Nga tshenetshi tshifhinga tsha dziedzi ḽa Corona, Ṱhanzi Dza Yehova vha bvela phanḓa na u Bvisa Bivhili nga dziṅwe nyambo. Nga dzi 28 dza June 2020, ho bviswa Bivhili ya Ṱhalutshedzelo Ya Shango Ḽiswa Ya Maṅwalo Makhethwa nga nyambo nṋa, nga Tshiswati, Tshitsonga, Tshizulu na Chitonga. Ho dovha ha bviswa Bivhili ya Ṱhalutshedzelo Ya Shango Ḽiswa Ya Maṅwalo A Tshikriste A Tshigerika nga luambo lwa Belize Kriol na Totonac. Naho vhahashu vha songo kona u ṱangana nga nṱhani ha tshitzhili tsha Corona, vho vha vho takala vhukuma musi vha tshi wana dzenedzi Bivhili kha zwishumiswa zwa elekitroniki. Vhahashu vho ṱalela nyambo dzo tou rekhodiwaho nga videoconference kana video streaming musi hu tshi bviswa dzenedzi Bivhili.

Wahashu vho Geoffrey Jackson vhane vha vha muraḓo wa Tshigwada Tshi Langaho, vho bvisa Bivhili ntswa ya Ṱhalutshedzelo Ya Shango Ḽiswa Ya Maṅwalo Makhethwa nga Tshiswati na dzo tou vusuluswaho nga Tshitsonga na Tshizulu. Dzoṱhe dzi wanala kha zwishumiswa zwa elekitroniki. (sedzani tshinepe) Vhahashu vha Afrika Tshipembe na Swaziland vho ṱalela wonoyu muṱangano wo khetheaho.

Hu anganyelwa uri fhethu hune ha ṱhogomelwa nga davhi ḽa Afrika Tshipembe hu na vhathu vha 18.5 miḽioni vhane vha amba Tshiswati, Tshitsonga na Tshizulu, u katela na vhahuweleli vha fhiraho 38 000.

Wahashu vho Augustine Semo vhane vha vha Muraḓo Wa Komiti Ya Davhi ḽa Malawi, vho ḓivhadza u bviswa ha Bivhili yo fhelelaho ya Ṱhalutshedzelo Ya Shango Ḽiswa Ya Maṅwalo Makhethwa nga Chitonga (luambo lwa Malawi).

Vhahashu vha tshifumakadzini vhararu na vha tshinnani vhaṱanu vho shuma lwa miṅwaha i fhiraho mivhili u itela u ṱalutshedzela Bivhili nga Chitonga. Muṅwe wa vhaṱalutshedzeli o amba uri: “Hu na nyambo tharu dzine dza bva kha Chitonga. Vhathu vha amba nga nḓila yo fhambanaho na ya vhane vha dzula kha zwiṅwe zwipiḓa zwa shango. Ri lwela u shumisa maipfi ane a pfeseswa nga vhathu vhanzhi. Zwiṅwe hafhu, ri shumisa ṱhumetshedzo u itela u ṱalutshedza maipfi ane a vha a so ngo ḓowelea kha vhavhali.”

Muṅwe muṱalutshedzeli o ri: “Zwi ḓo lelutshela vhahuweleli u shumisa yeneyi Bivhili tsimuni kana vhuḓinḓani na miṱanganoni ngauri luambo lwo shumiswaho a lu konḓi nahone lu a pfala zwine zwa ita uri i leluwe u vhala na u pfesesa.”

Wahashu Vho Joshua Killgore, Muraḓo Wa Komiti Ya Davhi ḽa Central America, vho bvisa Bivhili ya Ṱhalutshedzelo Ya Shango Ḽiswa Ya Maṅwalo A Tshikriste A Tshigerika nga luambo lwa Belize Kriol. Vhathu vha fhiraho 1 300 vho ṱalela yeneyi mbekanyamushumo.

Vhahashu vha tshifumakadzini vhaṋa na vha tshinnani vhavhili vho fhedza mushumo wa u ṱalutshedzela nga miṅwedzi ya 16. U itela u sumbedza mbuyelo dza yeneyi Bivhili ntswa, muṅwe wavho o ri: “Khezwi, vhahashu vho guma vho wana ṱhalutshedzelo ya Bivhili i songo shandulwaho na ine vha nga i fhulufhela. I ḓo vha luvhone lune lwa ḓo ita uri vha pfesese.”

Muṅwe muṱalutshedzeli o amba uri: “Vhahashu vha ḓo kona u vhala Bivhili nga luambo lwavho nga tshenetshi tshifhinga tsha dziedzi ḽa Corona. Zwi ḓo vha thusa uri vha si vhilaele, vha dzike nahone vha kone u konḓelela na zwi ḓaho.”

Ngei Belize, hu na vhahuweleli vha 867 kha zwivhidzo zwa 19 zwa luambo lwa Belize Kriol. Vhaṅwe vhahuweleli vha shuma kha tsimu ya Belize Kriol ngei United States.

Wahashu vho Jesse Pérez, Muraḓo Wa Komiti Ya Davhi ḽa Central America vho bvisa Bivhili ya Ṱhalutshedzelo Ya Shango Ḽiswa Ya Maṅwalo A Tshikriste A Tshigerika nga luambo lwa Totonac. Hu anganyelwa uri ho ṱalela vhathu vha 2 200 vha re kha zwivhidzo zwa 50 zwa vhahashu vhane vha amba luambo lwa Totonac.

Vhahashu vha tshinnani vhavhili na wahashu wa tshifumakadzini, vho fhedza mushumo wa u ṱalutshedzela nga miṅwaha i fhiraho miraru. Yeneyi ṱhalutshedzelo i ḓo thusa vhathu vha 250 000 vhane vha amba luambo lwa Totonac ngei Mexico uri vha ḓivhe mafhungo maḓifha.

Muṅwe muṱalutshedzeli o amba uri: “Bivhili ya Ṱhalutshedzelo Ya Shango Ḽiswa Ya Maṅwalo A Tshikriste A Tshigerika yo fhambana na dziṅwe Bivhili dza Totonac ngauri i shumisa luambo lwa ḓuvha na ḓuvha. Zwi ḓo leluwa u ṱalutshedza zwine Bivhili ya funza kha vhane ra huwelela khavho.”

Muṅwe muṱalutshedzeli o engedza a ri: “Ndi kale vhahashu vho lindela Bivhili ine ya nga heyi. Vhahashu vho vha vha tshi vho ṱalutshedzela ndimana dza Bivhili nga luambo lwa Totonac dzi tshi bva kha Spanish, u itela u ita zwipiḓa zwavho kha muṱangano wa vhukati ha vhege. Fhedzi zwa zwino zwi nga si tsha ṱoḓea musi hu tshi shumiswa Maṅwalo a re kha Thestamennde Ntswa.”

Zwi takadzaho nga yeneyi Bivhili ndi uri i a ṱalutshedza maṅwe maipfi a songo ḓoweleaho. I ḓo takadza vhathu vhane vha amba luambo lwa Totonac ngauri kha ṱhaluso ri wana mabulazwithihi a bva ho kha dziṅwe nyambo dza Totonac.

Ri pembela na vhahashu vho wanaho Bivhili nga luambo lwavho lwa ḓamuni. A ri timatimi uri lutendo lwavho lu ḓo khwaṱha musi vha tshi shumisa “banga ḽa mutshea-hoṱhe” vhuḓinḓani na kha ngudo ya muthu nga eṱhe.—Vhahevheru 4:12.