Vharuṅwa Ndi Mini Kana Ndi Vhonnyi?
Bivhili i a fhindula
Vharuṅwa ndi zwivhumbiwa zwi re na maanḓa u fhira vhathu. (2 Petro 2:11) Vharuṅwa vha dzula ṱaḓulu, hune ha vha fhethu ha vhutshilo vhu fhiraho ha fhethu hoṱhe. (1 Dzikhosi 8:27; Yohane 6:38) Nga zwenezwo, vha vhidzwa zwivhumbwa zwa muya.—1 Dzikhosi 22:21; Psalme ya 18:10.
Vharuṅwa vha bva ngafhi?
Mudzimu o shumisa Yesu u itela u sika vharuṅwa, ane Bivhilini a vhidzwa “tanzhe ḽa zwivhumbwa zwoṱhe.” Bivhili i tshi ṱalusa nḓila ye Mudzimu a shumisa ngayo Yesu kha u sika i ri: “Ho shumiswa ene [Yesu] uri zwiṅwe zwithu zwoṱhe zwi sikwe ngei ṱaḓulu na kha ḽifhasi, zwithu zwi vhonalaho na zwi sa vhonali,” u katela na vharuṅwa. (Vhakolosa 1:13-17) Vharuṅwa a vha vhingi kana u vha na vhana. (Marko 12:25) Nṱhani hazwo, muṅwe na muṅwe wa vhenevha “vharwa vha Mudzimu” o sikwa e eṱhe.—Yobo 1:6.
Vharuṅwa vho sikwa kale, hu sa athu u na u sikwa ḽifhasi. Musi Mudzimu a tshi sika ḽifhasi, vharuṅwa vho thoma u “huwelela nga dakalo.”—Yobo 38:4-7, NW.
Hu na vharuṅwa vhangana?
Bivhili a i ṋei tshivhalo tshavho kokotolo, fhedzi i sumbedza uri ndi vhanzhi vhukuma. Sa tsumbo, bono ḽa muapostola Yohane ḽo sumbedza vharuṅwa vha maḓana a dzimilioni.—Nzumbululo 5:11.
Naa vharuṅwa vha na madzina na vhumuthu ho fhamba-fhambanaho?
Ee. Bivhili i amba nga madzina a vharuṅwa vhavhili: Mikaele na Gabriele. (Daniele 12:1; Luka 1:26) a Vhaṅwe vharuṅwa vho tenda uri vha na madzina, fhedzi a vho ngo a bula.—Genesi 32:29; Vhahaṱuli 13:17, 18.
Vharuṅwa vha na vhumuthu ho fhamba-fhambanaho. Vha a kona u ambedzana nga tshavho. (1 Vhakorinta 13:1) Vha a kona u shumisa maanḓa avho a u humbula nahone u imba nyimbo dza u renda Mudzimu. (Luka 2:13, 14) Vha dovha vha vha na mbofholowo ya u ḓikhethela zwo lugaho na zwi songo lugaho, samusi ri tshi zwi vhona musi vhaṅwe vha tshi tevhela Sathane Diabolo kha u shandukela Mudzimu.—Mateo 25:41; 2 Petro 2:4.
Naa vharuṅwa vha na vhuimo ho fhamba-fhambanaho?
Ee. Muruṅwa a re na maanḓa na vhuimo ha nṱha u fhira vhaṅwe vharuṅwa ndi Mikaele, muruṅwa muhulu. (Yuda 9; Nzumbululo 12:7) Vhaserafe vha na vhuimo ha nṱha, vha dzula tsini na khuluṋoni ya Yehova. (Yesaya 6:2, 6) Vhakerube navho vha na vhuimo ha nṱha, vha na mishumo yo khetheaho. Sa tsumbo, vhakerube vho linda tsimuni ya Edeni musi Adamu na Eva vho pandelwa.—Genesi 3:23, 24.
Naa vharuṅwa vha a thusa vhathu?
Ee, Mudzimu u shumisa vharuṅwa vhawe vha fulufhedzeaho u thusa vhathu ṋamusi.
Mudzimu u shumisa vharuṅwa u itela u livhisa vhashumeli vhawe kha u huwelela mafhungo maḓifha a Muvhuso wawe. (Nzumbululo 14:6, 7) Honohu vhulivhisi vhu vhuyedza vhane vha huwelela na vhane ha huwelelwa khavho.—Mishumo 8:26, 27.
Vharuṅwa vha thusa kha u ita uri tshivhidzo tsha Vhukriste tshi si tshikafhadzwe nga vhathu vhavhi.—Mateo 13:49.
Vharuṅwa vha livhisa na u tsireledza vhane vha fulufhedzea kha Mudzimu.—Psalme ya 34:7; 91:10, 11; Vhaheberu 1:7, 14.
Hu si kale, vharuṅwa vha tshi shumisana na Yesu vha ḓo vhofholola vhathu vha nga u fhelisa vhuvhi.—2 Vhathesalonika 1:6-8.
Naa muṅwe na muṅwe washu u na muruṅwa wawe ane a mu tsireledza?
Naho vharuṅwa vha tshi ṱhogomela vhashumeli vha Mudzimu nga lwa muya, a zwi ambi uri Mudzimu o ita uri Mukriste muṅwe na muṅwe a vha na muruṅwa wawe ane a mu linda. b (Mateo 18:10) Vharuṅwa a vha tsireledzi vhashumeli vha Mudzimu kha mulingo muṅwe na muṅwe. Bivhili i sumbedza uri kanzhi Mudzimu u ḓo ni “vulela nḓila” kha mulingo nga u ṋea muthu vhuṱali na maanḓa zwa u mu thusa u konḓelela.—1 Vhakorinta 10:12, 13; Yakobo 1:2-5.
Mazwifhi nga ha vharuṅwa
Mazwifhi: Vharuṅwa vhoṱhe ndi vhavhuya.
Ngoho: Bivhili i amba nga ha “mimuya mivhi” na “vharuṅwa vhe vha tshinya.” (Vhaefesa 6:12; 2 Petro 2:4) Vhenevha vharuṅwa vhavhi ndi madimoni, vhe vha tevhela Sathane kha u shandukela Mudzimu.
Mazwifhi: Vharuṅwa a vha fi.
Ngoho: Vharuṅwa vhavhi, u katela na Sathane Diabolo vha ḓo fheliswa.—Yuda 6.
Mazwifhi: Vhathu vha vha vharuṅwa musi vha tshi fa.
Ngoho: Vharuṅwa ndi zwivhumbwa zwo fhambanaho zwa Mudzimu, a si vhathu vho vuswaho. (Vhakolosa 1:16) Vhathu vhane vha vuselwa u tshila ṱaḓulu vha wana tshifhiwa tshi bvaho ha Mudzimu tsha u sa. (1 Vhakorinta 15:53, 54) Vha ḓo vha na vhuimo ha nṱha u fhira na ha vharuṅwa.—1 Vhakorinta 6:3.
Mazwifhi: Vharuṅwa vho sikelwa u shumela vhathu.
Ngoho: Vharuṅwa vha pfa milayo ya Mudzimu, hu si yashu. (Psalme ya 103:20, 21) Yesu o amba uri u ḓo humbela thuso kha Mudzimu, hu si kha vharuṅwa.—Mateo 26:53.
Mazwifhi: Ri nga rabela vharuṅwa uri vha ri thuse.
Ngoho: Thabelo ndi tshipiḓa tsha vhurabeli hashu kha Mudzimu, ho fanelaho Yehova Mudzimu. (Nzumbululo 19:10) Ri fanela u rabela Yehova Mudzimu fhedzi nga Yesu.—Yohane 14:6.
a Dziṅwe ṱhalutshedzelo dza Bivhili dzi shumisa dzina “Lucifer” kha Yesaya 14:12, ḽine vhaṅwe vhathu vha ḽi dzhia hu dzina ḽa muṅwe muruṅwa, we nga murahu a vha Sathane Diabolo. Naho zwo ralo, ipfi ḽa u thoma ḽa Luheberu kha lwonolu luṅwalo ḽi amba ‘ṋaledzi i penyaho’. Mafhungo a sumbedza uri a hu khou ambiwa nga ha Sathane, fhedzi hu khou ambiwa nga ha muḓi wa Babele, we Mudzimu a vha a tshi ḓo u shonisa ngauri a vha thetshelesi. (Yesaya 14:4, 13-20) Mubulo ‘ṋaledzi i penyaho’ wo ambelwa kha muḓi wa Babele vha tshi khou u holedza nga murahu ha musi wo kundwa.
b Vhaṅwe vha dzhia u nga Petro o vhe e na muruṅwa wawe wa u mu tsireledza nga nṱhani ha mafhungo awe a musi a tshi bviswa dzhele. (Mishumo 12:6-16) Naho zwo ralo, musi vhafunziwa vha tshi amba nga ha “muruṅwa [wa Petro],” vha nga vha vha tshi khou humbula u nga ho ḓa muruṅwa ane a imela Petro, nṱhani ha Petro nga dzawe, e avha e mahumbulele o khakheaho.
You May Also Like
MBUDZISO DZA BIVHILI DZO FHINDULWA
Mikaele Muhulwane Wa Vharuṅwa Ndi Nnyi?
U dovha a ḓivhiwa nga ḽiṅwe dzina, ḽine khamusi no ḽi ḓowela.
TSHIINGAMO
Naa Ni Na Muruṅwa Ane A Ni Linda?
Naa ni humbula u nga muruṅwa kana vharuṅwa vha nga ni tsireledza?
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.