Lufuno lu tou nga guḽuu ine ya ita uri zwithu zwi ṱumane. Lu ita uri muṱa u vhe tshithu tshithihi. Zwi nga konḓa uri hu vhe na vhuthihi na u shumisana muṱani arali hu si na lufuno. Vhanna, vhafumakadzi na vhabebi vha nga sumbedza hani lufuno muṱani?

Munna u sumbedza uri u funa mufumakadzi wawe nga u dzhiela nṱha zwine mufumakadzi wawe a ṱoḓa, mahumbulele awe na nḓila ine a ḓipfa ngayo. (Ef 5:28, 29) U thusa vha muṱa wawe nga zwine vha shaya na u vha thusa uri vha sendele tsini na Yehova u katela na u dzula a tshi ita Vhurabeli Ha Muṱa ha nga madekwana. (1Ti 5:8) Mufumakadzi u sumbedza uri u funa munna wawe nga u ḓiṱukufhadza na nga u ‘ṱhonifha munna wawe nga maanḓa.’ (Ef 5:22, 33; 1Pe 3:1-6) Munna na mufumakadzi vha tea u ḓiimisela u hangwelana zwi tshi bva mbiluni. (Ef 4:32) Vhabebi vha sumbedza uri vha funa vhana vhavho nga u livhisa ṱhogomelo kha vhana vhoṱhe nga muthihi nga muthihi na nga u vha gudisa nga ha Yehova. (Dot 6:6, 7; Ef 6:4) Vha ḓivhudzisa uri, ṅwananga u khou sedzana na mini tshikoloni? U khou sedzana hani na mutsiko wa thangana dzawe? Musi hu na lufuno muṱani, muṅwe na muṅwe u ḓo ḓipfa o tsireledzea.

ṰALELANI VIDIO INE YA RI: BVELANI PHANḒA NI TSHI SUMBEDZA LUFUNO MUṰANI, NGA MURAHU NI FHINDULE MBUDZISO DZI TEVHELAHO:

• Munna u sumbedza hani uri u funa mufumakadzi wawe?

• Mufumakadzi u sumbedza hani uri u funa munna wawe?

• Vhabebi vha nga gudisa hani vhana vhavho Ipfi ḽa Mudzimu tshifhinga tshoṱhe?