STÙDIO 15
Cossa che podemo imparar dei miràcoli che Gesù el ga fato?
“Lu l’è ndato par tuta la region fando el ben e curando tuti.” — ATI 10:38.
CÀNTICO 14 Lodemo a Gesù el nostro Rè
COSSA CHE NDAREMO IMPARAR? a
1. Conta quel che l’era drio suceder quando Gesù el ga fato el so primo miràcolo.
PROA imaginar quel che ga sucedesto nel ano 29, quando Gesù el ga scominsià el so laoro de predicassion. Lu, so mama e arquanti dei so dissìpoli i ze stati convidadi par una festa de matrimònio in Canà, che l’era darente de Nasarè. Maria, so mama de Gesù, la era amiga de quela fameia e pol esser che la era drio giutar nela festa. Ma fursi l’è rivà pi gente de quel che i era drio spetar, e el vin se ga finio. Questa la era una bruta roba che podea far la fameia e el casal sentirse in vergogna. b Alora, Maria la ze ndata svelta e la ga dito a Gesù: “Lori no i ga pi vin.” (Gioani 2:1-3) Par quela, Gesù el ga fato una roba de gnanca creder. Par meso de un miràcolo, Gesù el ga fato la àqua deventar un “vin bon”. — Gioani 2:9, 10.
2-3. (a) Che miràcoli Gesù el ga fato? (b) Parché che l’è bon imparar dei miràcoli de Gesù?
2 Gesù el ga fato tanti altri miràcoli intanto che l’era qua nela Tera. c Col so poder, lu el ga giutà tante persone. Par esémpio, con sol due miràcoli lu el ghe ga dato de magnar a nove mila òmini. Ma, ghen’era anca done e tosatei intrà de lori. Alora, pol esser che Gesù el ga dato de magnar a de pi de 27 mila persone. (Mat. 14:15-21; 15:32-38) In quele due volte, lu anca el ga curà tanti maladi. (Mat. 14:14; 15:30, 31) Proa pensa come le persone le ze restade maraveiade dopo che Gesù le ga curade e el ghe ga dato de magnar!
3 Quel che Gesù el ga fato ne insegna tanto anca ancoi. In questo stùdio, ndaremo veder cossa che imparemo dei so miràcoli. Anca ndaremo veder come che podemo mostrar amor e umiltà compagno a Gesù quando el ga doperà so poder. Sicuro che imparar sora questi miràcoli ndarà far la nostra fede ancora pi forte.
I MIRÀCOLI I NE INSEGNA SORA GEOVÀ E GESÙ
4. Sora chi che podemo imparar coi miràcoli che Gesù el ga fato?
4 I miràcoli de Gesù i fà pi forte la nostra fede e ne insegna tanto sora lu e sora so Pare. Parché? Parché l’è stà Geovà che el ga dato a Gesù poder par far tuti i miràcoli. Lu el ga fato tuto pròpio compagno a so Pare, anca quando el ga doperà so poder. (Gioani 14:9) L’è pròpio questo che Ati 10:38 dise sora Gesù: “Dio lo ga scoliesto par esser el Cristo col spìrito santo e poder. Dio l’era con lu. Par quela, lu l’è ndato par tuta la region fando el ben e curando tuti quei che i era soto el poder del Diaol.” Adesso, vedemo tre lession che podemo imparar dei miràcoli de Gesù.
5. Parché che Gesù el ga fato miràcoli? (Mateo 20:30-34)
5 Prima, Gesù e so Pare i ne ama tanto. Quando l’era nela Tera, Gesù el ga mostrà tanto amor parché el ga doperà el so poder par giutar quei che i era drio sofrir. Una volta, due òmini orbi i ghe ga domandà aiuto. Quei òmini “i ghe ga fato pecà a Gesù e lu li ga curadi.” (Ledi Mateo 20:30-34. d) Le parole “ghe ga fato pecà” in greco le vol dir che Gesù el ga bio un forte sentimento, come se fusse un bruto dolor, quando el ga visto el sofrimento de quei òmini. E l’è stà anca par causa de questo forte sentimento de amor che Gesù el ga curà un leproso e el ghe ga dato de magnar ale persone. (Mat. 15:32; Mar. 1:41) Alora, podemo esser pròpio sicuri che Geovà e Gesù i ne ama tanto e i sofre anca lori quando semo drio tribolar. (Luc. 1:78; 1 Pie. 5:7) Lori i ze pròpio premosi de finir col sofrimento de tute le persone!
6. Che poder Geovà el ga dato a Gesù?
6 Seconda, Geovà el ga dato poder a Gesù par finir con tuti i problemi dele persone. Quando Gesù el ga fato i miràcoli, lu el ga mostrà che el pol finir coi problemi che mai saremo boni. Par esémpio, lu el ga el poder de finir fora col pecato, cole malatie e cola morte. (Mat. 9:1-6; Rom. 5:12, 18, 19) Par meso dei so miràcoli, lu el ga mostrà che el pol “guarir tuti i tipi de malatie” e fin ressussitar i morti. (Mat. 4:23; Gioani 11:43, 44) Gesù anca el ga el poder de far bruti temporai fermarse e de proteger le persone contra i demoni. (Mar. 4:37-39; Luc. 8:2) L’è pròpio bon saver che Dio el ga dato tanto poder al so Fiol!
7-8. (a) I miràcoli che Gesù el ga fato i ne assa sicuri de che? (b) Che miràcolo sito premoso de veder nel novo mondo?
7 Tersa, noantri podemo esser sicuri che gavaremo tante benedission soto el Regno de Dio. I miràcoli che Gesù el ga fato quando l’era qua nela Tera i ze sol un pochetin de quel che el ndarà far come Rè del Regno de Dio. Par esémpio, tuti i gavarà salute perfeta parché no ghen sarà pi malatie e nissuni mai pi restarà desgrassià. (Isa. 33:24; 35:5, 6; Apo. 21:3, 4) Nissuni mai pi ndarà patir la fame o infrontar una desgràssia dela naturesa. (Isa. 25:6; Mar. 4:41) Tuti noantri restaremo pròpio contenti de veder i nostri cari che i sarà ressussitadi. (Gioani 5:28, 29) Qual de questi miràcoli sito premoso de veder nel novo mondo?
8 Quando Gesù el ga fato i so miràcoli, lu el ga mostrà tanta umiltà e amor. Sicuro che noantri volemo far compagno a lu. Adesso ndemo veder cossa che due miràcoli de Gesù i pol insegnarne. El primo l’è dela festa de matrimònio in Canà.
I MIRÀCOLI I NE INSEGNA A ESSER ÙMILI
9. Cossa che Gesù el ga fato nela festa de matrimònio? (Gioani 2:6-10)
9 Ledi Gioani 2:6-10 e. Quando se ga finio el vin nela festa de matrimònio, Gesù no ghe tochea far gnente. No ghen’era gnanca una professia che la disea che el Messia el ndaria far un miràcolo cossita. Ma proa pensa come che te ndarissi sentirte se el vin el se gavesse finio nela to festa de matrimònio? Quela fameia ghe ga fato pecà a Gesù, ancora de pi la noiva e el noivo, e lu no’l volea che lori i se sentisse in vergogna. Par quela, lu el ga fato quel miràcolo che ghemo parlà nel scomìnsio del stùdio. Gesù el ga fato che 390 litri de àqua deventesse un vin pròpio bon. Lu el ga fato de pi vin de quel che i gavea de bisogno parché la fameia la podaria doperarlo pi tardi o venderlo par giutar i pena maridadi. Pensa come quel casal l’è restà contento!
Fà compagno a Gesù e no stà sprosiarte de quel che te fè (Varda i paràgrafi 10 e 11.) h
10. Cossa che imparemo de Gioani capìtolo 2? (Varda anca la ilustrassion.)
10 Vedemo cossa che podemo imparar de Gioani capìtolo 2. Gheto visto che no l’è mia stà Gesù che l’è ndato impienir i giari? Invesse de farse veder, lu el ga dito ai servi dela casa par impienirli. (Versìcoli 6 e 7) Dopo che Gesù el ga fato che la àqua la deventesse vin, gheto visto che no l’è stà lu che el ga portà el vin al omo che el tendea dela festa? Magari, Gesù el ga dito che i servi dela casa lo fesse. (Versìcolo 8) Alora, sicuro che lu mai el ndaria ciapar un bicier de vin, tegnerlo davanti de tuti e dir: ‘Gente, proé tastar qua un poco del vin che go pena fato.’
11. Cossa che podemo imparar de questo miràcolo de Gesù?
11 Cossa che imparemo de questo miràcolo de Gesù? Imparemo che ghemo de esser ùmili. Dopo de far el miràcolo, lu no’l se ga fato veder. Lu mai se sprosiea de quel che el fea. Invesse, Gesù sempre l’era ùmile e el ghe dea tuta la glòria a so Pare. (Gioani 5:19, 30; 8:28) Se femo compagno a Gesù, mai ndaremo pensar che semo meio che i altri gnanca ndaremo sprosiarse de qualcossa che ghemo fato. No importa el laoro che femo, volemo mostrar che quel che ghemo fato l’è stà gràssie al aiuto de Dio. (Ger. 9:23, 24) L’è Geovà el mèrita tuta la glòria parché no sarìssino boni de far gnente sensa el so aiuto. — 1 Cor. 1:26-31.
12. De che nantra maniera podemo esser ùmili compagno a Gesù? Parla de un esémpio.
12 Vedemo anca nantra maniera che podemo esser ùmili compagno a Gesù. Metemo dir che un ansiano l’è drio giutarghe un servo ministerial gióveno a pareciarse par el so primo discorso. Quel gióveno el ghe mete tanto tempo, ma el fà un bel discorso che assa tuti i fradei contenti. Dopo dela riunion, riva qualchedun e el ghe dise al ansiano: ‘Ciò, che bel discorso che el ga fato, nò?’ Saria pròpio bruto se el ansiano el ghe rispondesse: ‘Si, son stà mi che lo go giutà, e ghe ga volesto tanto tempo.’ Pitosto, saria meio se el disesse: ‘Si, lu l’è stà pròpio bravo. Son restà contento de scoltarlo!’ Alora, se semo ùmili, no ndaremo farse veder quando giutemo a qualchedun. Invesse, noantri restemo contenti de saver che Geovà el vede quel che femo e el ghe dà tanto valor. (Varda anca Mateo 6:2-4; Ebr. 13:16) Se femo cossita, saremo drio mostrar umiltà compagno a Gesù e assaremo Geovà pròpio contento. — 1 Pie. 5:6.
I MIRÀCOLI I NE INSEGNA A MOSTRAR AMOR
13. (a) Cossa che Gesù el ga visto darente dela cità de Nain? (b) Cossa che Gesù el ga fato? (Luca 7:11-15)
13 Ledi Luca 7:11-15. f Varda quel che ga sucedesto quando Gesù l’è ndato a Nain. Questa cità la era darente de Sunen, ndove el profeta Eliseo el gavea ressussità el fiol de una dona intorno de 900 ani vanti. (2 Rè 4:32-37) Quando Gesù l’è rivà darente el porton dela cità, lu el ga visto un grupo de persone che le era drio portar fora un morto. Quel che lu el ga visto ghe ga despiasesto tanto parché el morto l’era el ùnico fiol de una védova. Insieme de quela mare, ghen’era tanta gente dela cità. Alora, Gesù li ga fati fermarse e el ga fato una roba che no i ndaria mai pi desmentegarse: Lu el ga ressussità el fiol de quela védova. Questa la ze stata la prima de tre ressuression che Gesù el ga fato che le ze scrite nela Bìblia.
Fà compagno a Gesù e mostra amor a quei che i ze drio sofrir (Varda i paràgrafi 14 a 16.)
14. Cossa che podemo imparar de Luca capìtolo 7? (Varda anca la ilustrassion.)
14 Vedemo cossa che podemo imparar de Luca capìtolo 7. El versìcolo 13 el dise che Gesù “la ga vista” e dopo “ghe ga fato pecà”. Gesù el ga visto quela mare che la piandea dela banda de so fiol, e la ghe ga fato pecà. Ma quela mare no ghe ga sol fato pecà a lu. Gesù el ga mostrà amor par ela parché el ga fato qualcossa par giutarla. Lu el ga dito con bontà: “No stà piander.” Dopo, lu el ga ressussità quel toso e “lo ga dato ala so mama”. — Versìcoli 14 e 15.
15. Cossa che podemo imparar de questo miràcolo che Gesù el ga fato?
15 Cossa che podemo imparar de questo miràcolo de Gesù? Imparemo che ghemo de mostrar amor a quei che i ze drio sofrir par causa dela morte de qualchedun. L’è vera che no semo mia boni de ressussitar i morti. Ma ancora cossita, podemo far compagno a Gesù se stemo atenti a quel che i altri i ze drio infrontar. Dopo, podemo sforsarse de dir o far qualcossa par giutarli e consolarli. g (Pro. 17:17; 2 Cor. 1:3, 4; 1 Pie. 3:8) Ghemo de ricordarse che anca pìcole robe che femo pol giutarli tanto.
16. Cossa che te ghè imparà del esémpio de una mare che la ga perso so fiola? (Varda anca la ilustrassion.)
16 Varda quel che ga sucedesto con una sorela nte una riunion arquanti ani indrio. Intanto che i fradei i cantea un càntico che el parlea dela ressuression, una sorela la ga visto che nantra la era drio piander. Ela la piandea parché fea poco tempo che la so fiola la era morta. Alora, la sorela suito la ze ndata darente quela mare, ghe ga dato un strucon e la ga cantà el càntico insieme. Pi tardi, quela mare la ga dito: “Go sentio el grando amor dei fradei e dele sorele. L’è qua nel Salon del Regno che ghemo aiuto.” Ela la ze restada contenta de esser ndata in quela riunion. Alora, noantri podemo esser sicuri che Geovà el vede e el ghe dà valor a tuto quel che femo par consolar “quei che i ga el cuor pien de tristessa”. — Sal. 34:18.
SEITA A STUDIAR PAR FAR PI FORTE LA TO FEDE
17. Cossa che ghemo imparà in questo stùdio?
17 Quando imparemo quel che la Bìblia la dise sora i miràcoli de Gesù, restemo tanto incoraiadi. Par esémpio, imparemo che Geovà e Gesù i ne ama tanto, che Gesù el ga el poder de finir fora con tuti i problemi e restemo ancora pi sicuri che Geovà el farà quel che el ga prometesto. Alora, intanto che te studi i miràcoli de Gesù, proa ndar drio al so esémpio. Te pol studiar questi miràcoli intanto che te sì drio leder la Bìblia o nel to stùdio in fameia. Stà atento a quel che te pol imparar, e dopo contaghe ai altri. Sicuro che te gavarè tante bele robe de parlar. — Rom. 1:11, 12.
18. Cossa che ndaremo imparar nel pròssimo stùdio?
18 Gesù el ga fato la ùltima ressuression che la Bìblia la conta quando l’era drio finir so laoro qua nela Tera. Ma, questa ressuression la ze stata difarente dele altre parché el ga ressussità un caro amigo che l’era morto fea quatro giorni. Nel pròssimo stùdio, ndaremo imparar cossa che la Bìblia la dise sora questo miràcolo e come che podemo far pi forte la nostra fede nela ressuression.
CÀNTICO 20 Te ne ghè dato el to pressioso Fiol
a Restemo pròpio maraveiadi quando ledemo sora i miràcoli che Gesù el ga fato. Lu el ga fato un bruto temporal fermarse, el ga curà persone malade e el ga ressussità morti. Magari, questi miràcoli no i ze scriti nela Bìblia sol par contarne una stòria. Invesse, i miràcoli i ne insegna tanto e i ne giuta a far pi forte la nostra fede in Geovà e in Gesù. Anca imparemo sora bone qualità che podemo sforsarse par gaver.
b Un studioso dela Bìblia el ga spiegà: “Nel Oriente, l’era un costume tanto importante ricever ben le persone. Alora, quando una persona la volea ricever ben qualchedun, la gavea de pareciar de magnar e de bever tanto de pi de quel che ocorea. Questo l’era ancora pi importante nte una festa de matrimònio.”
c I libri dela Bìblia che i conta la vita de Gesù i mostra che lu el ga fato de pi de 30 miràcoli. Magari, lu el ga fato tanti altri miràcoli, e la Bìblia no la conta come cada un ga sucedesto. Par esémpio, una volta, ‘tuta una cità’ la ze ndata catarlo e ‘lu el ga curà le persone malade’, ma la Bìblia no la parla de cada un de questi miràcoli. — Mar. 1:32-34.
d (Mateo 20:30-34) Drio la strada, ghen’era due orbi sentadi do. I ga sentio che Gesù l’era drio passar lì darente e i ga osà: “Signor, Fiol de Davi, gàpia misericòrdia de noantri!” 31 Le persone le ghe ga dito su e le ghe disea de taser. Ma i orbi i ga osà ancora pi forte: “Signor, Fiol de Davi, gàpia misercòrdia de noantri!” 32 Alora Gesù el se ga fermà, li ga ciamadi e el ghe ga domandà: “Cossa gavé caro che fao par valtri?” 33 Lori i ghe ga rispondesto: “Signor, fane vederghe.” 34 Gesù el ga bio pecà de lori e el ga tocà i so oci. Lori i ze stati boni de vederghe e i ga scominsià a ndarghe drio.
e (Gioani 2:6-10) De acordo cola lege dei giudei sora lavarse, lori i gavea lì sie giari par meter rento àqua. Rento de cada giaro ghe stea 44 a 66 litri. 7 Gesù el ghe ga dito: “Impienì i giari con àqua.” E lori li ga impienidi del tuto. 8 Alora, Gesù el ga anca dito: “Adesso, ciapéghene un pochetin e portéla a quel che l’è drio tender dela festa.” E lori i ga fato pròpio cossita. 9 Quel che el tendea dela festa no’l savea de ndove el vin l’era vegnesto, ma quei che i gavea ciapà la àqua i lo savea. Quando lu el ga bevesto un poco dela àqua che la era deventada vin, lu el ga ciamà el sposo, 10 e el ghe ga dito: “Tuti i ghe dà ale persone prima el vin bon, e dopo che le ze belche ciuche, i ghe dà el rugno. Ma ti te ghè tegnesto fin adesso el vin bon.”
f (Luca 7:11-15) Pena dopo, lu l’è ndà nte una cità de nome Nain. I so dissìpoli e una mùcia de gente i viaiea insieme de lu. 12 Quando l’è rivà darente del porton dela cità, i ga visto che i portea fora un gióveno che l’era morto. So mama la era védova, e lu l’era so ùnico fiol. Ghen’era tanta gente dela cità insieme de ela. 13 Quando el Signor la ga vista, ghe ga fato pecà, e lu el ghe ga dito: “No stà piander.” 14 Dopo, lu l’è rivà darente, el ga tocà la portantina e i òmini che i la tegnea i se ga fermà. Alora, lu el ga dito: “Toso, mi te digo: Levate su!” 15 Alora, el toso che l’era morto el se ga sentà do e el ga scominsià a parlar. E Gesù lo ga dato a so mama.
g Varda arquante robe che te pol far o parlar par consolar a qualchedun nel artìcolo “Console os enlutados, assim como Jesus fez” nela Sentinela de 1 de novembre de 2010.
h ILUSTRASSION: Gesù l’è là de drio intanto che i pena maridadi e altre persone i beve quel vin bon.
