Hai. Bivhili a i ambi uri tshelede ndi mmbi kana uri ndi yone ine ya ita uri hu vhe na zwithu zwoṱhe zwivhi. Vhathu vhane vha ri “tshelede ndi mudzi wa zwithu zwoṱhe zwivhi” vha vha vha sa khou pfesesa zwine Bivhili ya amba nahone zwenezwi zwi ita uri vhathu vhanzhi vha xele. Bivhili i ri “mudzi wa zwithu zwoṱhe zwivhi ndi u funa tshelede”—1 Timotheo 6:10.

•  Bivhili i ri mini nga ha tshelede?

•  Ndi ngani Bivhili i tshi ri sevha nga ha u funa tshelede?

•  Ri nga vhuyelwa hani nga u shumisa zwine Bivhili ya amba nga ha tshelede?

•  Vese dzi ambaho nga ha tshelede

 Bivhili i bvisela khagala uri musi tshelede i tshi shumiswa zwavhuḓi, i nga ri vhuyedza vhukuma, i nga ita na u ri “tsireledza.” (Muhuweleli 7:12) Zwiṅwe hafhu, Bivhili i khoḓa vhane vha ṋea vhaṅwe nga mafunda, zwine zwa nga katela na u ṋea tshelede.—Mirero 11:25.

 Fhedzi Bivhili i dovha ya ri sevha uri ri songo livhisa ṱhogomela yashu kha u ṱoḓa tshelede. I ri: “Ni songo funa tshelede, fhedzi fusheani nga zwine na vha nazwo.” (Vhahevheru 13:5) Ngudo ndi ya uri ri shumise tshelede nga vhuṱali nahone ri si ṱoḓe u pfuma. Nṱhani hazwo ri fanela u fushea nga zwithu zwa ndeme zwi ngaho zwiḽiwa, zwiambari na vhudzulo.—1 Timotheo 6:8.

 Vhathu vhane vha vha na tseḓa a vha nga wani vhutshilo vhu sa fheli. (Vhaefesa 5:5) Tshiitisi tsha u thoma ndi uri u vha na tseḓa ndi muṅwe mufuda wa u gwadamela midzimu ya zwifanyiso kana vhurabeli ha mazwifhi. (Vhakolosa 3:5) Tshiṅwe tshiitisi ndi uri musi vhaṅwe vhathu vha tshi ṱoḓa u pfuma vha a thoma u tshila nga nḓila ine Mudzimu a sa i takalele. Mirero 28:20 i ri: ‘Ane a ṱoḓa u ṱavhanyedza u pfuma u ḓo vha na mulandu.’ Vhaṅwe vha lingea u ita vhuvemu vhu ngaho, u fhura, u tswa vhathu, u vha dzhiela nga khani kana u vha vhulaya.

 Naho u funa tshelede zwa sa ḓisa mikhwa i si yavhuḓi, fhedzi zwi nga ḓisa masiandoitwa a si avhuḓi. Bivhili i ri: “Vho ḓiimiselaho u pfuma vha wela mulingoni na tshikwekweni na nyemuloni nnzhi dza vhutsilu dzi huvhadzaho, zwine zwa ita uri vha fheliswe.”—1 Timotheo 6:9.

 Arali ra sa litsha u ita zwine Mudzimu a zwi funa ri tshi itela tshelede, u ḓo ri takalela na u ri tikedza. Vhane vha lingedza nga nḓila dzoṱhe u takadza Mudzimu, Mudzimu u vha fhulufhedzisa uri: “Ndi nga si vhuye nda u ṱutshela, ndi nga si vhuye nda u laṱa.” (Vhahevheru 13:5, 6) U dovha a ri fhulufhedzisa uri “ane a fhulufhedzea u ḓo wana phaṱhutshedzo nnzhi.”—Mirero 28:20.