Pamela la ga dito: “Intanto che mi fea el tratamento contra el càncaro, tante volte mi go bio paura. Ma quando mi preghea a Geovà Dio, ero bona de sentirme calma e de darghene fora cola situassion. El càncaro ancora me fà tanto mal, ma la orassion la me giuta a veder la me situassion dela meio maniera, sensa restar desanimada. Quando i altri i me domanda come stao, mi ghe digo: ‘No stao mia tanto ben, ma mi son contenta!’”

Sicuro che no ghemo mia de spetar fin che vegna fora un grosso problema nela nostra vita par dopo scominsiar a pregar. Tuti noantri infrontemo dificoltà, grande o pìcole, e tante volte sentimo che ghemo bisogno de aiuto par darghene fora. Sarà che la orassion la pol giutarne?

La Bìblia la dise: “Buta la to carga sora Geovà, e lu pròpio el te sostegnerà. Mai el assarà che el giusto el casche.” (Salmo 55:22) Che bel consolo! Alora, come che far orassion pol giutarte? Quando te preghi a Dio dela maniera giusta, lu el va darte quel che te ocore par darghene fora cole to dificoltà. — Varda el quadro “ Benedission che Dio el te dà quando te fè orassion.”