Hai, ḽifhasi ḽine ḽa vha pulanete yashu ḽi nga si vhuye ya fheliswa, u fhiswa nga mulilo kana ḽa dzhielwa vhudzulo. Bivhili i funza uri Mudzimu o sika ḽifhasi uri hu dzulwe khaḽo lwa tshoṱhe.

•   “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”​—Psalme ya 37:29.

•   “[Mudzimu o] fhaṱa ḽifhasi kha miteo yaḽo; a ḽi nga dzinginyei lini na lini.”​—Psalme ya 104:5.

•   “Shango ḽone ḽi dzula ḽi hone.”​—Muhuweleli 1:4.

•   “Muvhumbi wa ḽifhasi, a ḽi tika, ha ngo sika mahandana, o ḽi vhumba uri ḽi dzulwe nga vhathu.”​—Yesaya 45:18.

 Mudzimu a nga si tendele vhathu vha tshi bvelaphanḓa u tshinya ḽifhasi nga u tshikafhadza mupo, nga dzinndwa kana nga dziṅwe nḓila. Nṱhani hazwo, u ḓo “lozwa vha tshinyadzaho ḽifhasi.” (Nzumbululo 11:18) Izwo zwithu u ḓo zwi khunyeledza nga nḓila ḓe?

 Mudzimu u ḓo dzhiela vhudzulo mivhuso ya vhathu ine ya khou balelwa u tsireledza ḽifhasi, a ḓisa Muvhuso wawe wa ṱaḓulu une wa fhira yoṱhe. (Daniele 2:44; Mateo 6:9, 10) Yesu Kristo Murwa wa Mudzimu ndi ene ane a ḓo vha Khosi ya wonoyo Muvhuso. (Yesaya 9:6, 7) Musi e kha ḽifhasi, Yesu o sumbedza uri o vha e na maanḓa a u langa mupo. (Marko 4:35-41) Sa Khosi ya Muvhuso wa Mudzimu, Yesu u ḓo shumisa maanḓa awe u langa ḽifhasi na zwoṱhe zwi re kha ḽifhasi nga ho fhelelaho. U ḓo ita uri vhuimo kha ḽifhasi vhu dovhe vhu fane na ha tsimuni ya Edeni.​—Mateo 19:28; Luka 23:43

 Hai, a i funzi zwenezwo. Kanzhi enea mazwifhi a vha hone nga u sa pfesesa 2 Petro 3:7, ine ya ri: “Maṱaḓulu na ḽifhasi zwine zwa vha hone zwino zwo vhulungelwa mulilo.” Ṱhogomelani mbuno mbili dza ndeme dzine dza ḓo ri thusa u pfesesa zwine enea maipfi a amba zwone:

1.   Bivhili i shumisa maipfi “maṱaḓulu,” “ḽifhasi” na “mulilo” u ambela kha zwithu zwinzhi. Sa tsumbo, Genesi 11:1 i ri: “Shango ḽo vha ḽi na lulimi [kana luambo] luthihi.” Hafha, “shango” ḽi khou ambela kha vhathu.

2.   Mafhungo a re kha 2 Petro 3:7 a sumbedza zwine maṱaḓulu, ḽifhasi na mulilo zwa amba zwone. Ndimana 5 na 6 dzi amba zwi tshimbidzanaho na Maḓi Mahulu a misini ya Noaxe. Kha tshenetsho tshiitea, shango ḽa tshifhingani tsha kale ḽo fheliswa, fhedzi pulanete yashu ine ya vha ḽifhasi yo ḓi dzula i hone. Nṱhani hazwo, maḓi mahulu o fhelisa “shango” kana vhathu vho ḓalaho vhuvemu. (Genesi 6:11) O dovha a fhelisa na “maṱaḓulu”​—zwine zwa amba vhathu vhe vha vha vha tshi khou vhusa ḽeneḽo shango. Nga zwenezwo, pulanete a yo ngo fheliswa fhedzi ho fheliswa vhathu vhavhi. Noaxe na muṱa wawe vho ponyoka u fheliswa ha ḽeneḽo shango nahone vha dzula kha ḽeneḽi ḽifhasi musi Maḓi Mahulu o no fhela.​—Genesi 8:15-18.

 Zwi fanaho na tshifhingani tsha Maḓi Mahulu, u lozwiwa kana “mulilo,” zwo ambiwaho kha 2 Petro 3:7 zwi ambela kha u fheliswa ha shango ḽa vhathu vho ḓalaho vhuvhi hu si kha pulanete yashu ine ya vha ḽifhasi. Mudzimu o fhulufhedzisa “maṱaḓulu maswa na ḽifhasi ḽiswa” hune “u luga hu ḓo dzula khazwo.” (2 Petro 3:13) “Ḽifhasi ḽiswa,” kana vhathu vhaswa vhane vha ḓo dzula khaḽo, ḽi ḓo vhuswa nga “maṱaḓulu maswa,” kana Muvhuso muswa​—Muvhuso wa Mudzimu. Musi ḽi tshi khou vhuswa nga wonoyo Muvhuso, shango ḽi ḓo vha paradiso yo ḓalaho mulalo.​—Nzumbululo 21:1-4.