LESSION 15

Elo chi Gesù?

SONAR

Elo chi Gesù?

Quasi tuti i ga belche scoltà parlar sora Gesù. Ma tanti i sa pròpio poco sora lu e i parla robe difarente un del altro. Vedemo cossa dise la Bìblia sora Gesù.

1. Elo chi Gesù?

Gesù l’è nel cielo e l’è un àngelo che el ga tanto poder. La Bìblia la dise che Geovà el ga creà Gesù prima che tute le altre robe. Alora, Gesù l’è stà la prima creassion de Dio. (Colossensi 1:15) La Bìblia anca la dise che Geovà el ga sol Gesù de Fiol. (Gioani 3:16) Parché sol lu? Parché Geovà el ga creà lu sol a Gesù, e dopo, Gesù el ga giutà so Pare a crear tute le altre robe. (Ledi Proverbi 8:30.) La Bìblia anca la dise che Gesù l’è “la Parola”, o sia, lu el parla ai altri sora le lege de Dio e tuto quel che lu el vol. (Gioani 1:14) Alora, podemo dir che ghen’è tanto amor intrà Geovà e Gesù.

2. Parché Gesù l’è vegnesto ala Tera?

De pi de 2.000 ani indrio, Geovà el ga fato un miràcolo. Par meso del so spìrito santo, lu el ga fato che una dona, de nome Maria, restesse gràvida. Alora, Gesù l’è nassesto qua nela Tera come un bambin. (Ledi Luca 1:34, 35.) Geovà el ga mandà Gesù ala Tera par realisar le professie sora el Messia, ciamà Cristo, e anca par salvar le persone. a Gesù el ga fato tuto quel che l’era scrito nela Bìblia sora el Messia. Cossita, le persone le podea esser sicure che Gesù l’era el Cristo, el Fiol de Dio. — Mateo 16:16.

3. Ndove Gesù l’è adesso?

Dopo che Gesù l’è morto, l’è stà ressussità come un àngelo e l’è tornà al cielo. Nel cielo, Geovà el ghe ga dato un posto pi importante de quel che el gavea vanti. (Filipensi 2:9) Adesso lu l’è un àngelo tanto poderoso, e sol Geovà el ga de pi poder che lu.

IMPARA DE PI!

Elo chi Gesù, e parché che ghemo de imparar de pi sora lu?

4. Gesù no l’è Geovà Dio

La Bìblia la insegna che Gesù l’è un àngelo tanto poderoso nel cielo, ma anca cossita, lu el obedisse al so Dio e Pare, Geovà. Come che lo savemo? Vardé el VÌDEO par veder che la Bìblia la dise che Gesù e Dio no i ze la medèsima persona.

VÌDEO: Gesù e Dio i ze la medèsima persona? (3:22)

I testi dela Bìblia che ghen’è qua soto i ne giuta a capir che Geovà e Gesù i ze persone difarente. Ledé i testi, e dopo, parlé sora le domande:

Ledé Luca 1:30-32.

Come quel che ga dito el àngelo ne giuta a capir la difarensa intrà Gesù e Geovà?

Ledé Mateo 3:16, 17.

Quando Gesù l’era drio batesarse, cossa la voce del cielo la ga dito?
Chi che l’era drio parlar?

Ledé Gioani 14:28.

Nte una fameia, chi l’è el pi vècio e el ga de pi autorità? El pare o el fiol?
Gesù el ga ciamà a Geovà de Pare. Cossa che imparemo de questo?

Ledé Gioani 12:49.

Sarà che Gesù el pensa che l’è Dio? Cossa che ti te pensi?

5. Robe che ne assa sicuri che Gesù l’era el Messia

La Bìblia la ga tante professie che le ga giutà le persone a saver chi che l’era el Messia, o sia, quel che Dio el gavea scoliesto par salvar le persone. Vardé el VÌDEO par imparar sora arquante professie che Gesù el ga realisà quando l’è vegnesto ala Tera.

VÌDEO: Le professie sora Gesù le se ga realisà (3:03)

Ledé queste professie e dopo, parlé sora questo:

Ledé Michea 5:2 par saver ndove ndaria nasser el Messia. b

Questa professia la se ga realisà? — Mateo 2:1.

La Bìblia la gavea belche dito tante robe sora la morte del Messia. Par veder arquante de queste professie, ledé Salmo 34:20 e Zacaria 12:10.

Queste professie le se ga realisà? — Gioani 19:33-37.
Te pensi che Gesù el ga fato queste robe aposta sol par realisar queste professie?
Questo te ga assà sicuro de cossa sora Gesù?

6. Parché che l’è tanto importante imparar sora Gesù?

La Bìblia la mostra che l’è tanto importante imparar sora Gesù e sora quel che Geovà el ghe domanda de far. Ledé Gioani 14:6 e 17:3, e dopo, parlé sora questo:

Parché che l’è tanto importante imparar sora Gesù?

Gesù el ga verto la strada par noantri esser amighi de Dio. Gesù el ne ga insegnà la verità sora Dio e par meso de lu podaremo gaver la vita eterna

FURSI TE GHÈ BELCHE SCOLTÀ: “Le Testimònie de Geovà no le crede in Gesù.”