“Quando te fè orassion, no stà mia dir le medèsime parole una volta drio l’altra.” — Mateo 6:7.

Geovà no’l vol mia che femo orassion sempre cole medèsime parole, o che le ledemo de un libro de orassion. Lu el vol che parlemo quel che semo drio sentir. Te catarissi bel se un amigo tuo, sempre che el vien parlar con ti, el parlesse le medèsime parole drio man? Sicuro che nò! Veri amighi i ga caro de parlar un col altro sora i so sentimenti. Quando preghemo a Dio cole nostre pròpie parole sora quel che semo drio sentir, mostremo che volemo esser so amighi.

“Quando domandé, no ricevé mia, parché sì drio domandar cola motivassion sbaliada.” — Tiago 4:3.

Dio no’l ndarà mia risponder ale nostre orassion se ghe domandemo robe che lu no’l ghe piase mia. Par esémpio, la Bìblia la mostra che Dio no’l ghe piase quando una persona la vol sempre de pi e gnanca quando la se fida nela sorte. Alora, sarà che el ndaria risponder ala orassion de una persona che la ze drio pregar par gaver sorte nel giugo? (Isaia 65:11; Luca 12:15) Sicuro che nò! Se volemo che Dio el risponda ale nostre orassion, quel che noantri ghe domandemo ga de esser de acordo con quel che lu el insegna nela Bìblia.

 “Lu el òdia fin la orassion de quei che no i vol mia obedir ala so lege.” — Proverbi 28:9.

Nel passà, Dio no’l rispondea mia ale orassion de quei che no i obedia ale so lege. (Isaia 1:15, 16) E lu no’l ga mia cambià. (Malachia 3:6) Se volemo che Dio el risponda ale nostre orassion, ghemo de sforsarse par obedir ale so lege. Ma e se ghemo fato robe sbaliade nel passà? Sarà che Geovà mai el va scoltar le nostre orassion? Sicuro che el va! Dio el pol perdonarne se se fermemo de far quel che l’è sbalià e femo el nostro meio par far quel che l’è giusto. — Ati 3:19.