1. Cossa che Geovà el ne convida a far? (Varda anca la ilustrassion.)

 NOANTRI savemo che podemo ndar in serca de Geovà in orassion quando ghemo bisogno de consolo e aiuto. Parché savemo che l’è cossita? Parché lu el ne convida a pregar. Geovà el ga caro de scoltarne e el vol che “preghemo sempre”. (1 Tes. 5:17) Podemo pregar quando volemo e sempre che ne ocore. (Pro. 3:5, 6) Geovà el ne mostra tanta bontà parché el ne assa pregar quante volte volemo.

2. Cossa che ndaremo veder in questo stùdio?

² Semo pròpio contenti de saver che Geovà el ne assa pregar a lu. Ma, dele volte, ghemo tante robe de far che pol esser fadiga catar fora tempo par pregar. E fursi pensemo che ne ocore far ancora meio le nostre orassion. Se se sentimo cossita, la Bìblia la pol giutarne. In questo stùdio, ndaremo veder come far compagno a Gesù e torse el tempo par pregar. Anca ndaremo veder sinque robe che le pol giutarne a far le nostre orassion ancora meio.

3. Cossa che Gesù el savea sora le orassion?

³ Tanto tempo vanti de vegner ala Tera, Gesù el ga visto che so Pare el rispondea ale orassion dei so servi fedeli. Par esémpio, lu el ga visto quando Geovà el ga rispondesto a Ana, Davi e Elia. (1 Sam. 1:10, 11, 20; 1 Rè 19: 4-6; Sal. 32:5) Alora, Gesù el savea che Geovà el ghe dà tanto valor ale orassion. Par quela, lu el ga insegnà i so dissìpoli a sempre pregar e a esser sicuri che Geovà el ndaria scoltarli! — Mat. 7:7-11.

4. Cossa che podemo imparar dele orassion de Gesù?

⁴ Intanto che l’era nela Tera, Gesù sempre el preghea. Alora, cossa che podemo imparar del so esémpio? Gesù el se tolea tempo par pregar anca se el gavesse diverse robe de far e se tanta gente ghe ndesse drio. (Mar. 6:31, 45, 46) Lu anca el se levea su de matina bonora par gaver tempo de pregar. (Mar. 1:35) Quando el ga bio una dessision importante de far, Gesù el ga seità a far orassion tuta la note. (Luc. 6:12, 13) E nela note vanti de morir, lu el ga pregà tante volte, parché el volea esser sicuro che el saria bon de far tuto quel che Geovà ghe gavea domandà. — Mat. 26:39, 42, 44.

5. Come che podemo far compagno a Gesù quando preghemo?

⁵ El esémpio de Gesù ne giuta a capir che l’è importante torse el tempo par pregar, ancora che ghemo tante robe de far. Dele volte, ne tocarà levarse su pi bonora de matina o star desmissiadi fin tarde de note. Se femo cossita, mostremo che ghe demo tanto valor a questo bel presente de Geovà. Una sorela de nome Lynne ancora la se ricorda de come la ze restada contenta quando la ga imparà sora la orassion. Ela la ga dito: “Quando go savesto che posso pregar a Geovà sempre che mi vui, lo go visto come me caro amigo e go volesto far ancora meio le me orassion.” Sicuro che tanti de noantri se sentimo cossita. Adesso, ndaremo veder sinque robe che podemo parlar nele nostre orassion.

6. De acordo con Apocalisse 4:10, 11, cossa che Geovà el mèrita ricever?

⁶ Loda a Geovà. Nte una vision, el apòstolo Gioani el ga visto che 24 ansiani i era drio lodar e adorar a Geovà. Questi ansiani i disea che Dio el mèrita “ricever la glòria, el onor e el poder”.  (Ledi Apocalisse 4:10, 11. b) Anca i àngeli i loda a Geovà parché i cognosse tanto ben le so bele qualità e tuto quel che lu el fà. Par quela, i àngeli i vol pròpio lodar a Geovà. — Giò 38:4-7.

7. Come che podemo lodar a Geovà?

⁷ Anca noantri volemo lodar a Geovà quando preghemo a lu. Quando te studi la Bìblia, proa veder le bele qualità de Geovà e quale che te piase de pi. (Giò 37:23; Rom. 11:33) Alora, te pol parlarghe sora queste bele qualità e come lu sempre el tende tanto ben de ti e de tuti i fradei. — 1 Sam. 1:27; 2:1, 2.

8. Noantri podemo ringrassiar a Geovà par tante robe. Parla de arquanti esempi. (1 Tessalonissensi 5:18)

⁸ Ringràssia a Geovà. Geovà el ne ga dato tute le robe bone che ghemo. (Tia. 1:17) Alora, podemo pregar e ringrassiar a Geovà par causa de queste robe. (Ledi 1 Tessalonissensi 5:18. c) Par esémpio, lu el ne ga dato la Tera, tute le robe bele che ghen’è e la nostra vita. Geovà anca el ne ga dato una fameia, amighi, una bela speransa e la so amicìssia. Sicuro che volemo ringrassiarlo tanto.

9. Parché che ghemo de sforsarse par darghe valor a tuto quel che Geovà el ne fà?

⁹ Noantri ghemo de sforsarse par no assar de ringrassiar a Geovà nele nostre orassion. Parché? Parché vivemo nte un mondo ndove le persone le pensa sol in quel che le vol invesse de ringrassiar ai altri. Alora, se no stemo atenti, ndaremo sol domandarghe a Geovà una mùcia de robe invesse de ringrassiarlo par tuto quel che el fà. Par quela, noantri volemo seitar a pensarghe sora e a darghe valor a tuto quel che Geovà ne fà. — Luc. 6:45.

10. Come che ringrassiar a Geovà ga giutà una sorela a dàrghene fora cole so dificoltà? (Varda anca la ilustrassion.)

¹⁰ Se ringrassiemo a Geovà par le bele robe che lu el ne fà, sarà pi fàcile dàrghene fora cole nostre dificoltà. Varda el esémpio dela sorela Kyung-sook, che l’è nela Sentinela de 15 de genaro de 2015. Ela la ga savesto che la gavea un càncaro tanto bruto nei palmoni. Ela la ga dito: “Mi go sofrio tanto quando go savesto che gavea quela malatia. Son restada tanto spaurada e me parea de morir.” Cossa che ga giutà la sorela Kyung-sook a dàrghene fora con quela dificoltà? Prima de ndar dormir, ela la ghe pensea  sora sinque robe bone che la gavea bio in quel giorno. Alora, la ndea nela parte su de sora dela so casa e la preghea in voce alta par ringrassiarlo. Cossita, ela la restea manco ansiosa e la gavea ancora pi voia de mostrar el so amor a Geovà. E ela la ga capio che lu el tende tanto ben dei so servi e che ghemo pi benedission che problemi. Cossa che noantri imparemo? Compagno la sorela Kyung-sook, noantri ghemo tante bele robe par ringrassiar a Geovà, anca se semo drio tribolar. Se ghe pensemo sora tuto quel che ghemo de bon e ringrassiemo a Dio, saremo boni de dàrghene fora cole dificoltà e a seitar contenti.

11. Parché che i dissìpoli i gavaria de mostrar coraio dopo che Gesù el tornesse al cielo?

¹¹ Domandaghe che Geovà el te dae coraio par predicar. Prima che Gesù el ndesse al cielo, lu el ga dito che i so dissìpoli i gavaria de predicar “in Gerusalen, in tuta la Giudea e Samaria, e fin la parte pi distante dela tera”. (Ati 1:8; Luc. 24:46-48) Un tempo dopo, lìderi giudei i ga menà Piero e Gioani al Sinèdrio e i ga dito che i ghe ndaria contra se lori no i se fermesse de predicar. (Ati 4:18, 21) Ma cossa che Piero e Gioani i ga fato?

12. De acordo con Ati 4:29, 31, cossa che i dissìpoli i ga fato?

¹² Dopo de quel che i lìderi giudei i ga parlà, Piero e Gioani i ga dito: “Valtri podé dessider se Dio el cata giusto che noantri obedimo a valtri invesse de a Dio. Ma noantri no podemo mia fermarse de parlar dele cose che ghemo visto e che ghemo scoltà.” (Ati 4:19, 20) Quando Piero e Gioani i ze stati liberadi, i dissìpoli i ga pregà a Geovà e i ga dito: “Giuta i to schiavi a esser boni de seitar parlar dela to parola con tanto coraio.” E Geovà el ghe ga dato el coraio che lori i gavea de bisogno. — Ledi Ati 4:29, d 31. e

13. Cossa che podemo imparar del esémpio del fradel Jin-hyuk?

¹³ Se i governi i dise che ghemo de fermarse de predicar, noantri ghemo de far compagno a quei dissìpoli. Varda el esémpio del fradel Jin-hyuk. Lu l’è stà metesto in preson parché no’l ga volesto ndar al esèrsito. Lì, lu el gavea el laoro de portar de magnar e altre robe ai presoneri, ma no’l podea parlar sora pi gnente, gnanca sora la Bìblia. Alora, lu el ga domandà che Geovà el ghe desse coraio e aiuto par esser bon de parlar sora la Bìblia nela ora giusta. (Ati 5:29) Lu el ga dito: “Geovà el me ga dato el coraio che gavea de bisogno e son stato bon de scominsiar studi de sinque minuti. Alora, de note, mi scrivea carte par darghe ai presoneri nel giorno dopo.” Cossa che imparemo? Noantri podemo domandar che Geovà el ne dae coraio e sabedoria e a esser sicuri che lu el ndarà giutarne a seitar a predicar.

14. De acordo con Salmo 37:3, 5, cossa che ndarà giutarne a infrontar bruti colpi?

¹⁴ Domanda che Geovà el te giute a dàrghene fora coi problemi. Tanti de noantri sofrimo parché semo desanimadi, maladi o parché l’è morto qualchedun che amemo. Arquanti i sofre par causa de  un problema nela fameia, perseghission o altre robe. E l’è ancora pi fadiga portar avanti se vien fora una pandemia o una guera. Alora, cossa che pol giutarne a infrontar questi bruti colpi? Pregar a Geovà e parlarghe tuto quel che semo drio sentir. Ghemo de proar parlar con Geovà compagno ndarìssino parlar con un caro amigo e esser sicuri che lu el ndarà giutarne. — Ledi Salmo 37:3, f 5. g

15. Come che la orassion la pol giutarne a dàrghene fora con una dificoltà?

¹⁵ Se seitemo pregar a Geovà, saremo boni de dàrghene fora cole dificoltà. (Rom. 12:12) E podemo esser sicuri che lu el ndarà scoltarne. (Sal. 145:18, 19) Varda el esémpio dela sorela Kristie, che la ze una pioniera de 29 ani. Ela la ga savesto che la gavea bruti problemi de salute, e par quela, la ze restada tanto desanimada. Dopo de un tempo, la ga savesto che so mare la ndaria morir par causa de una bruta malatia. Kristie la ga dito: “Mi go pregà tanto a Geovà tuti i giorni par domandarghe la forsa che me ocorea. Me go sforsà de ndar a tute le riunion e imparar ancora de pi sora la Bìblia. Pregar a Geovà e esser sicura che lu l’era sempre dela me banda me ga dato la forsa par ndar avanti. Ancora go i me problemi de salute, ma Geovà el me ga dato pace e calma.” Alora, noantri sempre ghemo de ricordarse che ‘Geovà el salva quei che i lo adora’. — 2 Pie. 2:9.

16. Parché che ne ocore el aiuto de Geovà par dàrghene fora cola voia de far robe sbaliade?

¹⁶ Domanda che Geovà el te giute a dàrghene fora cola voia de far quel che l’è sbalià. Come semo imperfeti, ghemo de  seitar a sforsarse par no far robe sbaliade. E pol esser ancora pi fadiga far quel che l’è giusto parché Sàtana el proa intrigarne. Par esémpio, lu el vol che se divertimo con robe sbaliade. Se no scoliemo ben le nostre diversion, ndaremo scominsiar a pensar in robe che disgusta a Geovà e, dopo de un tempo, anca ndaremo farle. — Mar. 7:21-23; Tia. 1:14, 15.

17. Cossa che ghemo de far dopo de domandar aiuto a Geovà? (Varda anca la ilustrassion.)

¹⁷ Gesù el ga pregà: “E no ne assi cascar in tentassion, ma libèrane del Perverso.” (Mat. 6:13) L’è vera che Geovà sol assarà che infrontemo quel che saremo boni de dàrghene fora. (1 Cor. 10:12, 13) Ancora cossita, ghemo de domandarghe so aiuto e sforsarse par far quel che l’è giusto. Come? No ghemo mai de leder gnanca scoltar gnente che sìpia sbalià. (Sal. 97:10) Invesse, ghemo de studiar la Bìblia e pensarghe sora quel che imparemo, ndar sempre ala riunion e ala predicassion. Se femo cossita, podemo esser sicuri che Geovà el ndarà giutarne a dàrghene fora cola voia de far robe sbaliade.

18. Cossa che tuti noantri ghemo de far quando preghemo a Geovà?

¹⁸ Tuti noantri ghemo de pregar a Geovà par seitar fedeli a lu in questi ùltimi giorni. Geovà el vol che ghe parlemo tuto quel che sentimo e pensemo. (Sal. 62:8) Alora, ghemo de torse el tempo par pregar a lu tuti i giorni, lodarlo e ringrassiarlo par tute le robe bone che lu el ne fà. Anca ne ocore domandarghe coraio par predicar, e auito par dàrghene fora coi problemi e cola voia de far quel che l’è sbalià. E no podemo mai assar che gnente o nissuni ne intrighe de seitar a servir a Geovà. Magari, come che lu el risponde ale nostre orassion? Nel pròssimo stùdio, ndaremo veder la risposta a questa domanda.