Cari fradei e sorele:

Se noantri ghemo el vero amor a Dio e ale persone, volaremo ‘ndar e far dissìpoli de persone de tute le nassion e batesarle’. (Mat. 28:19, 20; Mar. 12:28-31) Cossita, saremo boni de tocar el cuor de quei che i vol imparar la verità. — Ati 13:48.

Una volta, noantri voléino gaver in mente le presentassion e assar publicassion cole persone nela predicassion. Adesso, ne ocore imparar a parlar cada volta meio con lore. Alora, ghemo de saver quel che ghe piase e quale che le ze le so preocupassion. Cossita, saremo boni de parlar robe che ghe interessa a lore e mostrar che le amemo. Come che questa revista la ne giutarà a farlo?

Questa revista la ga 12 lession che le parla dele qualità che ne ocore par mostrar amor ale persone e giutarle a far compagno Gesù. Cada lession la parla de una stòria dela Bìblia e la insegna una qualità che Gesù o un dei so primi seghidori i mostrea quando i era drio predicar. Noantri volemo saver difarente maniere de mostrar amor ale persone e no sol gaver in mente le presentassion. Ghemo bisogno de tute queste qualità quando predichemo. Ma ndemo veder come arquante le ze tanto importante par scominsiar a parlar cole persone, par seitar a parlar con lore o par insegnarghe la Bìblia.

Intanto che te studi questa revista, pensaghe sora come che te pol mostrar la qualità che ghen’è nele lession quando te parli cole persone del posto ndove te sì de star. Fà cada volta pi forte el to amor par Geovà e par le persone. Cossita, te sarè bon de giutarle a far compagno Gesù.

Ghemo caro de ‘laorar in union’ con tuti valtri. (Sof. 3:9) Preghemo che Geovà el seite a benedir el vostro sforso de mostrar amor ale persone e giutarle a far compagno Gesù!