“U amba nga ndimi” hu ambela kha maitele a vhuṱolo he vhaṅwe Vhakriste vha u thoma vha vha vhe naho nahone ha vha thusa u amba luṅwe luambo vha songo thoma vha lu guda. (Mishumo 10:46) Ane a khou amba o vha a tshi ṱavhanya a pfeseswa nga vhane vha ḓivha lwonolo luambo. (Mishumo 2:​4-8) U amba nga ndimi ho vha hu tshiṅwe tsha zwifhiwa zwa muya mukhethwa zwe Mudzimu a zwi ṋea vhaṅwe Vhakriste vha ḓanani ḽa u thoma.​—Vhaheberu 2:4; 1 Vhakorinta 12:​4, 30.

•  U amba nga ndimi ho thoma lini nahone gai?

•  Tshiitisi tsha u amba nga ndimi tsho vha tshi tshifhio?

•  Naa u amba nga ndimi zwo vha zwi tshi ḓo bvela phanḓa lwa tshoṱhe?

•  U amba nga ndimi zwo guma lini?

•  Hu pfi mini nga ha u amba nga ndimi ṋamusi?

•  Vhakriste vha ngoho vha nga ṱaluswa hani ṋamusi?

 Hovhu vhuṱolo ho thoma u itea Yerusalema nga matsheloni a Vhuṱambo ha Vhayuda nga Pentekoste ya 33 C.E. Vhafunziwa vha Yesu vha ṱoḓaho u vha 120 vho vha vho ṱangana musi vha tshi “ḓadzwa nga muya mukhethwa nahone vha thoma u amba nga nyambo dzo fhambanaho.” (Mishumo 1:​15; 2:​1-4) Tshigwada tshihulu tsha vhathu tshi “bvaho mashangoni” tsho kuvhangana nahone “muṅwe na muṅwe o vha a tshi khou pfa hu tshi ambiwa luambo lwawe.”​—Mishumo 2:5, 6.

1.   U sumbedza uri Mudzimu o vha e na Vhakriste. Tshifhingani tsho fhiraho, Mudzimu o ita tswayo dza vhuṱolo u itela u sumbedza uri o vha e na vhathu vha fulufhedzeaho sa Mushe. (Ekisodo 4:​1-9, 29-​31; Numeri 17:10) U amba nga ndimi zwo vha zwi tshiitisi tshi fanaho, tshi sumbedzaho uri Mudzimu o vha e na tshivhidzo tshiswa tsho thomiwaho tsha Vhakriste. Muapostola Paulo o ṅwala u ri: “Ndimi a si tshiga tsha vha tendaho, fhedzi ndi tsha vha sa tendi.”​—1 Vhakorinta 14:22.

2.   U itela uri Vhakriste vha ṱanziele nga hu bvelelaho. Vhe vha pfa vhatevheli vha Yesu nga ḓuvha ḽa Pentekoste vho ri: “Ri vha pfa vha tshi khou amba nga ha mishumo ya maanḓa ya Mudzimu.” (Mishumo 2:​11) Nga zwenezwo, tshiṅwe tshiitisi tsha ndeme tsha honovhu vhuṱolo ho vha hu u itela uri Vhakriste vha “ṱanziele nga vhuḓalo” nahone vha “ite vhathu vha tshaka dzoṱhe vhafunziwa,” samusi vho laedzwa nga Yesu. (Mishumo 10:42; Mateo 28:19) Kha vhathu vha ṱoḓaho u vha 3 000 vhe vha tshenzhela vhuṱolo nahone vha thetshelesa pfunzo ye ya ṋewa vho vha vhafunziwa nga ḽeneḽo ḓuvha.​—Mishumo 2:​41.

 Hai. Tshifhiwa tsha muya mukhethwa, u katela na tsha u amba nga ndimi, tsho vha tshi ndugiselelo ya tshifhinganyana. Bivhili yo dzula yo amba u ri: “Arali hu zwifhiwa zwa u porofita, zwi ḓo fhela; arali hu ndimi dzi ḓo fhumula; arali hu nḓivho, i ḓo fheliswa.”​—1 Vhakorinta 13:8.

 Tshifhiwa tsha muya mukhethwa tsho vha tshi tshi fhiriselwa kha vhaṅwe Vhakriste musi huna vhaṅwe vhaapostola, kanzhi zwo vha zwi tshi itwa nga vhaapostola vha tshi vhea zwanḓa zwavho kha ṱhoho ya mutendi ngavho. (Mishumo 8:18; 10:44-​46) Zwi vhonala u nga vhe vha ṋewa tshifhiwa tsha muya nga vhaapostola a vho ngo tshi fhirisela kha vhaṅwe. (Mishumo 8:5-7, 14-​17) U itela u fanyisa, mushumeli wa muvhuso a nga itela muṅwe muthu ṱhanziela ya u reila, fhedzi onoyo muthu ho ngo ṋewa maanḓa a mulayo a uri a itele muṅwe muthu yeneyo ṱhanziela. Nga zwenezwo, u amba nga ndimi zwo guma musi vhaapostola na vhe vha ṋewa tshifhiwa vha tshi fa.

 Vhuṱolo ha tshifhiwa tsha u amba nga ndimi vhu sumbedza uri ho guma mafheleloni a ḓanani ḽa u thoma C.E. A hu na muthu na muthihi ṋamusi ane a nga ri u amba nga ndimi nga maanḓa a Mudzimu. a

 Yesu o ri lufuno lwa u ḓifunela lu ḓo ṱalula vhafunziwa vhawe. (Yohane 13:34, 35) Nga hu fanaho, muapostola Paulo o gudisa uri lufuno lu ḓo ṱalula Vhakriste vha ngoho lwa tshoṱhe. (1 Vhakorinta 13:​1, 8) O sumbedza uri muya wa Mudzimu u ḓo bveledza pfaneleo kha Vhakriste dzine dza vha “zwiaṋwiwa nga muya,” pfaneleo ya u thoma ine ya vha lufuno.​—Vhagalata 5:​22, 23.