Ee, nga nṱhani ha uri Mudzimu u ṱoḓa vhathu vha tshi kuvhangana u itela u rabela. Bivhili i ri: “Kha ri ṱhogomelane uri ri ṱuṱuwedzane lufunoni na kha mishumo mivhuya, ri songo litsha u kuvhangana nga tshashu.”​—Vhaheberu 10:24, 25.

 Yesu o sumbedza uri vhatevheli vhawe vho vha vha tshi ḓo vhumba tshigwada tsho dzudzanyeaho musi a tshi vha vhudza uri: “Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.” (Yohane 13:35) Vhafunziwa vha Kristo vho vha vha tshi ḓo kuvhangana na vhatendi ngavho i nḓila ya u sumbedza lwonolwu lufuno. Vho vha vha tshi ḓo kuvhangana sa zwivhidzo zwine zwa ṱangana misi yoṱhe u itela u rabela. (1 Vhakorinta 16:19) Vho vha vha tshi ḓo vha vharathu na vhakomana vha shango ḽoṱhe.​—1 Petro 2:17.

A zwo ngo eḓana u sokou vha muraḓo wa tshigwada tsha vhurereli

 Ngoho ndi ya uri Bivhili i amba uri vhathu vha fanela u kuvhangana u itela u rabela Mudzimu, fhedzi a i ambi uri muthu a nga takadza Mudzimu nga u sokou vha muraḓo wa tshigwada tsha vhurereli. U itela u takadza Mudzimu, honoho vhurereli vhu fanela u kwama vhutshilo hawe ha ḓuvha ḽiṅwe na ḽiṅwe. Sa tsumbo, Bivhili i ri: “Mufuda wa vhurabeli ho kunaho na vhu si na tshika u ya nga mavhonele a Mudzimu washu na Khotsi ndi hovhu: u ṱhogomela zwisiwana na dzitshilikadzi vhuṱunguni havho, na u dzula u si na tshika i bvaho kha ḽino shango.”—Yakobo 1:27.