1. Cossa che ne toca far se volemo seitar vivi dopo del giorno de Geovà?

 QUANDO la Bìblia la dopera le parole “giorno de Geovà”, la ze drio parlar del tempo che Geovà el finisse fora coi so nemighi e el salva i so servi. Nel passà, Geovà el ga castigà arquante nassion. (Isa. 13:1, 6; Eze. 13:5; Sof. 1:8) E nei nostri giorni, el “giorno de Geovà” el ndarà scominsiar quando i governanti i finisse fora con Babilònia, la Granda. Dopo, el ndarà finirse col Armagedon. Se volemo seitar vivi dopo questo “giorno”, ne ocore pareciarse adesso. Ma Gesù el ga insegnà che no ne ocore sol esser pronti par la “granda tribolassion”. Invesse, lu el ga dito che ghemo de seitar pronti. — Mat. 24:21; Luc. 12:40.

2. Parché che 1 Tessalonissensi pol giutarne?

² Nela prima carta che Paolo el ga scrito ai tessalonissensi, lu el ga doperà diverse ilustrassion par giutar i fradei a seitar pronti par el giorno de Geovà. Paolo el savea che el giorno de Geovà no’l vegnaria mia in quela època. (2 Tes. 2:1-3) Ancora cossita, lu el ga dito che quei fradei i gavea de pareciarse par questo giorno come se el vegnesse suito. E anca noantri ghemo de far quel che Paolo el ga dito. Alora, ndemo veder quel che lu el ga spiegà sora (1) come che el giorno de Geovà el rivarà, (2) chi che ndarà seitar vivo dopo questo giorno, e (3) come che podemo pareciarse.

3. Parché che podemo dir che el giorno de Geovà el rivarà come un ladron de note? (Varda anca la ilustrassion.)

³ “Come un ladron de note.” (1 Tes. 5:2) Questa la ze la prima de tre ilustrassion che Paolo el ga doperà par parlar del  giorno de Geovà. Parché che Paolo el ga dito che el giorno de Geovà el rivarà come un ladron de note? Quando i ladroni i va ciavar qualchedun, lori i fà presto ciavar e quasi sempre i va de note parché le persone no le ze mia drio spetarli. Anca el giorno de Geovà el rivarà de colpo, e tante persone no le sarà mia drio spetarlo. Pol esser che fin arquanti servi de Geovà i restarà spaventadi parché tuto ndarà suceder pròpio svelto. Ma lori no i sarà mia finidi fora insieme i rugni.

4. Parché che el giorno de Geovà el vegnarà compagno al dolor de parto?

⁴ “Come i dolori de parto i vien nela dona che la ze drio spetar un fiol.” (1 Tes. 5:3) Una dona gràvida no la sa dir la ora giusta che la ndarà guadagnar so fiol. Magari, quando ghe vien el mal, ela la sa che suito el vegnarà. Dela medèsima maniera, noantri no savemo quando vegnarà el giorno de Geovà, ma semo sicuri che el vegnarà de colpo e el ndarà finir fora coi rugni.

5. Parché che podemo dir che la granda tribolassion la ze come el giorno che l’è drio sciarar?

⁵ Come el giorno che l’è drio sciarar. Anca nela tersa ilustrassion, Paolo el ga parlà dei ladroni che i ciava de note. I ladroni no i se nicorde gnanca che el tempo el passa e no i vede che el giorno l’è quasi drio sciarar. Alora, quando vien ciaro, tuti i pol veder le robe sbaliade che i era drio far. (1 Tes. 5:4) Par quela, Paolo el ga dito che el giorno de Geovà l’è come un giorno che l’è drio sciarar. Ancoi, tante persone le seita a far robe sbaliade come se le fusse ladroni de note. Alora, nela granda tribolassion, Geovà el ndarà mostrar chi che le ze queste persone che le ga fato robe sbaliade. Ma noantri no volemo esser come lore. Invesse, volemo esser pronti par el giorno de Geovà e far quel che lo assa contento. (Efe. 5:8-12) Adesso,  ndemo veder altre due ilustrassion che Paolo el ga fato par parlar de quei che no i ndarà seitar vivi dopo del giorno de Geovà.

6. Parché che podemo dir che l’è come se le persone le fusse drio dormir? (1 Tessalonissensi 5:6, 7)

⁶ ‘Quei che i ze drio dormir.’ (Ledi 1 Tessalonissensi 5:6, 7. b) Paolo el ga dito che quei che i ze drio dormir no i ndarà seitar vivi dopo del giorno de Geovà. Lori no i capisse mia quel che l’è drio suceder nel mondo intorno de lori gnanca i se nicorde che el tempo l’è drio passar. Par quela, no i vede che quel che l’è drio suceder l’è tanto importante. Ancoi, quasi tute le persone le ze come che drio dormir. (Rom. 11:8) Cossita, lore no le vede che semo nei “ùltimi giorni” e che la granda tribolassion la ze pròpio darente. Quando sucede robe pròpio brute nel mondo, fursi tante persone le scomìnsia a interessarse par quel che la Bìblia la dise. Ma suito le se desméntega e le torna a dormir. Ghen’è altre che le crede che ghen sarà un giorno de giulgamento, ma le pensa che ghen volarà tanto tempo par vegner. (2 Pie. 3:3, 4) Noantri, invesse, savemo che l’è cada volta pi importante seitar desmissiadi.

7. Parché che le persone che le sarà finide fora le ze come i ciuchi?

⁷ ‘Quei che i ze ciuchi.’ El apòstolo Paolo el ga dito che quei che i sarà finidi fora nel giorno de Geovà i ze come i ciuchi. Un ciuco no l’è mia bon de capir quel che sucede intorno de lu gnanca el fà bone dessision. Dela medèsima maniera, le persone che no le vol mia scoltar quel che Dio el dise le ze come i ciuchi e le sarà finide fora. Ma, i servi de Dio i sa che i ga de star sempre atenti par far bone dessision. (1 Tes. 5:6) Un studioso dela Bìblia el ga dito che persone che le stà sempre atente “le ze calme, le pensa polito e ghe piase le robe giuste che le giuta a far bone dessision”. Alora, ghemo de esser calmi e pensar ben vanti de far qualcossa par no meterse nela polìtica e nei assunti del mondo de ancoi. Intanto che rivemo pi darente del giorno de Geovà, sarà cada volta pi fadiga no meterse nela polìtica parché le persone le volarà che ciapemo una banda. Stesso cossita, no ghemo mia de preocuparse parché el spìrito santo de Dio ndarà giutarne a seitar calmi e a far bone dessision. — Luc. 12:11, 12.

8. De acordo con 1 Tessalonissensi 5:8, cossa che ndarà giutarne a esser pronti par el giorno de Geovà? (Varda anca la ilustrassion.)

⁸ ‘Meti su la corassa e el capassete.’ Paolo el ga dito che noantri semo come soldadi che i ze atenti e i ga su le robe par la guera. (Ledi 1 Tessalonissensi 5:8. c) Intanto che i fusse nela guera, i soldadi i gavea de esser pareciadi tuto el tempo. L’è cossita anca con noantri. Come che podemo esser sempre pronti par el giorno de Geovà? Ghemo de meter su la corassa dela fede e del amor e el capassete dela speransa. Ma come che la fede, el amor e la speransa i pol giutarne?

9. Come che la fede la pol protegerne?

⁹ Cossita come la corassa la protege el cuor de un soldà, la fede e el amor i giuta a proteger quel che pensemo, quel che sentimo e quel che volemo. La fede e el amor anca i pol giutarne a seitar a servir a Geovà e a ndar drio el esémpio de Gesù. La fede la  ne giuta a esser sicuri che Geovà el ricompensa quei che i va in serca de lu. (Ebr. 11:6) La fede anca la ne giuta a seitar leai a Gesù stesso che tribolemo. Come che podemo farla pi forte? Ghemo de vardar el esémpio de fradei e sorele che i ze leai a Geovà, ancora che i infronta perseghission o dificoltà coi soldi. E se noantri proemo far compagno quei che i ga dessidio viver con manco par far de pi par Geovà, no ndaremo mia amar i soldi gnanca el capital. d

10. Come che el amor a Dio e ale persone ne giuta a seitar a predicar?

¹⁰ El amor el ndarà giutarne a seitar desmissiadi e atenti. (Mat. 22:37-39) Par causa del nostro amor a Dio e ale persone, noantri seitemo predicar ancora che sìpia fadiga. (2 Tim. 1:7, 8) Alora, femo el nostro meio nela predicassion anca par meso del telèfono e dele carte. Noantri seitemo a predicar parché ghemo speransa che le persone le cambiarà e le farà quel che l’è giusto. — Eze. 18:27, 28.

11. Parché che el amor ai nostri fradei ne giuta? (1 Tessalonissensi 5:11)

¹¹ Noantri anca amemo i nostri fradei, e podemo mostrar questo amor quando li incoraiemo. (Ledi 1 Tessalonissensi 5:11. e) Ghemo de giutarse intrà de noantri compagno i soldadi che i ze drio lotar insieme contra el nemigo. L’è vera che nte una guera, pol esser che un el ghe fesse mal a quelaltro. Ma no i ndaria mai farlo aposta. Dela medèsima maniera, noantri mai ndaremo farghe mal ai nostri fradei o assarli disgustadi aposta. (1 Tes. 5:13, 15) Quando Paolo el ga scrito questa carta ai tessalonissensi, fea poco tempo che ghen’era quela congregassion. Alora, pol esser che quei ansiani no i gavesse tanta speriensa e i fesse sbali. Ancora cossita, i meritea el rispeto dei fradei. Cossa che podemo imparar? Podemo mostrar che amemo i fradei che i tende dela congregassion se ghe mostremo rispeto. (1 Tes. 5:12) Intanto che rivemo darente dela granda tribolassion, ghemo de fidarse ancora de  pi nei ansiani. Pol esser che no saremo pi boni de ricever istrussion dela Sede Mondial o de Betel. Par quela, ghemo de imparar a mostrar amor e rispeto ai ansiani adesso. Alora, no importa quel che sucede no ghemo mia de vardar i difeti dei ansiani, ma ne ocore ricordarse che Geovà e Gesù i ze drio doperar questi òmini fedeli par giutarne.

12. Parché che la speransa la protege i nostri pensamenti?

¹² Cossita come el capassete el protege la testa del soldà, la speransa che ghemo par el futuro la protege i nostri pensamenti. Se ghemo una forte speransa, noantri saremo sicuri che no ghen’è gnente de valor in questo mondo. (Fil. 3:8) La speransa anca la ne giuta a restar calmi e a far bone dessision. L’è stà cossita che ga sucedesto con Wallace e Laurinda, che i ze nela Àfrica. In tre stimane, so pare de Wallace e so mama de Laurinda i ze morti. E par causa dela pandemia del COVID-19, lori no i podea mia tornar casa par star cola fameia. Wallace el ga scrito: “La speransa dela ressuression la me giuta a pensar come i sarà nel novo mondo e nò maladi come i era vanti de morir. Questa speransa la me giuta a restar calmo, anca quando son tanto triste.”

13. Cossa ghemo de far par gaver el spìrito santo de Dio?

¹³ ‘No stà smorsar el fogo del spìrito.’ (1 Tes. 5:19) Paolo el ga dito che el spìrito santo l’è come un fogo rento noantri. Se ghemo el spìrito santo de Dio, gavaremo tanta voia de far quel che l’è giusto e la forsa de laorar par Geovà. (Rom. 12:11) Ma, cossa che ghemo de far par gaver el spìrito santo de Dio? Ghemo de pregar, studiar la Bìblia e far parte dela so organisassion. Se femo cossita, saremo boni de gaver el “fruto del spìrito”. — Gàl. 5:22, 23.

14. Cossa che no podemo mia far se volemo seitar a gaver el spìrito santo de Dio? (Varda anca la ilustrassion.)

¹⁴ Dopo che Dio el ne dà el spìrito santo, ghemo de tenderse par no ‘smorsar el fogo del spìrito’. Alora, no ghemo mia de seitar a pensar in robe sbaliade, parché Geovà el dà so spìrito santo sol a quei che i pensa e i fà  quel che l’è giusto. (1 Tes. 4:7, 8) Par seitar a gaver spìrito santo de Dio, el testo de 1 Tessalonissensi 5:20 dise che no podemo ‘far de poco dele professie’. Le ‘professie’, in questo testo, le ze quel che Geovà el dise par meso del so spìrito, come le professie che le mostra che semo drio viver nel fin. Alora, no podemo mia pensar che ghen volarà tanto tempo fin che vegna el Armagedon. Invesse, ghemo de ricordarse che el giorno de Geovà l’è pròpio darente, seitar a far quel che l’è giusto e mostrar che semo fedeli a Dio tuti i giorni. — 2 Pie. 3:11, 12.

15. Cossa ghemo de far par no assarse imbroiar par i demoni? (1 Tessalonissensi 5:21)

¹⁵ Suito i nemighi de Dio i ndarà parlar: “Vivemo in pace e sensa paura!” (1 Tes. 5:3) Tante persone in tuta la Tera le ghe ndarà drio ale busie dei demoni. (Apo. 16:13, 14) Magari, noantri no ndaremo mia assarse imbroiar parché ‘esaminemo tute le cose’. (Ledi 1 Tessalonissensi 5:21; f Varda anca la nota de stùdio.) La spression greca “esaminar tute le cose” la era doperada par parlar del laoro che le persone le fea par saver se el oro o el argento i era pròpio puri. I tessalonissensi i gavea de esaminar tute le cose, e anca noantri ghemo de far compagno parché semo pròpio darente dela granda tribolassion. Alora, quando scoltemo o ledemo qualcossa, ne ocore sempre veder se l’è pròpio vera. Come che podemo farlo? Invesse de far come i stupidoti e sol acetar quel che i altri i dise, noantri ghemo de veder se quel che ledemo o scoltemo l’è pròpio compagno a quel che la Bìblia e la organisassion de Geovà le dise. Cossita, no ndaremo mia assarse imbroiar par le busie dei demoni. — Pro. 14:15; 1 Tim. 4:1.

16. (a) Che bela speransa noantri ghemo? (b) Cossa ghemo de tegnerse ben in mente?

¹⁶ I servi de Geovà i seitarà vivi dopo dela granda tribolassion. Magari, no ghen’è come saver cossa che ndarà suceder con cada un de noantri. (Tia. 4:14) Pol esser che arquanti i morirà vanti che la scomìnsie. Ancora cossita, podemo esser sicuri che gavaremo la vita eterna se seitemo leai a Geovà. Alora, i untadi i ndarà governar con Cristo nel cielo e le altre piégore le viverà in Paradiso qua nela Tera. Par quela, ghemo de tegnerse ben in mente questa bela speransa che Dio el ne dà e seitar pronti par el giorno de Geovà!