Fà pi forte la to motivassion

“La roba pi importante de quei che i ze boni de fermarse de fumar l’è voler pròpio far cossita.” — “Stop Smoking Now!” (“Férmate de fumar adesso!”)

IN POCHE parole, se te vol fermarte de fumar, te ghè al manco de gaver una forte motivassion. Come che te pol farlo? Vanti, varda come che la to vita la pol restar meio sensa el sigro.

Te ndarè sparagnar i soldi. In arquanti paesi fumar una cartera de sigri par giorno pol costar miliari de dòlari par ano. “Mi no era nicorta de quanti soldi mi butea via con sigri.” — Gyanu, Nepal.

Te ndarè goder de pi la vita. Regina, dela Àfrica del Sud la ga dito: “La me vita la ga scominsià quando me go fermà de fumar, e la ze drio restar cada volta meio.” Quando una persona la se ferma de fumar, la sente tanto de pi el gusto e el profumo dele robe, e tante volte la ga de pi disposission e la resta pi bela.

La to salute la restarà meio. “Òmini e done de tute le età che i se ferma de fumar, suito i resta con una salute meio.” — Sentro de Controle e Prevension de Malatie dei Stati Uniti.

Te ndarè fidarte de pi in ti stesso. “Me go fermà de fumar parché mi no volea che el sigro el me controlesse. Mi che volea gaver el controlo del me corpo.” — Henning, Dinamarca.

Sarà meio par la to fameia e i to amighi. “Fumar . . . fà mal ala salute dele persone che le ze intorno de ti .  . . Studi i mostra che tuti i ani miliari de persone che le vive intorno de quei che i fuma i more de càncaro de palmoni e de malatie del cuor.” — Sossietà Americana del Càncaro.

El to Creador el restarà contento. “Me cari,  . . . ghemo de netarse de tute le sporchìssie dela carne.” (2 Corinti 7:1) “Ve domando de presentar el vostro corpo santo, e che ghe piase a Dio.” — Romani 12:1.

“Dopo de capir che Dio no’l ghe piase de robe che le sporca el corpo, go molà i sigri.” — Sylvia, Spagna.

Ma, in quasi tute le situassion, sol gaver la motivassion no’l ghe basta. Pol esser che ne ocore del aiuto de altre persone, come la fameia e i amighi. Cossa che lori i pol far?