1, 2. (a) Cossa che i lìderi religiosi i ga fato contra la predicassion, ma cossa che i apòstoli i ga fato? (b)  Parché che i apòstoli no i ga mia obedio ala òrdine de fermarse de predicar?

EL PENTECOSTE del ano 33  el gavea pena sucedesto e fea poche stimane che i seghidori de Gesù i gavea scominsià la congregassion in Gerusalen. Par quela, Sàtana el ga visto che questa la era la meio ora par atacar la congregassion. Vanti che la restesse pi forte, lu el volea finirla fora. Suito, Sàtana el ga scominsià a doperar i lìderi religiosi par proar fermar la predicassion del Regno. Ma, i apòstoli i ga seità a predicar con coraio e tanti òmini e done i ga scominsià a “creder nel Signor”. — Ati 4:18, 33; 5:14.

² Nantra volta i opositori i se ga inrabià coi apòstoli e li ga metesti in preson. Ma, de note, el àngelo de Geovà el ga verto le porte dela preson e vanti di i apòstoli i era belche drio predicar nantra volta. Lori i ze stati metesti in preson nantra volta, i ze stati menadi davanti le autorità che li ga acusadi de desobedir ala òrdine par fermarse de predicar. Con coraio i apòstoli i ga dito: “Gavemo de obedir a Dio come governante vanti che ai òmini.” Quei che i gavea autorità i ze restadi tanto cativi che i volea “finirli fora”. Magari, in quela bruta situassion, un istrutor dela Lege de nome Gamaliel, che l’era tanto rispetà, el ghe ga dito ale autorità: “No sté meterve contra questi òmini, ma asseli star.” Alora, ga sucedesto una roba de gnanca creder! Le autorità le ga scoltà Gamaliel e le ga molà i apòstoli. E cossa gali fato quei òmini fedeli? Con coraio, i ga seità “sensa fermarse a insegnar e a predicar le bone notìssie sora el Cristo, Gesù”. — Ati 5:17-21, 27-42; Prov. 21:1, 30.

3, 4. (a) Cossa che Sàtana el ga fato e ancora el fà par ndar contra el pòpolo de Dio? (b) Cossa che ndemo veder in questo e nei altri due capìtoli?

³ Nel ano 33, l’è stà sol la prima volta che la congregassion cristiana la ga infrontà oposission dele autorità. (Ati 4:5-8; 16:20; 17:6, 7) Anca ancoi, Sàtana el seita proar fermar la predicassion e el dopera quei che i ze contra la vera adorassion par influensar le autorità a ndar contra noantri. Questi opositori i acusa el pòpolo de Dio de far diverse robe sbaliade. Par esémpio, lori i dise che noantri femo confusion e problemi ai altri. Anca i dise che proemo influensar altre persone a desobedir al governo e che noantri ndemo in volta par vender qualcossa par guadagnar soldi. Par quela, diverse volte i nostri fradei i ze ndati ai tribunai mostrar che queste robe no le ze mia vera. Ma, quale che le ze state le dessision nei tribunai? Come che queste dessision de tanti ani indrio le fà difarensa nela to vita ancoi? Vedemo arquanti esempi che i mostra come quele dessision le ga giutà a “difender la predicassion dele bone notìssie”. — Fil. 1:7.

⁴ In questo capìtolo ndemo veder come el nostro dirito de predicar l’è stà difendesto. I due capìtoli avanti i mostrarà diverse situassion nei tribunai che le ne ga giutà a nò far parte del mondo e a viver de acordo coi prinsipi del Regno de Dio.

5. Parché che tanti fradei i ze stati metesti in preson intrà i ani 1930 e 1940? Cossa che i fradei che i gavea responsabilità nela congregassion i ga pensà de far?

⁵ Intrà i ani 1930 e 1940, tanti stati e cità dei Stati Unidi dela Amèrica i ga proà obrigar le Testimònie de Geovà a gaver una autorisassion, o permission, del governo par predicar. Ma i nostri fradei no i ze ndati in serca de questa permission. El governo el podaria finirla de colpo e lori anca i savea che gnanca un governo el gavea la autorità par fermarli de obedir ala òrdine de Gesù de predicar el messàgio del Regno. (Mar. 13:10) Par quela, tanti predicadori i ze stati metesti in preson. I fradei che i gavea responsabilità nela congregassion i ga pensà de ndar ai tribunai e mostrar che el governo el gavea fato tante proibission contra la lege e contra i diriti dei fradei. El governo el ga proà fermar le Testimònie de Geovà de praticar la so religion. Una dessision fata nel ano de 1938 la ze stata un esémpio che ga giutà in altri casi che i ze vegnesti fora dopo. Cossa ga sucedesto?

6, 7. Cossa che ga sucedesto cola fameia Cantwell?

⁶ Tuti dela fameia del fradel Newton Cantwell i era pionieri spessiai: lu, che el gavea 60 ani, la so dona Esther e i so fioi Henry, Russell e Jesse. Nel marti de matina del giorno 26 de april de 1938, lori i ze ndati predicar nela cità de New Haven, Connecticut. Lori i se ga parecià par star de pi de un giorno fora. Ma come i era belche stati metesti in preson diverse volte, lori i savea che questo podaria suceder nantra volta. Ancora cossita, no i se ga mia tirà indrio de ndar predicar parché i volea pròpio de cuor parlar el messàgio del Regno. Lori i ze ndati a New Haven con due auti. Newton l’era ndà col auto dela fameia che l’era pien de publicassion e fonògrafi, e Henry, che el gavea 22 ani, l’era ndà col auto de son. E come i spetea, la polìssia li ga fermadi dopo de poche ore.

⁷ Prima Russell, che el gavea 18 ani, l’è stà metesto in preson. Dopo, anca Newton e Esther. Jesse, che el gavea 16 ani, el ga visto de distante che la polìssia la gavea menà via so pare, so mare e so fradel. Alora, Jesse l’è restà lu sol, parché so fradel Henry l’era drio predicar de quel’altra banda dela cità. Ancora cossita, Jesse el ga ciapà el so fonògrafo e el ga seità predicar. Lu el ga sonà el discorso “Nemighi” del fradel Rutherford a due òmini catòlichi che i gavea acetà scoltarlo. Ma, lori i ze restadi tanto inrabiadi con Jesse e con quel che i ga scoltà, che i ga volesto ciaparlo par darghe su. Ma, Jesse el ga seità calmo e pin pian l’è stà bon de ndar via. Pena dopo, la polìssia lo ga catà e anca lu l’è stà metesto in preson. El fradel Newton e i so fioi i ze stati acusadi par la polìssia, ma la sorela Esther nò. Lori i ga pagà el prèssio par esser libertadi e ze stati moladi in quel medèsimo giorno.

8. Parché che Jesse l’è stà colpà de far confusion?

⁸ Dopo de pochi mesi, in setembre de 1938, la fameia Cantwell la ze stata giulgada nel tribunal dela cità de New Haven. Lori i ga acusà i fradei Newton, Russell e Jesse de domandar donativi sensa una autorisassion dela lege. La fameia la ga portà el so caso al tribunal de Connecticut. Ma ancora cossita, Jesse l’è stà colpà de far e motivar altri a far confusion. Quei due òmini catòlichi i ga dito che quel discorso che i gavea scoltà ga ofendesto la so religion e par quela lori i ze restadi cativi. Alora, i fradei responsàbili par la nostra organisassion i ga domandà che Jesse el fusse giulgà nel Supremo Tribunal dei Stati Unidi, la autorità pi importante par giulgar nel paese.

9, 10. (a) Cossa che el Supremo Tribunal dei Stati Unidi el ga dessidio nel caso dela fameia Cantwell? (b) De che maniera questo ne giuta fin ancoi?

⁹ El giulgamento el ga scominsià nel giorno 29 de marso de 1940. Charles E. Hughes, el presidente del tribunal, e altri oto giuisi i ga scoltà quel che el fradel Hayden Convington, un dei advogadi dele Testimònie de Geovà, el ga dito. * Dopo, el advogado de Connecticut el ga proà mostrar che le Testimònie de Geovà le fea confusion. Alora, un giuis el ga domandà: “Elo mia vera che le persone no le acetea el messàgio che Gesù Cristo el ga proclamà nei so giorni?”. El advogado el ga rispondesto: “Si che l’è vera. E anca me par che la Bìblia la dise cossa che ga sucedesto con Gesù par causa de questo messàgio.” Varda che roba! Lu no’l se ga gnanca nicorto che el ga parlà che le Testimònie de Geovà le era come Gesù e el governo de Connecticut l’era come quei che i gavea colpà Gesù. Cossita, nel giorno 20 de maio de 1940, tuti i giuisi del tribunal i ga dessidio che le Testimònie de Geovà le gavea rason.

¹⁰ Qual che l’è stà el resultà de questa dessision del Tribunal? Questa dessision la ga assà pi forte el dirito che le persone le ga de praticar la religion. Cossita, gnanca un governo, sìpia dela cità, del stado o del paese, el gavarà la autorità de ndar contra la libertà dele persone de praticar la so religion. El Tribunal anca el ga assà ciaro che Jesse “no’l ga fato gnente contra la pace e no’l ga mai fato confusion”. Questa dessision la ga provà che le Testimònie de Geovà no le fà mia problemi e gnanca confusion. Semo sicuri che questa la ze stata una dessision pròpio bela e importante par el pòpolo de Dio! De che maniera questo ne giuta fin ancoi? Un fradel che l’è advogado el ga dito: “Gavemo el dirito de praticar la nostra religion con libertà e sensa paura che qualche ingiustìssia la ne ferme. Par quela, ancoi, noantri Testimònie de Geovà, podemo proclamar un messàgio de speransa a tute le persone ndove semo de star.”

11. Che distribussion spessial i nostri fradei i ga fato nel Canadà e parché?

¹¹ Intrà i ani 1940 e 1950, le Testimònie de Geovà le ga infrontà una granda oposission. Par quela, nel ano de 1946 i fradei i ga fato una distribussion spessial de 16 giorni del foieto La Ràbia de Chebec Contra Dio, Cristo e la Libertà la ze una Vergogna par Tuto el Canadà. Lori i ga fato sforso par darghe ale persone questo foieto par farghe saver dela mancansa de rispeto del governo contra la libertà de adorassion. Questo foieto de quatro pàgine el ga parlà dele confusion che i lìderi religiosi i insentivea, dela violensa dela polìssia e dela mùcia de persone violente contra i fradei in Chebec. El foieto el disea che, ancora che fusse contra la lege, lori i ga seità meter in preson le Testimònie de Geovà. Anca el disea che, sol in Montreal, ghen’era intorno de 800 acusassion contra le Testimònie de Geovà.

12. (a) Cossa che i ga fato contra la distribussion spessial del foieto? (b) Che acusassion lori i ga fato contra i nostri fradei? (Varda anca la nota.)

¹² Maurice Duplessis, el primo ministro de Chebec, e Villeneuve, el cardeal catòlico romano, i se ga metesto insieme contra la distribussion spessial de quel foieto. Lori i ga dito che i faria una “bruta guera” contra le Testimònie de Geovà. Prima ghen’era 800 acusassion contra i fradei, ma presto ghen’era 1.600. Una pioniera la ga dito: “Noantri no savéino gnanca quante volte semo stati metesti in preson”. Quando la polìssia la ga visto che i fradei i era drio darghe ale persone quel foieto, li ga acusadi de “influensar i altri a ndar contra el governo”. *

13. Intrà i fradei che i ze stati acusadi de ndar contra el governo, chi che i ze stati i primi a esser giulgadi? Cossa che el Tribunal el ga dessidio?

¹³ Nel ano de 1947, el fradel Aimé Boucher e le so fiole Gisèle, de 18 ani, e Lucille, de 11 ani, i ze stati i primi a esser menadi al tribunal par causa dela acusassion de esser contra el governo. Lori i gavea dato ale persone el foieto La Ràbia de Chebec darente la so colònia, che la era nele montagne al sud dela cità de Chebec, ma lori no i era mia rebelde. El fradel Boucher l’era bona gente e una persona sémplisse che tendea dela so colònia e, dele volte, el ndea de careta fin la cità. Ancora cossita, lori i ze stati pròpio mal tratadi, come disea el foieto. El giuis el odiea le Testimònie de Geovà, e no’l ga acetà quando i ga proà mostrar che la fameia la era inossente. Invesse, lu el ga acetà la acusassion che quel foieto el influensea le persone a esser violente. Alora, l’era come se el giuis el gavesse dessidio che l’è un crime parlar la verità. Aimé e Gisèle i ze stati colpadi de influensar i altri a restar contra el governo e i ze stati condanadi. Anca la toseta Lucille la ze stata metesta in preson par due giorni. I fradei i ga portà el caso al Supremo Tribunal del Canadà, la autorità pi importante par giulgar nel paese, che l’è stato de acordo de giulgar el caso.

14. Cossa che i fradei de Chebec i ga fato quando i ze stati perseghidi?

¹⁴ Intanto che tuto questo sucedea, i fradei de Chebec i ze stati coraiosi e i ga seità a predicar, ancora che ghen fusse tuta quela violensa. Ma, tante robe bone le ga sucedesto. Vanti de scominsiar la distribussion spessial del foieto ghen’era sol 300 Testimònie de Geovà, ma dopo de quatro ani ghen’era 1.000! *

15, 16. (a) Cossa che i giuisi del Supremo Tribunal del Canadà i ga dessidio nel caso dela fameia Boucher? (b) Che boni resultadi i nostri fradei e le altre persone i ga bio dopo de questa dessision?

¹⁵ Nel giugno de 1950, i nove giuisi del Supremo Tribunal del Canadà i ga scominsià a studiar el caso dela fameia Boucher. E sei mesi dopo, in 8 de disembre de 1950, i giuisi i ga dessidio che la fameia no la gavea la colpa. Parché che i ga fato questa dessision? El fradel Glen How, advogado dele Testimònie de Geovà, el ga spiegà che el Tribunal el ga dito che qualchedun sol podaria esser colpà de ndar contra el governo se el insentivesse la violensa o se el fesse qualcossa contra el governo. Ma el foieto l’era sol una maniera de parlar quel che le persone le pensa sora un assunto de acordo cola lege. El fradel Glen How anca el ga dito: “Mi go visto pròpio come Geovà el ne ga dato la vitòria in questo caso.” *

¹⁶ Quel che el Tribunal el ga dessidio l’è stà una granda vitòria par el Regno de Dio. Dopo de questa dessision, lori no i gavea mia motivi par ndar avanti con quei altri 122 casi che acusea le Testimònie de Geovà in Chebec de ndar contra el governo. Questa dessision la ga dato a tuti del Canadà e dela Comunità Britànica la libertà de dir quel che i pensa sora el governo. Questo l’è stà un bel colpo contra la Ciesa e el governo de Chebec, che i se gavea metesto insieme contra i diriti dele Testimònie de Geovà. *

17. Cossa che arquanti governi i proa far contra la predicassion?

¹⁷ Compagno i primi seghidori de Gesù, noantri semo servi de Dio, e “no semo mia vendedori dela Parola de Dio”. (Ledi 2 Corinti 2:17.) Ancora cossita, ghen’è governi che i proa intrigar la nostra predicassion par meso de lege che le ze state fate par el comèrsio. Adesso, ndemo veder due casi che i ze stati giulgadi e che i mostra se le Testimònie de Geovà le ze vendedore o predicadore del Regno.

18, 19. Cossa che le autorità nela Dinamarca le ga fato par proar fermar el laoro de predicassion?

¹⁸ Dinamarca. Nel giorno 1.° de otobre de 1932, una lege la ga proibio de vender publicassion stampade sensa autorisassion. Ma i nostri fradei no i ga mia domandà questa autorisassion. Nel giorno dopo, sinque fradei i ga predicà tuto el di nela cità de Roskilde, che la ze intorno de 30 chilòmetri distante dela capital dela Dinamarca. Nel fin del giorno, nissuni i catea el fradel August Lehmann. Lu l’è stà metesto in preson acusà de vender publicassion sensa gaver una autorisassion.

¹⁹ El fradel Lehmann l’è stà giulgà nel giorno 19 de disembre de 1932. Lu el ga dito che el gavea pròpio visità arquante persone e che el ghe gavea mostrà publicassion, ma no l’era mia drio venderle. El tribunal de quela cità l’era de acordo e el ga dito: “Quel che l’è stà acusà l’è bon de mantegnerse, e lu no l’è drio guadagnar soldi con questo laoro, gnanca el vol guadagnar. Invesse, lu l’è drio guastar dei so soldi par predicar.” El tribunal el ga dito che le Testimònie de Geovà no le gavea mia colpa e che la predicassion che el fradel l’era drio far no la era “compagno el laoro del comèrsio”. Ma, i nemighi de Dio i ga seità a ndar contra el so pòpolo par fermar la predicassion in tuto el paese. (Sal. 94:20) El advogado de acusassion el ga portà questo caso a altri tribunai fin al Supremo Tribunal del paese. Cossa che i fradei i ga fato?

20. Cossa che el Supremo Tribunal dela Dinamarca el ga dessidio, e cossa che i fradei i ga fato?

²⁰ Nela stimana vanti del giulgamento nel Supremo Tribunal, tuti i fradei nela Dinamarca i ga fato un laoro ancora pi grando de predicassion. Nel marti, giorno 3 de otobre de 1933, el Supremo Tribunal el ga anunsià che el fradel Lehmann no’l gavea desobedio ala lege. La so dessision la ze stata de acordo con quelaltro tribunal. Questa dessision la ga assà i fradei predicar de maniera lìbera. Par quela, i ga seità a far ancora de pi nela predicassion. Fin ancoi, i nostri fradei nela Dinamarca i seita a predicar sensa che el governo el proe fermarli.

21, 22. Cossa che el Supremo Tribunal el ga dessidio nel caso del fradel Murdock?

²¹ Stati Unidi. Nela doménega de 25 de febraro de 1940, el fradel Robert Murdock Jr., che l’era pioniero, e altri sete fradei i ze ndati predicar in Jeannette, una cità darente de Pittsburgh, nela Pensilvània. Lori i ze stati metesti in preson e condanadi parché no i gavea la autorisassion par vender publicassion. Quando i ga portà el caso al Supremo Tribunal dei Stati Unidi, el tribunal el ga acetà studiar el caso.

²² Nel giorno 3 de maio de 1943, el Supremo Tribunal el ga dessidio che le Testimònie de Geovà no le gavea mia colpa e che lore no le podea esser obrigade a gaver quela autorisassion parché questo ndaria “tirarghe un dirito che le lege pi importante del paese le ghe dea”. El Tribunal el ga finio con quela lege parché la ndea “contra la libertà de far e distribuir publicassion e anca contra la libertà de praticar una religion”. El giuis William O. Douglas el ga dito che quasi tuti nel tribunal i era de acordo con quel che le Testimònie de Geovà le fea e che el so laoro “l’è de pi che sol predicar o darghe publicassion ai altri parché lore le fà tuti due”. Lu anca el ga dito: “Quel che lore le fà nela so adorassion a Dio l’è tanto importante come quel che se fà nela adorassion e predicassion nele ciese.”

23. Parché che le dessision dei tribunai de 1943 le ze importante fin ancoi?

²³ Questa dessision del Supremo Tribunal la ze stata una vitòria tanto importante par el pòpolo de Dio parché la ga provà pròpio quel che noantri semo: seghidori de Cristo e nò vendedori. In quel giorno tanto importante, nel ano de 1943, el Supremo Tribunal el ga dessidio che le Testimònie de Geovà no le gavea colpa in 12 de 13 casi che el ga giulgà. Intrà questi ghen’era el caso del fradel Murdock. Queste dessision le ze state un esémpio che el ga giutà in altri casi che ga sucedesto pi avanti, quando altri i ga proà tirar via el nostro dirito de predicar a tuti e de casa in casa el messàgio del Regno.

24. Cossa che femo quando i governi i proìbe la nostra predicassion?

²⁴ Noantri restemo pròpio contenti quando i governi i ne assa predicar el messàgio del Regno con libertà. Ma, quando i governi i proìbe la nostra predicassion noantri cambiemo la maniera de predicar e seitemo a far questo de altre maniere che se pol. Come i apòstoli i ga dito “gavemo de obedir a Dio come governante vanti che ai òmini”. (Ati 5:29; Mat. 28:19,20) Nantra roba che femo l’è ndar ai tribunai e domandarghe par finir cola proibission del nostro laoro. Vedemo due esempi.

25, 26. Parché che i fradei dela Nicaràgua i ga domandà al Supremo Tribunal par far un giulgamento? Cossa che ga sucedesto dopo?

²⁵ Nicaràgua. Nel giorno 19 de novembre de 1952, el fradel Donavan Munstermann, che l’era missionàrio e el laorea par la filial, l’è ndà al Departamento de Imigrassion in Manàgua, la capital del paese. Lu l’è ndà là parché el capitan Arnoldo García, el responsàbile par quel departamento, lo gavea ciamà. Lu el ga dito al fradel Donavan che tute le Testimònie de Geovà nela Nicaràgua le era “proibide de parlar de quel che le credea e de far el so laoro religioso”. El fradel Donavan el ga domandà al capitan la rason e lu el ghe ga spiegà che el ministro del governo el ghe gavea proibio e che lore le era state acusade de esser comuniste. Chi che ga acusà le Testimònie de Geovà? I lìderi religiosi dela Ciesa Catòlica Romana.

²⁶ El fradel Donavan el ga suito portà el caso al Ministero del Governo e dele Religion e anca al presidente Anastasio Somoza García, ma l’è stà par gnente. Alora, i fradei i ga cambià quel che i era drio far. Par esémpio, lori i ga serà i Saloni del Regno, i ga scominsià a far le riunion con manco persone e i se ga fermà de predicar in pùblico. Ma, no i se ga mai fermà de predicar el messàgio del Regno. Lori anca i ga domandà al Supremo Tribunal dela Nicaràgua, par meso de un registro, par finir con quela proibission. Tanti giornai i ga scrito sora questa proibission e anca sora quel che i fradei i gavea domandà, e el Supremo Tribunal el ga acetà studiar el caso. Alora, cossa che ga sucedesto dopo? Nel giorno 19 de giugno de 1953, el Supremo Tribunal el ga parlà che tuti i giuisi i gavea dessidio che le Testimònie de Geovà no le gavea mia colpa. Anca el ga dessidio che quela proibission la ndea contra la libertà de cossiensa, e anca de parlar e de praticar quel che le crede. El Tribunal el ga ordinà che el governo dela Nicaràgua e le Testimònie de Geovà i tornesse a gaver una bona relassion.

27. Parché che la dessision del Tribunal la ze stata una sorpresa par le persone dela Nicaràgua? (b) Cossa che i fradei i ga catà de questa dessision?

²⁷ I lìderi religiosi dela Nicaràgua i gavea tanta influensa, e le autorità del governo le gavea tanto poder. Alora, el Tribunal quasi sempre dessidia de acordo con lori. Par quela, l’è stà una roba de gnanca creder par le persone dela Nicaràgua quando le ga savesto che el Supremo Tribunal el gavea dessidio che le Testimònie de Geovà no le gavea mia colpa. Cossita, i nostri fradei i era sicuri che i ga bio quela vitòria parché el nostro Rè el ghe gavea dato protession e lori no i se gavea mai fermà de predicar. — Ati 1:8.

28, 29. Che cambiamenti ga sucedesto nel Zaire in 1980?

²⁸ Zaire. Nei ani de 1980, ghen’era intorno de 35 mila Testimònie de Geovà nel Zaire, che adesso el ga nome Repùblica Democràtica del Congo. Come ghen’era sempre tanto de far nele atività del Regno, la organisassion la ga scominsià a far su predi novi. In disembre de 1985, l’è stà fato un congresso internassional con 32 mila persone in Kinshasa, la capital del paese. Ma la situassion dei servi de Geovà la ga scominsià a cambiar tanto. Cossa ga sucedesto?

²⁹ El fradel Marcel Filteau, missionàrio de Chebec, el gavea infrontà perseghission nel tempo che Duplessis el governea el Canadà. Dopo, lu l’è ndà servir come missionàrio nel Zaire e el conta quel che ga sucedesto: “Nel giorno 12 de marso de 1986, i fradei che i era responsàbili par la predicassion in quel paese i ga ricevesto una carta che la assossiassion dele Testimònie de Geovà la era proibia.” El presidente del paese, Mobutu Sese Seko, el gavea aprovà questa proibission.

30. Cossa che la Comission de Filial la gavea de dessider e cossa che la ga dessidio?

³⁰ Nel giorno drio, la ràdio del paese la ga anunsià: “Mai pi sentiremo gnente sora le Testimònie de Geovà nel [Zaire].” Suito, ga scominsià la perseghission. I ga finio fora coi Saloni del Regno, i ga robà i fradei, li ga metesti in preson e i ghe ga dato una fila de bote. Nel giorno 12 de otobre de 1988, el governo el ga ciapà quel che la organisassion la gavea e el esèrsito el ga scominsià a doperar la propietà che fea parte dela sede. I fradei che i gavea responsabilità nela organisassion i ga proà parlar col presidente, ma l’è stà par gnente. La Comission de Filial la gavea de far una dessision importante: “Sarà che i gavea de portar el caso al Supremo Tribunal o spetar un poco de pi?” Timothy Holmes, che l’era missionàrio e cordinador dela Comission de Filial de quel tempo el ga dito: “Ghemo pregà a Geovà par la so orientassion e par gaver sabedoria.” Dopo che i ga pensà sora e pregà sora el assunto, la Comission la ga visto che no l’era la ora giusta de portar el caso al Tribunal. Invesse, lori i ga tendesto dei fradei e i ga proà catar fora altre maniere de seitar predicar.

31, 32. Cossa che el Supremo Tribunal del Zaire el ga dessidio? (b) Che boni resultadi i nostri fradei e le altre persone i ga bio dopo questa dessision?

³¹ Dopo de arquanti ani, manco persone le parlea contra le Testimònie de Geovà e ghen’era de pi rispeto par i diriti che le persone le podea gaver nel paese. Alora, la Comission de Filial la ga visto che l’era el tempo giusto de portar el caso al Supremo Tribunal del Zaire par causa dela proibission. I fradei no i spetea, ma el tribunal l’è stà de acordo in studiar el so caso. Alora, nel giorno 8 de genaro de 1993, sete ani dopo che el presidente el ga autorisà la lege, el Tribunal el ga dessidio che quel che el governo el gavea fato contra i fradei l’era contra la lege. Cossita, i ga finio cola proibission dela òpera dela organisassion. Pènsaghe sora quel che gavea sucedesto. Lori i gavea metesto la so vita in rìscio parché i ga finio cola dessision del presidente. El fradel Timothy el ga dito: “Intanto che se spetea la dessision del giuis del Tribunal, ghemo visto come Geovà el pol cambiar tuto.” (Dan. 2:21) Questa vitòria la ga fato la fede dei fradei ancora pi forte. Lori i ga pròpio visto come el Rè Gesù l’era drio guidar el so pòpolo par saver cossa far e quando far.

³² Sensa la proibission, adesso la Filial la podea far su predi novi, ricever publicassion e ricever missionari par far la predicassion. * Sicuro che i servi de Dio i resta contenti de veder come Geovà el tende del so pòpolo de maniera spiritual! — Isa. 52:10.

33. Cossa che imparemo de quel che ga sucedesto nei tribunai?

³³ Quando vedemo quel che ga sucedesto nei tribunai, semo boni de capir che Gesù l’è drio far quel che el ga prometesto: “Tuti i vostri nemighi no i sarà boni de parlar gnente contra valtri parché mi ve darò sabedoria e mi ve giutarò a saver cossa dir.” (Ledi Luca 21:12-15.) Dele volte, Geovà el dopera persone come Gamaliel par proteger el so pòpolo, e anca giuisi e advogadi che i difende con coraio quel che l’è giusto. Geovà no’l assa che gnanca una arma dei nostri nemighi la vae ben contra noantri. (Ledi Isaia 54:17.) La òpera de Dio no la se fermarà gnanca che ghen sìpia oposission.

34. Parché che l’è de maraveiarse cole nostre vitòrie nei tribunai? Cossa che questo assa ciaro? (Vedi anca el quadro “ Vitòrie importante nei tribunai le ga giutà la predicassion.”)

³⁴ Parché che l’è de maraveiarse cole nostre vitòrie nei tribunai? Le Testimònie de Geovà no le ze persone che le ga poder e gnanca le ze importante par el mondo. Noantri no votemo par scòlier un polìtico, no restemo dela banda dei governi de questo mondo e gnanca se metemo in meso la polìtica. Anca, quando una Testimònia de Geovà la ze giulgada nei tribunai importanti, quasi sempre la ze vista par i altri come una persona fiaca e sensa stùdio. (Ati 4:13) Par quela, tante persone le pensa che saria meio che i tribunai i fesse le dessision de acordo con quel che i governi e i lìderi religiosi i vol, invesse de giutarne. Ma tante volte, lori i ne giuta cole so dessision. Queste vitòrie le assa ciaro che ghemo la aprovassion de Dio e semo insieme de Cristo. (2 Cor. 2:17) Cossita, compagno a Paolo anca noantri semo sicuri che “Geovà l’è quel che me giuta, no gavarò mia paura.” — Ebr. 13:6.