Parché che ne piase tanto i congressi? Compagno le festività de Israel, i congressi i ne dà la oportunità de adorar a Geovà insieme de tanti, dele volte miliari de fradei. Anca, queste le ze oportunità de star insieme dei nostri amighi e dela nostra fameia. Noantri restemo pròpio contenti con tante robe che imparemo par far pi forte la nostra amicìssia con Geovà. Quando ndemo ai congressi tuti i tre giorni, mostremo che ghe demo valor a questo presente.

Quando semo insieme dei nostri fradei, no ghemo sol de spetar che i altri i mostre che i ne ama, ma anca noantri ghemo de mostrar che ghe volemo tanto ben. (Gàl. 6:10; Ebr. 10:24, 25) Par esémpio, podemo tegner la porta verta quando qualchedun el vol passar e doperar sol i posti che ne ocore par sentarse do, cossita saremo drio pensar nei altri e nò sol in noantri stessi. (Fil. 2:3, 4) Nei congressi, ghemo la oportunità de far amicìssia con altre persone. Par quela, vanti e dopo del programa o anca nela pausa par magnar, podemo ciacolar con fradei e sorele che no cognossemo mia. (2 Cor. 6:13) Lori i podarà esser nostri amighi par sempre! E quando le persone che no le serve mia a Geovà le vede el amor che ghen’è intrà de noantri, lore le pol dessider imparar de pi sora Geovà. — Gioani 13:35

VARDA EL VÌDEO CONGRESSI INTERNASSIONAI “EL AMOR NO’L SE FINISSE MAI”!, E DOPO RISPONDI A QUESTE DOMANDE:

• Come che i fradei i ga mostrà amor par quei che i ze vegnesti de altri paesi par i congressi internassionai de 2019?

• Parché che el amor e la union che ghen’è intrà el pòpolo de Geovà l’è de maraveiarse?

• Cossa che arquanti fradei del Corpo Governante i ga dito sora el amor che ghen’è intrà el pòpolo de Geovà?

• Come che el amor el ga unio i nostri fradei dela Alemagna e dela Corea del Sud?

• Cossa che noantri ghemo de esser dessididi a far?