1-2. Parché che dele volte arquanti prinsipi dela Bìblia i deventa ancora pi importanti par noantri?

 UN OMO e una dona i ze tanto atenti al discorso che el fradel el fà nel giorno che lori i se marida. L’è vera che lori belche i cognossea i prinsipi sora el matrimònio, ma adesso, questi prinsipi i ze ancora pi importanti par lori. Parché? Parché adesso i gavarà de meterli in pràtica nel so matrimònio.

² La medèsima roba la sucede quando quei che i ze maridadi i ga fioi. Pol esser che vanti de gaverli lori i gàpia scoltà tanti discorsi sora slevar su i fioi. Ma adesso, i prinsipi sora questo i ze ancora pi importanti par lori. Sicuro che ghe vol far tanto sforso par slevar su i fioi. Quando càmbia qualcossa nela nostra vita, arquanti prinsipi dela Bìblia i deventa ancora pi importanti par noantri. Par quela che l’è tanto importante che femo quel che Geovà el ga dito ai rè de Israel. Lu el ga dito che lori i gavaria de leder la Parola de Dio e pensar sora ela tuti i giorni. — Deu. 17:19.

3. Cossa che ndaremo veder in questo stùdio?

³ Se te sì pare o mare, ricòrdate che insegnar sora Geovà ai to fioi l’è una dele robe pi importante che ghen’è. Ma ricòrdate che no te ghè sol de parlar sora  Geovà ai to fioi, te ghè anca de giutarli a amarlo de tuto el cuor. In questo stùdio, ndaremo veder quatro prinsipi dela Bìblia che ndarà giutarte a farlo. (2 Tim. 3:16) Ndaremo anca veder come che arquanti de questi prinsipi i ga belche giutà tanti genitori.

4. Che prinsìpio i genitori i pol meter in pràtica par giutar i so fioi a amar a Geovà? (Tiago 1:5)

⁴ Prinsìpio 1: Domanda el aiuto de Geovà e dopera quel che la so organisassion la ne dà. Domanda a Geovà la sabedoria che te ocore par insegnar ai to fioi a amarlo. (Ledi Tiago 1:5. *) Geovà l’è la meio persona par giutarte a farlo. Parché? Par via de arquante robe. Par esémpio, lu l’è el pi bravo Pare che ghen’è. (Sal. 36:9) E anca parché se femo quel che Geovà el dise, sarà el meio par noantri. — Isa. 48:17.

5. (a) Come la organisassion de Geovà la ze drio giutar i genitori? (b) Cossa te ghè imparà del esémpio de Abilio e Ulla Amorin nel vìdeo “Geovà el ne ga insegnà a slevar su i nostri fioi”?

⁵ Sicuro che i genitori i vol tanto giutar i so fioi a amar a Geovà. Geovà el giuta i genitori a farlo par meso dela Bìblia e dela so organisassion. (Mat. 24:45) Par esémpio, i genitori i pol catar tanti bei consili sora slevar i fioi nel site jw.org. Nel site, ghen’è tanti bei videi e i artìcoli par leder in “Ajuda para Família”, che vanti ghen’era nela Despertai!. * — Pro. 2:4-6.

6. Cossa che Joe el ga dito sora el aiuto che la organisassion de Geovà ghe dà?

⁶ Tanti genitori i dà tanto valor al aiuto che Geovà el ghe dà par meso dela so organisassion. Un pare de nome Joe el ga dito: “Sicuro che insegnar i nostri tre fioi a amar e a servir a Geovà no l’è mia fàcile. Par quela che mi e la me dona preghemo tanto a Geovà par domandarghe aiuto. Tante volte la  organisassion la ga fato un artìcolo o un vìdeo pròpio sora el problema che èrino drio infrontar. Noantri sempre metemo in pràtica i consili che Geovà el ne dà.” Joe e la so dona i sa che questi artìcoli e vìdei i ze drio giutar i so fioi a esser pi amighi de Geovà.

7. Parché che i genitori i ga de sforsarse de esser un bon esémpio par i so fioi? (Romani 2:21)

⁷ Prinsìpio 2: Sìpia un bon esémpio par i to fioi. I fioi i vede tuto quel che i so genitori i fà e i proa far compagno. L’è vera che no ghen’è genitori perfeti, ma anca cossita, lori i ga de sforsarse par esser un bon esémpio par i so fioi. (Rom. 3:23; ledi Romani 2:21. *) Un pare el ga dito: “I fioi i ze come una sponga. Lori i ze atenti al esémpio dei so genitori e i proa far compagno. E quando i vede che no semo drio far quel che ghe insegnemo, lori i ne dise.” Alora, se volemo che i nostri fioi i ame a Geovà, anca noantri ghemo de mostrar che lo amemo tanto.

8-9. Cossa che te ghè imparà de Andrew e Emma?

⁸ I genitori i pol far tante robe par giutar i so fioi a amar a Geovà. El fradel Andrew de 17 ani el ga dito: “I me genitori i me ga sempre insegnà che l’è tanto importante pregar a Geovà. Tute le note vanti de dormir me pare el preghea con mi, anca se mi gavesse belche pregà a Geovà. I me genitori sempre i me disea: ‘Te pol parlar con Geovà sempre che te vol.’ Par quela, pregar a Geovà l’è tanto importante par mi. Ancoi, sento che Geovà l’è un Pare che el me vol tanto ben, e par mi, l’è tanto fàcile pregar a lu.” Se te sì pare o mare, ricòrdate che el to amor par Geovà pol giutar anca i to fioi a amarlo.

⁹ Varda anca el esémpio dela sorela Emma. El so pare el ga abandonà la fameia e el ga assà tanti dèbiti par la so mare pagar. Ela la ga dito: “La me mama la ga bio de laorar tanto par pagar i dèbiti e par dar quel che la nostra fameia la gavea de bisogno. Ma ela la disea che Geovà el dà sempre quel che i so servi i ga de bisogno. Mi vedea che la se fidea in Geovà. La me mama la fea tuto quel che la me insegnea.” Cossa che imparemo? I genitori i pol esser un bel esémpio par i so fioi anca quando i infronta dificoltà. — Gàl. 6:9.

10. Quando che i israeliti i podea discorer coi so fioi? (Deuteronómio 6:6, 7)

¹⁰ Prinsìpio 3: Discori sempre coi to fioi. Geovà el ga dito che i israeliti i parlesse sempre coi so fioi sora lu. (Ledi Deuteronómio 6:6, 7. *) In quela època, i israeliti i gavea tanto tempo par discorer coi so fioi e par giutarli a amar a Geovà. Par esémpio, un toseto el ndea insieme col so pare laorar in colònia e una toseta la restea tanto tempo insieme cola so mare par far i mistieri casa. I genitori i podea doperar el tempo che i stea insieme coi so fioi par insegnarghe robe tanto importante. Par esémpio, lori i podea insegnarghe sora le bele qualità de Geovà e come che lu l’era sempre drio giutarghe.

11. Quando che i genitori i pol discorer coi so fioi?

 ¹¹ Ancoi, pochi genitori i pol restar tanto tempo coi so fioi come i israeliti. Tanti genitori i va laorar e i so fioi i va ala scola. Par quela, i genitori i ga de tor del so tempo par discorer coi so fioi. (Efe. 5:15, 16; Fil. 1:10) Par esémpio, lori i pol discorer coi so fioi nela adorassion in fameia. Un gióveno de nome Alexander el ga dito: “Me pare sempre el fà la adorassion in fameia e no’l assa che gnente ne intrighe de farla. E dopo del stùdio, ciacolemo tanto.”

12. Come che un pare el pol far una bela adorassion in fameia?

¹² Se te sì pare, come che te pol far una bela adorassion in fameia? Valtri podé studiar el libro Te pol viver felice par sempre!. Questo libro l’è tanto bel parché el ga tante domande che le te giuta discorer coi to fioi. Ricòrdate de giutarli a parlar sora quel che i pensa e quel che i sente. Alora, no stà dirghe su o parlar dei so sbali nela adorassion in fameia. E se lori i parla qualcossa che no l’è mia giusto, no stà restar inrabià. Pitosto, ringràssia i to fioi che i ze drio parlar pròpio quel che i sente, e pàrlaghe che sempre i pol farlo. Se te sè quel che lori i sente, sarà pi fàcile giutarli.

13. De che nantra maniera el pare e la mare i pol insegnar ai so fioi sora Geovà?

¹³ Se te sì pare o mare, parla sempre che te pol ai to fioi sora Geovà. No te ocore spetar la ora del stùdio de lori par farlo. Lisa la ga dito: “Noantri doperemo tuto quel che vedemo nela naturesa par insegnar i nostri fioi sora Geovà. Par esémpio, sempre che el nostro cagneto el fea qualcossa che ne vegnea da rider, parleino ai nostri fioi che Geovà l’è un Dio tanto contento e che el ama la vita.”

14. Parché che i genitori i ga de giutar i so fioi a gaver boni amighi? (Proverbi 13:20)

¹⁴ Prinsìpio 4: Giuta i to fioi a gaver boni amighi. La Bìblia la dise che le amicìssie le pol giutar una persona a far quel che l’è giusto, ma anca quel che l’è  sbalià. (Ledi Proverbi 13:20. *) Alora, te cognossi i amighi dei to fioi? Come che te podarissi giutarli a gaver amighi che i ama a Geovà? (1 Cor. 15:33) Fursi te podarissi convidar bravi fradei par far qualcossa insieme cola to fameia. — Sal. 119:63.

15. Come che i genitori i pol giutar i so fioi a gaver boni amighi?

¹⁵ Varda el esémpio de Tony. Lu e la so dona i ga giutà i so fioi a gaver boni amighi. Lu el ga dito: “Noantri sempre convideino fradei e sorele de difarente età par vegner nela nostra casa. Dele volte, magneino qualcossa e dopo feino el stùdio in fameia insieme. Cossita, ghemo cognossesto fradei che i ama a Geovà e che i lo serve contenti. Noantri anca convideino superintendenti de sircuito, missionari e altri fradei par star nela nostra casa. I nostri fioi i ga imparà tanto col esémpio de lori e i ze deventadi pi amighi de Geovà.” Alora, sfòrsate sempre par giutar i to fioi a gaver boni amighi.

16. Cossa che i genitori i ga de ricordarse se el so fiol no’l vol pi servir a Geovà?

¹⁶ Fursi te te ghè sforsà tanto par slevar su el to fiol, ma lu no’l vol servir a Geovà. Se questo l’è drio suceder con ti, no stà pensar che la colpa la ze toa. Ricòrdate che Geovà el ga dato la libertà de scòlier a tuti noantri. Anca cossita, no stà mia desister parché el to fiol el pol tornar a Geovà. Proa pensar nela ilustrassion del fiol che l’è ndato via de casa e che dopo el se ga ciamà gramo. (Luc. 15:11-19, 22-24) Questo fiol el ga fato tante robe sbaliade, ma dopo de un tempo, l’è tornà al so pare. Fursi qualchedun el pense: “Questa la ze sol una ilustrassion. Sarà che questo pol suceder col me fiol?” Sicuro che si! Varda quel che ga sucedesto col fradel Elie.

17. Cossa che te ga piasesto dela stòria de Elie?

 ¹⁷ Elie * el ga dito sora i so genitori: “Lori i ga fato el so meio par giutarme a amar a Geovà e la Bìblia. Ma quando son vegnesto pi grando, no volea pi far quel che l’era giusto.” Alora Elie el ga seità a far arquante robe giuste, ma el ga scominsià anca a far robe sbaliade. Quando i so genitori i ga proà giutarlo a fermarse de far quel che l’era sbalià, lu no’l ga volesto scoltarli. Dopo, lu l’è ndato via de casa e el ga scominsià a far altre robe sbaliade. Anca cossita, dele volte, el parlea sora la Bìblia con un dei so amighi. Lu el ga dito: “Mi son nicorto che quando parlea sora Geovà pensea de pi sora lu. Pian pian le semense che i me genitori i gavea piantà rento el me cuor le ga scominsià a butar.” Dopo de un tempo, Elie l’è tornà servir a Geovà. Sicuro che i so genitori i ze restadi tanto contenti del sforso che i ga fato par insegnarghe ancora de picinin! — 2 Tim. 3:14, 15.

18. Come che te te senti de veder el sforso che i genitori i fà par giutar i so fioi a amar a Geovà?

¹⁸ Valtri che sì genitori gavé el grando privilègio de giutar i vostri fioi a deventar bravi servi de Geovà. (Sal. 78:4-6) Volemo lodarve par i sforsi che sì drio far par slevar i vostri fioi. L’è vera che no l’è fàcile farlo, ma seité a giutarli a amar e a obedir a Geovà. Se valtri fé cossita, podé esser sicuri che Geovà el resta tanto contento con valtri. — Efe. 6:4.