STÙDIO 19
Fà ancora pi forte la to fede nel novo mondo
‘Quando Geovà el dise qualcossa, lu no la farà?’ — NÙM. 23:19.
CÀNTICO 142 La speransa la ne dà coraio
COSSA CHE NDAREMO IMPARAR? a
1-2. Cossa ghemo de far intanto che spetemo el novo mondo?
SEMO pròpio contenti de saver dela promessa de Geovà de che ghen sarà un paradiso qua nela Tera. (2 Pie. 3:13) Ancora che no savemo mia quando vegnarà el novo mondo, tuto quel che sucede ancoi mostra che l’è ben darente. — Mat. 24:32-34, 36; Ati 1:7.
2 Ma, par intanto, ghemo de seitar a far pi forte la nostra fede in questa promessa, anca se semo drio servir a Geovà fà tanti ani. Parché? Parché la nostra fede la pol vegner fiaca. El apòstolo Paolo el ga dito che questo l’è “el pecato che ne intriga con facilità”. (Ebr. 12:1) Par quela, ghemo de seitar a pensarghe sora le robe che le fà pi forte la nostra fede nela promessa del novo mondo. — Ebr. 11:1.
3. Cossa ndaremo imparar in questo stùdio?
3 In questo stùdio, ndaremo veder come gaver una forte fede nela promessa del novo mondo ne giuta a dàrghene fora cole dificoltà. Anca ndaremo imparar come che podemo far pi forte la nostra fede quando: (1) ghe pensemo sora el sacrifìssio de Gesù, (2) ghe pensemo sora el grando poder de Dio, e (3) femo le robe che ne giuta a esser pi amighi de Geovà. Dopo, ndaremo veder parché le parole de Geovà a Abacuche ne giuta a far pi forte la nostra fede ancoi.
LA FEDE LA NE GIUTA A DÀRGHENE FORA COLE DIFICOLTÀ
4. Che dessision una forte fede la ne giuta a far?
4 L’è importante gaver una forte fede parché ghemo tanti dessision de far tuti i giorni. Par esémpio, ghemo de dessider chi che i ze nostri amighi, come che ndaremo divertirse, se ndaremo in serca de gaver stùdio, che tipo de laoro ndaremo scòlier, con chi che ndaremo maridarse e se gavaremo fioi. Alora, ghemo de domandarse: ‘Quel che mi fao mostra che son sicuro che questo mondo suito el sarà finio e che el novo mondo el vegnarà? O sonti drio far compagno ale persone che no le crede che le pol viver par sempre?’ (Mat. 6:19, 20; Luc. 12:16-21) Se femo forte la nostra fede che el novo mondo l’è darente, sempre faremo le meio dessision.
5-6. Parché che ghemo bisogno de una forte fede quando semo drio tribolar? Parla de un esémpio.
5 Ne ocore una forte fede par dàrghene fora cole nostre dificoltà, come la perseghission, una bruta malatia o qualcossa che ne assa desanimadi. De scomìnsio, fursi pensemo che saremo boni de perseverar. Ma se seitemo a infrontar quela dificoltà par tanto tempo, ghemo bisogno de una forte fede par esser boni de perseverar e de seitar a servir a Geovà con alegria. — Rom. 12:12; 1 Pie. 1:6, 7.
6 Intanto che semo drio tribolar, pol esser che ne par che el novo mondo no’l vegnarà mai. Magari, questo no vol mia dir che la nostra fede la ze fiaca. L’è compagno a quel che pol suceder nel inverno. Se vien massa fredo par tante stimane, fursi par che el caldo no’l vegnarà mai. Ma quando l’è ora, la staion la càmbia e vien anca el istà. L’è cossita che sucede quando semo desanimadi. Pol esser che ne par che el novo mondo no’l vegnarà mai. Ma se la nostra fede la ze forte, noantri savemo che tute le promesse de Geovà le ndarà suceder. (Sal. 94:3, 14, 15; Ebr. 6:17-19) Par quela, se semo sicuri dele promesse de Geovà, servirlo seitarà a esser la roba pi importante dela nostra vita.
7. Cossa che no podemo mai pensar?
7 Anca ghemo bisogno de una forte fede quando ndemo predicar. Parché? Parché tante persone ghe piase dele “bone notìssie” che parlemo, ma le pensa che quel che Geovà el promete no’l ndarà mai suceder. (Mat. 24:14; Eze. 33:32) Alora, ne ocore gaver una forte fede par mai pensar compagno a lore. Adesso, ndaremo veder tre maniere de far pi forte la nostra fede.
PENSEGHE SORA EL SACRIFÌSSIO DE GESÙ
8-9. Parché che pensarghe sora el sacrifìssio de Gesù ndarà giutarte a gaver una fede pi forte?
8 Podemo far pi forte la nostra fede quando pensemo sora el sacrifìssio che Gesù el ga fato. Par causa de questo, podemo esser sicuri che le promesse de Dio le ndarà suceder. Se se tolemo tempo par pensarghe sora parché Gesù l’è morto e come so Pare el ga sofrio, saremo ancora pi sicuri che ndaremo viver par sempre nel novo mondo.
9 Varda cossa che Geovà el ga fato. Lu el ga mandà so caro Fiol qua ala Tera, e Gesù l’è nassesto come un omo perfeto. Gesù el ga infrontà diverse dificoltà intanto che l’era qua. Dopo, lu el ga sofrio tanto e l’è morto. Pensa come l’è stà fadiga par Geovà veder tuto quel che ga sucedesto cola persona che lu el ama de pi. Geovà no’l gavaria mai assà che so Fiol el sofrisse e morisse par darne una vita sol un poco meio e che la duresse poco tempo. (Gioani 3:16; 1 Pie. 1:18, 19) Come Geovà el ga dato so caro Fiol come sacrifìssio, lu el farà de tuto par darne la vita eterna nel novo mondo.
PENSEGHE SORA EL PODER DE GEOVÀ
10. De acordo con Efesi 3:20, cossa che Geovà el pol far?
10 Nantra roba che fà pi forte la nostra fede la ze pensarghe sora el poder che Geovà el ga. Tante persone ancoi le pensa che viver par sempre nte un novo mondo l’è una roba de gnanca creder. Magari, Geovà el ga prometesto far tante robe che le persone no le saria mai bone de far. Ma lu l’è el Dio Tuto Poderoso e el ga el poder de far tuto quel che el ga prometesto. (Giò 42:2; Mar. 10:27) Par quela che lu el pol far bele promesse de gnanca creder. — Ledi Efesi 3:20. b
11. Parla de arquante promesse che Geovà el ga fato e che le parea de gnanca creder. (Varda anca el quadro “ Arquante promesse maraveiose”.)
11 Varda arquante promesse de gnanca creder che Geovà el ga fato. Par esémpio, lu el ga prometesto a Abraon e Sara che lori i gavaria un fiol, ancora che deromai i fusse ben veci. (Gén. 17:15-17) Dio anca el ga dito a Abraon che la tera de Canaan la saria dei so dissendenti. Ma i israeliti, che i era i dissendenti de Abraon, i ze stati schiavi nel Egito par tanti ani. Ancora cossita, Geovà li ga liberadi e el ga fato pròpio quel che el gavea prometesto. Tanti ani dopo, Geovà el ga dito a Elisabete che la gavaria un fiol, anca se la fusse belche vècia. Lu anca el ga prometesto a Maria, una vèrgine, che la saria mare del Fiol de Dio. Cossita, lu el ga fato quel che el gavea prometesto nel giardin del Èden. — Gén. 3:15
12. Come che Giosuè 23:14 e Isaia 55:10, 11 i ne giuta a esser sicuri che Geovà el ga tanto poder?
12 Se ghe pensemo sora come Geovà el ga belche fato quel che el ga prometesto, ndaremo veder che lu el ga tanto poder. Cossita, la nostra fede nela promessa del novo mondo la restarà ancora pi forte. (Ledi Giosuè 23:14; c Isaia 55:10, 11. d) Se ghemo una forte fede nele promesse de Geovà, saremo boni de giutar anca i altri a fidarse in queste promesse e a esser sicuri che no le ze mia sol storiete o fròtole. Dopo de parlar del novo cielo e de una nova tera, Geovà el ga dito: “Queste parole le ze fedele e vere.” — Apo. 21:1, 5.
FÉ LE ROBE CHE VE GIUTA A ESSER PI AMIGHI DE GEOVÀ
NDAR ALE RIUNION
Come che questa roba ne giuta a far pi forte la nostra fede? (Varda el paràgrafo 13.)
13. Come che le riunion le ne giuta a gaver una fede ancora pi forte? Parla de un esémpio.
13 Quando femo le robe che ne giuta a esser ancora pi amighi de Geovà, femo pi forte la nostra fede. Una dele robe che ghemo de far la ze ndar ale riunion. Varda el esémpio dela sorela Anna, che par tanti ani la ze drio far de pi par Geovà. e Ela la ga dito: “Le riunion le me giuta a gaver una fede ancora pi forte. Dele volte, i fradei che i fà i discorsi no i ga mia tanta abilità o i parla de una roba che mi belche savea. Ma sempre scolto qualcossa che me giuta a capir meio la Bìblia e a far pi forte la me fede.” La nostra fede anca la resta ancora pi forte quando scoltemo i comentari dei nostri fradei e sorele. — Rom. 1:11, 12; 10:17.
NDAR NELA PRECISASSION
Come che questa roba ne giuta a far pi forte la nostra fede? (Varda el paràgrafo 14.)
14. Come che la predicassion la ne giuta a far pi forte la nostra fede?
14 La nostra fede anca la resta pi forte quando ndemo ala predicassion. (Ebr. 10:23) Barbara, che la ze una sorela che la serve a Geovà par de pi de 70 ani, la ga dito: “Par mi, el laoro de predicassion sempre ga fato pi forte la me fede. Quando parlo ale persone sora le bele promesse de Geovà, vedo che la me fede la resta cada volta pi forte.”
STUDIAR DE PI SORA LA BÌBLIA
Come che questa roba ne giuta a far pi forte la nostra fede? (Varda el paràgrafo 15.)
15. Parché che studiar de pi sora la Bìblia ne giuta a gaver una fede pi forte? (Varda anca le ilustrassion.)
15 Studiar de pi sora la Bìblia l’è nantra roba che ne giuta a far pi forte la nostra fede. Una sorela de nome Susan ghe piase de far una programassion par studiar. Ela la ga dito: “Nela doménega, mi stùdio la Sentinela par la pròssima stimana. Nel luni e marti, mi me parecio par la riunion che gavaremo in meso la stimana. E nei altri giorni, mi stùdio altre robe sora la Bìblia.” Cossita, Susan la ze bona de mantegner forte la so fede. Nantra sorela de nome Irene, che la serve nela sede mondial par tanti ani, la dise che studiar le professie dela Bìblia ghe giuta a gaver una fede pi forte. Ela la ga dito: “Mi resto maraveiada de veder che le professie che Geovà el ga fato le ga sucedesto pròpio come le era scrite.” f
“SICURO CHE LA SE REALISARÀ”
16. Parché che le parole de Geovà a Abacuche le ne giuta anca ancoi? (Ebrei 10:36, 37)
16 Tanti servi de Geovà i ze drio spetar el fin de questo mondo fà tanto tempo. E arquante persone le pensa che el fin el gavaria de esser vegnesto tanto tempo indrio. Ma Geovà el savea che i so servi i ndaria sentirse cossita. Par quela, el ga dito al profeta Abacuche: “La vision la ze ancora par el so tempo determinà. Ela la va svelta fin al so fin, e no la sarà busia. Anca se ghe mete tempo, seita spetarla! Parché sicuro che la se realisarà. No la tardigarà!” (Aba. 2:3) Quel che Geovà el ga dito a Abacuche serve anca par noantri ancoi. Noantri lo savemo parché Geovà el ga doperà el apòstolo Paolo par parlar queste medèsime parole ai fradei dela època che i era drio spetar el novo mondo. (Ledi Ebrei 10:36, 37. g) Alora, ancora che ne par che el fin l’è distante, podemo esser sicuri che la promessa de Geovà ‘la se realisarà e no la tardigarà!’
17. Come che una sorela la ga metesto in pràtica el consìlio che Geovà el ga dato a Abacuche?
17 Tanti servi de Geovà i ga metesto in pràtica el consìlio de Geovà de ‘seitar a spetar’. Arquanti de lori i ze drio farlo par tanti ani. Varda el esémpio dela sorela Louise, che la ga scominsià a servir a Geovà nel ano 1939. Ela la ga dito: “In quela època, mi pensea che el Armagedon el vegnaria vanti de finir la scola. Ma no l’è mia stà cossita. Alora, in tuti questi ani, me ga giutà tanto leder sora servi de Geovà che ghe ga tocà spetar, come Noè, Abraon e Giusepe. Seitar a creder che le promesse de Geovà le ndarà suceder l’è drio giutar a mi e tanti altri a esser sicuri che el novo mondo l’è pròpio darente.” Sicuro che tanti altri fradei che i ze drio servir a Geovà par tanto tempo i ze de acordo con quel che Louise la ga dito.
18. Parché che pensarghe sora la creassion de Geovà ne giuta a gaver una forte fede nel novo mondo?
18 Pensa anca nele stele, nele piante, nele bèstie e nele persone. Tute queste robe no esistia mia una volta, ma Geovà le ga creade. (Gén. 1:1, 26, 27) L’è vera che el novo mondo no l’è gnancora vegnesto, ma Geovà el ga prometesto che ghen sarà un paradiso ndove viveremo par sempre con salute perfeta. Alora, semo sicuri che el novo mondo el vegnarà nela ora che Geovà el vol. — Isa. 65:17; Apo. 21:3, 4.
19. Come che te pol far pi forte la to fede?
19 Intanto che te speti el novo mondo, dopera el to tempo par far pi forte la to fede. Come? Daghe sempre valor al sacrifìssio de Gesù, pensaghe sora el poder de Geovà e fà le robe che te giuta a esser ancora pi amigo de Dio. Cossita, te sarè intrà “de quei che con fede e passiensa i riceve le promesse”. — Ebr. 6:11, 12; Rom. 5:5.
CÀNTICO 139 Imagìnate nel Paradiso
a Tante persone ancoi no le crede nela promessa del novo mondo. Lore le pensa che l’è sol una storieta o una fròtola e che l’è massa fadiga de creder. Magari, semo sicuri che Geovà el ndarà far tuto quel che el ga prometesto. Ancora cossita, ghemo de seitar a far la nostra fede cada volta pi forte. In questo stùdio, ndaremo imparar arquante robe che pol giutarne.
b (Efesi 3:20) De acordo col so poder che l’è in noantri, Dio el pol far pròpio tanto de pi de tuto quel che ghe domandemo o che podemo imaginar.
c (Giosuè 23:14) “Romai son drio morir, e valtri savé ben, de tuto el vostro cuor e de tuta la vostra ànima, che Geovà, el vostro Dio, no’l ga assà de far gnanca una dele bone robe che el ga prometesto. Tute le promesse le se ga realisà par el vostro ben. Gnanca una la ga assà de realisarse.
d (Isaia 55:10, 11) La piova e la neve le fà che vegna su le piante e le ghe dae fruti, le fà che el colono el gàpia semensa e che le persone le gàpie pan par magnar. Cossita come la piova e la neve le vien do del cielo e no le ritorna sensa vanti bagnar la tera, 11 cossita la sarà la me parola che la vien fora dela me boca. Ela no la tornarà a mi sensa resultadi, ma sicuro che la realisarà quel che mi vui, e sicuro che la farà quel che mi go mandà far.
e Arquanti nomi i ze stati cambiadi.
f Te pol catar tanti artìcoli che i parla de professie dela Bìblia se te vè in serca de “Profecias”, nel Índice de Publicações da Torre de Vigia. Par esémpio, te pol vardar el artìcolo “O que Jeová prediz se cumpre” nela Sentinela de 1 de genaro de 2008.
g (Ebrei 10:36, 37) Valtri gavé de perseverar. Cossita, dopo de far la volontà de Dio, riceveré quel che el ve ga prometesto. 37 Parché, ancora “nantro pochetin”, e “quel che el vien el rivarà, sensa tardigar”.
