1. Cossa che pol esser fadiga par noantri?

 POL ESSER che noantri ghemo belche proà adorar a Geovà ancora meio e ne ga fato pròpio fadiga. b Par esémpio, Philip el volea pregar pi volte e far ancora meio le so orassion, ma no l’era mia bon de catar fora tempo par pregar. Erika la volea rivar nela ora giusta par le riunion de predicassion. Ancora cossita, ela quasi sempre la rivea pi tardi. Tomáš el volea leder tuta la Bìblia, ma el ga dito che no’l ghe piasea mia lederla. Alora, el ga proà tre volte, ma quando el rivea in Levìtico, lu el se fermea.

2. Parché che no te ghè de pensar che mai te sarè bon de far meio la to adorassion a Geovà?

² Se te gavei in mente de far qualcossa meio nela to adorassion a Geovà e gnancora te sì stà bon de rivarghe, no stà pensar che no te sarè mai bon. Ricòrdate che anca par far una pìcola roba ghe vol tempo e sforso. Alora, se te seiti a sforsarte par adorar meio a Geovà, te mostri che te ghe dè valor ala to amicìssia con lu e che te vol darghe el to meio. Geovà el resta tanto contento col to sforso e lu no’l speta che te fae de pi de quel che te pol. Par quela, no stà proar far de pi de quel che te sì bon. (Sal. 103:14; Mic. 6:8) Adesso, ndemo veder arquante robe che pol giutarne a adorar a Geovà ancora meio.

3. Parché che l’è importante gaver voia?

³ Se te ghè in mente de far una roba ancora meio nela to adorassion a Geovà, l’è tanto importante che te gàpie voia parché, cossita, te ndarè sforsarte. Podemo dir che gaver voia se someia al vento che tira avanti una barca. Se el vento el sufia, la barca la rivarà nel posto giusto. Ma se el vento el seita sufiar forte, la barca la farà pi svelta rivarghe. Dela medèsima maniera, sarà pi fàcile far meio la to adorassion a Geovà se te ghè voia. Varda cossa che un fradel de nome David, che l’è de star in El Salvador, el ga dito: “Quando te ghè pròpio voia, te te sforsi tanto e no assi gnente disturbarte de far quel che te gavei in mente.” Alora, cossa che podemo far par gaver pi voia?

4. De acordo con Filipensi 2:13, cossa ghemo de domandar a Geovà? (Varda anca la ilustrassion.)

⁴ Prega par gaver voia. Geovà el pol doperar el so spìrito par darte la voia de far quel che te ghè in mente. (Ledi Filipensi 2:13. c) E questo l’è importante parché, dele volte, proemo far qualcossa meio nela adorassion a Geovà sol parché savemo che sarà bon, e nò parché volemo. L’è stà quel che ga sucedesto con una sorela de nome Norina, che la ze de star in Uganda. Ela la gavea in mente de scominsiar un stùdio dela Bìblia. Magari, no la gavea mia tanta voia parché la pensea che no la era mia bona de insegnar. Cossa che la ga giutada? Norina la ga dito: “Mi go scominsià a pregar tuti i di che Geovà el me desse la voia de gaver un stùdio dela Bìblia. Me go anca sforsà par esser pi brava de insegnar. Dopo de un per de mesi, go bio voia de scominsiar un stùdio dela Bìblia. In quel medèsimo ano, son stata bona de scominsiar due studi.”

5. Cossa ghemo de far par gaver pi voia de adorar meio a Geovà?

⁵ Pensaghe sora quel che Geovà el ga fato par ti. (Sal. 143:5) Se te seiti a pensarghe sora come Geovà el te ga giutà, te gavarè pi voia de far meio la to adorassion a lu. (Sal. 116:12) L’è stà pròpio quel che el apòstolo Paolo el ga fato. Lu el savea che no’l meritea mia la bontà che Dio sempre ghe mostrea. Alora, el ga pensà sora questa bontà. Cossita, Paolo el ga bio ancora pi voia de laorar tanto par Geovà. (1 Cor. 15:9, 10; 1 Tim. 1:12-14) Varda cossa che ga giutà una sorela che la ze de star in Honduras a deventar una pioniera regolar. Ela la ga dito: “Mi go pensà sora come l’è grando el amor che Geovà el ga par mi. Par esémpio, lu el me ga giutà a catar i so servi, el tende de mi e el me protege. Dopo che go pensà sora queste robe, el me amor par Geovà l’è restà pi forte e go bio pi voia de adorarlo ancora meio.

6. Che nantra roba te pol far par gaver ancora pi voia de far meio la to adorassion a Geovà?

 ⁶ Pensa nele benedission che te gavarè. Varda cossa che ga giutà Erika, che ghemo belche parlà, a rivar pi bonora nele riunion par la predicassion. Ela la ga dito: “Mi me son nicorta che, quando rivea pi tardi, mi perdea tanto. Magari, se rivesse pi bonora, saria bona de scoltar le idee par parlar sora la Bìblia che me giutaria a predicar ancora meio e a gaver pi alegria. Mi podaria anca saludar i fradei e ciacolar insieme.” Alora, Erika la ga pensà parché che saria bon rivar pi bonora, e par quela, la ze stata bona farlo. Anca ti te pol far cossita. Come? Metemo dir che te ghè pensà de leder de pi la Bìblia o de far meio le to orassion. Alora, gàpia in mente che, se te fè cossita, la to amicìssia con Geovà la restarà ancora pi forte. (Sal. 145:18, 19) O se te vol gaver una bela qualità che gnancora te ghè, pensa come la te giutarà a esser ancora pi amigo dei altri. (Col. 3:14) Proa anca meter par scrito le benedission che te gavarè, e dopo, ricòrdate de vardar quel che te ghè scrito. El fradel Tomáš, che ghemo parlà vanti, el ga dito: “Se te ghè in mente parché che te vol far meio una roba nela to adorassion a Geovà, te sarè bon de sforsarte ancora de pi.”

7. Cossa ga giutà Julio e so dona a far de pi par Geovà?

⁷ Stà insieme de persone che le ndarà incoraiarte a far de pi par Geovà. (Pro. 13:20) Varda cossa ga giutà Julio e so dona a ndar predicar ndove ghen’era de bisogno. Lu el ga dito: “Noantri ghemo scoliesto amighi che i ne giutea a voler far de pi par Geovà e ghemo discoresto con lori. Arquanti de questi amighi i era belche ndati giutar in altri posti, e i ne ga dato diverse idee. Dele volte, lori i ne domandea come èrino e ne incoraiea a no desistir.”

8. Cossa che ndarà suceder se se sforsemo par far de pi nela nostra adorassion a Geovà sol quando ghemo voia? (Varda anca la ilustrassion.)

⁸ L’è vera che, dele volte, no ghemo mia voia de far quel che ghemo pensà nela nostra adorassion a Geovà. Ma questo no vol mia dir che ghemo de desistir. Par giutarte a capir meio, pensa in questa ilustrassion: El vento che el porta avanti una barca el pol esser pròpio forte in arquanti giorni. Magari, dele volte, no ghen’è mia vento. Ancora cossita, questo no vol mia dir che la barca la ga de restar ferma nela àqua. Invesse, la persona che la ze rento la barca la pol doperar i remi o el motor par seitar ndar avanti. Dela stessa maniera, la nostra voia la ze come quel vento, e ghen sarà giorni che no gavaremo mia voia de far de pi par Geovà. Ma no ghemo de sforsarse sol quando ghemo voia, parché cossita, no saremo mai boni de rivarghe. Pitosto, compagno a quela persona rento la barca,  ghemo de seitar a sforsarse par ndar avanti. Cossita, restaremo pròpio contenti parché saremo boni de far quel che gavemo pensà. Sarà che l’è giusto far qualcossa se no ghemo voia de farla? Ndemo veder la risposta.

9. Elo sbalià far qualcossa par Geovà anca se no ghemo mia voia? Spiega.

⁹ Geovà el vol che noantri lo servimo con alegria e de volentiera. (Sal. 100:2; 2 Cor. 9:7) Ma, sarà che questo vol dir che ghemo de proar far de pi nela nostra adorassion a Dio sol quando ghemo voia? Sicuro che nò! Varda cossa che el apòstolo Paolo el ga dito: “Mi ghe dao bote nel me corpo e lo go come un schiavo.” (1 Cor. 9:25-27; varda la nota de stùdio nel versìcolo 27) Alora, Paolo el se ga sforsà de far quel che l’era giusto anca se no’l gavesse mia voia. Geovà l’è restà pròpio contento con Paolo e el ga benedio so sforso. — 2 Tim. 4:7, 8.

10. Parché che l’è bon sforsarse par far meio una roba nel laoro de Geovà, anca se no ghemo mia voia?

¹⁰ L’è pròpio bon che se sforsemo par far meio una roba nela nostra adorassion a Geovà, ancora che no ghemo mia tanta voia. Parché? Parché Geovà el resta pròpio contento de veder el nostro sforso. Lu el sa che, anca se no ne piase far quel laoro, semo drio sforsarse parché lo amemo. Alora, lu el ndarà benedirne compagno el ga fato con Paolo. (Sal. 126:5) E quando vedemo le benedission de Geovà, scominsiaremo a gaver ancora pi voia de far meio el nostro laoro a lu. Una sorela de nome Lucyna, dela Polònia, la ga dito: “Dele volte, mi no go mia voia de ndar nela predicassion, manco ancora se son stufa. Ma se mi vao, resto tanto contenta.” Adesso, ndemo veder cossa che podemo far se no ghemo mia voia de far de pi nel laoro de Geovà.

11. Come che Geovà el pol giutarne a controlar quel che sentimo e quel che femo?

¹¹ Prega che Geovà el te giute a controlar quel che te senti e quel che te fè. Cossita, te sarè bon de no far quel che l’è sbalià e anca de far quel che l’è giusto, stesso che sìpia fadiga o che no te gàpie mia voia. Par quela che ghemo de domandar spìrito santo. Una qualità del spìrito santo de Geovà la ze el autocontrolo. Alora, se te lo domandi, Geovà el podarà giutarte. (Luc. 11:13; Gàl. 5:22, 23) David el ga spiegà come che la orassion lo ga giutà. Lu el volea studiar de pi la Bìblia e le publicassion. Lu el ga dito: “Mi ghe domandea a Geovà che el me giutesse a controlar quel che mi fea. Col so aiuto, son stà bon de scominsiar a studiar la Bìblia e de seitar a farlo.”

12. Cossa che podemo imparar de Eclesiasti 11:4?

¹² No stà spetar fin che tute le robe le sìpia polito. In questo mondo, sempre ndaremo tribolar par causa de una roba o nantra. Alora, se seitemo spetar fin che sìpia tuto polito, pol esser che mai saremo boni de far gnente. (Ledi Eclesiasti 11:4. d) Varda quel che un fradel de nome Dayniel el ga dito: “Mai ghen sarà una ora nela nostra vita in che sarà tuto polito.” Un fradel de nome Paul, che l’è de star in Uganda, el ga spiegà parché che no ghemo de seitar a spetar fin che sìpia tuto polito. Lu el ga dito: “Ancora che l’è fadiga, se noantri se sforsemo de scominsiar a far meio una roba nel laoro a Geovà, lu el ndarà giutarne.” — Mal. 3:10.

13. Parché che pol esser bon proar far un pochetin ala volta quel che te ghè in mente?

¹³ Proa far un pochetin ala volta quel che  te gavei in mente. Se ghe vol massa tempo e sforso par far quel che volemo, pol esser che restemo desanimadi e no saremo mia boni de rivarghe. Alora, proa pensar anca nele pìcole robe che te giutarà a far meio to laoro par Geovà. Par esémpio, se te vol gaver nantra bela qualità, proa scominsiar a mostrarla un pochetin ala volta. O se te vol leder tuta la Bìblia, scomìnsia a lederla pochi minuti al giorno. Tomáš, che ghemo parlà nel scomìnsio del stùdio, no l’era mia bon de leder tuta la Bìblia nte un ano. Lu el ga dito: “Son nicorto che quel che volea far l’era massa par mi. Alora, go scominsià nantra volta e go proà leder pochi versìcoli. Dopo, mi pensea sora quel che gavea ledesto. Cossita, me ga scominsià piaserme lederla.” Quando Tomáš el ga scominsià a esser contento de leder la Bìblia, lu l’è stà bon de lederla pi tempo al giorno. Par quela, l’è stà bon de leder tuta la Bìblia. e

14. Che dificoltà che pol vegner fora?

¹⁴ Ancora che volemo far meio la nostra adorassion a Geovà e se sforsemo del bon, pol esser che vegna fora qualche dificoltà. Par esémpio, pol esser che restemo sensa tempo par causa de ‘qualcossa che no spetemo mia’. (Ecl. 9:11) O pol esser che vegna fora un problema che ne assa sensa forsa e desanimadi. (Pro. 24:10) E come semo imperfeti, fursi semo strachi o femo un sbàlio che ne intriga. (Mat. 26:43; Rom. 7:23) Alora, cossa che pol giutarne a dàrghene fora e no desanimar?

15. Parché che no ghemo de desistir quando vien fora una dificoltà? Spiega. (Salmo 145:14)

¹⁵ No stà fermarte de far el to meio par causa dele dificoltà. La Bìblia la dise che gavaremo problemi e dificoltà. Ma ancora cossita, saremo boni de ndar avanti parché Geovà el ne giuta. (Ledi Salmo 145:14. f)  Philip, che ghemo parlà prima, el ga dito: “Invesse de star atento ai me sbali, proo pensar in come son stà bon de dàrghene fora e ndar avanti.” David, che ghemo parlà prima, el ga dito: “Se vien fora una dificoltà, me sforso de no assar che la me intrighe. Pitosto, penso che, se son bon de dàrghene fora, ndarò mostrar che amo tanto a Geovà.” Quando te seiti a proar far meio la to adorassion a Geovà anca se vien fora qualche dificoltà, te mostri che te vol contentarlo. E lu el resta pròpio contento de veder to sforso.

16. Cossa che podemo imparar cole dificoltà che vien fora?

¹⁶ Impara cole dificoltà. Proa pensar parché quela dificoltà la ze vegnesta fora e se ghen’è ancora qualcossa che te pol cambiar. (Pro. 27:12) Magari, dele volte, quel che sucede te giutarà a veder che te vol far de pi de quel che te sì bon. Se questo ga sucedesto, pensa de pi sora quel che ti te sì bon de far. g E ricòrdate che Geovà mai el restarà disgustà se no te sì bon de far quel che te volei. — 2 Cor. 8:12.

17. Parché che l’è bon pensarghe sora quel che te sì belche stà bon de far?

¹⁷ Pensaghe sora quel che te sì belche stà bon de far. La Bìblia la dise che ‘Dio no l’è mia ingiusto par desmentegarse del to laoro’. (Ebr. 6:10) Se Geovà el se ricorda de tuto quel che te ghè fato de bon, anca ti te ghè de ricordarte. Par esémpio, se te sì stà bon de far pi forte la to amicìssia con Geovà, de parlar ai altri sora quel che te ghè imparà e de esser batesà, pensaghe sora queste robe. Cossita come te ghè belche fato tanto, te pol esser sicuro che te sarè bon de far ancora de pi. — Fil. 3:16.

18. Cossa che te ghè de ricordarte intanto che te sì drio sforsarte? (Varda anca la ilustrassion.)

¹⁸ Sìpia sicuro che te sarè bon de adorar a Geovà cada volta meio parché lu el ndarà giutarte! Alora, ti te restarè contento compagno una persona che la ze drio viaiar e che la riva ndove la volea. Ma ricòrdate che la persona la resta contenta anca de vardar le bele robe intanto che la ze drio viaiar. Dela medèsima maniera, sìpia contento de veder le benedission de Geovà intanto che te sì drio sforsarte. (2 Cor. 4:7) Cossita, invesse de desistir, te gavarè cada volta pi benedission. — Gàl. 6:9.