani ha uri vhahashu vha ite zwithu nga vhone vhaṋe. Zwenezwo zwi thivhela uri ri si ite mushumo muthihi lunzhi-lunzhi, u tambisa masheleni na zwishumiswa.

Vhahashu vhe vha khethiwa nga davhi vha a kona u ḓivha uri hu nga ṱoḓea tshelede nngafhani na uri hu ṱoḓea vhathu vhangana kha wonoyu mushumo wa u phalala. Vha nga shumisana na vhaofisiri vha honoho vhupo uri vha thuse kha mushumo wa u phalala nga u ṱavhanya. Nga zwenezwo, vhathu a vho ngo tea u kuvhanganya masheleni, zwishumiswa zwa u thusa kana na ya fhethu he ha itea khombo nga nnḓa ha musi vho humbelwa uri vha ite nga u ralo.

Naho zwo ralo, musi ho itea khombo ri ṱoḓa u thusa. (Hev 13:​16) Vhahashu ri a vha funa! Ndi mini zwine ra nga ita? Tsha ndeme kha zwoṱhe ndi u rabelela vho welwaho nga khombo na vhane vha khou vha thusa. Ri nga ṋeela kha mushumo wa shango ḽoṱhe. Tshigwada Tshi Langaho tshi ṋea ofisi dza madavhi vhulivhisi, ngauri ndi one ane a ḓivha uri ndi ngafhi hune eneo masheleni a nga shumiswa zwavhuḓi. Arali ri tshi nga takalela u thusa ri nga ḓadza fomo ya Local Design/Construction Volunteer Application (DC-50).

ṰALELANI VIDIO INE YA RI: MIḒALO YO TSHINYADZA NGEI BRAZIL, NGA MURAHU NI FHINDULE MBUDZISO I TEVHELAHO

Ndi mini zwo ni takadzaho kha nḓila ye Ṱhanzi Dza Yehova vha phalala ngayo musi ho vha na muḓalo ngei Brazil nga 2020?