Hu si kale Yehova u ḓo fhelisa ḽino shango. Vhurereli ha mazwifhi vhu ḓo fheliswa, tshaka dzo ṱanganelanaho dzi ḓo ṱhasela vhathu vha Mudzimu nahone Yehova u ḓo fhelisa vhavhi nga Haramagedo. Vhakriste vho lavhelela nga maṱo matswuku zwenezwi zwiitea zwa ndeme zwi takadzaho.

Ndi ngoho uri a ri ḓivhi zwidodombedzwa zwoṱhe nga ha maṱungu mahulu. Sa tsumbo, a ri ḓivhi tshifhinga tshine maṱungu mahulu a ḓo thoma ngatsho. A ri ḓivhi uri vharangaphanḓa vha poḽitiki vha ḓo ri ndi ngani vha tshi khou vutshela vhurereli. A ri ḓivhi uri tshaka dzi ḓo vutshela vhathu vha Yehova lwa tshifhinga tshingafhani kana uri zwi ḓo katela mini. A ri ḓivhi na uri Yehova u ḓo shumisa mini kokotolo u itela u fhelisa vhavhi nga Haramagedo.

Naho zwo ralo, Maṅwalo a ri ṋea zwoṱhe zwine ra zwi ṱoḓa u itela u vha na fhulufhelo na tshivhindi tsha u sedzana na zwine zwa ḓo itea tshifhingani tshi ḓaho. Sa tsumbo, ri a zwi ḓivha uri ri khou tshila magumoni a “maḓuvhani a vhufhelo.” (2Ti 3:1) Ri a zwi ḓivha uri u vutshelwa ha vhurereli ha mazwifhi hu “ḓo fhungudzwa” u itela uri vhurereli nga ngoho vhu si fheliswe. (Mat 24:22) Ri a zwi ḓivha uri Yehova u ḓo tshidza vhathu vhawe. (2Pe 2:9) Ri ḓivha na uri Muthu we Yehova a mu khetha uri a fhelise vhavhi na u ita uri gogo ḽihulu ḽi ponyoke Haramagedo o luga nahone u na maanḓa.—Nzu 19:11, 15, 16.

Zwine zwa ḓo itea tshifhingani tshi ḓaho, zwi ḓo ita uri ‘vhathu vha ṋoke nga nyofho.’ Naho zwo ralo, nga u vhala na u elekanya nga zwe Yehova a zwi ita u itela u tshidza vhathu vhawe na zwe a ri u ḓo zwi ita tshifhingani tshi ḓaho, ri nga kona u vha “na maanḓa na tshivhindi,” ri na vhungoho ha uri u vhofhololwa hashu hu tsini.—Luk 21:26, 28.