Kanzhi Bivhilini Yesu u vhidzwa “Murwa wa Mudzimu.” (Yohane 1:49) Maipfi ane a ri “Murwa wa Mudzimu” a sumbedza uri Mudzimu ndi Musiki kana Tshisima tsha vhutshilo ha zwoṱhe, u katela na ene Yesu. (Phisalema 36:9; Nzumbululo 4:11) Bivhili a i funzi uri Mudzimu o beba ṅwana nga nḓila ine vhathu vha beba ngayo vhana.

 Bivhili i amba uri na vharuṅwa ndi “vharwa vha Mudzimu.” (Yobo 1:6) Zwiṅwe hafhu, Bivhili i amba uri Adamu ane a vha muthu wa u thoma, o vha e “murwa wa Mudzimu.” (Luka 3:38) Naho zwo ralo, Bivhili i amba uri Yesu ndi ene Murwa muhulwane wa Mudzimu. Zwenezwo ndi ngauri ndi ene wa u thoma u sikwa nga Mudzimu na we a sikwa ngae nga ho livhaho.

•  Yesu o vha a tshi tshila ṱaḓulu musi a sa athu bebwa kha ḽifhasi?

•  Yesu o vha a tshi ita mini musi a sa athu ḓa kha ḽifhasi?

 Ee, Yesu o vha e tshivhumbiwa tsha muya ngei ṱaḓulu musi a sa athu bebwa kha ḽifhasi. Yesu o amba uri: “Ndo ḓa ndi tshi bva ṱaḓulu.”—Yohane 6:38; 8:23.

 Mudzimu o sika Yesu a sa athu sika zwiṅwe zwithu. Bivhili i amba zwi tevhelaho nga ha Yesu:

•   ‘Ndi ene tanzhe ḽa zwoṱhe zwo sikwaho.’—Vhakolosa 1:15.

•   Ndi ene “wa u thoma u sikwa nga Mudzimu.”—Nzumbululo 3:14.

 Zwe zwa porofitiwa nga ha ane “a vha wa kale-kale, u bva zwifhingani zwa kale” zwo itea kha Yesu.—Mika 5:2; Mateo 2:4-6.

 O vha e na vhuimo ha nṱha ngei ṱaḓulu. Yesu o amba nga ha honovhu vhuimo musi a tshi rabela a ri: “Khotsi, nkhulise u fana na zwiḽa ndi tsini hau musi shango ḽi sa athu u vha hone.”—Yohane 17:5.

 O thusa Khotsi awe kha u sika zwiṅwe zwithu zwoṱhe. Yesu o shuma tsini na Mudzimu “sa mushumi a re na vhutsila.” (Mirero 8:30) Bivhili i amba zwi tevhelaho nga ha Yesu, i ri: “Ho shumiswa ene u sika zwoṱhe zwi re ṱaḓulu na kha ḽifhasi.”—Vhakolosa 1:16.

 Mudzimu o sika zwiṅwe zwoṱhe a tshi shumisa Yesu. Zwenezwi zwi katela u sikwa ha vharuṅwa na fhethu hoṱhe. (Nzumbululo 5:11) Nḓila ye Yesu na Mudzimu vha shumisana ngayo i nga fanyiswa na nḓila ine muoli wa dzipulane a shumisana ngayo na mufhaṱi. Muoli u ita pulane nahone mufhaṱi a fhaṱa zwo oliwaho.

 O vha e Ipfi. Bivhili i amba uri Yesu o vha e “Ipfi” musi a sa athu ḓa kha ḽifhasi. (Yohane 1:1) Zwenezwi zwi sumbedza uri Mudzimu o vha a tshi ruma Murwa wawe uri a vhudze zwiṅwe zwivhumbiwa zwa muya mafhungo na vhulivhisi.

 Zwi vhonala u nga Mudzimu o vha a tshi shumisa Yesu uri a mu ambele na vhathu. Khamusi Mudzimu o shumisa Yesu samusi o vha e Ipfi, uri a mu ambele na Adamu na Eva ngei tsimuni ya Edeni. (Genesi 2:16, 17) Muruṅwa we a livhisa Vhaisiraele vha tshifhingani tsha kale musi vha tshi pfukekanya sogani hu nga vha hu Yesu nahone khamusi ndi ene we Vhaisiraele vha vha vha tshi tea u mu thetshelesa.—Ekisoda 23:20-23. a