Quando Geovà el ga creà la fameia, Lu el ga dato ai genitori la responsabilità de slevar su i fioi. (Colossensi 3:20) Come genitori, gavé de insegnar ai vostri fioi a amar a Geovà e a deventar adulti che i tende dele so responsabilità. (2 Timòteo 1:5; 3:15) Gavé anca de saver quel che i fioi i ga nel cuor. Sicuro che el vostro esémpio l’è tanto importante. La meio maniera de insegnar ai vostri fioi la Parola de Dio la ze meterla prima nel vostro cuor. — Salmo 40:8.

COSSA CHE LA BÌBLIA LA DISE: “Tuti i ga de esser pronti par scoltar, pensarghe vanti de parlar.” (Tiago 1:19) Sicuro che volé che i vostri fioi i se senta lìberi de parlar con valtri. Lori i ga de saver che, quando i ga bisogno de parlar, valtri sé a disposission par scoltarli. Par lori, l’è pi fàcile parlar quel che i pensa se i ze slevadi su nte un posto tranquilo. (Tiago 3:18) Se lori i cata che valtri ndaré barufar con lori o sbrontolar, fursi no i se sentirà lìberi de parlar. Gavé de esser passienti e dirghe sempre che li amé. — Mateo 3:17; 1 Corinti 8:1.

COSSA CHE PODÉ FAR:

• Gavé de esser a disposission quando i vostri fioi i vol parlar con valtri.

• Parlé sempre coi vostri fioi, nò sol quando che ghen’è un problema.

COSSA CHE LA BÌBLIA LA DISE: “A quel che el capisse ben una question ghe ndarà ben.” (Proverbi 16:20) Dele volte gavé de sforsarve par capir cossa che el vostro fiol el sente, nò sol pensar nele parole che el dise. Dele volte, i gióveni i dise de pi de quel che l’è o i dise robe che no i pensa mia. “Risponder a una question vanti de scoltar i fati l’è stùpido.” (Proverbi 18:13) No resté suito inrabiadi. — Proverbi 19:11.

COSSA CHE PODÉ FAR:

• No importa quel che i fioi i dise, gavé de scoltarli sensa parlarghe sora e gnanca restar inrabiadi.

• Ricordeve come valtri ve gavé sentio quando gavei la so età e cossa che l’era importante par valtri.

COSSA CHE LA BÌBLIA LA DISE: “Scolta, me fiol, la dissiplina de to pare e no stà mia assar de banda quel che to mare la te ga insegnà.” (Proverbi 1:8) Geovà el ga dato autorità sora i fioi tanto al pare come ala mare. Gavé de insegnarghe a obedir e scoltar a valtri. (Efesi 6:1-3) I fioi i capisse suito se i genitori no i ze unidi “nela medèsima maniera de pensar”. (1 Corinti 1:10) Se valtri no sé mia de acordo sora qualche roba, no sté parlar davanti dei fioi. Lori i podaria perder el rispeto par valtri come genitori.

COSSA CHE PODÉ FAR:

• Gavé de meterve de acordo sora come dissiplinar i fioi.

• Se valtri pensé difarente sora come slevar su i fioi, sforséve de capir un al altro.

COSSA CHE LA BÌBLIA LA DISE: “Insegna al toseto la strada che el ga de ndar.” (Proverbi 22:6) Slevar su ben i fioi no l’è mia una roba che la sucede par caso. Gavé de far una programassion par insegnar e dissiplinar i fioi. (Salmo 127:4; Proverbi 29:17) La dissiplina no la ze sol castigar, ma la vol dir anca giutar i vostri fioi a capir parché ghen’è règole. (Proverbi 28:7) Gavé anca de insegnarghe a amar la Parola de Geovà e a capir i prinsipi. (Salmo 1:2) Questo ghe giutarà a gaver una bona cossiensa. — Ebrei 5:14.

COSSA CHE PODÉ FAR:

• Sforséve par giutar i vostri fioi a veder Dio come una persona real e che lori i pol fidarse in Lu.

• Giuté i vostri fioi a ricognosser e scampar via dei perìcoli morai, come quei che i se cata nela internet o nele rede sossiai. Gavé de insegnarghe a protegerse de quei che i abusa dei toseti.