DELE volte Geovà el fà robe grande par proteger i toseti che no i sà e no i ze boni de protegerse. Se te fè un giro par la colònia, fursi te pol veder come Geovà lo fà, anca se no te capissi suito quel che sucede.

Magari te sì drio caminar e te vedi un osel che el riva darente de ti. Te par che el stà mal parché el strassina una ala. Quando te proi ndarghe darente el va pi distante e se te ghe vè drio, el va ancora pi distante. E dopo el zola via. In verità no’l stea mal. Seto cossa ga sucedesto? —

Darente del posto ndove el osel l’era rivà ghen’era i so picinini in meso un baro. La mare la gavea paura che te i catessi e te ghe fessi mal. Par quela la ga fato finta de star mal, cossita la te ga portà via de là. Seto chi che pol protegerte come un oseleto el fà coi so picinini? — Nela Bìblia se fà el esémpio de Geovà come un osel ciamà de àghia che tende dei so picinini. — Deuteronómio 32:11, 12.

Gesù l’è el fiol che Geovà el ama de pi. Quando el stea nel cielo, l’era un spìrito poderoso come so Pare. El podea tenderse lu sol. Ma quando l’è nassesto nela Tera, l’era un bambin che ghe ocorea protession.

Par far el laoro che Geovà el ghe gavea dato, Gesù el gavea de cresser e deventar un omo perfeto. Ma Sàtana el ga proà coparlo tanto vanti. L’è pròpio emossionante leder la stòria de come el ga proà coparlo quando l’era bambin e de come Geovà lo ga protegesto. Te piaseria scoltarla? —

Poco dopo che Gesù l’è nassesto, Sàtana el ga fato che nel cielo, in diression del oriente, slusesse una luce che parea una stela. Arquanti astròloghi, òmini che stùdia le stele, i ghe ze ndati drio par sentene de chilòmetri fin rivar a Gerusalen. Là i ga domandà ndove saria nassesto quel che el deventaria el rè dei giudei. Arquanti òmini che savea la risposta dela Bìblia i ghe ga dito: “In Belen”. — Mateo 2:1-6.

Quando Erode, el rè cativo che stea in Gerusalen, el ga savesto che el novo rè l’era nassesto fà poco tempo nela cità de Belen, el ghe ga dito ai astròloghi: ‘Ndé in serca del bambin, e quando lo caté, torné qua par dirmelo.’ Te sè parché Erode el volea catar Gesù? — Parché l’era geloso de lu e el volea coparlo!

Come Dio el ga protegesto so Fiol? — Ben, dopo che i astròloghi i ga catà Gesù e i ghe ga dà presenti, Dio li ga avisadi nte un insogno che no i tornesse ndove l’era Erode. Alora, i ze ndati via de là par nantra strada sensa passar par Gerusalen. Quando Erode el ga savesto che i astròloghi i era ndati via, el se ga inrabià come una bèstia. Come el volea far fora Gesù, el ga ordinà che i copesse tuti i picinini de Belen con manco de 2 ani. Ma Gesù no l’era pi là.

Seto come Gesù el se ga salvà? — Quando i astròloghi i ze ndati via, Geovà ghe ga dito a Giusepe, el sposo de Maria, che i scampesse par el Egito. Là Gesù l’è stà salvà del cativo rè Erode. Ani dopo, quando Maria e Giusepe i ze tornadi con Gesù del Egito, Dio el ga parlà nantra volta a Giusepe. Nte un insogno, el ghe ga dito che i ndesse a Nazarè, ndove Gesù no’l saria pi in perìcolo. — Mateo 2:7-23.

Gheto capio come Geovà ga protegesto so Fiol? — Chi te pensi che sìpia compagno i oseleti che la mare ga scondesto nel baro, o come Gesù quando l’era pìcolo? No te sì compagno? — Ghen’è de quei che vol farte mal a ti! Seto chi che i ze? —

La Bìblia dise che Sàtana l’è come un leon che urla che el vol magnarne. Come i leoni tante volte i scòlie le bèstie picolete par magnarsele, Sàtana e i so demoni tante volte i va in serca dei picinini. (1 Piero 5:8) Ma Geovà l’è pi forte che Sàtana. El pol proteger i picinini che lo serve, o rangiar su e cavar via el mal che Sàtana pol farghe.

Come ghemo visto nel capìtolo 10 de questo libro, cossa che el Diaol e i so demoni i vol che femo? — I vol che femo relassion sessuai che Dio dise che le ze sbaliade. Te te ricordi sol chi che pol far relassion sessuai? — Si, sol un omo e una dona che i sìpia maridadi.

Ma l’è bruto dir che ghen’è grandi che ghe piase far relassion sessuai coi toseti. E dopo pol suceder che questi toseti i fae robe sbaliade che i ga imparà dei grandi e i dopere i so òrgani sessuai de maniera sbaliada. Questo ga sucedesto fà tanto tempo nela cità de Sodoma. La Bìblia la dise che quei che i vivea in quela cità, ‘del toseto fin el vècio’, i ga proà far relassion sessuai con quei che i era ndati catar Lò. — Génesi 19:4, 5.

Compagno Gesù el gavea bisogno de protession, anca a ti te ocore esser protegesto dei grandi e fin anca de altri toseti che i vol far relassion sessuai con ti. Pol esser che queste persone le fà finta de esser to amighi. Fursi i te dà un presente se te prometi de no dir gnente a nissuni. Ma i ze egoisti e i pensa sol in lori come Sàtana e so demoni i fà. I ghe va drio ale so voie, e la so maniera de godersela la ze far relassion sessuai coi toseti. Questa la ze una roba tanto ma tanto sbaliada!

Seto cossa che i fà par godersela? — Pol esser che i proe sfrugnar i to òrgani sessuai. O che i russe i so òrgani sessuai coi toi. Ma no te ghè de assar che nissuni i giughe coi to òrgani sessuai. Gnanca to fradel, to sorela, to mama o to pupà. Queste parte del to corpo le ze solche toe.

Come te pol proteger el to corpo de persone che le fà queste brute robe? — Prima de tuto, no stà assar che nissuni giughe coi to òrgani sessuai. Se qualchedun el proa farlo, dighe forte e ciaro: “Férmate, no stà tocarme! Ghe lo digo a tuti!” E se el te dise che l’è colpa toa, no stà créderghe. L’è una busia! Scampa via e conta quel che el ga fato, no importa chi che el sìpia. Te ghè de dir tuto anca se el te dise che l’è un segreto intrà de valtri. Anca se el promete darte bei presenti o fin el te minassa, te ghè de scampar via de lu e contar tuto quel che el ga fato.

No stà gaver paura, ma te ghè de star atento. Quando to pare e to mare i te avisa che arquante persone o posti i podaria esser pericolosi par ti, te ghè de scoltarli. Se te i scolti, no te assarè che le persone cative le te fae mal.