1. De acordo con 1 Piero 5:2, cossa che i ansiani i ga de far?

 I ANSIANI i ga de giutar e proteger le care piégore de Geovà. Lori i se sforsa tanto e i resta contenti de tender dei so fradei e sorele. (Ger. 23:4; Ledi 1 Piero 5:2. b) Par quela, noantri ghe demo tanto valor ai nostri ansiani!

2. Che dificoltà arquanti ansiani i ga?

² Magari, i ansiani i infronta tante dificoltà. Arquanti i ga massa laori nela congregassion o ghe fà fadiga seitar a dàrghene fora con tuto quel che i ga de far. E pol esser che altri i pensa che l’è fadiga obedir a tute le orientassion. Varda arquanti esempi. Tony, un ansiano dei Stati Unidi, el ga imparà che dele volte, lu no l’è bon de far tuti i laori che ghen’è. Lu el ga dito: “Quando la pandemia del COVID-19 la ze vegnesta fora, mi go laorà tanto par pareciar quel che i fradei ghe ocorea par le riunion e la predicassion. Ma ancora che mi laoresse tanto, sempre ghen’era pi robe de far. Alora, mi no gavea mia pi tempo par pregar, leder gnanca studiar la Bìblia.” Ilir, un ansiano de Kosovo, l’era de star nte un posto in meso la guera. Lu el ga dito: “Go ciapà paura quando Betel me ga domandà de tender dei fradei e dele sorele che i era de star nte un posto ndove la guera la era ancora pi bruta. Go bio paura parché le orientassion no me parea mia bone.” Tim, un  missionàrio dela Àsia, el ga dito: “Dele volte, mi resto tanto straco e me par che no go pi forsa de ndar avanti.” Cossa che pol giutar i ansiani che i ze drio infrontar dificoltà cossita?

3. Cossa che tuti noantri podemo imparar col esémpio de Gideon?

³ I ansiani i pol imparar col esémpio de Gideon. (Ebr. 6:12; 11:32) Lu el ga tendesto e el ga protegesto el pòpolo de Dio nte una època che i israeliti i era drio infrontar tante dificoltà. (Giui. 2:16; 1 Cró. 17:6) Ancoi, i ansiani i ga de far un laoro compagno a quel de Gideon. (Ati 20:28; 2 Tim. 3:1) Lu l’è stà ùmile, obediente e el ga seità a laorar par Geovà. Ma ancora se no semo mia ansiani, podemo imparar a darghe ancora pi valor al laoro che lori i fà par tender de tuta la congregassion. — Ebr. 13:17.

4. Come che Gideon el ga mostrà che l’era ùmile?

⁴ Quando el àngelo de Geovà el ga dito a Gideon che lu el ndaria salvar Israel dei so nemighi tanto poderosi, lu el ghe ga rispondesto: “La me fameia la ze la pi pìcola dela tribo de Manassè, e mi son el manco importante nela casa de me pare.” (Giui. 6:15) Gideon l’era ùmile e modesto e el pensea che no’l podaria salvar Israel. c Ma Geovà el savea che lu el saria bon e lo ga giutà.

5. Quando che pol esser fadiga par i ansiani esser ùmili?

⁵ I ansiani i ga de sforsarse tanto par esser ùmili. (Mic. 6:8; Ati 20:18, 19) Par quela, lori no i se spròsia par causa dele so abilità o de quel che i ga fato. Magari, i ansiani gnanca i ga de pensar che i ze poco gnente par causa dei so sbali. E dele volte, pol esser che ghe fae fadiga mostrar umiltà. Par esémpio, quando un ansiano el aceta massa laori, ma dopo el se nicorde che no l’è bon de farli, quando i altri sbrontola par qualcossa che el ga fato o quando lo loda parché l’è stà bravo. Se una roba cossita la sucede, come che i ansiani i pol ndar drio al esémpio de Gideon?

6. Come che i ansiani i pol esser ùmili compagno a Gideon? (Varda anca la ilustrassion.)

⁶ Domanda aiuto. Una persona ùmile la sa che ghen’è robe che no la ze bona de far. Par esémpio, Gideon el ga domandà  aiuto dei altri parché l’era ùmile. (Giui. 6:27, 35; 7:24) Bravi ansiani i fà compagno a lu. Tony, che ghemo pena parlà, el ga dito: “Par causa de quel che go imparà coi me genitori, mi sempre volea far de pi de quel che ero bon. Alora, go scominsià a studiar insieme la me fameia sora come esser pi ùmile e go domandà aiuto ala me dona. Anca go visto el vìdeo Treine, confie e delegue como Jesus fez del jw.org.” Dopo, Tony el ga domandà aiuto de altri fradei dela congregassion. Cossa ga sucedesto? Tony el ga dito: “Adesso, mi go pi tempo par far pi forte la me amicìssia con Geovà e i fradei e le sorele dela congregassion ancora i ga el aiuto che ghe ocore.”

7. Come che un ansiano el pol far compagno el esémpio de Gideon quando un fradel el sbrontola de lu? (Tiago 3:13)

⁷ No stà restar cativo se un fradel el sbrontola de qualcossa che te ghè fato. Pol esser fadiga par un ansiano seitar ùmile quando sucede una roba de questa. Ma, el esémpio de Gideon el pol giutarlo. Una volta, i òmini de Efrain i ga sbrontolà par causa de una roba che Gideon el gavea fato. Lu el savea che no l’era mia perfeto e no l’è restà cativo. (Giui. 8:1-3) Pitosto, Gideon li ga scoltadi con calma e ghe ga rispondesto con bontà. Come che i ansiani i pol far compagno a lu? Quando qualchedun el sbrontola par causa de quel che te ghè fato, sfòrsate par scoltarlo con calma e risponderghe con bontà. (Ledi Tiago 3:13. d) Cossita, ghen sarà pace nela congregassion.

8. Cossa che i ansiani i ga de far quando i ze lodadi? Parla de un esémpio.

⁸ Daghe sempre onor a Geovà. Quando Gideon el ga vinsesto Midian, i israeliti i lo ga lodà tanto. Magari, Gideon el ga dato el onor a Geovà. (Giui. 8:22, 23) Come che i ansiani i pol far compagno el so esémpio? Lori i ga de ricordarse de sempre lodar a Geovà par tuto quel che i ze boni de far. (1 Cor. 4:6, 7) Par esémpio, pol esser che un ansiano l’è bon de far bei discorsi. Alora, se qualchedun lo loda, lu el ga de dir che tuto quel che el ga parlà vien dela Bìblia e dela organisassion. Lori anca i ga de pensarghe sora se la so maniera de insegnar la ghe dà onor a Geovà o a lori stessi. Varda quel che ga sucedesto con un fradel de nome Timothy. Lu ghe piasea tanto far discorsi nela congregassion. Lu el ga dito: “Mi sempre scominsiea cada discorso de una maniera difarente e doperea bele ilustrassion. I fradei i me lodea tanto. Ma me son nicorto che lori i ghe dea de pi atension a mi che a Geovà o ala Bìblia.” Timothy el ga visto che ghe tochea cambiar la so maniera de insegnar par darghe onor a Geovà e ala Bìblia invesse de a lu. (Pro. 27:21) Cossa ga sucedesto? Lu el ga dito: “Adesso, tanti fradei i me dise come quel che go dito ghe ga giutà a dàrghene fora con un problema, una dificoltà o a esser ancora pi amighi de Geovà. Son pi contento adesso che quando i fradei i lodea a mi.”

9. Parché che l’è stà fadiga par Gideon esser obediente e coraioso? (Varda anca la ilustrassion.)

⁹ Pena dopo che Gideon l’è stà scoliesto par esser giuis, lu el ga bio de mostrar che l’era obediente e coraioso. Prima, Geovà el ghe ga dato un laoro tanto pericoloso de far. Gideon el gavaria de finir fora col altar de adorassion de Baal che so pare el gavea fato su. (Giui. 6:25, 26) Par obedir a Geovà, due volte Gideon ghe ga tocà far pi pìcolo el so esèrsito. (Giui. 7:2-7) E Geovà anca el  ghe ga dito de ndar contra i so nemighi in meso la note. — Giui. 7:9-11.

10. Parché che pol esser fadiga par un ansiano esser obediente?

¹⁰ I ansiani i ga de esser ‘pronti par obedir’. (Tia. 3:17) Un ansiano che l’è obediente sempre el va drio a quel che dise la Bìblia e la organisassion de Geovà. Cossita, lu el ghe dà un bon esémpio ai altri. Ma, dele volte, pol esser fadiga esser obediente. Parché? Parché fursi le orientassion le càmbia massa svelto e l’è fadiga meterle in pràtica o ghe par che no le ze mia bone. O pol esser che, se el obedisse, el sìpia metesto in preson. Alora, come che i ansiani i pol ndar drio al esémpio de Gideon e sempre esser obedienti?

11. Cossa che pol giutar i ansiani a esser obedienti?

¹¹ Stà atento ale orientassion e metele in pràtica. Geovà el ga dito a Gideon come finir fora col altar de Baal, el posto ndove el gavaria de far su un altar par Geovà e che bèstia darghe come sacrifìssio. Cossa che Gideon el ga fato? Invesse de tirarla longa, lu el ga suito obedio. Ancoi, la organisassion la insegna ai ansiani come tender dei fradei par meso de carte, anunsi e orientassion. Sicuro che ghe demo tanto valor ai ansiani che i obedisse e i giuta a tuti nela congregassion. — Sal. 119:112.

12. De acordo con Ebrei 13:17, cossa che i ansiani i ga de far quando riceve qualche orientassion dela organisassion?

¹² Càmbia quel che te ocore. Proa ricordarte che Geovà el ga dito che Gideon gavaria de mandar via quasi tuti i òmini del so esèrsito. (Giui. 7:8) Fursi, Gideon el ga pensà: ‘Sarà che ghe ocore pròpio far cossita? Sarà che ndarà ben?’ Ancora cossita, lu el ga obedio a Geovà. Come che i ansiani i pol far compagno el so esémpio ancoi? Meter in pràtica le orientassion che i riceve e cambiar quel che ghe ocore. (Ledi Ebrei 13:17. e) Varda un esémpio. Una volta, par far su Saloni del Regno e Saloni de Assemblea, la organisassion la ghe dea soldi imprèstio e i fradei ghe paghea indrio. Ma, dopo del ano 2014, el Corpo Governante el ga cambià la maniera de doperar i soldi par far su le costrussion. (2 Cor. 8:12-14) Ancoi, la organisassion la dopera i donativi de tuti i fradei par giutar a far su Saloni in tuto el mondo. Par quela, anca una congregassion che no la ga soldi la pol gaver un Salon. In quela època, un fradel de nome José el ga pensà che no ndaria mia ben. Lu el ga dito: “Vui veder se i sarà ancora boni de far su Saloni del Regno. No l’è mia cossita che femo le robe qua.” Ma cossa lo ga giutà a pensar dela maniera giusta? Lu el ga dito: “Le parole de Proverbi 3:5, 6 le me ga ricordà  che me toca fidarme del tuto in Geovà. E varda sol come le robe le ze pi bele ancoi. Ghemo fato ancora de pi Saloni del Regno e fin i fradei che i ze poareti i pol gaverli.”

13. (a) De cossa che Gideon l’era sicuro? (b) Come che i ansiani ancoi i fà compagno al so esémpio? (Varda la ilustrassion.)

¹³ Gàpia coraio e fà quel che Geovà el vol. Geovà el ga dito a Gideon che el ndaria giutarlo a tender dei israeliti e Gideon se ga fidà del tuto in lu. Par quela, lu ghe ga obedio anca se gavesse paura o fusse fadiga. (Giui. 9:17) Ancoi, i ansiani che i ze de star in posti violenti o ndove el governo ne vien contra i fà compagno el esémpio de Gideon. Come? Anca se el governo el ga proibio la nostra adorassion, se i pol perder el laoro o se i ze de star in posti violenti, lori i mostra coraio e i seita a far le riunion e el laoro de predicassion. f I ansiani anca i gavarà de mostrar coraio nela granda tribolassion par obedir ale orientassion sora come parlar del giulgamento de Geovà e come dàrghene fora col atache de Goghe de Magoghe. — Eze. 38:18; Apo. 16:21.

14. Quando che Gideon el ga mostrà che el gavea tanta forsa?

¹⁴ Gideon ghe ocorea de forsa par esser un giuis. Par esémpio, quando i òmini de Midian i ga scampà via dela guera in meso la note, Gideon e i so òmini i ze ndati drio. Vanti de rivar nel Rio Giordon, lori i ga passà par Gezreel, un posto ndove fursi ghen’era tanti spineri. (Giui. 7:22) Ma ancora che Gideon e i so 300 òmini i era cansi, lori no i se ga fermà lì. Invesse, i ze ndati de quel’altra banda del Rio Giordon par catar e vinser el esèrsito de Midian. — Giui. 8:4-12.

15. Cossa che dele volte pol suceder coi ansiani?

¹⁵ Dele volte, i ansiani i resta pròpio strachi parché i ga tanto de far par tender dela so fameia e dela congregassion. Alora, se  lori i ze drio sentirse cossita, come che i pol far compagno Gideon?

16-17. (a) Cossa che ga giutà Gideon a ndar avanti? (b) De acordo con Isaia 40:28-31, de cossa che i ansiani i pol esser sicuri? (Varda anca el ritrato.)

¹⁶ Sìpia sicuro che Geovà el te darà la forsa par ndar avanti. Gideon l’era sicuro che Geovà el ndaria giutarlo, e el ga bio la forsa che ghe ocorea. (Giui. 6:14, 34) Par esémpio, una volta, Gideon e i so òmini i era a pié e i gavea de vinser due rè de Midian che i era drio scampar via de cameli. (Giui. 8:12, 21) Ma, lori i ze stati boni de catar quei rè e vinserli parché Geovà li ga giutadi. Ancoi, i ansiani i pol esser sicuri che Geovà el ndarà darghe la forsa che i ga de bisogno parché “lu no’l resta mai canso, gnanca straco”. — Ledi Isaia 40:28-31 g.

¹⁷ Varda quel che ga sucedesto con Matthew, un fradel che fà parte de una Comission de Contato coi Ospedai. Cossa che lo giuta a ndar avanti? Lu el ga dito: “Go sentio pròpio quel che dise Filipensi 4:13. Dele volte, mi ero straco e sensa forsa. Alora, mi preghea a Geovà e ghe domandea aiuto par esser bon de dàrghene fora e giutar i me fradei. Cossita, mi sentia che Geovà l’era drio darme la forsa par ndar avanti.” Compagno a Gideon, i nostri ansiani i laora tanto par tender del pòpolo de Geovà. Magari, dele volte, lori i ga de esser ùmili parché ghen’è robe che no i sarà mia boni de far. Ancora cossita, i ansiani i pol esser sicuri che Geovà sempre el ndarà scoltarli e giutarli. — Sal. 116:1; Fil. 2:13.

18. Come che i ansiani i pol far compagno al esémpio de Gideon?

¹⁸ Come ghemo visto, i ansiani i pol imparar tanto del esémpio de Gideon. Lori i ga de esser ùmili quando i desside se i ndarà acetar o nò altri laori e quando un fradel li loda o el sbrontola de qualcossa che i ga fato. I ansiani anca i ga de esser obedienti e coraiosi, ancora de pi in questi ùltimi giorni. Lori i ga de fidarse che Geovà el ndarà darghe la forsa che ghe ocore, anca se vien fora brute dificoltà. Tuti noantri ghe demo tanto valor a questi òmini e al so laoro. — Fil. 2:29.