1, 2. (a) Quando un regalo l’è pressioso par ti? (b) Parché el risgate l’è el regalo pi grando che Dio el ga dato a noantri?

QUAL l’è el meio regalo che ti te ghè ricevesto? Quando el regalo el te fà felice o l’è una cossa che ti te gavea pròpio bisogno, te resti tanto contento.

² De tuti i regali che Dio el ga dato a noantri, ­ghen’è un che l’è el pi grandioso e che gavemo pròpio bisogno. In questo capìtolo, ndaremo imparar che Geovà el ga mandà el so Fiol, Gesù Cristo. L’è par quel che podemo viver par sempre. (Lesi Mateus 20:28.) Quando Geovà el ga mandà Gesù come risgate, Lu el ga provà che el ne ama tanto.

3. Parché i umani i more?

³ El risgate l’è el meso che Geovà el dopera par liberar i umani del pecà e dela morte. (Efésios 1:7) Par capir parché gavemo bisogno del risgate, gavemo de saver cossa l’è sucedesto tanti mila ani indrio ntel giardin del Èden. I nostri primi genitori Adamo e Eva i ga pecà, par quela i ze morti. Anca noantri morimo parché gavemo eredità el pecà de Adamo e Eva. —Vedi la Nota Final 9.

4. Come l’era la vita de Adamo vanti de pecar?

⁴ Quando Geovà el ga creà el primo omo, Adamo, Lu el ga  dato una cossa tanto pressiosa: una vita umana perfeta. Adamo el gavea una mente perfeta e un corpo perfeto. Lu no’l restaria malà, gnanca restaria vècio e mai el moreria. Geovà l’era come un pare par Adamo parché Lu lo ga creà. (Lucas 3:38) Geovà sempre el parlea con Adamo. Dio el ga spiegà a Adamo cossa el spetea de lu e el ga dato un bel laoro par far. —Gênesis 1:28-30; 2:16, 17.

5. Cossa la Bìblia la vol dir quando la dise che Adamo l’è stà creà “ala imàgine de Dio”?

⁵ Adamo l’è stà creà “ala imàgine de Dio”. (Gênesis 1:27) Geovà el ga dato a lu qualità compagne le soe, come el amor, la sapiensa, la giustìssia e el poder. Geovà el ga dato a Adamo anca la libertà de scòlier far el ben o el mal. Lu no l’era mia una màchina. Se Adamo el scoliesse obedir a Dio, lu el podaria viver par sempre ntel Paradiso.

6. (a) Cossa Adamo el ga perso quando el ga desobedio a Dio? (b) Qual l’è stà el resultà par noantri?

⁶ Quando Adamo el ga desobedio a Dio, lu el ga pagà un prèssio alto e l’è stà condanà a morte. Lu el ga perso la so amicìssia spessial con Geovà, la so vita perfeta e anca el Paradiso. (Gênesis 3:17-19) Adamo e Eva i ga scoliesto desobedir a Dio, par quela no i gavea pi speransa. Cossita, “el pecà l’è vegnesto al mondo, e la morte par meso del pecà, cossita la morte la se ga spalià a tuti i òmini, parché tuti i gavea pecà”. (Romanos 5:12) Quando Adamo el ga pecà, el “ga vendesto” lu stesso e tuti noantri par esser schiavi del pecà e dela morte. (Romanos 7:14) Sarà che ghen’è una speransa par noantri? Sicuro che si!

7, 8. Cossa l’è un risgate?

 ⁷ Cossa l’è un risgate? Pol esser due cose: prima, l’è el prèssio par liberar una persona o par recuperar una cosa persa; seconda, l’è el prèssio par pagar el dano o el costo de una cosa.

⁸ Gnanca un omo el podaria pagar el dano che Adamo el ga causà quando el ga pecà e el ga vendesto noantri ala morte. Ma Geovà el ga dato el meso par liberarne del pecà e dela morte. Ndemo veder come l’è stà pago sto risgate e come el pol benefissiarne.

9. Come podea esser pago el risgate?

⁹ Gnanca una persona la podaria pagar el prèssio del risgate, par la vita perfeta che Adamo el ga perso, parché tuti semo imperfeti. (Salmo 49:7, 8) Sol nantra vita umana perfeta la podea pagar sto risgate. Par quel che l’è ciamà “el risgate corispondente.” (1 Timóteo 2:6) El risgate el ghe ocorea gaver el medèsimo valor dela vita che Adamo el gavea perso.

10. Come Geovà el ga dato el risgate?

¹⁰ Come Geovà el ga dato el risgate? Geovà el ga mandà ala Tera el so Fiol pi spessial, Gesù, che l’è stà la so prima creassion. (1 João 4:9, 10) Gesù l’è stà disposto assar so Pare e la so vita ntel cielo. (Filipenses 2:7) Geovà el ga trasferio Gesù dal cielo ala Tera par nasser come un omo perfeto, sensa pecà. —Lucas 1:35.

11. Come un sol omo el podaria esser un risgate par tuti i umani?

¹¹ Quando el primo omo, Adamo, el ga desobedio a Geovà,  lu el ga perso la possibilità de tuti i umani esser perfeti. Sarà che nantro omo el podaria finir cola morte de tuti i dissendenti de Adamo? Si! (Lesi Romanos 5:19.) Gesù, che no’l ga mai pecà, el ga dato la so vita perfeta come risgate. (1 Coríntios 15:45) La vita perfeta de Gesù la podaria finir cola morte de tuti i dissendenti de Adamo. —1 Coríntios 15:21, 22.

12. Parché Gesù el ga bio de sofrir tanto?

¹² La Bìblia la descrive quanto Gesù el ga sofrio vanti de morir. El ga ciapà tante bote, l’è stà inciodà su un pal de tortura e el ga soportà una morte lenta e dolorosa. (João 19:1, 16-18, 30) Parché Gesù el ga bio de sofrir tanto cossita? Parché Sàtana el ga dito che gnanca un umano saria leal a Dio se el fusse tentà. Invesse, Gesù el ga dimostrà che un omo perfeto el pol restar leal a Dio anca quando l’è tentà e l’è drio sofrir. Imagina quanto Geovà l’è restà orgolioso de Gesù! —Provérbios 27:⁠11; vedi la Nota Final 15.

13. Come l’è stà pago el risgate?

¹³ Come l’è stà pago el risgate? Gesù el ga dato a so Pare el valor dela so vita. Nel ano 33, nel di 14 de Nisan del calendàrio ebraico, Geovà el ga assà che i nemighi de Gesù i lo copasse. (Hebreus 10:10) Dopo de tre giorni, Geovà el ga ressussità Gesù, nò come umano ma come persona spiritual. Pi tardi, quando Gesù el ga ritornà a so Pare ntel cielo, lu el ga dato a Geovà el valor dela so vita umana perfeta come risgate. (Hebreus 9:24) Par quela podemo esser liberadi del pecà e dela morte.—Lesi Romanos 3:23, 24.

14, 15. Cossa gavemo de far par ricever el perdon dei nostri pecadi?

¹⁴ Semo drio esser benefissiadi del pi grando regalo de Dio. Vedemo come podemo esser benefissiadi ancoi e nel futuro.

¹⁵ I nostri pecadi i ze perdonadi. No l’è mia fàcile far sempre quel che l’è giusto. Dele volte disemo e femo robe sbaliade. (Colossenses 1:13, 14) Come podemo esser perdonadi? Gavemo de pentirse con sincerità par quel che gavemo fato de sbalià e domandar perdon a Geovà con umiltà. Podemo esser sicuri che i nostri pecadi i sarà perdonadi. —1 João 1:8, 9.

16. Cossa ne toca far par gaver una cossiensa neta?

¹⁶ Podemo gaver una cossiensa neta. Quando la nostra cossiensa la dise che gavemo fato una roba sbaliada, se sentimo colpadi, fursi sensa speransa e sensa valor. Ma no gavemo de pensar cossita. Se noantri suplichemo in orassion perdon a Geovà, podemo esser sicuri che Lu el ne scoltarà e el ne perdonarà. (Hebreus 9:⁠13, 14) Geovà el vol che parlemo con Lu sora tuti i nostri problemi e le nostre fiachesse. (Hebreus 4:14-16) Cossita, podemo star in pace con Dio.

17. Che benedission le ze possìbili gràssie ala morte de Gesù?

¹⁷ Gavemo la speransa de viver par sempre. “Parché el salàrio che el pecà el paga l’è la morte, ma el don dato da Dio l’è la vita eterna par meso de Cristo Gesù, el nostro Signor.” (Romanos 6:23) Gràssie al fato che Gesù l’è morto par tuti noantri, podemo viver par sempre e gaver salute perfeta. ­(Apocalipse 21:3, 4) Cossa gavemo de far par ricever ste benedission?

18. Come savemo che Geovà el ne ama?

¹⁸ Pensa in come el to cuor se impienisse de contentessa quando te ricevi un bel regalo. El risgate l’è el regalo pi grando de tuti e gavemo de ringrassiar pròpio tanto a Geovà par questo. João 3:16 el dise che Dio “el ga amà tanto el mondo, che el ga dato el so Fiol unigénito.” Si, Geovà el ne ama tanto che el ga dato el so Fiol spessial, Gesù. E savemo che anca Gesù el ne ama tanto parché l’è stà disposto a morir par noantri. (João 15:13) El regalo del risgate el ne assa sicuri che Geovà e Gesù i ne ama pròpio tanto. —Gálatas 2:20.

19, 20. (a) Come ti te pol deventar amigo de Geovà? (b) Come ti te pol dimostrar che te ghè fede nel sacrifìssio de risgate de Gesù?

¹⁹ Adesso che te ghè imparà sora el grando amor de Dio, come ti te pol deventar so amigo? No l’è mia fàcile amar a chi ti no te cognossi. João 17:3 el dise che noantri podemo cognosser a Geovà. Quanto de pi te lo cognossi, tanto de pi grando sarà el to amor par Geovà, de pi te volerè far la so volontà e de pi amigo de Lu ti te deventarè. Alora, seita imparar sora Geovà par meso del stùdio dela Bìblia. —1 João 5:3.

²⁰ Gàpia fede nel sacrifìssio de risgate de Gesù. La Bìblia la dise che ‘quel che el pratica la fede in Gesù el riceve vita eterna’. (João 3:36) Cossa vol dir praticar la fede? Vol dir far quel che Gesù el ne ga insegnà. (João 13:15) Par dar valor al risgate, no podemo sol dir che gavemo fede in Gesù ma anca gavemo de far qualcossa. Tiago 2:26 el dise: “La fede sensa òpere la è morta.”

21, 22. (a) Parché gavemo de assister ala Selebrassion dela morte de Cristo tuti i ani? (b) Cossa i capìtoli 6 e 7 i ndarà spiegar?

 ²¹ Assisti ala Selebrassion dela morte de Cristo. Nela note vanti de morir, lu el ga insegnà che gavemo de far la selebrassion dela so morte. Tuti i ani femo questo, che l’è ciamà Selebrassion o “Sena del Signor.” (1 Coríntios 11:20; Mateus 26:26-28) Gesù el vol che noantri se ricordemo che el ga dato la so vita perfeta come un risgate par nostro benefìssio. El ga dito: “Seité far questo in ricordo de mi.” (Lesi Lucas 22:19.) Quando ti te assisti ala Selebrassion, te dimostri che te ricordi del risgate e del grando amor de Geovà e Gesù par noantri.—Vedi la Nota Final 16.

²² El risgate l’è el pi grando regalo che gavemo ricevesto. (2 Coríntios 9:14, 15) I capìtoli 6 e 7 i ndarà spiegar come sto pressioso regalo el ndarà benefissiar anca milioni de persone che le ze morte.