1-2. De acordo con Mateo 5:11, cossa che ghemo de far quando infrontemo dificoltà?

GESÙ el ga prometesto che quei che i lo seghisse i gavaria la vera alegria. L’è vera che noantri restemo tanto contenti de seghir a Gesù, ma Gesù el ga anca dito che ndarìano infrontar tante dificoltà. (Mat. 10:22, 23; Luc. 6:20-23) Par esémpio, noantri restemo ansiosi quando sofrimo oposission dela fameia, semo perseghidi o quando i nostri coleghi de laoro o de scola i vol che femo qualcossa sbaliada.

² L’è sicuro che quasi tute le persone no le resta contente de infrontar dificoltà. Ma la Bìblia la dise che noantri ghemo de restar contenti quando questo sucede. Par esémpio, el dissìpolo Tiago el ga dito che noantri ghemo de restar contenti anca quando infrontemo le dificoltà. (Tiago 1:2, 12) Anca Gesù el ga dito che ghemo de restar contenti ancora se semo perseghidi. (Ledi Mateo 5:11. *) Ma cossa che ndarà giutarne a restar contenti anca cole dificoltà? Una roba che la pol giutarne l’è studiar i consili che Tiago el ga dato ai primi cristiani. Prima, ndemo veder che dificoltà che lori i ga infrontà.

3. Cossa che ga sucedesto un tempo dopo che Tiago l’è deventà dissìpolo de Gesù?

³ Poco tempo dopo che Tiago, fradel de Gesù, l’è deventà dissìpolo, i cristiani i ga scominsià a esser perseghidi in Gerusalen.  (Ati 1:14; 5:17, 18) E quando Stevon l’è stato copà, tanti cristiani i ga scampà via de Gerusalen e i ze ndati ala Giudea, Samaria, Cipre e Antiochia. (Ati 7:58–8:1; 11:19) Lori i ga infrontà tante dificoltà, ma i ga seità a predicar le bone notìssie contenti e i ga anca giutà a scominsiar congregassion in tuta la region che Roma la governea. (1 Pie. 1:1) Ma ndemo veder altri problemi che lori i ga infrontà.

4. Che altre dificoltà i primi cristiani i ga infrontà?

⁴ I primi cristiani i ga infrontà anca altre dificoltà. Par esémpio, intorno del ano 50 d.C., Clàudio, che el governea Roma, el ga parà via tuti i giudei dele so cità. Alora, arquanti cristiani i ga bio de assar indrio le so case e ndar de star in nantro posto. (Ati 18:1-3) Intorno del ano 61 d.C., el apòstolo Paolo el ga dito che tanti fradei i ze stati metesti in preson e i ze stati ciavadi. Anca el ga dito che tante persone le seitea dirghe su in meso dei altri. (Ebr. 10:32-34) In quel tempo, ghen’era anca i fradei che i era poareti e maladi. — Rom. 15:26; Fil. 2:25-27.

5. Cossa che ndaremo studiar adesso?

⁵ Vanti del ano 62 d.C., Geovà el ga doperà Tiago par scriver una carta a questi fradei. Tiago el savea ben dele dificoltà che questi fradei i era drio infrontar. Cossita, la so carta la podaria giutarli a infrontar queste dificoltà e a seitar contenti. Nela carta de Tiago, ghen’è le risposte a queste domande: De che alegria Tiago l’era drio parlar? Cossa che podaria far qualchedun perder la alegria? Come la sabedoria, la fede e el coraio i pol giutarne a infrontar le dificoltà con alegria? In questo stùdio, ndaremo veder le risposte a queste domande.

6. De acordo con Luca 6:22, 23, parché un servo de Dio l’è contento anca quando el infronta provassion?

⁶ Tante persone le pensa che le pol esser felice se le ga una bona salute, tanti soldi e una fameia felice. Ma Tiago no l’era drio parlar de questa alegria. Invesse, lu l’era drio parlar dela alegria che la vien del spìrito santo de Dio, e nò de quel che sucede nela vita. (Gàl. 5:22) Alora, un servo de Dio el resta contento quando el fà compagno a Gesù e el fà quel che ghe piase a Geovà. (Ledi Luca 6:22, 23; * Col. 1:10, 11) Imaginemo che la nostra alegria la ze come una fiama rento de un feral. Par causa dela protession che ghen’è intorno dela fiama, el vento e la piova no i pol smorsarla. Cossita anca la ze la nostra alegria. Anca che i altri i ne dise su, che ne manche i soldi, che ghemo problemi de salute o che infrontemo oposission dela fameia, ghemo alegria. E quando infrontemo provassion, la nostra alegria la resta ancora pi forte parché questo prova che semo veri dissìpoli de Cristo. (Mat. 10:22; 24:9; Gioani 15:20) Par quela che Tiago el ga scrito: “Me fradei, podé restar pròpio contenti quando infronté tanti tipi de dificoltà.” — Tiago 1:2.

7-8. Cossa che sucede cola nostra fede quando la infronta dificoltà?

⁷ Tiago anca el ga dito parché che i servi de Geovà i infronta anca le pedo dificoltà. Lu el ga dito: “Parché valtri savé che, quando la vostra fede la infronta dificoltà come queste, la ve farà gaver perseveransa.” (Tiago 1:3) Le dificoltà le ze come un fogo che l’è doperà par far una spada de fero. La spada la resta pi forte dopo che la passa par el caldo e el fredo. La medèsima roba la sucede cola nostra fede. Quando la infronta dificoltà, la resta pi forte e semo boni de perseverar. Tiago el ga dito sora questo: “Ma, gavé de assar che la perseveransa la ve insegne del tuto. Cossita, valtri saré completi, giusti in tute le robe e sensa sbàlio.” (Tiago 1:4) Quando la nostra fede la resta forte, noantri semo boni de perseverar con alegria.

⁸ Tiago el ga dito che noantri podemo perder la nostra alegria par causa de altre robe. Che robe le ze queste? Come che podemo infrontarle?

9. Parché che ghemo bisogno de sabedoria?

⁹ Cossa che pol farne perder la alegria? No saver cossa far. Fursi noantri restemo desanimadi quando infrontemo una provassion e  no savemo cossa far. Quando questo sucede, ghemo bisogno de sabedoria par saver quel che ghemo de far e quel che ghemo de dir a quei che i ne vien contra. Alora, ghemo bisogno del aiuto de Geovà par far le dessision che ghe piase a lu, che le ne giute a seitar leai e che le incoraie ai nostri fradei. — Ger. 10:23.

10. De acordo con Tiago 1:5, cossa che noantri ghemo de far?

¹⁰ Cossa che podemo far? Domandar la sabedoria de Geovà. Se noantri domandemo sabedoria a Geovà, ndaremo far le meio dessision. Cossita, noantri saremo boni de perseverar contenti. (Ledi Tiago 1:5. *) Tiago el ga dito che, quando noantri preghemo a Geovà par domandar sabedoria, lu el ne dà de maniera generosa. (Sal. 25:12, 13) Ma cossa che ghemo de far se pensemo che Geovà no’l ga rispondesto ale nostre orassion? Tiago anca el ga dito che noantri ghemo de seitar a domandar a Geovà. Geovà no’l se stufa se seitemo domandar sabedoria a lu. Lu el vede quel che semo drio infrontar, el resta disgustà par causa de questo e el vol giutarne. Noantri restemo tanto contenti de saver che ghemo el aiuto de Geovà! Ma come che Geovà el ne dà sabedoria?

11. Cossa che podemo far par gaver sabedoria?

¹¹ Geovà el ne dà sabedoria par meso dela so Parola. (Pro. 2:6) Alora, noantri ghemo de studiar la Bìblia e anca le nostre publicassion. Tiago anca el ga dito che no ghemo sol de scoltar, ma meter in pràtica quel che imparemo. (Tiago 1:22) Se femo questo, noantri deventemo persone tranquile, misericordiose e no ndaremo voler che le robe le sìpia fate dela nostra maniera. (Tiago 3:17) Cossita, queste qualità le ndarà giutarne a seitar contenti anca cole dificoltà.

12. Parché che l’è importante studiar ben la Bìblia?

 ¹² Tiago el ga dito che leder la Parola de Dio l’è come vardarse nte un spècio. Ela la ne mostra quel che ghemo de cambiar e la ne insegna come farlo. (Tiago 1:23-25) Par esémpio, quando noantri ledemo la Bìblia, fursi capimo che semo meso cativi. Col aiuto de Geovà, podemo imparar a restar tranquili quando infrontemo i problemi o quando le persone le ne assa inrabiadi. Alora, semo boni de pensar dela maniera giusta e far le meio dessision. (Tiago 3:13) Par quela che l’è tanto importante studiar ben la Bìblia!

13. Parché che ghemo de studiar i esempi dei servi de Dio?

¹³ Dele volte, noantri sol imparemo a far quel che l’è giusto dopo che ghemo sbalià. Ma ghen’è una maniera meio de far questo. Come? Podemo imparar dei boni e dei bruti esempi dei altri. Par quela che Tiago el ne ga incoraià a studiar i esempi de servi leai de Geovà, come Abraon, Raabe, Giò e Elia. (Tiago 2:21-26; 5:10, 11, 17, 18) Questi servi leai de Geovà i ze stati boni de perseverar con alegria. E questo el mostra che anca noantri podemo perseverar col aiuto de Geovà.

14-15. Cossa che pol suceder se ghemo dubi sora quel che credemo?

¹⁴ Cossa che pol farne perder la alegria? Gaver dubi sora quel che credemo. Pol esser che noantri no ghemo capio ben qualcossa che la Bìblia la dise o Geovà no’l ga rispondesto ale nostre orassion come voléino. Alora, podemo scominsiar a gaver dubi. Se no femo gnente, questi dubi i ndarà far la nostra fede restar pi fiaca e ndaremo restar distanti de Geovà. (Tiago 1:7, 8) E podaremo fin perder la nostra speransa nele promesse de Geovà.

¹⁵ El apòstolo Paolo el ga dito che la nostra speransa la ze come una àncora. (Ebr. 6:19) Nte una tempesta, un navio el resta firme e no’l va su par i sassi par causa dela so àncora. Ma ela la ga de esser ligada al navio par una corente. La corente la ga de esser ben forte e sensa rùsine, senò no la ndarà tegner el barco ala àncora. La corente la ze come la nostra fede. Alora, se noantri ghemo dubi, la nostra fede la ndarà restar fiaca e quando infrontaremo dificoltà, no gavaremo pi fede. Sensa fede, podaremo pensar che Geovà no’l ndarà far quel che lu el ga prometesto e no gavaremo pi speransa. Tiago el ga dito che una persona che la ga dubi la ze come le onde del mar che el vento la porta de qua in là. (Tiago 1:6) Questa persona no la ze bona de gaver alegria!

16. Cossa che ghemo de far se ghemo dubi sora quel che credemo?

¹⁶ Cossa che podemo far? Far peschise par no gaver pi dubi e far pi forte la nostra fede. Nei giorni del profeta Elia, anca el pòpolo de Geovà el ga bio dubi sora quel che i credea. Elia el ghe ga dito: “Fin quando valtri no saré mia sicuri de chi ndaré adorar? Se Geovà l’è el vero Dio, alora gavé de adorarlo! Ma se l’è Baal, podé adorarlo!” (1 Rè 18:21) Alora, se noantri ghemo dubi, volemo suito far peschise e esser sicuri de quel che credemo. Par esémpio, che Geovà l’è el vero Dio, che la Bìblia la ze la so Parola e che le Testimònie de Geovà le ze el so pòpolo. (1 Tes. 5:21) Cossita, no gavaremo pi dubi e gavaremo una fede pi forte. Se no semo mia boni de far questo noantri soli, podemo domandar el aiuto dei ansiani. Alora, se ghemo dubi, ne ocore suito far quel che ghemo pena imparà par servir a Geovà con alegria!

17. Cossa che ndarà suceder se no ghemo pi coraio?

¹⁷ Cossa che pol farne perder la alegria? Restar  desanimadi. La Bìblia la dise: “Se te sì desanimà quando te infronti dificoltà, no te gavarè pi forsa.” (Pro. 24:10) La parola ebraica che la ze tradusida, come “restar desanimà”, la vol anca dir “perder el coraio”. Se noantri perdemo el coraio, ndaremo anca perder la alegria.

18. Cossa vol dir perseverar?

¹⁸ Cossa che podemo far? Capir che sol saremo boni de perseverar se ghemo el aiuto de Geovà. Noantri ghemo bisogno de coraio par perseverar quando infrontemo dificoltà. (Tiago 5:11) Quando Tiago el ga parlà sora “perseverar”, lu el gavea in mente una persona che la resta firme nte un posto. L’è compagno a un soldà che el resta firme nel so posto e no’l scampa via dei so nemighi.

19. Cossa che podemo imparar col esémpio del apòstolo Paolo?

¹⁹ El apòstolo Paolo l’è un bel esémpio de coraio e perseveransa. Dele volte, Paolo no’l gavea pi forsa, ma lu l’era bon de perseverar parché el se fidea che Geovà el ndaria darghe el coraio e la forsa che lu el gavea de bisogno. (2 Cor. 12:8-10; Fil. 4:13) Anca noantri podemo gaver la forsa e coraio se se fidemo nel aiuto de Geovà. — Tiago 4:10.

20-21. Cossa che podemo esser sicuri?

²⁰ Quando noantri infrontemo dificoltà, semo sicuri che Geovà no l’è mia drio castigarne. Tiago el ga dito: “Quando soto prova, che nissuni i diga: ‘Dio l’è drio provarme.’ Parché par robe rugne Dio no’l pol esser provà, gnanca el prova nissuni.” (Tiago 1:13) Se noantri semo sicuri de questo, gavaremo una amicìssia cada volta pi forte con Geovà. — Tiago 4:8.

²¹ Geovà el ga giutà i primi cristiani a infrontar le so dificoltà e el ndarà anca giutarne parché lu no’l càmbia mia. (Tiago 1:17) Alora, prega e domanda a Geovà sabedoria, fede e coraio. L’è sicuro che Geovà el ndarà risponder ale to orassion e anca darte la alegria par infrontar le dificoltà!