Un falso amigo

Te ghè cognossesto un “amigo” da gióveno. Lu el te fea sentirte pi adulto e parea che el te giutea a gaver altri amighi. Quando ti te gavei problemi, l’era lu che el te giutea a restar pi “tranquilo”. In tante situassion, sensa lu, no te eri bon de ndar avanti.

Ma col tempo, te ghè savesto che lu no l’era un bon amigo. No te pol ndar in arquanti posti parché el vol che te sìpia con lu tuto el tempo. E ancora che el te ga fato sentirte pi adulto, lu el te ga fato perder la to salute. E pedo ancora, el ciava i to soldi.

Te ghè proà arquante volte finir cola amicìssia, ma lu no’l te ga assà. Adesso, te sì come un schiavo del to amigo. Te volei mai verlo cognossesto.

COSSITA ze la amicìssia de quel che el fuma col sigro. Una dona de nome Earline, che la ga fumà par 50 ani, la se ricorda: “Star insieme col me sigro l’era meio de che star insieme con una persona. Lu l’era de pi che un bon amigo, e dele volte, l’era el ùnico amigo che mi gavea.” Ma dopo, Earline la ga visto che in verità, el sigro l’è un bruto e falso amigo. Parea che quel che ghemo parlà nel scomìnsio l’era la stòria de Earline, sol che con una roba difarente. Earline la ze stata bona de fermarse de fumar dopo che la ga imparà che Dio no’l ghe piase dei sigri, parché i assa sporco el corpo che Dio el ga creà.—2 Corinti 7:1.

Un omo che el ga nome Frank anca el se ga fermà de fumar par contentar a Dio. Ma sol un giorno dopo de fumar el ùltimo sigro, lu el se ga rastà par tera soto la casa, drio ndar in serca de tochi de sigri che i ze stati cascadi ntele sfese del assoaio dela casa. Frank el ga dito: “L’era sol questo che me manchea. Quando me go visto indenocià drio ndar in serca de tochi de sigri in meso le sporchissie, son restà spaventà. Mai pi go metesto un sigro ntela me boca.”

Parché che el tabaco el ga tanto poder? Studiosi i parla de arquanti motivi: (1) Robe fate con tabaco pol assar la persona vissiada cossita come altre droghe. (2) La nicotina la pol rivar ntel sarvel in sete secondi. (3) Par una persona che la ze vissiada in sigro, fumar l’è tanto importante come magnar, bever, conversar, restar tranquila e cossita avanti.

Ma, come ghemo visto nei esempi de Earline e de Frank, una persona la pol si molar el bruto vìssio de fumar. Se te vol fermarte de fumar, i pròssimi artìcoli i pol giutarte a scominsiar una nova vita.