Va in serca de aiuto

“Qualchedun el pol vinser nantro che l’è lu sol, ma due insieme i pol resisterghe.” — Eclesiasti 4:12.

QUANDO ghemo el aiuto de altre persone, l’è pi fàcile vinser un nemigo, no importa cossa o chi che sìpia el nemigo. Alora, se te vol fermarte de fumar, l’è bon che ti te domandi el aiuto dela fameia, amighi e altri che i vol pròpio giutarte e che i gàpia passiensa.

Proa cognosser persone che le ze state bone de molar el sigro, parché pol esser che lore le te capissa e le vol giutarte. Torben, una Testimònia de Geovà dela Dinamarca, el dise: “Gaver el aiuto dei altri l’è stà pròpio importante par mi.” Abraham, che l’è de star ntela Ìndia, el ga scrito: “El vero amor che la me fameia e che i fradei dela congregassion i ga mostrà el me ga giutà a fermarme.” Ma dele volte, el aiuto che la fameia e i amighi i dà no’l ghe basta.

“Bhagwandas, un omo che el ga fumà par 27 ani, el dise: “Dopo che go imparà quel che la Bìblia la dise sora robe che sporca el corpo, go mola el sigro. Mi go proà fumar manco, cambiar i amighi, son ndato in serca dei dotori, ma gnente me ga giutà. Alora, nte una note, go verto el me cuor a Geovà e go sùplica che el me giutesse a fermarme. Alora si, son stà bon de farlo!”

Nantra roba importante la ze pareciarte par le dificoltà che te gavarè. Quale che le ze le dificoltà? Varda el pròssimo artìcolo.

[Quadro]

TE TOCA DOPERAR REMEDI?

Ghen’è emprese che fà remedi che i giuta a quei che i fuma a molar el vìssio del sigro, come el adesivo de nicotina. Queste emprese guadagna bilioni de soldi. Ma vanti de ndar in serca de remedi, daghe atension ale domande:

Quai che i ze i benefessi dei remedi? Arquanti i dise che ghen’è tratamenti che i giuta la persona a molar el vìssio e a gaver manco voia de fumar. Ma col tempo, pol esser che el tratamento no’l giute pi la persona.

Qual che l’è el perìcolo? Arquanti remedi pol far la persona sentirse mal, gaver depression e voia de coparse. Ricòrdate che doperar la nicotina, stesso che no la sìpia par via del sigro, anca la ze una droga e pol farte mal. In verità, la persona ancora la seita col vìssio.

Ghen’è altre robe che se pol far? Nte una peschisa, 88% dele persone che le ze state bone de molar el vìssio le ga dito che le ga fermà de fumar de un colpo sol, e sensa el aiuto dei remedi.