Bivhilini, ipfi “ṱaḓulu” ḽo shumiselwa u ṱalula zwithu zwiraru: (1) fhethu hune ra hu vhona ro sedza makoleni; (2) fhethu hune zwivhumbiwa zwa dzula hone na (3) u ambela kha vhuimo ha nṱha kana u huliswa. Zwine zwa ḓo ri thusa u pfesesa zwine ipfi ṱaḓulu ḽa amba zwone ndi u sedza vhubvo ha mafhungo. a

1.   Fhethu hune ra hu vhona musi ro sedza nṱha. Zwenezwi zwi amba uri “ṱaḓulu” ndi hune ha vha na lutombo, hune muya wa vhudzula hone, hune zwiṋoni zwa fhufha hone, hune makole a kuvhangana uri mvula i ne na hune phenyo dza penya hone. (Phisalema 78:26; Mirero 30:19; Yesaya 55:10; Luka 17:24) Hu dovha ha ambela kha fhethu hune “ḓuvha, ṅwedzi na dziṋaledzi” zwa vha hone.​—Dotoronomio 4:19; Genesi 1:1.

2.   Fhethu hune zwivhumbiwa zwa muya zwa dzula hone. Ipfi “ṱaḓulu” ḽi dovha ḽa ambela kha fhethu hune zwivhumbiwa zwa muya zwine ri si kone u zwi vhona zwa dzula hone, hune ha vha nṱha vhukuma u fhira hune ra kona u hu vhona. (1 Dzikhosi 8:27; Yohane 6:38) Yehova Mudzimu u dzula henefho, ane Bivhili ya ri ndi “Muya” u katela na vharuṅwa vhe a vha sika. (Yohane 4:24; Mateo 24:36) Nga zwiṅwe zwifhinga, “ḽiṱaḓulu” ḽi ambela kha vharuṅwa vha fhulufhedzeaho, “tshivhidzo tsha vhakhethwa.”​—Phisalema 89:5-7.

    Bivhili i dovha ya shumisa ipfi “ḽiṱaḓulu” i tshi khou ambela kha fhethu hune Yehova a “dzula hone.” (1 Dzikhosi 8:43, 49; Vhahevheru 9:24; Nzumbululo 13:6) Sa tsumbo, Bivhili yo dzula yo amba uri Saṱhane na mademoni awe vho vha vha tshi ḓo poselwa fhasi u bva ṱaḓulu vha si tsha tendelwa u vha tsini na Yehova. Naho zwo ralo, vho vha vha tshi ḓo dzula vhe zwivhumbiwa zwa muya.​—Nzumbululo 12:7-9, 12.

3.   Vhuimo ha nṱha kana u huliswa. Maṅwalo a shumisa ipfi “ṱaḓulu” u itela u ambela kha vhuimo ha nṱha nahone kanzhi zwi tshimbidzana na maanḓa a u vhusa. Vhuimo ho raloho vhu nga vha ha:

   •   Yehova Mudzimu ene muṋe sa Ramaanḓaoṱhe.​—2 Koronika 32:20; Luka 15:21.

   •   Muvhuso wa Mudzimu une wa ḓo dzhiela vhudzulo mivhuso ya vhathu. Bivhili i ri wonoyo Muvhuso ndi “ḽiṱaḓulu ḽiswa.”​—Yesaya 65:17; 66:22; 2 Petro 3:13. b

   •   Vhakriste vhane musi vhe kha ḽifhasi vha vha na fhulufhelo ḽa u ya u tshila ṱaḓulu.​—Vhaefesa 2:6.

   •   Mivhuso ya vhathu ine ya kha ḓi vhusa na ṋamusi.​—Yesaya 14:12-14; Daniele 4:20-22; 2 Petro 3:7.

   •   Madimoni ane zwino a khou vhusa shango.​—Vhaefesa 6:12; 1 Yohane 5:19.

Ṱaḓulu hu hani?

 Zwivhumbiwa zwa muya zwo farekanea ngei ṱaḓulu. Hu na vharuṅwa vha dzimiḽioni “vhane vha ita zwine [Yehova] a amba.”​—Phisalema 103:20, 21; Daniele 7:10.

 Bivhili i amba uri ṱaḓulu ndi fhethu hu penyaho. (1 Timotheo 6:15, 16) Muporofita Hesekiele kha bono o vhona ṱaḓulu hu na “tshedza” ngeno muporofita Daniele o vhona “mulilo u tshi khou elela.” (Hesekiele 1:26-28; Daniele 7:9, 10) Ṱaḓulu ndi hukhethwa nahone ho naka.​—Phisalema 96:6; Yesaya 63:15; Nzumbululo 4:2, 3.

 Zwine Bivhili ya zwi amba nga ha ḽiṱaḓulu zwi a mangadza. (Hesekiele 43:2, 3) Naho zwo ralo, ri nga si kone u pfesesa ḽiṱaḓulu nga ho fhelelaho, samusi ri sa koni u vhona hune zwivhumbiwa zwa muya zwa dzula hone.