1-2. De acordo col Salmo 25:14, cossa che ne ocore gaver par esser amighi de Geovà?

 COSSA pénsito che l’è importante che ghen sìpia intrà due amighi? Pol esser che te ghè pensà che lori i ga de amarse e giutarse. Magari, fursi no te ghè mia pensà che lori i ga de temer un al altro. Ma, el testo de questo stùdio el mostra che quei che i vol gaver una forte amicìssia con Geovà ‘i ga de temer a lu’. — Ledi Salmo 25:14. b

² No importa se servimo a Geovà fà poco o tanto tempo, tuti noantri ghemo de temer a lu, o sia, rispetarlo tanto. Ma cossa che vol dir gaver tanto rispeto par Geovà? Cossa che el esémpio de Obadia, del somo sasserdote Geoiada e del rè Geoàs el ne insegna?

3. Parché che fursi sentimo paura, e parché che l’è importante gaverla?

³ Noantri ghemo paura quando ne par che ndarà suceder qualcossa bruta che ne farà mal. L’è importante gaver paura parché la ndarà giutarne a far bone dessision e a scampar de robe che pol farne mal. Par esémpio, no ndaremo caminar darente un baranco parché ghemo paura de cascar do. Noantri gnanca ndaremo far qualcossa bruta a un caro amigo o dirghe su parché ghemo paura de disgustarlo.

4. Cossa che Sàtana el vol farne gaver?

 ⁴ Sàtana el vol farne gaver paura de Geovà. Lu el vol che credemo che Geovà l’è tristo, che el ne castiga e che no saremo mai boni de assarlo contento. (Giò 4:18, 19) Sàtana el sa che se ghemo paura cossita ndaremo fermarse de adorar a Geovà. Ma no ghemo de creder in questa busia. Invesse de gaver paura de Geovà, ne ocore gaver paura de disgustarlo.

5. Cossa che vol dir temer a Geovà?

⁵ Cossa che vol dir temer a Geovà, o sia, gaver tanto rispeto par lu? Vol dir amarlo tanto e mai far gnente che ndarà rovinar nostra amicìssia con lu. (Ebr. 5:7) Gesù el gavea tanto rispeto par Dio, ma no’l gavea paura. (Isa. 11:2, 3) Invesse, lu el amea tanto a Geovà e el volea sempre obedirghe. (Gio. 14:21, 31) Anca noantri se sentimo compagno Gesù. Noantri rispetemo tanto a Geovà parché el ga tanto poder, sabedoria, el fà tuto polito e el ne mostra so amor. Savemo che lu el ne vol tanto ben e che podemo assarlo contento o disgustà. — Sal. 78:41; Pro. 27:11.

6. Cossa che ndarà giutarne a gaver tanto rispeto par Dio? (Salmo 34:11)

⁶ Noantri ghemo de imparar a gaver tanto rispeto par Geovà. (Ledi Salmo 34:11. c) Cossa che pol giutarne? Pensarghe sora tuto quel che Geovà el ga creà. Quando vedemo nela creassion la sabedoria, el poder e el amor de Geovà, lo amemo ancora de pi. (Rom. 1:20) Una sorela de nome Adrienne la ga dito: “Quando vardo tuto quel che Geovà el ga creà e la sabedoria che lu el ga, mi resto tanto maraveiada e ancora pi sicura che lu el sa quel che l’è meio par mi. Mi sempre me domando: ‘Parché che ndaria far qualcossa che podaria rovinar la me amicìssia con Geovà?’” E ti, cossa pénsito de torte el tempo par vardar tuto quel che Geovà el ga creà? Se te fè cossita, te ndarè amarlo e rispetarlo ancora de pi. — Sal. 111:2, 3.

7. Come che le orassion le ne giuta a gaver tanto rispeto par Dio?

⁷ Pregar a Geovà ndarà giutarne a gaver tanto rispeto par lu e a cognosserlo ancora meio. Come cossita? Quando domandemo che Geovà el ne dae forsa par dàrghene fora con una dificoltà e lu el ne giuta, vedemo so grando poder. Quando lo ringrassiemo par el sacrifìssio de so Fiol, se ricordemo che lu el ne ama tanto. E quando ghe domandemo aiuto parché no savemo cossa far, se ricordemo dela so sabedoria. Par quela che le orassion le ne giuta a gaver tanto rispeto par Geovà e a far cada volta pi forte la nostra amicìssia con lu.

8. Cossa che pol giutarne a seitar a gaver tanto rispeto par Geovà?

⁸ Cossa che pol giutarne a seitar a gaver tanto rispeto par Geovà? Studiar la Bìblia par imparar dei bei e dei bruti esempi del passà. Adesso, ndaremo imparar sora i bei esempi de Obadia e del somo sasserdote Geoiada. Dopo, ndaremo imparar sora el bruto esémpio del rè Geoàs.

9. Parché che gaver tanto rispeto par Geovà ga giutà Obadia? (1 Rè 18:3, 12)

⁹ La Bìblia la mostra che Obadia d el tendea dela casa del rè e “el gavea tanto  rispeto par Geovà”. (Ledi 1 Rè 18:3, e 12 f; Varda anca Neemia 7:2.) Parché che gaver tanto rispeto par Dio ga giutà Obadia? Parché lu l’è deventà una persona de fidarse e l’è stà bon de mostrar tanto coraio. Obadia el ga bio bisogno de tanto coraio parché el vivea nte una època che l’era fadiga adorar a Geovà. In quel tempo, el rè l’era Acabe, un omo pròpio tristo e che el disgustea tanto a Geovà. (1 Rè 16:30) E Gesabel, che la era la dona de Acabe, la odiea tanto a Geovà, no la volea che nissuni lo adoresse e la ga fin copà tanti profeti de Dio. — 1 Rè 18:4.

10. Quando che Obadia el ga mostrà che l’era pròpio coraioso?

¹⁰ Obadia l’era pròpio coraioso. Quando Gesabel la ga scominsià a proar copar i profeti de Geovà, Obadia el ga sconto sento de lori nte una caverna e ghe ga portà de magnar e de bever. (1 Rè 18:13) Sicuro che, se Gesabel la savesse cossa Obadia l’era drio far, la ndaria coparlo. Ma lu no’l volea mia morir. Alora, pol esser che lu el gavesse paura. Ancora cossita, lu el ga mostrà che el amea de pi a Geovà e ai so servi che a lu stesso.

11. Come che i servi de Geovà ancoi i mostra coraio compagno Obadia? (Varda anca el ritrato.)

¹¹ Ancoi, tanti fradei che i ze de star in posti ndove i ze proibidi de adorar a Geovà i mostra coraio compagno Obadia. Come? Anca se lori i rispeta i governi, mai i se ferma de servir a Geovà. (Mat. 22:21) Questi fradei i mostra che i ga tanto rispeto par Geovà parché i seita a obedirghe, no importa cossa che i òmini i dise. (Ati 5:29) Par esémpio, lori mai i se ferma de predicar e de far le riunion, anca se ghe toca farlo sconto. (Mat. 10:16, 28) Lori anca i giuta altri fradei e sorele a seitar a gaver una forte fede. Varda el esémpio del fradel Henri. Lu l’è de star nte un posto dela Àfrica ndove, par un tempo, le Testimònie de Geovà no le era lìbere par adorar a Dio. In quela  època, lu el ga volesto giutar a portar le publicassion par i fradei. Lu el ga dito: “Mi go sempre bio tanta vergogna de parlar coi altri. Alora, son sicuro che l’è stà el rispeto che go par Geovà che me ga giutà a mostrar coraio.” Anca ti te pol mostrar coraio compagno a Henri se te temi a Geovà, o sia, se te ghè tanto rispeto par lu.

12. Come che Geoiada e so dona i ga mostrà che i era leai a Geovà?

¹² El somo sasserdote Geoiada el gavea tanto rispeto par Geovà. Par quela, lu sempre l’è stà leal e el ga giutà altre persone a adorar a Geovà. Varda quel che lu el ga fato quando Atalia, la fiola de Gesabel, la ga scominsià a governar in Giudà. Tuti i gavea tanta paura de Atalia parché la era pròpio rugna e la ga fin proà copar tuti i so neti par deventar regina. (2 Cró. 22:10, 11) Magari, no la ze mia stata bona de copar Geoàs parché Geoiada e so dona, Geosabeate, i lo ga sconto e lo ga tendesto. Par causa de quel che lori i ga fato, una persona dela fameia de Davi la deventaria rè. Ancora che Geoiada fursi el gavesse paura de Atalia, el ga dessidio far quel che l’era giusto. — Pro. 29:25.

13. Come che Geoiada el ga mostrà nantra volta che l’era leal a Geovà?

¹³ Quando Geoàs el gavea sete ani, Geoiada el ga mostrà nantra volta che l’era leal a Geovà. Lu el ga catà fora una maniera de far che Geoàs el deventesse rè. Se le robe no le ndesse mia ben, Geoiada el saria copà. Ma col aiuto de Geovà, dei leviti e dei paroni dele tribo, Geoiada l’è stà bon de copar Atalia e de far che Geoàs el deventesse rè. (2 Cró. 23:1-5, 11, 12, 15; 24:1) Alora, lu el ga fato che el rè e el pòpolo i fesse un acordo con Geovà par seitar a servirlo. (2 Rè 11:17) Lu anca el ga metesto òmini nei portoni par no assar che nissuni che fusse impuro el vegnesse rento la cità. — 2 Cró. 23:19.

14. Come che Geovà el ghe ga dato glòria a Geoiada?

¹⁴ La Bìblia la mostra che Geovà el ‘ghe darà glòria a quei che i ghe dà glòria a lu’. (1 Sam. 2:30) E l’è stà pròpio questo che el ga fato con Geoiada. Lu el ga scrito la stòria de Geoiada nela Bìblia par insegnarne. (Rom. 15:4) E quando Geoiada l’è morto, lu l’è stà metesto nte una tomba nela cità de Davi darente dei rè parché el gavea fato robe bone. — 2 Cró. 24:15, 16.

15. Cossa che podemo imparar dela stòria de Geoiada? (Varda anca la ilustrassion.)

¹⁵ La stòria de Geoiada ne giuta a rispetar ancora de pi a Geovà. Cossa che podemo imparar dela so stòria? I ansiani i pol far compagno a lu quando i se sforsa de proteger e tender dei fradei. (Ati 20:28) Quei che i ze pi veci i pol imparar de Geoiada parché, se i seita leai a Geovà, lu el ndarà doperarli par far bele robe e mai el ndarà abandonarli. I gióveni i pol imparar a tratar i pi veci compagno Geovà el ga tratà Geoiada. Lori i ga de mostrarghe rispeto, ancora de pi se i ze drio servir a Geovà fà tanto tempo. (Pro. 16:31) E quando obedimo a quei che i tende dela congregassion, femo compagno ai leviti e ai paroni dele tribo che i ga giutà Geoiada. — Ebr. 13:17.

16. Cossa che mostra che Geoàs no’l gavea mia rispeto par Dio?

¹⁶ Geoiada el ga giutà el rè Geoàs a deventar un bravo rè. (2 Rè 12:2) Par quela,  quando l’era gióveno Geoàs el volea obedir a Geovà. Ma dopo che Geoiada l’è morto, Geoàs el ga scominsià a scoltar prìnsipi che i ndea contra Geovà. Par quela, lu e i so servi ‘i ga scominsià a adorar i palanchi sacri e i dèi falsi’. (2 Cró. 24:4, 17, 18) Ancora che Geovà el fusse tanto disgustà, lu el ga seità a mandar profeti par dirghe che i cambiesse. Ma Geoàs e i so servi no i ga volesto scoltarli. Un de questi profeti l’è stà el sasserdote Zacaria, che l’era fiol de Geoiada e primo cusin de Geoàs. Invesse de Geoàs mostrar che el ghe dea valor a quel che la fameia de Zacaria la gavea fato, lu el ga mandà coparlo. — 2 Cró. 22:11; 24:19-22.

17. Cossa che ga sucedesto con Geoàs?

¹⁷ Geovà el ga dito che ‘quei che i ghe fà de poco i sarà umiliadi’. (1 Sam. 2:30) Alora, come Geoàs no’l ga seità a gaver tanto rispeto par Dio, tante robe rugne le ga scominsià a suceder con lu. Par esémpio, anca se el so esèrsito el fusse grando, el pìcolo esèrsito dela Sìria lo ga vinsesto e Geoàs el se ga fato tanto mal. Dopo, i so servi lo ga copà parché lu el gavea copà Zacaria. Lu l’è stà un rè tanto rugno che le persone ‘gnanca lo ga metesto nela tomba dei rè’. — 2 Cró. 24:23-25; Varda “filho de Baraquias” nela nota de stùdio in Mateo 23:35.

18. De acordo con Geremia 17:7, 8, cossa che ghemo de far par no esser come Geoàs?

¹⁸ Geoàs l’è stà come una pianta sensa radise, che sol la ze bona de star su par causa de una steca. Se no ghen’è la steca, el vento la buta do. Come cossita? Intanto  che Geoàs el gavea el aiuto de Geoiada, lu l’è stà fedele a Geovà. Magari dopo che Geoiada l’è morto, Geoàs el ga scominsià a far tante robe sbaliade e a ndar contra Geovà. Cossa che podemo imparar de quel che ga sucedesto con Geoàs? Noantri no ghemo de servir a Geovà sol par causa dela nostra fameia o dei fradei dela congregassion. Invesse, ghemo de far pi forte nostro amor e rispeto par Geovà. Par quela, volemo sforsarse par seitar a pregar a Geovà, studiar la Bìblia e pensarghe sora quel che imparemo. — Ledi Geremia 17:7, 8; g Col. 2:6, 7.

19. Cossa che Geovà el speta de noantri?

¹⁹ La Bìblia la dise cossa che Geovà el speta de noantri: “Temi el vero Dio e obedissi ai so comandamenti parché questa la ze tuta la obrigassion del omo.” (Ecl. 12:13) Alora, quel che Geovà el ne domanda de far no l’è mia fadiga. Se noantri tememo a Geovà, o sia, ghemo tanto rispeto par lu, saremo boni de dàrghene fora con tute le dificoltà che vegnarà fora nel futuro, compagno Obadia e Geoiada. Cossita, gnente ndarà rovinar la nostra amicìssia con Geovà.