STÙDIO 21
Cossa che el libro de Apocalisse el dise che sucederà nel futuro?
‘Amén! Vien, Signor Gesù.’ — APO. 22:20.
CÀNTICO 142 La speransa la ne dà coraio
COSSA CHE NDAREMO IMPARAR? *
1. Che scólia importante tute le persone le ga de far?
TUTE le persone le ga una scólia tanto importante de far. Lore le ga de dessider se le sarà leai a Geovà, che l’è el Sovrano del Universo, o esser leai a Sàtana, el Diaol. Se le scòlie esser leai a Geovà, lore le ndarà viver par sempre. Ma se le scòlie esser leai a Sàtana, le ndarà morir. (Mat. 25:31-33, 46) Nela granda tribolassion, le persone le sarà giulgade se le podarà seitar a viver o se le sarà finide fora. — Apo. 7:14; 14:9-11; Eze. 9:4, 6.
2. (a) Cossa che Ebrei 10:35-39 el ne incoraia a far? (b) Cossa che el libro de Apocalisse el ne giuta a far?
2 Ledi Ebrei 10:35-39. * Se noantri scoliemo esser leai al governo de Geovà, ghemo fato la meio roba. Ma ghemo de seitar a far pi forte la nostra voia de esser leai a Geovà. Cossa pol giutarne a farlo? Studiar quel che dise el libro de Apocalisse. Questo libro el ne giuta a saver cossa ndarà suceder coi nemighi de Geovà e le benedission che i servi de Dio i riceverà. Sicuro che volemo giutar anca i altri a scòlier esser leai a Geovà, e quel che imparemo nel libro de Apocalisse el pol giutarne tanto a farlo.
3. Cossa che ndaremo veder in questo stùdio?
3 In questo stùdio, ndaremo veder la risposta a queste domande: Che benedission quei che i ze leai al governo de Dio i ndarà ricever? Cossa che ndarà suceder con quei che i ze leai ala bèstia de color scarlate del libro de Apocalisse?
COSSA CHE NDARÀ SUCEDER CON QUEI CHE I ZE LEAI A GEOVÀ?
4. Chi che el apòstolo Gioani el ga visto insieme con Gesù nel cielo?
4 El apòstolo Gioani el ga bio una vision de due grupi che i ze leai a Geovà e che i riceve vita eterna. Prima, Gioani el ga visto 144 mila persone insieme con Gesù nel cielo. (Apo. 14:1; 7:4) Queste 144 mila persone le ze state scolieste par viver nel cielo e par governar insieme con Gesù. Lori i ndarà governar la Tera del cielo. — Apo. 5:9, 10; 14:3, 4.
5. Cossa che sucederà coi untadi che i sarà ancora qua nei ùltimi giorni?
5 Del tempo dei apòstoli fin adesso, tante persone le ze state scolieste par far parte dei 144 mila. (Luc. 12:32; Rom. 8:17) Ma nela so vision, Gioani el ga visto che pochi untadi i saria ancora nela Tera nei ùltimi giorni. Cossa che ndarà suceder con questi untadi? Lori i ndarà ricever el selo final, che vol dir la aprovassion de Geovà, vanti del scomìnsio dela granda tribolassion. (Apo. 7:2, 3; 12:17) Alora, nela granda tribolassion, lori i sarà menadi su al cielo insieme ai altri untadi che i sarà belche là. Del cielo, tuti i governarà insieme con Gesù. — Mat. 24:31; Apo. 5:9, 10.
6-7. (a) Che altro grupo Gioani el ga visto dopo dei 144 mila, e cossa savemo sora questo grupo? (b) Parché che el capìtolo 7 de Apocalisse l’è importante par quei che i ndarà viver nel cielo e anca par quei che ndarà viver nela Tera?
6 El secondo grupo che Gioani el ga visto l’è stà una mùcia de gente. La Bìblia no la dise quante persone che le fà parte de questo grupo. (Apo. 7:9, 10) Alora cossa savemo sora questo grupo? Apocalisse 7:14 dise: “Questi i ze quei che i vien fora dela granda tribolassion, e i ga lavà le so longhe robe e le ga fate vegner bianche nel sangue del Piegoreto.” Dopo de vegner fora dela granda tribolassion, queste persone le ndarà viver par sempre qua nela Tera e le gavarà tante benedission. — Sal. 37:9-11, 27-29; Pro. 2:21, 22; Apo. 7:16, 17.
7 El capìtolo 7 de Apocalisse l’è tanto importante parché el parla che quei che i viverà nel cielo i governarà con Gesù, e quei che i viverà nela Tera i gavarà vita eterna. Tuti noantri ghemo de proar imaginar come sarà ricever le benedission che Geovà el ne promete. Sicuro che sarà tanto bel e restaremo tanto contenti de gaver scoliesto esser leai al governo de Geovà! Vedemo adesso che altre robe el libro de Apocalisse el parla sora la granda tribolassion. — Mat. 24:21.
COSSA CHE NDARÀ SUCEDER COI NEMIGHI DE DIO?
8. (a) Cossa che farà scominsiar la granda tribolassion? (b) Cossa che quei che no i serve a Geovà i ndarà far?
8 Come ghemo imparà nel secondo stùdio, i governi de questo mondo i ndarà finir fora con Babilònia, la Granda, che la ze tute le religion false. (Apo. 17:16, 17) Quando questo sucederà, scominisiarà la granda tribolassion. Alora, sarà che tante persone le scominsiarà servir a Geovà? Nò. Apocalisse capìtolo 6 el mostra che le persone che no le serve mia a Geovà le ndarà in serca de protession nele montagne, o sia, nela polìtica e nel comèrsio de questo mondo. Le persone che no le ze leai al Regno de Dio le deventarà so nemighe. — Luc. 11:23; Apo. 6:15-17.
9. Parché che i nemighi de Geovà i restarà tanto inrabiadi nela granda tribolassion, e cossa che i ndarà far?
9 Nela granda tribolassion, i servi de Geovà i sarà tanto difarenti de tute le altre persone. Come cossita? Sol lori i sarà drio adorar a Dio e no i volerà obedir ala bèstia cativa. (Apo. 13:14-17) Par quela, i nemighi de Geovà i restarà tanto inrabiadi con lori. Alora, le nassion, o sia, Goghe de Magoghe, le se meterà insieme par ndar contra el pòpolo de Dio in tuta la Tera. — Eze. 38:14-16.
10. De acordo con Apocalisse 19:19-21, cossa che Geovà el farà quando le nassion le ndarà contra el so pòpolo?
10 Cossa che Geovà el farà quando le nassion le ndarà contra el so pòpolo? La Bìblia la dise che Geovà el restarà tanto inrabià. (Eze. 38:18, 21-23) El capìtolo 19 de Apocalisse el dise che Geovà el ndarà mandar el so Fiol par proteger el so pòpolo e par finir fora coi so nemighi. I àngeli fedeli e i 144 mila, o sia, el esèrsito del cielo i ndarà lotar con Gesù contra Goghe de Magoghe. (Apo. 17:14; 19:11-15) E cossa che ndarà suceder in questa guera? Tute le persone e organisassion che no le ze leai a Geovà le sarà finide fora. — Ledi Apocalisse 19:19-21. *
DOPO DELA GUERA, GHEN’È UN MATRIMÒNIO
11. Che nantra roba tanto importante el libro de Apocalisse el parla che ndarà suceder?
11 Proa pensar in tuto quel che ndarà suceder. Babilònia, la Granda, e dopo, anca i nemighi de Dio i sarà finidi fora. Sicuro che tuti i servi de Geovà qua nela Tera e anca i àngeli nel cielo i restarà tanto contenti. (Apo. 19:1-3) Ma el libro de Apocalisse el parla de nantra roba tanto importante che ndarà suceder. Cossa zela questa roba? El matrimònio del Piegoreto. — Apo. 19:6-9.
12. De acordo con Apocalisse 21:1, 2, quando che sarà el matrimònio del Piegoreto?
12 L’è vera che tuti i 144 mila i sarà belche nel cielo par far la guera del Armagedon, ma no sarà ancora la ora del matrimònio del Piegoreto. (Ledi Apocalisse 21:1, 2. *) Alora quando che sarà questo matrimònio? El sarà dopo del Armagedon, quando no ghen sarà pi i nemighi de Dio. — Sal. 45:3, 4, 13-17.
13. Cossa che ndarà suceder nel matrimònio del Piegoreto?
13 Cossa che ndarà suceder nel matrimònio del Piegoreto? El matrimònio del Piegoreto el sarà la union intrà el rè Gesù Cristo e i 144 mila, come che sucede nel matrimònio intrà un omo e una dona. Dopo de questo, Gesù e i 144 mila i governarà la Tera par mila ani. — Apo. 20:6.
LA BELA CITÀ E EL TO FUTURO
Apocalisse capìtolo 21 el parla de una cità simbòlica de nome Nova Gerusalen che la ze drio vegner do del cielo. Nel Governo de Mila Ani de Cristo, la ndarà benedir i servi de Dio de tante maniere (Vedi i paràgrafi 14 a 16.)
14-15. Cossa che el capìtolo 21 de Apocalisse el parla sora i 144 mila? (Vedi la ilustrassion dela prima pàgina.)
14 El capìtolo 21 de Apocalisse el dise che dopo del matrimònio, i 144 mila i sarà come una cità tanto bela che la gavarà nome “Nova Gerusalen”. (Apo. 21:2, 9) Questa cità la sarà sora 12 sassi che i ze scriti i nomi dei 12 apòstoli del Piegoreto. Gioani l’è restà tanto contento con quel che el ga visto parché el ga visto anca el so nome lì. Sicuro che questo l’è stà un grando onor par lu. — Apo. 21:10-14; Efe. 2:20.
15 La Nova Gerusalen la ze una cità tanto difarente de tute le altre. La so strada prinsipal la ze de oro, i so 12 portoni i ze de pèrole e la so fondassion e le so muràlie le ze fate de tanti sassi pressiosi. Tute le mesure de questa cità le ze giuste. (Apo. 21:15-21) Ma Gioani el vede che no ghen’è una roba. Lu el ga dito: ‘Mi no go visto el témpio nela cità parché Geovà, Dio, el Tuto Poderoso e el Piegoreto i ze el so témpio. E la cità no la ga bisogno del sol e gnanca dela luna par slusarla parché la ga la glòria de Dio, e la so làmpada la ze el Piegoreto.’ (Apo. 21:22, 23) Alora, Geovà e Gesù i ze el témpio dela Nova Gerusalen e tuti quei che i fà parte de questa cità i podarà star sempre insieme con Geovà. — Ebr. 7:27; Apo. 22:3, 4.
Nela vision de Gioani, ‘el rio’ e ‘le piante’ i vol dir le benedission che i servi de Geovà i riceverà nel futuro (Vedi i paràgrafi 16 e 17.)
16. Cossa che ndarà suceder nei Mila Ani?
16 Sicuro che i untadi i resta tanto contenti de pensar in questa bela cità. Ma questa cità la ga tanto valor anca par quei che i ga la speransa de viver par sempre nela Tera. Parché? La Nova Gerusalen la ndarà benedir la Tera de tante maniere nei mila ani che Gesù el ndarà governar. Nela vision, Gioani el ga visto un rio, che vol dir le benedission, e piante de tute due bande del rio. E el ga anca visto che le foie dele piante le ze ‘doperade par curar le nassion’. (Apo. 22:1, 2) Alora, nei Mila Ani, tute le persone nela Tera le podarà gaver queste benedission. Par esémpio, pian pian le persone le deventarà perfete e no ghen sarà pi malatie, dolor e gnanca sofrimento. — Apo. 21:3-5.
17. De acordo con Apocalisse 20:11-13, chi che ndarà ricever le benedission nei Mila Ani?
17 Chi che ndarà ricever queste benedission? Tuti quei che i sarà vivi dopo del Armagedon, i fioi che fursi lori i gavarà e quei che i sarà ressussitadi. (Ledi Apocalisse 20:11-13. *) Chi che sarà ressussità? I giusti, o sia, i servi de Geovà, e i ingiusti, che i ze quei che no i ga podesto imparar sora Geovà. (Ati 24:15; Gioani 5:28, 29) Ma sarà che tute le persone che le ze morte le ndarà ressussitar par viver nela Tera? Nò. Le persone che le ga bio la oportunità de servir a Geovà, ma no le ga mia volesto farlo, no le ndarà esser ressussitade. Parché? Parché lore le ga belche mostrà che no le vol servir a Geovà e che no le mèrita viver nel Paradiso nela Tera. — Mat. 25:46; 2 Tes. 1:9; Apo. 17:8; 20:15.
PODAREMO MOSTRAR CHE SEMO PRÒPIO LEAI A GEOVÀ
18. Come che le persone le ndarà viver dopo dei Mila Ani?
18 Nel fin dei Mila Ani tute le persone nela Tera le tornarà a viver, o sia, le sarà perfete. (Apo. 20:5) Alora no ghen sarà pi el pecato che l’è vegnesto de Adon, e nissun pi ndarà sofrir par via de questo. — Rom. 5:12.
19. Cossa che tute le persone le podarà mostrar dopo dei mila ani?
19 Sàtana el ga proà intrigar Gesù de adorar a Geovà tante volte, ma anca cossita, Gesù el ga seità a esser leal. Ma sarà che tute le persone perfete le ndarà far compagno a lu? Tuti noantri podaremo mostrar che semo leai a Geovà quando Sàtana el sarà molà del abismo dopo dei mila ani. (Apo. 20:7) Quei che i seitarà leai a Geovà i viverà par sempre e i deventarà pròpio lìberi. (Rom. 8:21) Ma quei che no i volerà pi obedir a Geovà i sarà finidi fora insieme con Sàtana e i so demoni. — Apo. 20:8-10.
20. Come che te te senti dopo de studiar sora le professie del libro de Apocalisse?
20 Come che te te senti dopo de imparar de pi sora el libro de Apocalisse? L’è pròpio bon saver che arquante de queste professie le ze drio realisarse nel nostro tempo. Sicuro che questo ne dà ancora de pi voia de giutar i altri a adorar a Geovà dela maniera giusta. (Apo. 22:17) Questi studi i ne ga fato anca pensar sora la bela speransa che ghemo par el futuro. Semo stati incoraiadi a parlar come el apòstolo Gioani: ‘Amén! Vien Signor Gesù.’ — Apo. 22:20.
CÀNTICO 25 I servi untadi de Geovà
[Nota],[Note]
^ Questo l’è el ùltimo stùdio de questa revista che el parla sora el libro de Apocalisse. Ndaremo veder che quei che i ze leai a Geovà i gavarà un futuro tanto bel e che quei che no i ze leai al so Regno i sarà finidi fora.
^ (Ebrei 10:35-39) Alora, seité a esser coraiosi, cossita saré tanto ricompesadi. 36 Valtri gavé de perseverar. Cossita, dopo de far la volontà de Dio, riceveré quel che el ve ga prometesto. 37 Parché, ancora “nantro pochetin”, e “quel che el vien el rivarà, sensa tardigar”. 38 “Ma el giusto el ndarà viver par via dela so fede”, e “se lu el torna indrio, mi no restarò contento con lu”. 39 Ma noantri no semo mia de quei che i torna indrio par esser finidi fora, ma semo de quei che i ga fede par salvar la vita.
^ (Apocalisse 19:19-21) E go visto la bèstia cativa e i rè dela tera coi so esèrsiti, riunidi par far guera contra quel che l’era sora el caval e contra el so esèrsito. 20 La bèstia cativa la ze stata ciapada, e el falso profeta insieme. El falso profeta el fea segnai davanti dela bèstia cativa; con questi segnai el imbroiea quei che i gavea ricevesto la marca dela bèstia cativa e quei che i adorea la so imàgine. Tuti i due i ze stati butadi ancora vivi nel lago de fogo ndove che el sùlfaro el brusa. 21 Ma i altri i ze stati copadi cola longa spada che vegnea fora dela boca de quel che l’era nel caval. E tuti i osei che i ga magnà la carne de lori i ze restadi pieni.
^ (Apocalisse 21:1, 2) E go visto un novo cielo e una nova tera; el cielo che ghen’era vanti e la tera che ghen’era vanti no ghen’era pi, e el mar no ghen’era pi. 2 Go anca visto la cità santa, la Nova Gerusalen. Ela la ze drio vegner do del cielo e la vien de Dio. Ela la se ga parecià come una noiva che la se fà bela par el so omo.
^ (Apocalisse 20:11-13) E go visto un grando trono bianco e Quel che l’era sentà nel trono. El cielo e la tera i scampea de davanti de lu, e no se ga pi catà posto par lori. 12 Go visto i morti, grandi e pìcoli, in pié davanti del trono, e roli i ze stati verti. E nantro rolo l’è stà verto: el rolo dela vita. De acordo con quel che l’era scrito nei roli, i morti i ze stati giulgadi par le so assion. 13 El mar el ga dato i so morti, e la morte e el Sepolcro i ga dato i so morti; e cada un de lori i ze stati giulgadi de acordo cole so assion.
