Ee, i nga ni thusa. Bivhili i bva kha “Mudzimu ane a khuthadza vho tsikeledzeaho.” (2 Vhakorinta 7:6) Naho Bivhili i si bugu ya zwa ngalafho, yo no thusa vhathu vhanzhi vhe vha vha vha tshi khou humbula u ḓivhulaya. Na inwi i nga ni thusa.

•  Bivhili i ri ṋea nyeletshedzo dzifhio?

•  Naa Bivhili i a amba nga ha vhathu vhe vha vha vha tshi khou ṱoḓa u fa?

•  Ndi maṅwalo afhio a bvaho Bivhili ane a nga ni thusa arali ni tshi khou humbula u ḓivhulaya?

•  Ni nga ita mini arali khonani yaṋu ya ni vhudza uri, “A thi tsha ṱoḓa u tshila?”

•  Ndi nga thuswa nga mini arali ndo no vhuya nda lingedza u ḓivhulaya?

• ● Vhudzani vhaṅwe nḓila ine na khou ḓipfa ngayo.

   Zwine Bivhili ya amba: “Khonani ya vhukuma i sumbedza lufuno tshifhinga tshoṱhe, ndi ṅwana wa mme au ane wa nga ḓitika ngae musi wa khombo.”—Mirero 17:17.

   Zwine zwa amba zwone: Ri ṱoḓa u thuswa nga vhaṅwe musi ri tshi khou ḓipfa ro tsikeledzea.

   U sa vhudza vhaṅwe nḓila ine na khou ḓipfa ngayo, zwi nga ni tsikeledza. Fhedzi u vhudza vhaṅwe nḓila ine na khou ḓipfa ngayo, zwi nga ita uri ni ḓipfe ni khwine na uri ni vhe na mavhonele avhuḓi nga ha nyimele yaṋu.

   Lingedzani hezwi: Ambani na muṅwe muthu ṋamusi, khamusi muṅwe wa muraḓo wa muṱa wa haṋu kana khonani ine na i fhulufhela. a Zwiṅwe hafhu, ni nga kha ḓi ṅwala fhasi nḓila ine na khou ḓipfa ngayo.

• ● Ṱoḓani thuso.

   Zwine Bivhili ya amba: “Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho.”—Mateo 9:12.

   Zwine zwa amba zwone: Ri tea u ṱoḓa thuso kha madokotela musi ri tshi khou lwala.

   U humbula nga ha u ḓivhulaya, zwi nga sumbedza uri ni khou thoma u vha na vhulwadze ha muhumbulo kana vhulwadze ha u tsikeledzea. A no ngo tea u shona, hovhu vhulwadze vhu fana na maṅwe malwadze ane a vha hone. Vhulwadze ha u tsikeledzea na ha muhumbulo vhu na ngalafho.

   Lingedzani hezwi: Ṱoḓani thuso kha dokotela nga u bonya ha iṱo.

• ● Ni dzule ni tshi humbula uri Mudzimu u a ni funa.

   Zwine Bivhili ya amba: “Naa zwiṋoni zwiṱuku zwiṱanu a zwi rengwi nga mapeni mavhili? Naho zwo ralo, a hu na na tshithihi tshazwo tshine Mudzimu a tshi hangwa. . . . Ni songo ofha; ni vha ndeme vhukuma u fhira zwiṋoni zwiṱuku zwinzhi.”—Luka 12:6, 7.

   Zwine zwa amba zwone: Ni wa ndeme kha Mudzimu.

   Ni nga ḓipfa ni noṱhe, fhedzi Mudzimu u a vhona na u pfesesa zwine na khou sedzana nazwo. U na ndavha na inwi, naho ni tshi khou ḓipfa ni si tsha ṱoḓa u tshila. Phisalema 51:17 i ri: “Iwe Mudzimu, mbilu yo kwashekanaho na yo vunḓekanaho u nga si i laṱe.” Mudzimu u khou ṱoḓa uri ni bvele phanḓa na u tshila ngauri u a ni funa.

   Lingedzani hezwi: Gudani Bivhilini nga ha zwithu zwi sumbedzaho uri Mudzimu u a ni funa. Sa tsumbo, sedzani ndima 24 ya bugu Sendelani Tsini Na Yehova.

• ● Rabelani

   Zwine Bivhili ya amba: “Ni mu kumedzele mbilaelo dzaṋu dzoṱhe, ngauri u na ndavha na inwi.”—1 Petro 5:7.

   Zwine zwa amba zwone: Mudzimu u ṱoḓa ni tshi mu tevhulela zwoṱhe zwine zwa vha mbiluni yaṋu, nḓila ine na khou ḓipfa ngayo na zwine zwa khou ni vhilaedzisa.

   Mudzimu a nga ni ṋea mulalo na nungo dza uri ni kone u bvela phanḓa na u konḓelela. (Vhafilipi 4:6, 7, 13) Yeneyi ndi nḓila ine a thusa ngayo vhane vha humbela thuso khae nga thabelo zwi tshi bva mbiluni.—Phisalema 55:22.

   Lingedzani hezwi: Ambani na Mudzimu nga thabelo ṋamusi, ni mu vhidze nga dzina ḽawe ḽine ḽa vha Yehova nahone ni mu vhudze nḓila ine na khou ḓipfa ngayo. (Phisalema 83:18) Mu humbeleni uri a ni thuse uri ni kone u bvela phanḓa na vhutshilo.

• ● Elekanyani nga ha mafhulufhedziso a re Bivhilini nga ha vhumatshelo.

   Zwine Bivhili ya amba: “Zwine ra zwi fhulufhela ndi thikho ya vhutshilo hashu, zwi ḓo itea, zwo khwaṱhisedzwa.”—Vhahevheru 6:19.

   Zwine zwa amba zwone: Ni nga ḓipfa ni tshi nga ni khou iswa nṱha na fhasi u fana na tshikepe musi hu na ḓumbu, fhedzi fhulufhelo ḽine Mudzimu a ni ṋea ḽone ḽi nga ita uri ni ime no khwaṱha.

   Ḽeneḽi fhulufhelo a si muḽoro, ndi tshiṅwe tsha zwithu zwe Mudzimu a zwi fhulufhedzisa musi a tshi ri u ḓo fhelisa vhuṱungu hashu.—Nzumbululo 21:4.

   Lingedzani hezwi: Gudani nga ha zwithu zwe Mudzimu a zwi fhulufhedzisa kha ngudo 5 ya bugwana Mafhungo Maḓifha A Bvaho Ha Mudzimu!

• ● Itani zwithu zwine zwa ni takadza.

   Zwine Bivhili ya amba: “Mbilu yo takalaho ndi mushonga wavhuḓi.”—Mirero 17:22.

   Zwine zwa amba zwone: Musi ri tshi ita zwithu zwine zwa ri takadza ri nga vha na mutakalo wavhuḓi.

   Lingedzani hezwi: Itani tshiṅwe tshithu tshine kanzhi na ḓiphiṋa nga u tshi ita. Sa tsumbo, ni nga thetshelesa muzika u nyanyulaho, u vhala zwithu zwi ṱuṱuwedzaho kana ni nga ita zwithu zwine na zwi kona zwine zwa ni takadza. Ni nga dovha na takala vhukuma arali na ita zwiṅwe zwithu zwine zwa thusa vhaṅwe naho hu zwithu zwiṱuku.—Mishumo 20:35.

• ● Ṱhogomelani mutakalo waṋu.

   Zwine Bivhili ya amba: ‘Nyonyoloso i a vhuyedza.’—1 Timotheo 4:8.

   Zwine zwa amba zwone: Ri a vhuyelwa musi ri tshi ita nyonyoloso, u eḓela lwo linganelaho na u ḽa zwiḽiwa zwi re na pfushi.

   Lingedzani hezwi: Iyani u tshimbila nnḓa ni rwiwe nga muya naho hu lwa mimunithi ya 15 fhedzi.

• ● Humbulani uri nḓila ine na ḓipfa ngayo na zwiṅwe zwithu vhutshiloni zwi a shanduka.

   Zwine Bivhili ya amba: ‘A ni ḓivhi uri hu ḓo itea mini kha inwi matshelo.’—Yakobo 4:14.

   Zwine zwa amba zwone: Zwithu zwi tsikeledzaho zwi nga vha zwi zwa tshifhinga-nyana naho zwi tshi vhonala u nga zwi nga si shanduke.

   Naho ni tshi khou ḓipfa ni tshi nga no tangwa nga ḓuvha na mulilo, zwithu zwi nga shanduka. Ngauralo, ṱoḓani nḓila dza u sedzana na vhuimo haṋu. (2 Vhakorinta 4:8) Vhuimo haṋu vhu nga shanduka, fhedzi arali na ḓivhulaya a hu na u humela murahu.

   Lingedzani hezwi: Vhalani Bivhilini nga ha vhathu vhe vha ḓipfa vho tsikeledzea vhukuma, vha humbula uri ndi khwiṋe vho fa, ni vhone uri vhutshilo hafho ho shanduka hani ha vha khwine nga nḓila ye vha vha vha songo vhuya vha i lavhelela. Ṱhogomelani dziṅwe tsumbo.

 Ee. Bivhili i ri vhudza nga ha vhathu vhe vha amba nga ho livhaho uri vha khou ṱoḓa u fa. Mudzimu ho ngo vha sinyutshela, fhedzi o vha thusa. Na inwi a nga ni itela zwi fanaho.

Elia

•  ● O vha e nnyi? O vha e muporofita ane a vha na tshivhindi. Fhedzi na ene o ḓipfa o tsikeledzea nga zwiṅwe zwifhinga. Yakobo 5:17 i ri: “Elia o vha e muthu u fana na riṋe.”

•  ● Ndi ngani o vha a tshi khou ṱoḓa u fa? Hu na tshifhinga tshee Elia a ḓipfa e eṱhe, o tshuwa nahone a tshi ḓipfa e si wa ndeme. Nga zwenezwo a mbo ḓi humbela Yehova uri: “Dzhia vhutshilo hanga.”—1 Dzikhosi 19:4.

•  ● Ndi mini zwo mu thusaho? Elia o tevhulela Yehova zwi re mbiluni yawe. Mudzimu o mu ṱuṱuwedza hani? Mudzimu o mu sumbedza uri u na ndavha nae na uri u na maanḓa vhukuma. O dovha a mu khwaṱhisedza uri u kha ḓi vha na mushumo, a mu ṋea muthu ane a ḓo mu thusa.

•  ▸ Vhalani nga ha Elia: 1 Dzikhosi 19:2-18.

Yobo

•  ● O vha e nnyi? Yobo o vha e munna wa tshigwili ane a vha na muṱa muhulwane nahone o vha a tshi gwadamela Mudzimu wa ngoho.

•  ● Ndi ngani o vha a tshi khou ṱoḓa u fa? Vhutshilo ha Yobo ho mbo ḓi shanduka nga u bonya ha iṱo. O xelelwa nga zwithu zwoṱhe zwe a vha e nazwo. Vhana vhawe vho welwa nga khombo vha lovha. A farwa nga vhulwadze vhu tsikeledzaho. Mafheleloni a farwa nga nḓila i si yavhuḓi, a pomokwa zwi songo tea ha pfi o tou ḓivhangela makhaula mbilu e a mu wela. Yobo a ri: “Ndi nengwa vhutshilo hanga; a thi tsha ṱoḓa u tshila.”—Yobo 7:16.

•  ● Ndi mini zwo mu thusaho? Yobo o amba na Mudzimu nga thabelo a dovha a amba na vhaṅwe vhathu. (Yobo 10:1-3) O dovha a thuswa nga khonani yawe Elihu, we a sumbedza u mu pfela vhuṱungu a ita uri a vhone thaidzo ine a khou sedzana nayo nga nḓila yavhuḓi. Zwa ndeme vhukuma ndi uri Yobo o tenda u thuswa nga Yehova.

•  ▸ Vhalani nga ha Yobo: Yobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mushe

•  ● O vha e nnyi? Mushe o vha e murangaphanḓa wa Isiraele na muporofita a fhulufhedzeaho.

•  ● Ndi ngani o vha a tshi khou ṱoḓa u fa? Mushe o vha e na mushumo munzhi we a vha a tshi tea u u ita, o vha a tshi dzulela u goḓiwa nahone o ḓipfa o neta. Nga zwenezwo o mbo ḓi lilela Mudzimu a ri: “Ndi humbela uri u mmbulaye.”—Numeri 11:11, 15.

•  ● Ndi mini zwo mu thusaho? Mushe o vhudza Mudzimu nḓila ine a khou ḓipfa ngayo. Mudzimu o mu thusa nga u mu fhungudzela mushumo, zwa ita uri a si tsha tsikeledzea.

•  ▸ Vhalani nga ha Mushe: Numeri 11:4-6, 10-17.