LESSION 16

Cossa che Gesù el ga fato qua nela Tera?

SONAR

Quando le persone le scolta parlar sora Gesù, tante le pensa nte un bambin pena nassesto, nte un profeta con tanto saver o nte un omo che l’è drio morir. Ma quando studiemo sora la vita de Gesù qua nela Tera, podemo imparar tanto sora lu. In questa lession, ndaremo imparar sora arquante robe importante che Gesù el ga fato qua nela Tera e come le pol giutarne ancoi.

1. Che laoro l’era pi importante par Gesù?

El laoro pi importante par Gesù l’era parlar sora le bone notìssie del Regno de Dio. (Ledi Luca 4:43.) Gesù el parlea ale persone che el Regno, o el governo de Dio, el ndaria finir fora con tuti i problemi che ghen’è. a Nei so ùltimi tre ani e meso qua nela Tera, Gesù el ga doperà la so vita par parlar tuto quel che el podea sora questo Regno. — Mateo 9:35.

2. Parché che Gesù el ga fato miràcoli?

La Bìblia la parla che Geovà el ga fato tanti miràcoli par meso de Gesù. (Ati 2:22) Par esémpio, lu l’è stà bon de fermar una tempesta, darghe de magnar a miliari de persone, guarir maladi e ressussitar morti. (Mateo 8:23-27; 14:15-21; Marco 6:56; Luca 7:11-17) I miràcoli de Gesù i provea che Dio lo gavea mandà, e che Geovà el pol finir fora con tuti i nostri problemi.

3. Cossa che podemo imparar del esémpio de Gesù?

Gesù el ga sempre obedio a Geovà. (Ledi Gioani 8:29.) Lu el ga fato questo, anca che ghe fesse fadiga. Fin la so morte, Gesù el ga seità a far tuto quel che Geovà el ghe gavea mandà far. Cossita, Gesù el ga mostrà che anca noantri podemo servir a Dio, ancora che infrontemo dificoltà. Sicuro che Gesù el ne ga assà un bel esémpio! — 1 Piero 2:21.

IMPARA DE PI!

Come che l’era el laoro che Gesù el fea, e come el ga fato i so miràcoli?

4. Gesù el parlea ale persone sora le bone notìssie del Regno de Dio

Gesù el ga caminà sentene de chilòmetri par parlar dele bone notìssie a tute le persone che lu el podea. Ledé Luca 8:1, e dopo, parlé sora questo:

Sarà che Gesù el spetea che le persone ndesse catarlo par parlar a lore sora el Regno?
Cossa che Gesù el fea par catar le persone?

Dio el gavea belche dito che Gesù, o el Messia, el ndaria parlar dele bone notìssie ale persone. Ledé Isaia 61:1, 2, e dopo, parlé sora questo:

Come che Gesù el ga realisà questa professia?
Te pensi che anca ancoi le persone le ghe ocore scoltar queste bone notìssie?

5. Gesù el ga insegnà tante robe importante

Gesù el ga parlà ale persone sora le bone notìssie del Regno de Dio e anca el ghe ga dato tanti bei consili. Vedemo arquanti consili che lu el ga dato nte un discorso che el ga fato nte un monte. Ledé Mateo 6:14, 34 e 7:12, e dopo, parlé sora questo:

Che bei consili de Gesù catemo in questi versìcoli?
Te pensi che questi consili i pol giutar le persone ancoi?

6. Gesù el ga fato miràcoli

Geovà el ga dato a Gesù poder par far tanti miràcoli. Par veder un esémpio, ledé Marco 5:25-34 o vardé el VÌDEO. Dopo, parlé sora questo.

VÌDEO: Una dona la ze stata curada par Gesù (5:10)

Ancora che la dona la fusse tanto malada, de cossa la era sicura?
Cossa che te ga piasesto de pi in questo miràcolo?

Ledé Gioani 5:36, e dopo, parlé sora questo:

De cossa i miràcoli de Gesù i ne assa sicuri?

Seto questo?

Quasi tuto quel che savemo sora la vita de Gesù qua nela Tera l’è nei Vangeli de Mateo, Marco, Luca e Gioani. In cada libro, ghen’è robe che quelaltro no’l ga mia dito. Alora, quando ledemo tuti i quatro Vangeli, podemo capir tante robe sora come che l’era la vita de Gesù qua nela Tera.

MATEO

L’è stà el primo Vangelo a esser scrito e el parla tanto sora quel che Gesù el ga insegnà. Questo libro el mostra che Gesù el parlea tanto sora el Regno de Dio.
MARCO

L’è el libro pi pìcolo dei quatro Vangeli. Questo libro el parla sora tante dele robe che le ga sucedesto e come che le ga sucedesto.
LUCA

Questo libro el mostra che pregar l’era tanto importante par Gesù, e anca el mostra come che Gesù el tratea le done.
GIOANI

Questo libro el mostra tante dele ciàcole che Gesù el ga bio coi so amighi e cole altre persone. Questo ne giuta a capir come che Gesù l’era.