1, 2. (a) Parché la orassion la è un maraveioso regalo de Dio? (b) Parché ne ocore saver quel che la Bìblia la insegna sora la orassion?

IN COMPARASSION col universo, la Tera la è pròpio pìcola e par Geovà noantri semo come gossete de àqua nte una sécia. (Salmo 115:15; Isaías 40:15) Anca se semo tanto picinini, gavemo el maraveioso privilègio dela orassion. El Salmo 145:18, 19 el dise: “Geovà l’è darente de tuti quei che i lo ciama, de tuti quei che i lo ciama in verità. Lu el fà la voia de tuti quei che i lo teme; Lu el scolta la so sùplica par aiuto, e li salva.” Geovà, el Creador Altìssimo, el vol scoltar le nostre orassion e el vol star darente de noantri. La orassion la è pròpio un maraveioso regalo de Geovà.

² Se volemo che Geovà el ne scolte, l’è importante far orassion dela maniera giusta. Vedemo cossa la Bìblia la dise sora la orassion.

3. Parché gavemo de far orassion a Geovà?

³ Geovà el vol che parlemo con Lu par meso dela orassion. Varda el invito che Geovà el ne fà in Filipenses 4:6, 7. (Lesi.) El Creador del Universo el fà tanto caso de ti che el vol che ti te parli a Lu sora i to sentimenti e i to problemi.

4. Parché la to amicìssia con Geovà la resta pi forte quando te fè orassion a Lu?

 ⁴ La orassion la ne giuta a gaver una forte amicìssia con Geovà. Par esémpio, i veri amighi i se parla sempre sora i so pensieri, le so preocupassion e i so sentimenti, par quela la so amicìssia la resta pi forte. Dela medèsima maniera, Geovà el ne conta par meso dela Bìblia i so pensieri e i so sentimenti e cossa ndarà far ntel futuro. Anca ti, par meso dela orassion, te pol sempre parlar con Lu sora i to sentimenti e i to pensieri. Quanto de pi te fè questo, tanto de pi la to amicìssia con Geovà la restarà pi forte. —Tiago 4:8.

5. Come savemo che Geovà no’l scolta tute le orassion?

⁵ Sarà che Geovà el scolta tute le orassion? Nò. Nei giorni del profeta Isaia, Geovà el ga dito ai israeliti: “Anca se valtri fé tante orassion, Mi  no ve scolto; le ­vostre man le ze piene de sàngue.” (Isaías 1:15) Par quela, gavemo de star atenti parché se femo robe che Geovà el òdia, Lu no’l scoltarà le nostre orassion.

6. (a) Parché la fede la è tanto importante? (b) Come ti te pol mostrar che te ghè fede?

⁶ Se volemo che Geovà el scolte le nostre orassion, ne ocore gaver fede in Lu. (Marcos 11:24) El apòstolo Paolo el spiega: “Sensa fede l’è impossìbile contentar a Dio, parché quel che el se riva darente de Dio el ga de creder che lu el esiste e che lu el deventa el ricompensador de quei che i va in serca de lu de maniera sincera.” (Hebreus 11:6) No basta sol dir che gavemo fede, ma anca gavemo de mostrarla obedindo a Geovà tuti i giorni.—Lesi Tiago 2:26.

7. (a) Parché gavemo de esser ùmili e rispetosi quando femo orassion a Geovà? (b) Come podemo far orassion sincere?

⁷ Quando femo orassion a Geovà, gavemo de esser ùmili e rispetosi. Par esémpio, se ti te fussi parlar con un presidente, no te lo faria de maniera rispetosa? Geovà l’è el Dio Tuto Poderoso. Par quela gavemo de mostrar ancora de pi rispeto e umiltà quando parlemo con Lu. (Gênesis 17:1; Salmo 138:6) Le nostre orassion le ga de esser sincere e le ga de vegner del nostro cuor. No gavemo de dir le medèsime parole drio man. —Mateus 6:7, 8.

8. Cossa gavemo de far dopo de domandar qualcossa in orassion?

⁸ Par fin, quando femo orassion domandando qualcossa, gavemo de far tuto quel che podemo d’acordo con quel che gavemo domandà. Par esémpio, se domandemo a Geovà el sostento, no gavemo de esser pegri e spetar che Geovà el ne dà tuto sensa  far gnente. Gavemo de acetar qualche sia el laoro che podemo far. (Mateus 6:11; 2 Tessalonicenses 3:10) Se domandemo a Geovà che el ne giute a assar de far una roba sbaliada, gavemo de evitar tute le situassion che le podaria menarne a far sta roba. (Colossenses 3:5) Ndemo veder arquante domande che tuti i se fà sora la orassion.

9. (a) A chi gavemo de far orassion? (b) Cossa João 14:6 el ne insegna sora la orassion?

⁹ A chi gavemo de far orassion? Gesù el ga insegnà ai so seguidori a far orassion al nostro Pare celestial. (Mateus 6:9) Lu anca el ga dito: “Mi son el camino, la verità e la vita. Nissun riva al Pare senò par meso de mi.” (João 14:6) Par quela, gavemo de orar sol a Geovà in nome de Gesù. Cossa vol dir far orassion in nome de Gesù? Par Geovà acetar le nostre orassion, gavemo de mostrar rispeto par la posission spessial che Lu el ga dato a Gesù. Gavemo imparà che Gesù l’è vegnesto ala Tera par salvar noantri del pecà e dela morte. (João 3:16; Romanos 5:12) Geovà anca el ga nominà Gesù come Sacerdote e Giuise. —João 5:22; Hebreus 6:20.

10. Ghen’è una posission giusta par far orassion? Spiega.

¹⁰ Ghen’è una posission giusta par far orassion? Nò. Geovà no’l domanda par indenociarse o sentarse e gnanca star in pié. La Bìblia la insegna che podemo parlar con Geovà in qualche posission rispetosa. (1 Crônicas 17:16; Neemias 8:6; Daniel 6:10; Marcos 11:25) Par Geovà el pi importante no l’è la posission, ma quel che gavemo ntel cuor. Podemo far orassion in alta vose o in silénsio, in tuti i posti e in tuti i momenti del di o dela note. Podemo fidarse che  Geovà el scoltarà le nostre orassion, anca se nissun ne scolta. —Neemias 2:1-6.

11. Cossa podemo domandar a Geovà in orassion?

¹¹ Cossa podemo domandar in orassion? Podemo domandar tuto quel che l’è d’acordo cola volontà de Geovà. La Bìblia la dise: “No importa cossa ghe domandemo d’acordo cola so volontà, Lu el ne scolta.” (1 João 5:14) Sarà che podemo far orassion sora cose personai? Sì. Far orassion a Geovà l’è compagno parlar con un caro amigo. Podemo dir a Geovà tuto quel che ­pensemo e sentimo. (Salmo 62:8) Podemo domandar­ghe el so spìrito santo par giutarne a far quel che l’è giusto. (Lucas 11:13) Podemo domandar a Geovà sapiensa par far bone decision e anca forsa par infrontar i problemi. (Tiago 1:5) Gavemo de domandarghe perdon dei nostri pecadi. (Efésios 1:3, 7) Gavemo anca de far orassion par i altri, tanto par quei dela nostra fameia come par i fradei dela congregassion. —Atos 12:5; Colossenses 4:12.

12. Cossa ga de esser pi importante nele nostre orassion?

¹² Cossa ga de esser pi importante nele nostre orassion? Ga de esser Geovà e la so volontà. Gavemo de ringrassiarlo de tuto el nostro cuor par tuto quel che el ne ga fato. (1 Crônicas 29:10-13) Gesù el ga insegnà ai so dissìpoli come far orassion. (Lesi Mateus 6:9-13.) Gavemo de far orassion par la santificassion del nome de Dio parché el sìpia tratà come santo o sacro. Gavemo de far orassion parché vegna el Regno de Dio e sia fata la volontà de Dio ntela Tera. Gesù el ga insegnà che podemo domandar le nostre cose personai sol dopo che gavemo domandà ste cose pi  importanti. Se femo cossita, mostremo che Geovà e la so volontà le ze le robe pi importanti par noantri.

13. Quanto tempo le orassion le ga de durar?

¹³ Quanto tempo le orassion le ga de durar? La Bìblia no la dise quanto tempo. Le nostre orassion le pol esser curte o longhe, depende dela situassion. Par esémpio, podemo far una orassion curta vanti de ma­gnar e podemo far una orassion longa quando ringrassiemo Geovà o quando parlemo sora le  nostre preocupassion. (1 Samuel 1:12, 15) No gavemo de far orassion longhe sol par farse veder ai altri come arquanti i fea nei giorni de Gesù. (Lucas 20:46, 47) A Geovà no’l ghe piase sto tipo de orassion. Lu el vol che le sia fate de tuto el cuor.

14. (a) Quante volte al giorno gavemo de far orassion? (b) Cossa questo ne insegna sora Geovà?

¹⁴ Quante volte al giorno gavemo de far orassion? Geovà el ne invita a parlar con Lu con regolarità. La Bìblia la dise che gavemo de “far orassion continuamente”, ‘perseverar in orassion’ e ‘far orassion costantemente’. (Mateus 26:41; Romanos 12:12; 1 Tessalonicenses 5:17) Geovà l’è sempre pronto par scoltar noantri. Podemo ringrassiarlo tuti i giorni par el so amor e la so generosità. Podemo domandar orientassion, forsa  e consolo. Se demo valor al privilègio dela orassion, ndaremo doperar tute le oportunità par parlar con Geovà.

15. Parché gavemo de dir “amen” al fin dela orassion?

¹⁵ Parché gavemo de dir “amen” al fin dela orassion? La parola “amen” vol dir “sicuro” o “cossì sia”. La è una maniera de mostrar che capimo quel che gavemo dito e che semo sinceri ntela nostra orassion. (Salmo 41:13) La Bìblia anca la insegna che l’è bon dir “amen”, tanto in silénsio come in alta vose, al fin dele orassion fate in pùblico par mostrar che semo d’acordo con quel che l’è stà dito. —1 Crônicas 16:36; 1 Coríntios 14:16.

16. Sarà che Geovà el risponde ale nostre orassion? Spiega.

¹⁶ Sarà che Geovà el risponde ale nostre orassion? Sì, par quela la Bìblia la ciama Geovà ‘quel che el scolta le orassion’. (Salmo 65:2) Geovà el scolta e el risponde ale orassion sincere de milioni de persone. Lu el fà questo de difarenti maniere.

17. Come Geovà el dopera i àngeli e i so servi ntela Tera par risponder ale nostre orassion?

¹⁷ Geovà el dopera i àngeli e i so servi ntela Tera par risponder ale nostre orassion. (Hebreus 1:13, 14) Ghen’è tanti esempi de persone che le ga fato orassion a Dio domandando aiuto par capir la Bìblia e pena dopo le Testimònie de Geovà le ze rivade ntela so casa. La Bìblia la mostra che i àngeli i giuta ntela predicassion dele “bone notìssie” in tuta la Tera. (Lesi Apocalipse 14:6.) Tante volte, dopo che gavemo fato orassion a Geovà sora un problema o un bisogno,  un fradel dela congregassion el ne giuta. —Provérbios 12:25; Tiago 2:16.

18. Come Geovà el dopera el so spìrito santo e la Bìblia par risponder ale orassion?

¹⁸ Geovà el dopera el so spìrito santo par risponder ale nostre orassion. Quando femo orassion domandando aiuto par infrontar un problema, Lu el pol doperar el so spìrito santo par darne orientassion e forsa. (2 Coríntios 4:7) Geovà el dopera anca la Bìblia par risponder ale nostre orassion e par giutarne a far bone decision. Quando lesemo la Bìblia, podemo catar testi che i ndarà giutarne. Geovà el pol anca motivar ­qualchedun ntela riunion par dir quel che gavemo bisogno de scoltar o pol motivar un ansiano dela congregassion par mostrarne un punto dela Bìblia. —Gálatas 6:1.

19. Parché dele volte ne par che Geovà no’l risponde ale orassion?

¹⁹ Dele volte se domandemo: ‘Parché Geovà no’l ga ancora rispondesto ala me orassion?’ No stà desmentegarte che Lu el cognosse i nostri bisogni e el sa quando e come risponder ale nostre orassion. Gavemo de seitar a far orassion par dimostrar che le nostre domande le ze sincere e che se fidemo de Dio. (Lucas 11:5-10) Dele volte Geovà el risponde de una maniera che no spetemo. Par esémpio, femo orassion sora una situassion difìcile, ma invesse de cavar via el problema, Geovà el ne dà forsa par tirarse avanti. —Lesi Filipenses 4:13.

20. Parché gavemo de far orassion a Geovà con regolarità?

²⁰ Far orassion l’è pròpio un maraveioso privilègio! Podemo esser sicuri che Geovà el ne scoltarà. (Salmo 145:18) Quanto de pi orassion femo a Geovà de tuto el nostro cuor, tanto de pi forte la sarà la nostra amicìssia con Lu.