1. Chi pol dir quala la è la maniera giusta de adorar a Dio?

LA PI GRANDA parte dele religion la dise che la in­segna la verità sora Dio. Ma questo no l’è mia vera. Le religion le insegna tante robe difarenti sora chi l’è Dio e come gavemo de adorarlo. Come podemo saver quala la è la maniera giusta de adorar a Dio? Geovà l’è el ùnico che pol dirne come gavemo de adorarlo.

2. Come podemo imparar la maniera giusta de adorar a Dio?

² Geovà el ne ga dato la Bìblia cossita podemo imparar la maniera giusta de adorarlo. Lu el fà pròpio caso de ti e el vol el to meio. (Isaías 48:17) Alora, seita studiar la Bìblia e Geovà el te giutarà a capir cossa Lu el vol.

3. Cossa Dio el vol che femo?

³ Arquanti i dise che Dio el aceta tute le religion, ma questo no l’è mia quel che Gesù el ga insegnà. Lu el ga dito: “Gnanca tuti quei che i me dise: ‘Signor, Signor’ ndarà rento el Regno dei cieli, ma sol quel che el fà la volontà de me Pare.” Alora, gavemo de imparar quala la è la volontà de Dio e come farla. Questo l’è importante parché Gesù el ga comparà quei che no i obedisse a Dio a persone che le fà “quel che l’è contra la lege”. —Mateus 7:21-23.

4. Cossa Gesù el ga dito sora far la volontà de Dio?

⁴ Gesù el ne ga avisà che no’l saria mia fàcile far la  volontà de Dio. Lu el ga dito: “Ndé rento la porta streta, parché granda la è la porta e larga la è la strada che la mena ala destrussion, e tanti i ze quei che i va rento; invesse che pìcola la è la porta e streta la è la strada che la mena ala vita, e pochi i ze quei che i la cata.” (Mateus 7:13, 14) La strada streta, o sia, la maniera giusta de adorar a Dio, la mena ala vita eterna. La strada larga, o sia, la maniera sbaliada de adorar a Dio, la mena ala morte. Ma Geovà el dà a tuti la oportunità de imparar sora Lu parché no’l vol che nissun el sia destruto. —2 Pedro 3:9.

5. Come podemo ricognosser quei che i adora Dio dela maniera giusta?

⁵ Gesù el ga dito che podemo ricognosser quei che i adora a Dio dela maniera giusta esaminando in cossa lori i crede e cossa i fà. Lu el ga dito: “Par meso dei so fruti valtri ndaré ricognosserli.” E anca el ga dito: “Cada pianta bona la produse fruti boni.” (Mateus 7:16, 17) Questo vol dir che quei che i adora a Dio sempre i proa far quel che l’è giusto, anca se no i ze perfeti. Ndemo considerar adesso cossa pol giutarne a ricognosser quei che i adora Dio dela maniera giusta.

6, 7. (a) Parché la vera adorassion la ga de esser fondamentada ntela Bìblia? (b) Che esémpio Gesù el ne ga dato?

⁶ La nostra adorassion la ga de esser fondamentada ntela Bìblia. La Bìblia la dise: “Tuta la Scritura la è inspirada da Dio e ùtile par insegnar, par coreger, par indrissar le cose, par dissiplinar ntela giustìssia, parché el omo de Dio el sìpia bon de far tuto, del tuto parecià par tuti i boni laori.” (2 Timóteo 3:16,  17) El ­apòstolo Paolo el ga scrito ai cristiani: “Quando ­valtri gavé ­ricevesto la parola de Dio, che gavé scoltà de noantri, la gavé acetà nò come la parola de òmini ma, come pròpio la è, come la parola de Dio.” (1 Tessalonicenses 2:13) La vera adorassion la ga de esser fondamentada sol ntela Parola de Dio, la Bìblia, e nò nele idee umane, tradission o altre cose.

⁷ Tuto quel che Gesù el ga insegnà l’era fondamentà ntela Parola de Dio. (Lesi João 17:17.) Tante volte lu el fea sitassion dele Scriture. (Mateus 4:4, 7, 10) Compagno Gesù, i veri servi de Dio i dopera la Bìblia par ­insegnar.

8. Cossa Gesù el ga insegnà sora la adorassion a Geovà?

⁸ Gavemo de adorar sol a Geovà. Salmo 83:18 el dise: “Ti, che el to nome l’è Geovà, sol ti te sì el Altìssimo sora tuta la tera.” Gesù el ga insegnà ale persone el nome de Dio parché el volea che lore le savesse la verità sora Lu. (Lesi João 17:6.) Gesù el ga dito: “Te ghè de adorar a Geovà el to Dio, e sol a lu te ghè de dar sacro servìssio.” (Mateus 4:10) Alora, come servi de Dio imitemo el esémpio de Gesù. Adoremo sol a Geovà e doperemo el so nome. Anca insegnemo ai altri sto nome e cossa Lu ndarà far par noantri.

9, 10. Come mostremo amor un al altro?

⁹ Ne ocore gaver amor sincero par le persone. Gesù el ga insegnà ai so dissìpoli a amarse un al altro. (Lesi João 13:35.) No importa de ndove semo vegnesti, quala la è la nostra cultura o se semo siori o poareti. El amor el fà che semo unidi come fradei e sorele. (Colossenses 3:14) Par quela, mai ndemo ale guere e gnanca copemo le  persone. La Bìblia la dise: “I fioi de Dio e i fioi del Diaol i se fà cognosser de sta maniera: tuti quei che no i pratica la giustìssia no i vien da Dio, gnanca quei che no i ama i so fradei.” E el ga dito ancora: “Gavemo de amarse un al altro, nò come Cain, che el se ga originà del perverso e che el ga copà so fradel.” —1 João 3:10-12; 4:20, 21.

¹⁰ Doperemo el nostro tempo, la nostra energia e le nostre robe materiai par giutarse e incoraiarse un al ­altro. (Hebreus 10:24, 25) “Femo quel che l’è bon par tuti.” —Gálatas 6:10.

11. Parché acetemo Gesù come el camino che el mena a Dio?

¹¹ Gavemo de obedir a Gesù parché lu l’è el camino che el mena a Dio. La Bìblia la dise: “No ghen’è salvassion in nissun altro, parché no ghen’è soto el cielo nissun altro nome che l’è stà dato intrà i òmini par meso del qual gavemo de esser salvi.” (Atos 4:12) Ntel capìtolo 5, gavemo imparà che Geovà el ga mandà Gesù par dar la so vita come risgate par tuti i umani obedienti. (Mateus 20:28) Geovà el ga scoliesto Gesù par governar come Rè sora la Tera. Par quela, gavemo de obedir a Gesù se volemo viver par sempre. —Lesi João 3:36.

12. Parché no se metemo ntela polìtica?

¹² No gavemo de meterse ntela polìtica. Gesù no’l se ga messo ntela polìtica. Ntel tribunal, lu el ga dito al governante romano Pilato: “El me Regno no’l fà parte de sto mondo.” (Lesi João 18:36.) Come Gesù, semo leai al Regno celestial de Dio e par quela no se metemo ntela polìtica. Ancora cossita, la Bìblia la ne manda obedir “ale autorità superiori”, o sia i  governi. ­(Romanos 13:1) Obedimo ale legi del paese ndove vivemo. Sol che, quando una lege la va contra la lege de Dio, imitemo i apòstoli che i ga dito: “Gavemo de obedir a Dio come governante vanti che i òmini.” —Atos 5:29; Marcos 12:17.

13. Cossa predichemo sora el Regno de Dio?

¹³ Credemo che el Regno de Dio l’è el ùnico che el va risolver i problemi del mondo. Gesù el ga dito che le “bone notìssie del Regno” le saria predicade in tuto el mondo. (Lesi Mateus 24:14.) Gnanca un governo umano el pol far quel che el Regno de Dio el va far par noantri. (Salmo 146:3) Gesù el ne ga insegnà a pregar sora sto Regno cossita: “Vegna el to Regno. Sia fata la to volontà, come ntel cielo, anca ntela Tera.” (Mateus 6:10) La Bìblia la dise che el Regno de Dio el finirà fora con tuti i governi umani e “sol lu el restarà par sempre”. —Daniel 2:44.

14. Par ti, chi l’è drio adorar a Dio dela maniera giusta?

¹⁴ Dopo de gaver studià questi punti, domàndate: ‘Chi l’è drio insegnar d’acordo cola Bìblia? Chi l’è drio parlar ai altri sora el nome de Dio? Chi l’è drio mostrar amor sincero un al altro? Chi l’è drio creder che Dio el ga mandà Gesù par salvarne? Chi no se mete ntela polìtica? Chi l’è drio predicar che sol el Regno de Dio el va risolver i nostri problemi?’ Sol le Testimònie de Geovà. —Isaías 43:10-12.

15. Cossa gavemo de far par Dio acetar la nostra adorassion?

¹⁵ No basta sol creder che Dio el esiste, parché anca i demoni i crede in Lu ma no i ghe obedisse. (Tiago 2:19) Par Dio acetar la nostra adorassion,  gavemo de far quel che Lu el dise, nò sol creder che Lu el esiste.

16. Parché gavemo de abandonar la religion falsa?

¹⁶ Par Dio acetar la nostra adorassion, gavemo de abandonar la religion falsa. El profeta Isaia el ga scrito: “Ndé via de in meso d’ela, mantegneve neti.” (Isaías 52:11; 2 Coríntios 6:17) Par quela, gavemo de abandonar tute le pràtiche dela religion falsa.

17, 18. (a) Elo cossa “Babilònia la Granda”? (b) Parché l’è urgente abandonarla?

¹⁷ Elo cossa la religion falsa? La è tute le religion che le insegna a adorar a Dio de una maniera che no l’è d’acordo cola Bìblia. La Bìblia la ciama tute le religion false de “Babilònia la Granda”. (Apocalipse 17:5) Parché? Parché l’è stà ntela cità de Babilònia, dopo del Dilùvio dei giorni de Noè, che i ga scominsià tanti falsi insegnamenti religiosi e questi i se ga spalià par tuta la Tera. Par esémpio, le persone che le vivea in Babilònia le adorea un grupo de tre dèi. Compagno quei giorni, ancoi tante religion le insegna che Dio l’è una Trinità. Ma la Bìblia la insegna che esiste sol un vero Dio, Geovà, e che Gesù l’è so Fiol. (João 17:3) Nantro falso insegnamento l’è che una parte dela persona la continua a viver dopo dela morte del corpo e che quela parte la pol sofrir ntel inferno de fogo. Ma questo no l’è mia vera. —Vedi la Nota Final 14, 17, e 18.

¹⁸ Dio el ga promesso che presto tute le religion false le sarà destrute. (Apocalipse 18:8) Gheto capio parché l’è urgente abandonar la religion falsa? Geovà Dio el vol che te fassa questo vanti che sìpia massa tardi. —Apocalipse 18:4.

19. Come Geovà el tende quei che i desside servirlo?

¹⁹ Quando ti te dessidi abandonar la religion falsa par  servir a Geovà, fursi arquanti dela to fameia o amighi no i sìpia d’acordo cola to dessision e par quela i va contra ti. Ma Geovà mai el te abandonarà. Ti te ndarè guadagnar el amor e la amicìssia de una fameia mondial de milioni de persone. Anca te gavarè la speransa de viver par sempre ntel novo mondo de Dio. (Marcos 10:28-30) Fursi col tempo, quei che i era contra la to dessision i ndarà dessider studiar la Bìblia.

20. Parché l’è importante adorar a Dio dela maniera giusta?

²⁰ Presto Dio el finirà fora con tute le robe rugne e el so Regno el governarà sora tuta la Tera. (2 Pedro 3:9, 13) L’è pròpio una roba bela! Tuti i adorarà a Geovà dela maniera giusta. Alora, l’è importante che ti te dessidi adesso adorar a Dio dela maniera giusta.