1. Cossa che noantri savemo?

 NOANTRI savemo che Geovà el ne ama tanto e el vol che semo pròpio felici. (Rom. 8:35-39) Noantri anca semo sicuri che meter in pràtica i consili dela Bìblia ndarà giutarne tanto. (Isa. 48:17, 18) Ma, cossa ghemo de far se vien fora qualche dificoltà de colpo?

2. (a) Che dificoltà podemo infrontar? (b) Che domande fursi se femo quando semo drio tribolar?

² Tuti i servi de Geovà i infronta dificoltà. Par esémpio, pol esser che qualchedun dela nostra fameia el fae qualcossa che ne disgusta o no podemo far de pi par Geovà par causa de un problema de salute. Fursi sucede una desgràssia dela naturesa ndove semo de star o semo perseghidi parché adoremo a Geovà. Se sucede una roba de queste, pol esser che se domandemo: ‘Parché che questo l’è drio suceder con mi? Gonti fato qualcossa de sbalià? Sarà che Geovà no l’è pi drio benedirme?’ Se te ghè belche pensà cossita, no stà restar desanimà. Tanti servi fedeli de Geovà i se ga sentio come ti. — Sal. 22:1, 2; Aba. 1:2, 3.

3. Cossa che imparemo del Salmo 34:19?

³ Ledi Salmo 34:19. b Varda due robe importante che imparemo de questo salmo: Anca le persone che le fà quel che l’è giusto le ndarà tribolar e Geovà el ne salva dele nostre dificoltà. Come che lu el ne salva? Lu el ne giuta a pensar dela maniera  giusta. Geovà el promete che, se noantri lo servimo, gavaremo tanta alegria. Magari, questo no vol mia dir che no gavaremo problemi. (Isa. 66:14) Par quela, Geovà el ne dise de pensar come sarà bela la nostra vita nel futuro, quando viveremo felici e par sempre. (2 Cor. 4:16-18) Ma, par intanto, lu el ne giuta a dàrghene fora cole nostre dificoltà e a seitar a servirlo tuti i giorni. — Lam. 3:22-24.

4. Cossa che ndaremo imparar in questo stùdio?

⁴ In questo stùdio, ndaremo imparar sora el esémpio de servi fedeli del passà e anca dei nostri giorni. Ndaremo veder che, ancora che infrontemo bruti colpi, Geovà sempre el ndarà giutarne se se fidemo in lu. (Sal. 55:22) Alora, intanto che te studi el esémpio de questi servi fedeli, domàndate: ‘Cossa che mi gavaria fato se me gavesse sucedesto una roba cossita? Come che questi esempi fà pi forte la me fede in Geovà? Come che posso far compagno a lori?’

5. Che dificoltà Giacò el ga infrontà par causa de Labon? (Varda la ilustrassion dela prima pàgina.)

⁵ Tanti servi de Geovà del passà i ga infrontà dificoltà che no i spetea mia. Varda quel che ga sucedesto con Giacò. So pare el ghe ga dito che el ndesse catarse una dona intrà le fiole de Labon e che Geovà el ndaria benedirlo se el fesse cossita. (Gén. 28:1-4) Labon l’era un parente che el adorea a Geovà e el gavea due fiole, che le era Lèia e Rachel. Alora, Giacò el ga scoltà so pare e l’è ndato fin la casa de Labon. Giacò el ghe volea tanto ben a Rachel, che la era la fiola pi gióvena, e el ga acetà laorar sete ani par maridarse con ela. (Gén. 29:18) Magari, no l’è stà quel che ga sucedesto. Labon lo ga ciavà e lo ga fato maridarse con Lèia. Dopo de una stimana, Labon el ga assà che Giacò el se maridesse anca con Rachel. Magari, ghe ga tocà laorà altri sete ani. (Gén. 29:25-27) Labon el ga imbroià Giacò de diverse maniere e lo ga fato laorar 20 ani par lu. — Gén. 31:41, 42.

6. Che altre dificoltà Giacò el ga bio?

⁶ Giacò el ga bio tante altre dificoltà. Lu el gavea una fameia granda e so fioi no i era mia intesi. Lori i ga fin vendesto so fradel Giusepe come schiavo. Due dei fioi de Giacò, Simeon e Levi, i ga fato un bruto pecato che el ga portà vergogna al nome de Geovà e dela so fameia. Giacò anca el ga sofrio tanto parché la so cara dona Rachel la ze morta quando la ga bio el so secondo fiol. E quando Giacò deromai l’era vècio, una bruta fame la ze vegnesta fora e ghe ga tocà ndar de star nel Egito. — Gén. 34:30; 35:16-19; 37:28; 45:9-11, 28.

7. Come che Geovà el ga mostrà che l’era drio giutar Giacò?

⁷ Dopo de tuto quel che ghe ga sucedesto, Giacò no’l ga mai assà de fidarse in Geovà e nele so promesse. Par quela, Geovà lo ga sempre giutà. Par esémpio, ancora che Labon lo gavesse ciavà arquante volte, Giacò l’è stà benedio e el so capital l’è restà cada volta pi grando. E sicuro che lu el ga ringrassià tanto a Geovà quando el se ga catà nantra volta col so fiol Giusepe. La forte amicìssia che Giacò el gavea con Geovà lo ga giutà a dàrghene fora con tute queste dificoltà. (Gén. 30:43; 32:9, 10; 46:28-30) Se se sforsemo par gaver una forte amicìssia con Geovà, anca noantri saremo boni de dàrghene fora cole dificoltà che sucede de colpo.

8. Cossa che el rè Davi el volea far?

⁸ Varda el esémpio del rè Davi. Lu el volea tanto far un témpio par Geovà, e el ga parlà de questo col profeta Natan. Alora, pensa come Davi l’è restà contento quando Natan el  ghe ga dito: ‘Fà tuto quel che te ghè pensà, parché el vero Dio l’è con ti.’ (1 Cró. 17:1, 2) Fursi lu el ga suito scominsià a pareciarse e a far i progeti par quel grando laoro. Magari, lu no’l ga podesto far tuto quel che el volea nel laoro de Geovà.

9. Cossa che Davi el ga fato quando el ga savesto che no’l ndaria pi far su el témpio?

⁹ ‘In quela medèsima note’, Geovà el ga dito al profeta Natan che Davi no’l ndaria mia far su el témpio. Invesse, saria un dei so fioi. (1 Cró. 17:3, 4, 11, 12) Alora, cossa che Davi el ga fato quando el profeta Natan ghe ga dito questo? Lu el ga fato quel che el podea. Davi el ga scominsià a imuciar su soldi e robe che Salomon ghe ocoreria par far su el témpio. — 1 Cró. 29:1-5.

10. Come che Geovà el ga benedio Davi?

¹⁰ Pena dopo che Davi el ga savesto che no’l ndaria mia far su el témpio, Geovà el ghe ga prometesto che un dei so dissendenti el saria rè par sempre. (2 Sam. 7:16) Alora, pensa come Davi el restarà contento de saver che el Rè Gesù l’è un dei so dissendenti. Quel che ga sucedesto con Davi ne insegna che, anca se no podemo far tuto quel che volemo, Geovà el ndarà benedirne de altre maniere che fursi no ghemo mai pensà.

11. De acordo con Ati 6:7, come che i primi dissìpoli de Gesù i ze stati benedidi?

¹¹ Anca i primi dissìpoli de Gesù i ga bio problemi che no i spetea mia. Lori i era premosi che el Regno de Dio el vegnesse in quela època. Ma no l’è stà cossita che ga sucedesto. (Ati 1:6, 7) Alora, cossa gali fato? Lori i ga seità a predicar, e i ga visto che Geovà l’era drio benedir el so laoro. — Ledi Ati 6:7. c

12. Cossa che i primi dissìpoli de Gesù i ga fato quando una bruta fame la ze vegnesta fora?

¹² Nela època dei primi dissìpoli de Gesù, una ‘bruta fame la ze vegnesta sora tuta la tera’. (Ati 11:28) Quela fame la ga ciapà rento anca quei dissìpoli. Alora pensa come che i ga tribolà. Sicuro che quei che i gavea de tender dela fameia i ze restadi preocupadi se i saria boni de darghe quel che ghe ocorea. Pol esser che anca i gióveni che i pensea de far de pi nela predicassion no i ze stati boni de farlo. Ma, ancora cossita, i primi dissìpoli de Gesù i ga seità a far el meio che i podea nela predicassion. Lori anca i ze restadi contenti de spartir quel che i gavea coi altri fradei. — Ati 11:29, 30.

13. Che benedission i dissìpoli de Gesù i ga ghen’era quela bruta fame?

¹³ Che benedission i dissìpoli de Gesù i ga bio intanto che ghen’era quela bruta fame? Lori i ga visto el aiuto de Geovà parché i ga bio el magnar che ghe ocorea. (Mat. 6:31-33) I dissìpoli de Gesù anca i se ga sentio pi amighi dei fradei che li ga giutadi, e questi fradei i ga sentio la alegria de dar. (Ati 20:35) Geovà li ga pròpio benedidi, parché anca se ghen’era quela bruta dificoltà, lori i ga fato quel che i podea.

14. (a) Cossa che ga sucedesto con Paolo e Barnabè? (b) Cossa che ga sucedesto dopo che lori i ga seità a predicar? (Ati 14:21, 22)

¹⁴ I primi dissìpoli de Gesù anca i ga infrontà perseghission, e dele volte, questa perseghission la vegnea fora de colpo. Varda quel che ga sucedesto con Paolo e Barnabè intanto che i era drio predicar in Listra. De scomìnsio, le persone de quela cità li ga ricevesti ben. Magari pi tardi, arquanti giudei che i ze rivadi ala cità no ghe piasea la predicassion de Paolo e Barnabè. Alora, quei giudei i ga fato tanta gente vegner contra lori, e arquante  persone ghe ga dato tante sassade a Paolo che le ga pensà che l’era morto. (Ati 14:19) Ma, Paolo e Barnabè i ga seità a predicar. E cossa che ga sucedesto? Tante persone le ze deventade dissìpoli e i fradei i ze stati tanto incoraiadi par causa del esémpio de Paolo e Barnabè. (Ledi Ati 14:21, 22. d) Lori no i se ga mia fermà de predicar, ancora che i ze stati perseghidi. Cossita, Paolo e Barnabè i ze stati boni de giutar tanti. Alora, se noantri seitemo a far quel che Geovà el dise, sicuro che anca noantri saremo tanto benedidi.

15. Cossa gheto imparà col esémpio del fradel Macmillan?

¹⁵ Vanti de 1914, arquanti servi de Geovà i pensea che suito ndaria suceder arquante robe. Un de questi l’è stà el fradel Alexander Macmillan. Come tanti in quela època, lu el pensea che suito el ndaria al cielo. Nte un discorso che el ga fato in setembre de 1914, lu el ga dito: “Pol esser che questo sìpia el me ùltimo discorso.” Ma no l’è mia stà cossita. Un tempo dopo, el fradel Macmillan el ga scrito: “Fursi, arquanti de noantri sol gaveino in mente de ndar suito in cielo. Pitosto, gaveino de seitar a far el laoro del Signor.” El fradel Macmillan el ga fato pròpio cossita. Lu el ga seità a predicar e a ndar ale riunion, anca quando l’era ben vècio. El fradel Macmillan anca el ga incoraià arquanti fradei che i ze stati metesti in preson parché no i volea ndar al esèrsito. Sarà che l’è stà bon par lu seitar a servir a Geovà intanto che el spetea ndar al cielo? Sicuro che si. Poco vanti de morir in 1966, lu el ga scrito: “Sempre go bio una forte fede.” Volemo far compagno al fradel Macmillan e seitar a perseverar, anca se semo drio infrontar un problema fà tanto tempo. — Ebr. 13:7.

16. Che bruta dificoltà el fradel Jennings e la so dona i ga infrontà? (Tiago 4:14)

¹⁶ Tanti servi de Geovà i ga de dàrghene fora con problemi de salute che i sucede de colpo. Par esémpio, el fradel Herbert Jennings e el ga contà nela so stòria de vita che lu e so dona ghe piasea tanto esser missionari in Gana. Ma dopo de un tempo che i era lì, lu el ga savesto che el gavea una bruta malatia che lo fea cambiar come el se sentia. Una ora, lu l’era ben contento, e de là un poco, lu el se sentia tanto triste. Lu el ga dito che la so vita la era pròpio come dise Tiago 4:14. (Ledi. f) Lu el ga dito: “No ghen’è come saver come che sarà la nostra vita doman. Me ga tocà acetar quel che l’era drio suceder. Alora, semo ndati via de Gana, ndove gaveino tanti cari amighi, e semo tornadi al Canadà par far el tratamento.” Geovà el ga giutà el fradel Jennings e la so dona a seitar fedeli anca con una dificoltà che no i spetea mia.

17. Come che el esémpio del fradel Jennings el ga giutà altri fradei?

¹⁷ La stòria del fradel Jennings la ga giutà tanto altri fradei. Una sorela la ga scrito: “L’è stà la prima volta che ledo un artìcolo e me sinto tanto incoraiada. Veder quel che el fradel Jennings ghe ga tocà assar de banda par tender dela so salute me ga giutà a veder i me problemi dela maniera giusta.” Nantro fradel el ga scrito: “Mi son stato ansiano nela  congregassion par diese ani. Ma dopo, me ga tocà assar de esser ansiano par causa de una bruta malatia. Mi me sentia un porogramo e me fea fadiga leder le stòrie de vita de altri fradei, parché me parea che no ero bon de far gnente. Magari, me ga incoraià tanto leder la stòria del fradel Jennings.” L’è tanto importante ricordarse che se semo boni de perseverar ndaremo incoraiar tanto altre persone. Anca se le robe no le vien fora come voleino, podemo esser un bon esémpio de perseveransa par i altri. — 1 Pie. 5:9.

18. Cossa che podemo imparar de quel che ga sucedesto con una sorela védova nela Nigèria? (Varda anca la ilustrassion.)

¹⁸ Tanti servi de Geovà i ga tribolà par causa de desgràssie, come la COVID-19. Varda cossa ga sucedesto con una sorela védova e poareta che la ze de star nela Nigèria. Un giorno de matina, so fiola ghe ga domandà cossa che le ndaria magnar, parché le era drio cosinar la ùltima sbranca de riso e no ghen’era pi gnente. Alora, la sorela la ga dito a so fiola che le ndaria pareciar quel magnar e le ndaria fidarse in Geovà, compagno la védova de Sarefà. (1 Rè 17:8-16) Ma, no la ga gnanca fato ora pensar cossa le ndaria magnar de mesdì, che fradei i ghe ga portà un paco de magnar. Rento el paco, ghen’era magnar par altre due stimane. Quela sorela la ga dito che Geovà l’era pròpio atento a quel che la ga dito ala so fiola. Cossa che imparemo? Podemo esser sicuri che, se noantri se fidemo in Geovà, anca le robe brute che sucede le pol giutarne a far pi forte la nostra fede. — 1 Pie. 5:6, 7.

19. Che perseghission el fradel Aleksey Yershov el ga infrontà?

¹⁹ Nei ùltimi ani, tanti fradei e sorele i ze drio infrontar tanta perseghission. Varda par esémpio quel che ga sucedesto col fradel Aleksey Yershov dela Rùssia. Nel ano de 1994, quando lu l’è stà batesà, i fradei i gavea libertà par adorar a Geovà. Ma de là in qua, le robe  le ze restate pròpio brute. Nel ano de 2020, le autorità le ze ndate rento so casa in serca de qualcossa contra lu, e le ga portà via arquante robe soe. E par tanto tempo, un omo el ga fato finta de voler studiar la Bìblia e el ga fato vìdei del stùdio. El governo el ga doperà questi vìdei par acusar el fradel Yershov de esser un criminoso. Sicuro che lu el se ga sentio tradio.

20. Come che el fradel Yershov l’è stà bon de far pi forte la so amicìssia con Geovà?

²⁰ El fradel Yershov el ga dito: “Me son nicorto che no saria mia bon de dàrghene fora con questa dificoltà sensa el aiuto de Geovà. Alora, mi e me dona semo drio pregar ancora de pi. Studiar la Bìblia me giuta quando son desanimà. Nantra roba che me giuta la ze pensarghe sora esempi dei servi fedeli del passà. Ghen’è tanti esempi nela Bìblia che i mostra come l’è importante restar calmo e fidarse in Geovà.” Alora, el fradel Yershov el ga fato la so amicìssia con Geovà ancora pi forte, anca se l’era drio infrontar una bruta dificoltà.

21. Cossa che ghemo imparà in questo stùdio?

²¹ Cossa che ghemo imparà in questo stùdio? Intanto che vivemo in questo mondo, tante robe brute le pol suceder de colpo. Ancora cossita, se se fidemo in Geovà, lu sempre el ndarà giutarne. Come dise el testo de questo stùdio: “Le dificoltà del giusto le ze tante, ma Geovà lo salva de tute lore.” (Sal. 34:19) Cossita, invesse de consentrarse sol nele nostre dificoltà, volemo star atenti al poder che Geovà el ga de giutarne. Alora, poderemo dir compagno al apòstolo Paolo: “Par tute le robe, go forsa gràssie a quel che el me dà poder.” — Fil. 4:13.