Nela Seconda Guera Mondial, me pare e me mare i ze ndati via dela Estònia fin la Alemagna, ndove son nassesto. Dopo, lori i ga dessidio ndar de star nel Canadà. La nostra prima casa la ze stata rento un punaro, nte un posto darente Ottawa. Noantri èrino pròpio poareti, ma al manco gaveino ovi par magnar de matina.

Un giorno, le Testimònie de Geovà le ga ledesto a me mama el testo de Apocalisse 21:3, 4. Ela la ze restada tanto contenta con quel che la ga scoltà che la ga tacà a piander. Alora, me mama e me pupà i ga seità studiar la Bìblia, e dopo de poco tempo, i era pronti par batesarse.

Me pare e me mare no i era mia boni de capir e parlar el inglese polito. Ma, i se sforsea tanto par servir a Geovà. Me pare el laorea in Sudbury, nte una fàbrica ndove i doperea el caldo par desmansiar el nìchel. Ancora cossita, quasi tuti i sabi de matina, lu el menea a mi e ala me soreleta, Sylvia, nela predicassion. La nostra fameia sempre la studiea La Sentinela insieme. Cossita, la mama e el pupà i me ga insegnà a amar a Geovà. Par quela, nel ano 1956, quando mi gavea 10 ani, go volesto dedicar la me vita a Geovà. El grando amor che me pare e me mare i gavea par Geovà sempre me ga incoraià a seitar a servirlo.

Magari, dopo che go finio la scola, servir a Geovà ga assà de esser la roba pi importante par mi. Par quela, mi pensea che se deventesse pioniero, no gavaria mai soldi par zolar e cognosser el mondo. Cossita, go scominsià a laorar nte una ràdio ndove mi scoliea e metea sonar le mùsiche par la gente. Me piasea tanto questo laoro. Ma laorea de note, perdea tante riunion e go scominsià a star insieme de persone che no le servia a Geovà. Alora, son nicorto che gavea de cambiar.

Son ndato de star in Oshawa, ndove go cognossesto Ray Norman, la so sorela Lesli e altri pionieri. Lori i me ga tratà pròpio ben e i me ga incoraià a esser pioniero. Veder come i era contenti me ga dato voia de far compagno a lori. Par quela, in setembre de 1966, son deventà pioniero. Mi ero pròpio contento e la me vita la me parea bona. Magari, suito ndaria suceder una mùcia de altre bele robe nela me vita.

Intanto che ero ancora nela scola, go fato la petission par ndar laorar nel Betel in Toronto, nel Canadà. Pi tardi, quando ero belche pioniero, son stà  convidà par laorar in Betel par quatro ani. Magari, mi ghe volea tanto ben a Lesli e gavea paura che, se ndesse via, no ndaria mai pi vederla. Alora, dopo de tanto pregar, go dessidio ndar a Betel. Ma son restà pròpio disgustà de dirghe ciao a Lesli.

In Betel, go laorà nela parte ndove se lavea do le robe e dopo come secretàrio. Intanto che ero là, Lesli la ze deventada una pioniera spessial nel Quebec. Mi sempre me domandea cossa èrila drio far e se mi gavea fato la dessision giusta. Alora, un giorno ga sucedesto una dele robe pi bele dela me vita. Ray, so fradel de Lesli, l’è stà convidà par servir in Betel e l’è vegnesto de star nel medèsimo quarto de mi. Cossita, mi son stà bon de parlar con Lesli nantra volta. Noantri se ghemo maridà nel giorno 27 de febraro de 1971, nel ùltimo giorno dei me quatro ani in Betel.

Mi e Lesli semo stati mandadi servir nte una congregassion de francese in Quebec. Dopo un per de ani, son stà convidà par esser superintendente de sircuito. Ma come mi gavea sol 28 ani, me parea che ero massa gióveno e no saria mia bon. E Lesli no la era bona dormir polito de note par causa de un per de assidente de auto che la gavea sofrio. Alora, penseino che no sarìssino mia boni de far el laoro de superintendente. Ancora cossita, ela la me ga dito: “Se Geovà el ne domanda de far qualcossa, sarà che no gavarìssino al manco de proar?” Le parole de Geremia 1:7, 8 anca le me ga incoraià. Alora, ghemo acetà far quel laoro, e semo restadi pròpio contenti de esser superintendenti par 17 ani.

Ghen’era sempre tanto laoro de far, e dele volte, mi no gavea mia tempo par star insieme de Lesli. Magari, me tochea imparar una roba pròpio importante. Un luni de matina bonora, qualchedun el ga sona el campaner. Quando son ndato veder chi che l’era, ghen’era sol una sestela, una tovaia, fruti, formai, pan, una botilia de vin, bicieri e un papel scrito: “Mena to dona a spasso”. L’era un giorno pròpio bel. Ma ghe go spiegà a Lesli che me tochea pareciar i discorsi e no podarìssino mia ndar. Ela la ga capio, ma la ze restada un pochetin disgustada. Dopo, quando me son sentà do par pareciar i discorsi, go scominsià a sentirme in colpa. Me ze vegneste in mente le parole de Efesi 5:25, 28, e me parea che Geovà l’era drio dirme che mi gavea de tender ben dela me dona. Alora, dopo de pregar, ghe go dito a Lesli: “Ndemo là.” Ela la ze restada pròpio contenta! Ghemo ciapà el auto e semo ndati nte un posto pròpio bel darente un rio. Lì, ghemo stirà in tera la tovaia, se ghemo sentà do e ghemo passà un bel giorno insieme. In ùltima, son anca stà bon de pareciar i me discorsi.

Nostro sircuito el ciapea dela Columbia Britànica fin Tera Nova. E semo restadi pròpio contenti de visitar tanti posti. Alora, ero pròpio drio viaiar come gavea voia ancora de picinin. Mi gavea belche pensà de far la Scola de Gileade, ma no gavea mia voia  de esser un missionàrio. Me parea che i missionari i era gente spessial e che mi no saria mai bon de esser cossita. Anca gavea paura che i me mandesse a un de quei posti dela Àfrica ndove ghen’è tante guere e malatie. E mi ero contento nel Canadà.

Nel ano 1992, le Testimònie de Geovà le ga scominsià a predicar nantra volta in arquante paesi che i era dela Union Soviètica. Alora, i fradei i ne ga domandà de esser missionari nela Estònia. Semo restadi spaventadi, ma dopo pregar ghemo pensà nantra volta: “Se Geovà el ne domanda de far qualcossa, sarà che no gavarìssino al manco de proar?” Cossita, ghemo acetà, e go pensà: ‘Manco mal che no semo mia drio ndar ala Àfrica.’

Noantri suito ghemo scominsià a imparar el estoniano. Dopo de un per de mesi, i me ga convidà par laorar come superintendente de sircuito. Ghemo visità intorno de 46 congregassion e grupi nela Estònia, Letònia, Lituania e nte una parte dela Rùssia. Par quela, ne tochea imparar a parlar un pochetin de leton, lituano e russo. E l’è stà pròpio fadiga. Magari, i fradei i restea contenti de veder el nostro sforso e i ne giutea tanto.Alora, una filial la ze stata fata su nela Estònia nel ano 1999 e i me ga convidà par far parte dela comission de filial, insieme de Toomas Edur, Lembit Reile, e Tommi Kauko.

Noantri ghemo cognossesto tanti fradei che nel passà i era stati presi e menadi ala Sibèria. Anca se i ga sofrio tanto par causa dela preson e ghe ga tocà star distante dela fameia, lori no i ze mai deventadi tristi. Invesse, i ga seità a far el so meio nela predicassion contenti. El so bel esémpio ne ga giutà a veder che podarìssino anca noantri perseverar e gaver alegria ancora che fusse fadiga.

Gaveino sempre tanto laoro de far e se toleino poco tempo par riposar. Alora, de colpo, Lesli la ga scominsià a sentirse tanto straca. De scomìnsio, me parea una roba normal, ma dopo ghemo capio che la gavea fibromialgia. Par quela, ghemo pensà de tornar al Canadà. Magari, semo stati convidadi par far la Scola par Fradei de Comission de Filiai, in Patterson, Stadi Unidi. Mi pensea che no sarìssino mia boni de ndar. Ma ghemo pregà tanto a Geovà e ghemo acetà. Geovà el ga benedio tanto la nostra dessision parché l’è stà lì che Lesli la ga scominsià a far el tratamento che la gavea de bisogno. Cossita, semo stati boni de tornar ala Estònia e far el nostro laoro.

Una sera, in 2008, quando èrino nela Estònia, la Sede Mondial la me ga ciamà par telèfono e la ga domandà se podarìssino ndar de star nel Congo. Mi son restà pròpio spaurà. Ancora de pi parché mi gavea de risponder nel giorno dopo. Alora, no ghe go dito gnente a Lesli parché savea che la restaria massa preocupada e no la saria mia bona dormir quela note. Invesse, son stà mi che go mai dormio parché go seità a pregar par causa dei me pensieri sora la Àfrica.

Nel giorno dopo, quando ghe go contà a Lesli, ghemo pensà: “Geovà l’è drio convidarne par ndar  nela Àfrica. Come che podemo dir che no semo mia boni de ndar se mai proemo?” Alora, dopo de 16 ani nela Estònia, semo ndati de star in Kinshasa, nel Congo. La filial de quel paese la ga un bel giardin e l’è un posto ndove se sentimo pròpio ben. Quando semo rivadi, una dele prime robe che Lesli la ga fato la ze stata meter nel nostro quarto un carton che disea: “Resta contento ndove te sì.” E ghemo bio pròpio tanta alegria dopo de cognosser i fradei, far studi dela Bìblia e quando ghemo visto come l’è bon el laoro come missionari. Semo ndati visitar le filiai de intorno de 13 paesi dela Àfrica. Cossita, ghemo cognossesto fradei de culture tanto bele e difarente. Alora, mi no gavea pi paura e ghemo ringràssia tanto a Geovà che el ne ga mandà nela Àfrica.

Nel Congo, i fradei i magna tante robe difarente, come bisseti. Mi pensea che no sarìssino mia boni de magnar quele robe lì. Magari, ghemo visto che ghe piasea tanto ai fradei. Alora, ghemo proà e ne ga piasesto anca a noantri.

Ghemo viaià al leste del paese par incoraiar i fradei e giutarli con quel che i gavea de bisogno. In quel posto, òmini cole sciòpe in man i ndea rento le cità e i ghe fea mal ale done e ai tosatei. Quasi tuti i fradei i era pròpio poareti. Ancora cossita, la speransa dela ressuression, el so amor par Geovà e la so lealtà ala organisassion ne ga giutà a far pi forte la nostra fede in Geovà e a pensar parché servimo a lu. Arquanti dei fradei anca i gavea perso le so case e le so piantassion. Questo me ga giutà ricordarme che i soldi e le robe che ghemo i pol finirse pròpio svelto, ma che el pi importante l’è gaver una forte amicìssia con Geovà. Ancora che i tribolesse tanto quei fradei no i era sbrontoloni. El so esémpio ne ga giutà a gaver pi coraio par dàrghene fora coi nostri problemi.

Dopo ne ga sucedesto nantra roba che no speteino mia. Semo stati convidadi par ndar nel Betel de Hong Kong. No gaveino mai pensà de ndar de star nela Àsia. Ma dopo che ghemo visto la man de Geovà giutarne in tuti altri posti, ghemo acetà anca questo convite. Semo restadi tanto disgustadi de assar indrio i nostri cari amighi e le bele robe dela Àfrica. Ancora cossita, in 2013, semo  ndati a Hong Kong, un posto che no gaveino gnanca idea de come l’era.

Hong Kong la ze una cità pròpio granda, ndove ghen’è una mùcia de gente che vien de diversi posti del mondo. Alora, la nostra vita la ga cambià tanto e l’era pròpio fadiga imparar el cinese. Magari, i fradei i ne ga ricevesto tanto ben e ne ga piasesto anca el magnar. Come ghen’era tanto laoro de far in quel paese, ghe tochea sgrandar la filial. Ma, le tere e le costrussion costea massa e el Corpo Governante el ga dessidio vender tante de queste costrussion e scominsiar a far arquanti laori nela filial de nantro paese. Par quela, in 2015, semo ndati de star nela Corea del Sud, ndove semo fin ancoi. Qua, ghemo catà nantra léngua che la ze pròpio fadiga, e ancora ghen’è tanto de imparar. Ma i fradei i ne incoraia quando i dise che semo drio parlar cada volta meio.

Dele volte, no l’è mia fàcile far novi amighi. Magari, ghemo visto che se convidemo i altri par vegner casa nostra, podemo cognosserli meio. Anca ghemo visto che, ancora che i nostri fradei in tuto el mondo i sìpia difarenti, ghen’è robe che se someia tanto. Noantri restemo tanto contenti de veder che Geovà el ne ga creà de una maniera che semo boni de amar a tuti. — 2 Cor. 6:11.

Noantri ghemo imparà che ne ocore rispetar le persone compagno a Geovà e ndar in serca de prove che lu ne ama e el ne giuta. Dele volte, se ghemo sentio desanimadi parché no saveino se i altri ne volea ben. Alora, ledeino i cartoni e le carte che ghemo ricevesto dei amighi. Cossita, vedeino che Geovà l’era drio risponder le nostre orassion parché el mostrea che el ne amea e el ne dea forsa.

In tuti questi ani, mi e Lesli ghemo imparà che l’è importante catar fora tempo par star insieme noantri due, anca se ghemo tante robe de far. Ghemo anca visto che l’è bon rider dei nostri sbali, ancora de pi se semo drio imparar una nova léngua. E tute le sere, mi e Lesli proemo pensar nte una roba par ringrassiar a Geovà.

Par dirghela giusta, mi pensea che mai podaria esser un missionàrio o ndar de star in altri paesi. Stesso cossita, go bio tanta alegria de veder Geovà giutarme a far tute queste robe. Me vien in mente le parole de Geremia quando el ga dito che Geovà lo gavea imbroià. (Ger. 20:7) E Geovà el ga fato la medèsima roba con mi! Lu el me ga dato tante benedission e el ga fato che me sucedesse robe maraveiose. Mi go visità le filiai in sinque continenti. Ancora che, de picinin, mi volesse tanto zolar de avion e cognosser altri paesi, mai imaginea de far una roba bela cossita. Son anca tanto contento de gaver una brava dona come Lesli, che la ze sempre stata dela me banda par giutarme.

Noantri sempre proemo ricordarse che femo el nostro meio parché amemo a Geovà. E savemo che le benedission che ghemo ancoi le mostra sol un pochetin de tute le robe maraveiose che gavaremo quando Geovà el verderà le man e ghe darà a tute le persone tuto quel che le vol. — Sal. 145:16.