U TSHILA SA VHAKRISTE
Arali Na Ṱanganedzwa Nga Ṅwana
Arali ra ṱanganedzwa nga ṅwana, ri fanela u humbela uri a vhidze vhabebi vhawe. Zwenezwo zwi sumbedza u ṱhonifha muḓi. (Mir 6:20) Arali ṅwana a ri ri dzhene nḓuni, ri songo dzhena. Arali vhabebi vhawe vha siho, ri fanela u vhuya ḽiṅwe ḓuvha.
Naho ṅwana a tshi vhonala e muhulwane, fhedzi e miṅwahani ya vhufumi, ndi zwavhuḓi u humbela u amba na vhabebi vhawe. Arali vha siho, ri mu vhudzise arali vhabebi vhawe vha tshi nga mu tendela u vhala khandiso ine na khou ṱoḓa u mu siela yone. Arali vha tshi tenda, ni nga mu siela magazini nahone ni mu ṱalutshedze nga ha jw.org.
Musi ri tshi khou ita lwendo lwa u vhuyelela kha muswa we a sumbedza u vha na dzangalelo, ri fanela u thoma ra humbela u amba na vhabebi vhawe. Zwenezwo zwi ri ṋea tshibuli tsha u vha ṱalutshedza uri ndi ngani ro ḓa nahone ri nga kona u vha sumbedza mulaedza wavhuḓi u re Bivhilini une wa nga thusa miṱa. (Ps 119:86, 138) U ṱhonifha na u humbulela vhabebi zwi ḓo ri ṋea tshibuli tshavhuḓi tsha u ḓivhadza mafhungo maḓifha kha muṱa.—1Pe 2:12.