1, 2. Come Geovà el vol che le fameie le sìpia?

GEOVÀ DIO el ga creà la prima dona par esser la sposa de Adamo. Cossita el ga realisà el primo matrimònio. Adamo l’è restà tanto contento che el ga dito: “Questa la è par fin osso dei me ossi e carne dela me carne.” (Gênesis 2:22, 23) Questo vol dir che Geovà el vol che le persone maridade le sìpia felici.

² L’è pròpio triste saver che tanti no i ga bio una fameia felice. Ma la Bìblia la dà tanti consili che i pol giutar le fameie a esser felici. —Lucas 11:28.

3, 4. (a) Come el sposo el ga de tratar la so sposa? (b) Parché l’è importante el perdon nel matrimònio?

³ La Bìblia la dise che un bon sposo el ga sempre de tratar la so sposa con amor e rispeto. Lesi Efésios 5:25-29. Lu anca el ga de proteger e tender la sposa e mai farghe mal.

⁴ Ma cossa ga de far un sposo quando la so sposa la fà sbali? La Bìblia la dise: “Seité amar le vostre spose e no gavé de esser rabiosi con lore.” (Colossenses 3:19) Sposo, ricòrdate che anca ti te fè sbali. Alora, se ti te vol che Dio el te perdone, te ghè de perdonar la to sposa. (Mateus 6:12, 14, 15)  El matrimònio el sarà felice se el sposo e la sposa i se perdona.

5. Parché un sposo el ga de rispetar la so sposa?

⁵ Geovà el vol che el sposo el rispeta la so sposa. Lu el ga de preocuparse coi bisogni fìsichi e emossionai dela sposa. Questa la è una roba pròpio importante. Geovà el pol assar de scoltar le orassion del sposo che no’l trata ben la so sposa. (1 Pedro 3:7) Quel che fà una persona pressiosa ai oci de Geovà l’è el so amor par Lu, no importa se la è omo o dona.

6. Cossa vol dir par el sposo e la sposa esser “una sol carne”?

⁶ Gesù el ga spiegà che el sposo e la sposa “no i ze pi due, ma una sol carne.” (Mateus 19:6) Alora, lori i ga de esser leai e fedeli un al altro. (Provérbios 5:15-21; Hebreus 13:4) El sposo e la sposa no i ga de esser egoisti sora le nessessità sessuai un del altro. (1 Coríntios 7:3-5) El sposo el ga de ricordarse che “gnanca un omo el ga mai odià el so pròpio corpo, ma lu lo alimenta e lo tende.” L’è par quela che el ghe toca amar e tender la so sposa. De pi de qualche altra cosa, la sposa la vol che el so sposo el sìpia gentile e amoroso con ela. —Efésios 5:29.

7. Parché tute le fameie le ga bisogno de un testa?

⁷ Tute le fameie le ga bisogno de un testa, o sia, qualchedun par guidar e mantegner la fameia unida. La Bìblia la dise in 1 Coríntios 11:3: “El testa de tuti i òmini l’è Cristo; el testa dela dona l’è el omo; el testa del Cristo l’è Dio.”

8. Come una sposa la pol mostrar profondo rispeto par el so sposo?

 ⁸ Savemo che gnanca un sposo l’è perfeto, ma tuta la fameia la se benefissia quando la sposa la apoia le dessision del so sposo e la è disposta a giutarlo. (1 Pedro 3:1-6) La Bìblia la dise: “La sposa la ga de rispetar profondamente el so sposo.” (Efésios 5:33) Ma se el sposo no’l ga le medèsime credense dela sposa? Ancora cossita la ga de mostrar profondo rispeto par lu. La Bìblia la dise: “Valtre spose, gavé de star soto la autorità dei vostri sposi, de modo che, se no i ze obedienti ala parola, i sìpia guadagnadi sensa parole, par meso dela condota dele so spose, parché i ze stati testimònie dela vostra condota casta insieme a profondo rispeto.” (1 Pedro 3:1, 2) El bon esémpio dela sposa el pol giutar el so sposo a capir e rispetar la fede d’ela.

9. (a) Cossa pol far la sposa quando no la è d’acordo col so sposo? (b) Che consìlio l’è dato ale spose in Tito 2:4, 5?

⁹ Cossa pol far la sposa quando no la è d’acordo col so sposo? La pol spressar la so opinion con  rispeto. Par esémpio, Sara la ga dito una roba che a Abraamo no’l ga piasesto, ma Geovà el ga dito a lu: “Scóltela.” (Gênesis 21:9-12) Quando el sposo cristiano el fà una dessision che la è d’acordo cola Bìblia, la sposa la ga de apoiarlo. (Atos 5:29; Efésios 5:24) Una bona sposa la tende ben la so fameia. (Lesi Tito 2:4, 5.) Quando el so sposo e i so fioi i vede el tanto che la fà par lori, i la amarà e i la rispetarà ancora de pi. —Provérbios 31:10, 28.

10. Cossa la Bìblia la dise sora la separassion e el divòrsio?

¹⁰ Dele volte arquanti che i ze maridadi i desside separarse o divorsiarse. Ma la Bìblia la dise che “la sposa no la ga de separarse del so sposo” e che “el sposo no’l ga de assar so sposa.” (1 Coríntios 7:10, 11) Ghen’è arquante situassion estreme che le pol menar ala separassion, ma questa dessision no la ga de esser fata de colpo. E cossa podemo dir sora el divòrsio? La Bìblia la mostra che el ùnico motivo par divorsiarse l’è el adultèrio, o sia, quando el sposo o la sposa i fà sesso con nantra persona. —Mateus 19:9.

11. De cossa i fioi i ga bisogno?

¹¹ Genitori, gavé de passar tuto el tempo che podé coi vostri fioi parché lori i ga bisogno de valtri. De pi de qualche altra cosa, lori i ga bisogno che valtri li insegné sora Geovà. —Deuteronômio 6:4-9.

12. Cossa i genitori i ga de far par proteger i so fioi?

¹² El mondo de Sàtana l’è drio restar sempre pedo. Par quela, ghen’è arquante persone che le vol far mal ai nostri fioi o ancora pedo abusar sessualmente de lori. Arquanti genitori i ga dificoltà de parlar sora questo. Ma ghe toca ai genitori parlar coi so fioi sora ste persone rugne e insegnar lori come evitarle. Genitori, gavé de proteger i vostri fioi. * —1 Pedro 5:8.

13. Come i genitori i ga de insegnar ai so fioi?

¹³ I genitori i ga la responsabilità de insegnar ai so fioi come comportarse. Come i pol far questo? Ghe dando educassion e dissiplina, ma questa no la ga mia de esser dura o crudel. (Jeremias 30:11)  Par quela, no sté dissiplinar i vostri fioi quando valtri sé ­inrabiadi. Le vostre parole no le ga de esser come “colpi de spada” e farghe mal. (Provérbios 12:18) Gavé de insegnar i vostri fioi a capir parché i ghe toca esser obedienti. —Efésios 6:4; Hebreus 12:9-11; vedi la Nota Final 30.

14, 15. Parché ai fioi i ghe toca esser obedienti ai so genitori?

¹⁴ Gesù el ga sempre obedio al so Pare, anca quando no l’era mia fàcile. (Lucas 22:42; João 8:28, 29) Dela medèsima maniera, Geovà el vol che i fioi i sìpia obedienti ai so genitori. —Efésios 6:1-3.

¹⁵ Fioi, anca se dele volte no l’è mia fàcile obedir ai vostri genitori, ricordeve che Geovà e lori i resta tanto contenti quando valtri fé cossita. * —Provérbios 1:8; 6:20; 23:22-25.

16. (a) Come Sàtana el pressiona i gióveni a far robe sbaliade? (b) Parché l’è importante scòlier amighi che i ama a Geovà?

¹⁶ El Diaol el pol doperar i vostri amighi e altri gióveni par pressionarve a far robe sbaliade. Lu el sa che l’è difìcile resister a ste pression. Par esémpio, Dinà, la fiola de Giacobe, la gavea amighi che no i amea a Geovà e questo el ga causà tanti problemi a ela e ala so fameia. (Gênesis 34:1, 2) Se i vostri amighi no i ama a Geovà, lori i pol pressionarve a far qualcossa che Geovà el òdia. Questo el pol causar tanto dolor a valtri, ala vostra fameia e a Dio. (Provérbios 17:21, 25) Par quela, l’è pròpio importante che i  vostri amighi i ama a Geovà. —1 Coríntios 15:33.

17. Che responsabilità el ga cada membro dela fameia?

¹⁷ Quando le fameie le obedisse ale istrussion de Dio, le evita tanti problemi. Se ti te sì un sposo, ama e trata con rispeto e amor la to sposa. Se ti te sì una sposa, sìpia rispetosa e aceta la autorità del to sposo. Anca imita el esémpio dela sposa descrita in Provérbios 31:10-31. Se ti te sì un genitor, insegna ai to fioi a amar a Dio. (Provérbios 22:6) Se ti te sì un pare, guida la to fameia “de una maniera ecelente.” (1 Timóteo 3:4, 5; 5:8) E valtri fioi, obedí ai vostri genitori. (Colossenses 3:20) Ricòrdate che tuti i membri dela fameia i pol sbaliar, par quela sìpia ùmile e domanda scusa un al altro. La Bìblia la dà i consili de Geovà par cada membro dela fameia.