Paréciate par le dificoltà

“Go dessidio fermarme de fumar parché mi ero preocupà cola salute del me bambin pena nassesto. Alora go metesto una placheta ntela nostra casa che la disea ‘Proibio Fumar’. Sol una ora dopo no son stà bon de controlar la me voia, e go scominsià a fumar.”— Yoshimitsu, Giapon.

FERMARSE de fumar pol esser tanto difìcile, come ghemo visto nel esémpio de Yoshimitsu. Una peschisa la mostra che quasi 90% dele persone che le ze drio proar fermarse de fumar no le ze bone de controlarse e scomìnsia a fumar nantra volta. Se te sì parecià vanti par infrontar le dificoltà, l’è pi fàcile esser bon de molar el vìssio. Quale che le ze arquante dele dificoltà?

Voia sensa controlo de nicotina: La voia pi granda che la persona la ga de nicotina la sucede nei tre giorni dopo de fumar el ùltimo sigro e la resta manco dopo de due stimane. Un omo che adesso no’l fuma pi el ga dito: “Nel scomìnsio, no l’è sempre che ghemo la voia, la vien e la va via”. Anca, dopo de ani pol esser che de colpo te gàpia la voia de fumar. Se fursi questo sucede con ti, no stà far gnente suito, férmate 5 minuti e la voia la ndarà via.

Altre robe che la persona la pol sentir: Nel scomìnsio, pol esser fadiga par la persona restar desmissiada, consentrarse e l’è pi fàcile guadagnar peso. La persona la pol sentir anca: dolor, spissa, tanto sudor e tosse, anca pol esser che no la sàpia se la ze triste o contenta, no la ga passiensa, la resta pi rabiosa e la pol fin gaver depression. La pi granda parte de quel che la sente pol ndar via dopo de quatro a sei stimane.

Nele ore pi brute, ghen’è robe che pol giutarte. Par esémpio:

● Proa dormir de pi.

● Bevi tanta àqua o suco. Magna robe bone par la salute.

● Fà esersissi.

● Proa tirar ben el fià e imaginar la ària pura drio impienir i to palmoni.

Robe che ne fà gaver voia: Vol dir no far pi gnente che pol farte gaver voia de fumar. Par esémpio, se ti te bevei intanto che te fumei, proa bever quel lì pi svelto. Col tempo te podarè bever con pi calma.

El to sarvel el pol farte ricordar de arquante atività che te fei intanto che te fumei, ancora che el to corpo el sia lìbero dela nicotina fà tanto tempo. Torben, che ghemo belche parlà, el ga dito: “Fà 19 ani che go molà el sigro, ma ancora go voia de fumar quando fermo el laoro par bever un cafè.” La relassion che el sarvel el fà de arquante atività che la persona la fea intanto che la fumea la resta manco col tempo.

Ma la situassion l’è difarente quando el sigro l’è relassionà con bever àlcol. Intanto che te sì drio proar fermarte de fumar, fursi te toca no bever gnente de àlcol e anca no ndar ntei posti ndove ghen’è questo tipo de bebida. Tanti scomìnsia a fumar nantra volta intanto che i ze drio bever. Parché che l’è cossita?

● Un pochetin de àlcol l’è quel che basta par sgrandar el efeto dela nicotina nel corpo.

● Ghen’è una forte relassion intrà bever insieme dei altri e fumar.

● El àlcol fà la persona perder el controlo. La Bìblia la ze giusta quando la dise che el vin fà perder el giudìssio. — Oseia 4:11.

Amicìssie: Fà bone scólie. Par esémpio, se no te ocore, no stà ndar insieme de persone che le fuma o che pol darte un sigro. Anca stà distante de persone che fursi le te ride drio, parché lore le pol intrigar i to sforsi de fermarse de fumar.

Sentimenti: Una peschisa ga mostrà che grande parte dele persone che le ga scominsià a fumar nantra volta le ga fato cossita parché in quela ora le era stressade o con ràbia. Se un sentimento el te fà gaver la voia de fumar, pensa in nantra roba. Par esémpio, bevi àqua o fà una caminada. Proa pensar in robe bone, te pol pregar a Dio o leder versìcoli dela Bìblia. — Salmo 19:14.

No stà dar scuse

● Fumar sol un pochetin no ndarà farme mal.

Verità: Se te fumi sol una volta, par tre ore te gavarè la metà dela nicotina che el to corpo el ga de bisogno. L’è par quela che tanti i scomìnsia a fumar nantra volta.

● Fumar me giuta a darghene fora col stresse.

Verità: Peschise le mostra che la nicotina fà la persona restar ancora de pi stressada. La persona la cata che la se sente manco stressada parché la ga dato al so corpo la nicotina che lu el volea.

● Fà tanti ani che fumo.

Verità: Se no te credi che te sarè bon de fermar sarà ancora pi difìcile. La Bìblia la dise: “Se te si desanimà quando te infronti dificoltà, no te gavarè pi forsa.” (Proverbi 24:10) Alora, no sìpia negativo. La persona che la vol pròpio fermar e la mete in pràtica i consili che ghemo belche parlà, la gavarà boni resultadi.

● Quel che sinto quando proo fermar me fà tanto mal.

Verità: L’è vera che ti te senti tanto mal, ma in poche stimane te restarè meio. Alora, no stà mia desister! Se te ghè voia de fumar mesi o ani dopo che ti te ghè fermà, la voia la ndarà passar in pochi minuti — ma no stà ciapar un sigro.

● Mi no go salute mental.

Verità: Se te si drio far un tratamento parché no te ghè bona salute mental, depression o schisofrenia, domanda che el to dotor el te giute a fermarte de fumar. Fursi lu el vol pròpio giutarte, lu el pol cambiar el to tratamento, cossita pol esser che te sia bon de fermarte de fumar nel stesso tempo che te trati la to malatia coi remedi.

● Se fumo nantra volta, vol dir che son fiaco.

Verità: Se te fumi nantra volta, come tante persone che le proa fermarse de fumar le fà, no vol dir che no ghen’è pi cossa far. Seita proar e và avanti. Se te fumi, no vol dir che te si fiaco. Ma se ti te desisti, alora sì te si fiaco. No stà mia desister. Col tempo te sarè bon de vinser!

Romualdo che el ga fumà par 26 ani e el se ga fermà de fumar fà de pi de 30 ani, el ga dito: “No me ricordo quante volte go scominsià a fumar nantra volta. Tute le volte me go sentio tanto mal, go pensà che mai saria bon de fermarme. Ma dopo che go dessidio gaver una bona amicìssia con Geovà Dio e go pregà par domandar el so aiuto tante volte, alora sì son stà bon de fermarme de fumar”.

Nel pròssimo artìcolo ndaremo veder arquante sugestion che pol giutarte a esser una persona felice che no la fuma pi.

[Quadro/Stampa]

PERICOLOSO DE TUTE LE MANIERE

El tabaco l’è doperà de tante maniere. Se pol fin catar robe fate de tabaco ndove che se vende prodoti e remedi naturai. La Organisassion Mondial dela Salute la parla: “No importa come el tabaco l’è doperà, tute le maniere le ze pericolose”. Ghen’è tante malatie che le vien fora parché la persona la dopera el tabaco, come el càncaro e le malatie del cuor, che pol fin far con che la persona la more. Done che le fuma intanto che le ze gràvide, pol far tanto mal al so bambin ancora vanti de lu nasser. Come che arquante robe fate con tabaco le ze doperade?

Bidis: I ze pìcoli sigri fati su cola man, i ze de pi doperadi ntela Àsia. Lu el ga ancora de pi alcatron, nicotina e monòssido de carbono de quei altri sigri.

Saruti: I ze fati con tochi de tabaco inrolà nte una foia che la ze fata cola erba de tabaco. El tabaco dei saruti l’è pi alcalino che el tabaco dei sigri, che l’è pi àssido, cossita la boca la ciapa la nicotina ancora che el saruto el sia smorsà.

Sigri de cravo o kreteks: Questo tipo de sigro ghen’è 60% de tabaco e 40% de cravo. Lu el ga de pi alcatron, nicotina e monòssido de carbono de quei altri sigri.

Pipa: Fumar pipa anca l’è pericoloso parché la persona la pol gaver càncaro e altre malatie, compagno ai altri sigri.

Tabaco sensa fumana: I ze el rapè, la gutkha (che l’è doperà ntela Àsia) e anca mastegar el tabaco. La nicotina la va rento el sangue par la boca. Doperar tabaco sensa fumana l’è tanto pericoloso come doperar altro tipo de tabaco.

Pipe de àqua (narghilès): La fumana del tabaco passa par la àqua vanti de ndar rento la boca, ma no vol mia dir che no fà mal. Ancora pol pregiudicar i palmoni e la persona la pol gaver càncaro.

[Quadro/Stampa]

COME CHE TE POL GIUTAR QUALCHEDUN A FERMARSE DE FUMAR?

● Sia positivo. Lodar e dar qualche presente ze meio che sbrontolar e dirghe su. L’è pi poderoso dir: “Se te proi ancora, mi cato che te sarè bon”, de che dir: “No te si stà bon nantra volta!”

● Sia perdonador. Ghe ocore passiensa se qualchedun che l’è drio proar fermarse de fumar el gàpia ràbia de ti. No stà pensar che el problema sia con ti. Parlé robe bone, come: “Mi sò che no l’è fàcile, ma mi go orgòlio de ti parché te si drio proar.” Mai stà dir: “Me piasea de pi de ti col sigro in man!”

● Sia un vero amigo. La Bìblia la dise: “Un vero amigo el ama tuto el tempo, e el deventa come un fradel quando ghen’è situassion difìcile.” (Proverbi 17:17) Mostra passiensa e amor “tuto el tempo” cola persona che la ze drio proar fermarse de fumar — no importa la ora del giorno o se la ze contenta o nò.