STÙDIO 22
Consili che i ne giuta a esser felici
“Geovà el dà la sabedoria.” — PRO. 2:6.
CÀNTICO 89 Quei che i obedisse i sarà benedidi
COSSA CHE NDAREMO IMPARAR? *
1. Parché che tuti noantri ghemo bisogno de sabedoria? (Proverbi 4:7)
SICURO che te ghè belche domandà sabedoria a Geovà quando te gavei de far una scòlia tanto importante. (Tiago 1:5) Se te ghè fato cossita, te sì stà bravo. Parché? Salomon el ga dito: “La sabedoria la ze la roba pi importante.” (Ledi Proverbi 4:7. *) Salomon no l’era drio parlar dela sabedoria dei òmini, ma quela che la vien de Geovà. (Pro. 2:6) La sabedoria che la vien de Geovà la pol giutarne a infrontar i nostri problemi. In questo estùdio, ndaremo veder come.
2. Come che podemo gaver sabedoria?
2 Podemo gaver de pi sabedoria quando studiemo e metemo in pràtica i consili de Salomon e de Gesù. Prima, ndaremo imparar sora i consili che Salomon el ga dato. La Bìblia la dise che ‘Dio el ghe ga dato tanta sabedoria’. (1 Rè 4:29) Dopo, ndaremo imparar sora i consili de Gesù Cristo. Lu l’è stà la persona che la ga bio de pi sabedoria qua nela Tera. (Mat. 12:42) El profeta Isaia el ga parlà sora Gesù Cristo: ‘El spìrito de Geovà el vegnerà sora lu, el spìrito de sabedoria e comprension.’ — Isa. 11:2.
3. Cossa che ndaremo imparar in questo stùdio?
3 Dio el ga dato tanta sabedoria a Salomon e a Gesù. Par quela che lori i ne ga dato bei consili. In questo stùdio, ndaremo imparar sora i so consili che i ndarà giutarne a veder i soldi, el laoro e noantri stessi dela maniera giusta.
LA MANIERA GIUSTA DE VEDER I SOLDI
4. Come che la vita de Salomon la era difarente dela vita de Gesù?
4 Salomon l’era tanto sior e el podea gaver tuto quel che el volesse. (1 Rè 10:7, 14, 15) Invesse, Gesù el vivea con poche robe e no’l gavea gnanca una casa. (Mat. 8:20) Ma tuti due i vedea i soldi e le robe che i gavea dela maniera giusta, parché i gavea la sabedoria de Geovà.
5. Cossa che Salomon el pensea dei soldi?
5 Salomon el ga dito che ‘i soldi i ze una protession’. (Ecl. 7:12) Coi soldi podemo gaver quel che ghemo de bisogno e quel che volemo. Ma Salomon el savea che i soldi no i ze la roba pi importante. Par esémpio, lu el ga dito che ‘un bon nome el ga de pi valor de che tante richesse’. (Pro. 22:1) Salomon anca el ga dito che quei che i ama i soldi no i ze mai contenti con quel che i ga. (Ecl. 5:10, 12) Lu anca el ga dito che no ghemo de fidarse massa nei soldi parché podemo perderli de colpo. — Pro. 23:4, 5.
Sarà che quel che pensemo sora i soldi ne intriga de far el nostro meio a Geovà? (Vedi i paràgrafi 6 e 7.) *
6. Cossa che Gesù el pensea sora i soldi? (Mateo 6:31-33)
6 Anca Gesù el vedea i soldi dela maniera giusta. Par esémpio, lu no’l pensea che l’era sbalià magnar e bever robe bone. (Luc. 19:2, 6, 7) Savemo che lu el pensea cossita parché el so primo miràcolo l’è stà far àqua deventar un bon vin. (Gioani 2:10, 11) E nel giorno che l’è morto, lu l’era drio doperar una roba tanto bona. (Gioani 19:23, 24) Anca cossita, lu no’l pensea che i soldi e le robe i era le robe pi importante dela vita. Lu el ga dito: ‘Nissun pol laorar come schiavo par due paroni . . . No podé laorar come schiavi par Dio e par le richesse.’ (Mat. 6:24) Lu el ga anca dito che se metemo el Regno in primo posto nela vita, Geovà el ndarà darne tuto quel che ghemo de bisogno. — Ledi Mateo 6:31-33. *
7. Che benedission Daniel el ga bio de meter el laoro a Geovà in primo posto nela vita?
7 I consili de Geovà sora i soldi i ze drio giutar tanti fradei e sorele. Varda el esémpio del fradel Daniel. Lu el ga dito: “Quando mi ero gióveno, go dessidio che el laoro a Geovà el saria la roba pi importante dela me vita.” Come Daniel l’è drio sforsarse par viver con manco soldi e manco robe, lu l’è bon de far de pi par Geovà. Par esémpio, lu el ga belche giutà fradei quando i ga infrontà desgràssie e el ga servio in Betel. Lu el ga anca dito: “Son pròpio contento dela scólia che mi go fato. L’è vera che mi podaria gaver tanti soldi se i fusse la roba pi importante dela me vita. Ma mi no gavaria i bei amighi che go ancoi e gnanca saria contento cossita. Mi no saria mai bon de pagar tuto quel che Geovà el me ga dato.” Sicuro che la roba pi importante dela nostra vita la ga de esser el nostro laoro a Geovà, e nò i soldi.
LA MANIERA GIUSTA DE VEDER EL LAORO
8. Come che savemo che Salomon el vedea el laoro dela maniera giusta? (Eclesiasti 5:18, 19)
8 Salomon el ga dito che el laoro pol assarne contenti. Lu el ga dito che el laoro l’è un ‘presente de Dio’ e che sucede robe bone se semo bravi laoradori. (Ledi Eclesiasti 5:18, 19; Pro. 14:23) E lu el savea de questo parché lu l’era un bravo laorador. Par esémpio, lu el ga fato su case, cità, el ga piantà vignai, giardin e el ga fato tante altre robe. (1 Rè 9:19; Ecl. 2:4-6) L’è vera che Salomon l’è restà contento con quel che lu l’è stà bon de far, ma lu el savea che el laoro no l’era la roba pi importante dela vita. Par quela che lu el ga laorà tanto a Geovà. Par esémpio, lu el ga laorà sete ani par far su el témpio par Geovà. (1 Rè 6:38; 9:1) Dopo de tuto quel che el ga fato, lu el ga capio che la roba pi importante la era servir a Geovà. Salomon el ga dito: “Dopo de scoltar tuto, questa la ze la conclusion: temi el vero Dio e obedissi ai so comandamenti, parché questa la ze tuta la obrigassion del omo.” — Ecl. 12:13. *
9. Come che savemo che Gesù el vedea el laoro dela maniera giusta?
9 Gesù l’era un bravo laorador. Quando l’era gióveno, lu el laorea come un marangon. (Mar. 6:3) E l’è sicuro che i so genitori i dea tanto valor al so aiuto casa. Come Gesù el fea i so laori de maniera perfeta, podemo anca creder che le persone le volea che lu el laoresse par lore. Anca che Gesù el ghe piasea tanto del so laoro, lu sempre el gavea tempo par servir a Geovà. (Gioani 7:15) Dopo che Gesù el ga scominsià a doperar tuto el so tempo par predicar, el ga dito che ghemo de ‘laorar par gaver el magnar che el resta par sempre e nò quel che el se smarsisse’. (Gioani 6:27) E nel pi importante discorso che el ga fato, lu el ga dito par ‘imuciar richesse nel cielo’. — Mat. 6:20.
Come che podemo veder el nostro laoro e quel che femo par Geovà dela maniera giusta? (Vedi i paràgrafi 10 e 11.) *
10. Cossa che pol suceder se no vedemo el laoro dela maniera giusta?
10 Se noantri ghemo la sabedoria de Geovà, saremo boni de veder el laoro dela maniera giusta. Savemo che ghemo de esser bravi laoradori e laorar polito. (Efe. 4:28) Tante volte, i nostri paroni i ne loda parché laoremo ben e dela maniera giusta. Ma ghemo de star atenti par nò scominsiar a laorar de pi sol parché volemo che el nostro paron el reste contento e el parle robe bone dele Testimònie de Geovà. Parché? Se lo femo, no gavaremo el tempo che ne ocore par la nostra fameia e par el laoro a Geovà. Alora, ghemo de veder el laoro dela maniera giusta e gaver tempo par le robe pi importante!
11. Cossa che William el ga imparà sora la maniera giusta de veder el laoro?
11 Varda el esémpio de un gióveno che el ga nome William. Lu el ga imparà tanto con un fradel che l’è stà so paron. William el ga dito: “Questo fradel l’è un bel esémpio. Lu l’è un bravo laorador, e par quela, le persone le parla robe bone sora el so laoro. Ma quando finisse la giornada de laoro, lu el se ferma de laorar e el dopera tuto del so tempo e dela so forsa par la so fameia e par le robe de Geovà. E seto una roba? Lu l’è una dele persone pi felice che mi cognosso!” *
LA MANIERA GIUSTA DE VEDER A NOANTRI STESSI
12. (a) Come che Salomon el ga mostrà che el vedea a lu stesso dela maniera giusta? (b) Cossa che ga sucedesto dopo de un tempo?
12 Quando Salomon el servia a Geovà de tuto el cuor, lu el vedea a lu stesso dela maniera giusta. Par esémpio, quando l’era gióveno, lu el savea che no l’era bon de far arquante robe e el ga domandà el aiuto de Geovà. (1 Rè 3:7-9) Salomon el ga anca dito che quei che i ze orgoliosi i ndarà cascar. (Pro. 16:18) Ma dopo de un tempo, Salomon l’è deventà orgolioso e no’l ga pi obedio ai comandamenti de Dio. Par esémpio, una dele lege la disea che i rè de Israel no i gavea de maridarse con tante done. (Deu. 17:17) Salomon no’l ga obedio a questa lege. Lu el ga bio 700 done e 300 concubine e tante de lore le adorea a dei falsi! (1 Rè 11:1-3) Fursi Salomon el pensea che no’l gavaria problema. Ma dopo de un tempo, Salomon el ga sofrio tanto par causa dela scólia che el ga fato. — 1 Rè 11:9-13.
13. Cossa che podemo imparar col esémpio de Gesù?
13 Gesù el vedea a lu stesso dela maniera giusta. Vanti de vegner ala Tera, lu el ga fato tante bele robe insieme a Geovà. Par esémpio, la Bìblia la dise che Geovà el ga doperà Gesù par far tute le robe nel cielo e nela Tera. (Col. 1:16) E credemo che nel so batésimo, Gesù el se ga ricordà de tuto quel che el ga fato insieme al so Pare. (Mat. 3:16; Gioani 17:5) Anca che Gesù el gavesse tanta sabedoria e el savesse tante robe, lu no l’è deventà orgolioso. Lu mai el pensea che l’era meio che i altri. Lu el ga dito che l’è vegnesto ala Tera, “nò par esser servio, ma par servir e dar la so vita par salvar tante persone”. (Mat. 20:28) Lu anca el ga mostra umiltà parché el savea che el gavaria de far quel che el so Pare el volea, e nò quel che lu el volea. (Gioani 5:19) Sicuro che Gesù l’è un bel esémpio par noantri.
14. Cossa che imparemo de quel che Gesù el ga dito ai so dissìpoli?
14 Gesù el ga insegnà i so dissìpoli a pensar dela maniera giusta sora lori stessi. Lu el ga dito: “Fin tuti i cavei dela vostra testa i ze contadi.” (Mat. 10:30) Quel che Gesù el ga dito pol giutarne tanto se pensemo che no ghemo valor. Le parole de Gesù le ne insegna che tuti noantri ghemo tanto valor par Geovà. Ghemo de ricordarse che l’è stà Geovà che el ne ga scoliesto par servirlo e par darne la speransa de vita eterna. Alora, chi che semo noantri par dir che lu l‘è sbalià?
Cossa che ndarà suceder se no vedemo a noantri stessi dela maniera giusta? (Vedi el paràgrafo 15.) *
15. (a) Cossa che imparemo de quel che una Sentinela la ga dito? (b) Che benedission no gavaremo se pensemo massa in noantri stessi? (Vedi i ritrati dela pàgina 24.)
15 Una Sentinela de 2005 la ga dito: “No volemo pensar che semo massa importanti parché deventaremo orgoliosi. Ma no volemo pensar che no ghemo mia valor. Alora, ghemo de pensar dela maniera giusta sora noantri stessi e ricordarse che no semo boni de far arquante robe, ma che ghemo bele qualità. Una sorela la ga dito: ‘Mi no son una persona rugna e gnanca una persona che la ze meio che i altri. Mi go robe rugne e robe bone come tute le persone.’” * Sicuro che l’è tanto importante veder a noantri stessi dela maniera giusta.
16. Parché che Geovà el ne dà consili?
16 Geovà el ne ama e el vol che semo felici. Par quela che el ne dà i meio consili che ghen’è. (Isa. 48:17, 18) Alora, la roba pi importante nela nostra vita la ga de esser servir a Geovà. Cossita, saremo pròpio felici e lìberi de tanti problemi che i vien se pensemo massa nei soldi, nel laoro o in noantri stessi. Alora volemo sempre sforsarse tanto par mostrar sabedoria e par far el cuor de Geovà contento! — Pro. 23:15.
CÀNTICO 94 Gràssie par la Bìblia!
^ Salomon e Gesù i gavea tanta sabedoria. E l’è stà Geovà che ghe ga dato questa sabedoria. In questo stùdio, ndaremo imparar sora arquanti consili de Salomon che i ndarà giutarne a veder el laoro, i soldi e a noantri stessi dela maniera giusta. Ndaremo anca veder come l’è stà bon par arquanti fradei meter in pràtica questi consili.
^ (Proverbi 4:7) La sabedoria la ze la roba pi importante. Alora, sfòrsate par gaverla. E, dopo, sfòrsate par esser bon de capir le robe.
^ (Mateo 6:31-33) Par quela, no sté mai restar ansiosi e dir: ‘Cossa che ndaremo magnar?’, ‘Cossa che ndaremo bever?’, ‘Cossa che ndaremo vestir?’ 32 Parché queste le ze le cose che le persone dele nassion le va in serca con tanta voia. El vostro Pare nel cielo el sà che valtri gavé bisogno de tute queste cose. 33 “Alora, seité a meter el Regno e la giustìssia de Dio nel primo posto, e cossita tute queste altre robe le ve sarà dontade.
^ (Eclesiasti 5:18, 19) Mi go visto che l’è bon e giusto che la persona la magne, la beve e la gode de tuto el duro laoro che la fà soto el sol, nei pochi giorni che el vero Dio el ghe ga dato, parché questa la ze la so ricompensa. 19 E anca, quando el vero Dio el dà a un omo richesse e altre robe, e lo assa goderle, lu el ga de acetar la so ricompensa e restar contento col so laoro. Questo l’è el presente de Dio.
^ Vedi el artìcolo “Como gostar do seu trabalho” nela Sentinela de 1 de febraro de 2015.
^ Vedi el artìcolo “A Bíblia pode ajudá-lo a encontrar alegria” nela Sentinela de 1 de agosto de 2005.
^ RITRATI: Gioani e Andrè i ze dela medèsima congregassion. Gioani el dopera tanto del so tempo par tender del auto. Andrè el dopera el so auto par portar i fradei ala predicassion e ale riunion.
^ RITRATI: Gioani el laora fin pi tardi parché no’l vol disgustar el so paron. Lu el laora tute le volte che el so paron el ghe domanda de laorar fin pi tardi. Andrè, che l’è servo ministerial, el fà una vìsita insieme con un ansiano. Andrè el gavea belche parlà al so paron che no’l podaria laorar arquante note dela stimana parché el dopera questo tempo par adorar a Geovà.
^ RITRATI: Gioani el pensa massa in lu stesso. Andrè sempre el se sforsa de dar el so meio nel laoro a Geovà. Par quela, el fà tanti amighi quando l’è drio giutar a rangiar un Salon de Assemblea.
