1-2. Compagno a Lò, che dificoltà semo drio infrontar ancoi?

 NELA època de Lò, le persone le fea aposta robe che disgustea tanto a Dio. (2 Pie. 2:7, 8) Magari, Lò el odiea quele brute robe parché el amea a Geovà e el gavea tanto rispeto par lu. Ancoi, l’è drio suceder la stessa roba. Tante persone intorno a noantri le ga poco gnente rispeto par quel che Dio el dise che l’è giusto. Ancora cossita, podemo far quel che Geovà el vol se seitemo a amarlo e imparemo come rispetarlo. — Pro. 14:2.

² Nel libro de Proverbi, Geovà el ne insegna cossa ghemo de far par amarlo e mostrar che ghemo tanto rispeto par lu. Alora, no vol mia dir se semo òmini o done, gióveni o veci, tuti noantri podemo imparar tanto coi consili che catemo in Proverbi.

3. De acordo con Proverbi 17:3, parché che l’è importante proteger el nostro cuor? (Varda anca la ilustrassion.)

³ Difarente dele persone, Geovà l’è bon de veder quel che ghemo rento el nostro cuor. Par quela, l’è importante proteger el nostro cuor. (Ledi Proverbi 17:3. b) Se seitemo a pensarghe sora i consili che Geovà el ne dà, lu el ndarà amarne e podaremo viver par sempre. (Gio. 4:14) Alora, se vien la voia de far qualcossa sbaliada, podemo domandarse: ‘Come che mi podaria far qualcossa contra una persona che la me ama tanto?’ (1 Gio. 4:9, 10) Se femo pi forte la nostra amicìssia con Geovà, ndaremo amarlo e rispetarlo ancora de pi. No ndaremo gnanca pensar de far qualcossa che ndarà disgustar  el nostro caro Pare. Cossita, no ndaremo drio le robe sbaliade, le busie de Sàtana e le persone de questo mondo. — 1 Gio. 5:18, 19.

4. Come che el rispeto par Geovà ga giutà una sorela a no far un pecato?

⁴ Marta, una sorela dela Croàssia, la ga bio voia de far imoralità. Ela la ga dito: “L’è stà fadiga pensar dela maniera giusta e dàrghene fora cola voia de far una roba sbaliada. Ma gaver tanto rispeto par Geovà me ga giutà!” c Marta la ga pensà sora cossa vegnaria fora se la fesse quel pecato e la ga bio paura de disgustar a Geovà. Noantri ghemo de far compagno. Alora, ne ocore ricordarse che saria pròpio bruto disgustar a Geovà e perder la nostra amicìssia con lu. — Gén. 6:5, 6.

5. Cossa che podemo imparar de quel che ga sucedesto con Leo?

⁵ Varda anca quel che ga sucedesto con Leo, un fradel che l’è de star nel Congo. Quatro ani dopo de esser batesà, lu el ga scominsià a restar massa insieme de persone che le fea robe sbaliade. Ma lu el pensea che no’l ndaria disgustar a Geovà se no’l fesse compagno de lore. Ancora cossita, quele persone lo ga influensà, e Leo el ga scominsià a bever massa e el ga fato imoralità. Dopo, lu el ga pensà sora quel che so pare e so mare ghe gavea insegnà e come che l’era contento quando servia a Geovà. Cossita, lu l’è stà bon de cambiar, e col aiuto dei ansiani, l’è tornà a servir a Geovà. Ancoi, Leo el serve contento come ansiano e pioniero spessial. Cossa che podemo imparar de quel che ga sucedesto con Leo? Se tememo a Geovà, o sia, ghemo tanto rispeto par lu, mai ndaremo esser amighi de persone che le fà robe sbaliade.

6. De che “due done” ndaremo imparar adesso?

⁶ Adesso, ndemo veder cossa che podemo  imparar de Proverbi 9, ndove ledemo sora la stupidìsia e la sabedoria come se le fusse due done. (Varda anca Romani 5:14; Gàlati 4:24.) L’è tanto importante gaver in mente che el mondo de Sàtana el ghe dà tanto valor ala imoralità e ala pornografia. (Efe. 4:19) Par quela, ghemo de temer a Geovà se volemo star distante de queste brute robe. (Pro. 16:6) La dona che la ga sabedoria e la dona che la ze stùpida de Proverbi 9 le fà un convite a tuti quei che no i ga mia speriensa. L’è come se lore le disesse: ‘Vegné qua casa magnar.’ (Pro. 9:1, 5, 6, 13, 16, 17) Magari, ghemo de ricordarse che dopo che scoliemo che convite ndaremo acetar, podarà vegner fora robe bone o nò. Alora, quel che podemo imparar de Proverbi 9 l’è tanto importante par tuti noantri.

7. De acordo con Proverbi 9:13-18, cossa che ndarà suceder con quei che i ghe va drio ala dona stùpida? (Varda anca la ilustrassion.)

⁷ Vedemo prima el convite dela “dona stùpida”. (Ledi Proverbi 9:13-18. d) Questa dona no la ga mia vergogna e la convida tuti “quei che no i ga mia giudìssio” a ndar ala so casa far una festa. Ma cossa che sucede? Tuti quei che i va lì i more. Fursi te te ricordi che el libro de Proverbi el parla anca altre volte de done che le fà robe sbaliade e de cossa che sucede con quei che i ghe va drio. Par esémpio, el dise che quei che i ghe va drio ‘la dona slandra’ i ndarà morir. — Pro. 2:11-19; 5:3-10

8. Che dessision fursi te ocore far?

⁸ Quei che scolta la “dona stùpida” i ga de dessider se i ndarà acetar so convite o nò. Fursi, anca noantri gavaremo de dessider cossa far. Par esémpio, cossa farìssito se te vien voia de far qualcossa sbaliada? O cossa farìssito se te sì drio doperar el telèfono, el computador o la television e, de colpo, vien fora qualcossa imoral o pornogràfica?

9-10. Parché che ghemo de scampar via dela imoralità?

⁹ La Bìblia la dise che el sesso intrà un omo e una dona che i ze maridadi l’è come àqua fresca. (Pro. 5:15-18) E savemo che sol un omo e una dona che i ze maridadi i pol  far sesso. Magari, quel che la dona stùpida la dise l’è tanto difarente. Ela la dise che “la àqua che la ze stata ciavada la ze dolsa”. Compagno a un ladron, quei che i fà imoralità i proa sconder quel che i fà. Par quela, i pensa che nissuni i sa quel che i ga fato e che no i gavarà gnanca un problema. Invesse, Geovà el vede e el sa tuto. Alora, quando una persona lo assa disgustà no ghen’è gnente de dolso. Saver che ghemo disgustà a Geovà la ze la pedo roba che podaria suceder. (1 Cor. 6:9, 10) Sicuro che l’è tanto importante star distante dela imoralità. Ma ghen’è ancora altre robe brute che le pol suceder.

¹⁰ Sicuro che l’è tanto meio scampar via invesse de acetar el convite dela dona stùpida. Parché? Parché quei che i fà imoralità i se sente in vergogna, i sente che no i ga mia valor, i spartisse le so fameie e pol esser che vien fora fioi che no i volea mia. Quei che i fà imoralità anca i ndarà perder la so amicìssia con Geovà, fursi i restarà maladi e i podarà fin morir. (Pro. 7:23, 26) Par quela che Proverbi 9:18 dise que chei che i ghe va drio el convite dela dona stùpida “no i sa che quei che i ze lì i ze sensa vita, gnanca che quei che i va rento i ze nel fondo del Sepolcro”. — Pro. 9:13-18.

11. Parché che vardar pornografia la ze una roba pròpio bruta?

¹¹ Ghemo de star distante dela tràpola dela pornografia. Tanti i dise che no ghen’è mia problema vardar pornografia. Ma questa la ze una roba tanto bruta che la pol deventar un vìssio e fursi la persona no la sarà pi bona desmentegarse quel che la ga visto. La pornografia la fà le persone gaver ancora pi voia de far quel che l’è sbalià e perder el rispeto par lore stesse e par i altri. (Col. 3:5; Tia. 1:14, 15) Par quela, tanti de quei che i vede pornografia i fà bruti pecati.

12. Come che mostremo che volemo star distante de tuto quel che pol farne disgustar a Geovà?

¹² Cossa che noantri ghemo de far se semo drio doperar el telèfono o el computador e vien fora qualcossa pornogràfica? Ne toca svelti vardar par nantra banda e cavar via quela roba. Saremo boni de far cossita se seitemo a ricordarse che la nostra amicìssia con Geovà la ze la roba pi importante che ghemo. E anca ne ocore star atenti a robe che no le ze mia pornografia, ma che ne fà pensar in sesso e gaver voia de far qualcossa che la ze sbaliada. Ma parché che no ghemo de vardar queste robe? Parché volemo star distante de qualcossa che pol farne disgustar a Geovà. (Mat. 5:28, 29) Varda quel che David, un ansiano dela Tailàndia, el ga dito: “Mi penso: ‘Anca se queste robe no le ze pornografia, sarà che Geovà el restarà contento se mi seito a vardarle?’ Pensar cossita me giuta a far bone dessision.”

13. Cossa che pol giutarne a far bone dessision?

¹³ Podemo far bone dessision se ghemo paura de far qualcossa che ndarà disgustar a Geovà. Par quela che la Bìblia la dise che se ghemo un ‘grando rispeto par Geovà’, gavaremo ‘sabedoria’. (Pro. 9:10) Questo ne giuta a capir meio el scomìnsio del capìtolo 9 de Proverbi. Lì parla sora la “vera sabedoria” come se la fusse nantra dona.

14. Che nantro convite vedemo in Proverbi 9:1-6?

¹⁴ Ledi Proverbi 9:1-6. e Qua, vedemo un convite de Geovà, el Creador e quel che el  ga la vera sabedoria. (Pro. 2:6; Rom. 16:27) Questi versìcoli parla de una granda casa con 7 colone. Questo mostra che Geovà l’è generoso e che el riceve tanto ben tuti quei che i vol imparar de lu e gaver sabedoria.

15. Cossa che Geovà el vol che femo?

¹⁵ Capimo che Geovà l’è tanto generoso par via de quel che la “vera sabedoria” la fà. In Proverbi capìtolo 9 dise che questa “dona” la ga parecià una bela tola con carne e vin. (Pro. 9:2) Dopo, nei versìcoli 4 e 5, ledemo: ‘Che i vegna qua tuti quei che no i ga speriensa! Vegné e magné del me pan.’ Parché che saria bon ndar drio el convite dela vera sabedoria e magnar quel che la ga parecià? Parché Geovà el vol darne sabedoria invesse de vederne sofrir e imparar cole brute. Par quela che Geovà el dà sabedoria a quei che i ze giusti. (Pro. 2:7) Quando tememo a Geovà, volemo contentarlo, ndemo drio ai so consili e semo felici de meterli in pràtica. — Tia. 1:25.

16. (a) Come che temer a Geovà ga giutà Alain a far una bona dessision? (b) Cossa che ga sucedesto dopo?

¹⁶ Varda quel che ga sucedesto con Alain, un ansiano che l’è maestro. Gaver tanto rispeto par Geovà e paura de disgustarlo ga giutà Alain a far una bona dessision. Lu el ga dito: “Tanti dei me coleghi i disea che mi podaria imparar sora sesso in filmi de pornografia.” Ma Alain no’l se ga assà imbroiar. Lu el ga dito: “Mi amo a Geovà e go tanto rispeto par lu. Par quela, mai ndaria vardar una roba cossita. Mi ghe go spiegà ai me coleghi parché che mai ndaria vardar pornografia.” Alain el ga metesto in pràtica el consìlio de ‘ndar avanti nela strada dela sabedoria’. (Pro. 9:6) Cossa che ga sucedesto dopo? Altri maestri ghe ga piasesto de quel che Alain el ga dito e, adesso, i ze drio studiar la Bìblia e ndar ale riunion.

17-18. (a) Che benedission quei che aceta el convite dela “vera sabedoria” i ga adesso? (b) Che benedission lori i gavarà nel futuro? (Varda anca la ilustrassion.)

¹⁷ Par insegnarne cossa ghemo de far par esser felici, Geovà el ga parlà sora la sabedoria e la stupidìsia come se fusse due done. Quei che i ghe va drio la “dona stùpida” i va in serca dela imoralità par esser felici. Magari, lori no i ze drio pensar in quel che sucederà pi avanti. Le so brute dessision le ndarà portarli ‘nel Sepolcro’. — Pro. 9:13, 17, 18.

¹⁸ Invesse, le persone che le va drio el convite dela “vera sabedoria” le gavarà un futuro tanto difarente! Lore le ga tuto quel che ghe ocore par esser amighe de Geovà. (Isa. 65:13) Par meso del profeta Isaia, Geovà el ne convida de ‘scoltarlo e goderse de un bon  magnar che fà ben’. (Isa. 55:1, 2) Se acetemo so convite, ndaremo imparar a amar quel che Geovà el ama e odiar quel che lu el òdia. (Sal. 97:10) E restemo contenti de convidar anca altre persone par imparar dela “vera sabedoria”. L’è come se fùssino “nel posto pi alto dela cità par dir cossita: ‘Che i vegna qua tuti quei che no i ga speriensa!’” Se acetemo questo convite, riceveremo benedission adesso e par sempre parché saremo drio ndar “avanti nela strada de quei che i ga sabedoria”. — Pro. 9:3, 4, 6.

19. De acordo con Eclesiasti 12:13, 14, cossa che ghemo de far? (Varda anca el quadro “ Gaver un grando rispeto par Dio ne giuta a . . .”)

¹⁹ Ledi Eclesiasti 12:13, 14. f In questi bruti ùltimi giorni, ne ocore temer a Geovà. Cossita saremo boni de proteger el nostro cuor, esser cada volta pi amighi de Dio e star distante de robe sbaliade. Volemo seitar a convidar tuti quei che i vol imparar cola “vera sabedoria”. Cossita, mostremo che amemo tanto a Geovà e no volemo mai disgustarlo.