1. Cossa che la Bìblia la parla sora el amor intrà un omo e una dona?   

 LA BÌBLIA la dise sora el amor: ‘Le so fiame le ze come le fiame del fogo, come la fiama de Geovà. Le àque cative no le pol finir col amor, gnanca i rii i pol portarlo via.’ b (Cànt. 8:6, 7) Queste parole le ze pròpio bele e le ne insegna una roba tanto importante. Cossa? Quei che i ze maridadi i pol gaver un forte amor un al altro par sempre.

2. Cossa che un omo e una dona i ga de far par seitar a gaver un forte amor intrà de lori?

² El fogo el seita a brusar quando metemo legna. Magari, se se fermemo de farlo, el fogo el more. La medèsima roba la sucede col amor nel matrimònio. El omo e la dona i ga de sforsarse par far cada volta pi forte el so amor. Ma pol esser che el amor el reste pi fiaco se lori i infronta problemi de salute, se ghe manca i soldi, o se i ga preocupassion de come slevar su i fioi. Alora, come che i maridadi i pol seitar a gaver un forte amor nel so matrimònio? In questo stùdio, ndaremo imparar sora tre robe che podemo far par gaver un bel matrimònio. c

3. Parché che una forte amicìssia con Geovà ne giuta a gaver un forte amor nel matrimònio? (Eclesiasti 4:12) (Varda anca la ilustrassion.)

³ Un omo e una dona sol i sarà boni de seitar a gaver un forte amor intrà de lori se i ze amighi de Geovà. Parché che podemo dirlo? Parché se i ze amighi de Geovà, i volerà ndarghe drio i so consili. Cossita, lori i sarà boni de dàrghene fora coi problemi che i podaria intrigar el so matrimònio. (Ledi Eclesiasti 4:12. d) El omo e la dona che i ze amighi de Geovà anca i volerà far compagno a lu, i sarà boni de perdonar e de mostrar qualità come bontà e passiensa. (Efe. 4:32–5:1) Alora, el amor intrà de lori el restarà cada volta pi forte. Una sorela de nome Lena, che la ze maridada fà de pi de 25 ani, la ga dito: “L’è tanto fàcile amar e rispetar una persona che la ze amiga de Geovà.”

4. Parché che Geovà el ga scoliesto Giusepe e Maria par esser so pare e so mare de Gesù?

⁴ Varda quel che podemo imparar del esémpio de Giusepe e Maria. Quando Geovà el gavea de scòlier chi che saria so pare e so mare de Gesù, ghen’era tante persone. Ma lu el ga scoliesto Giusepe e Maria. Parché? Parché lori due i gavea una forte amicìssia con Geovà e parché servirlo saria sempre la roba pi importante nela so vita. Adesso, ndemo veder cossa ancora podemo imparar del esémpio de Giusepe e Maria.

5. Cossa che i òmini che i ze maridadi i pol imparar del esémpio de Giusepe?

⁵ Giusepe l’era sempre pronto par obedir a Geovà. Par esémpio, nele tre volte che Geovà ghe ga dito come tender dela so fameia, lu el ga suito obedio, anca se l’era fadiga. (Mat. 1:20, 24; 2:13-15, 19-21) Cossita, lu el ga tendesto tanto ben de Maria e el ghe ga dato tuto quel che ghe ocorea. Par quela, semo sicuri che Maria la amea e la rispetea tanto el so omo. Cossa che i òmini che i ze maridadi i pol imparar? Lori i ga de ndar in serca dei consili dela Bìblia par tender ben dela so fameia. e Quando i se sforsa de catar fora consili nela Bìblia e li mete in pràtica, lori i mostra che i ama la so dona, e el so matrimònio el resta ancora pi forte. Una sorela de Vanuatu, che la ze maridada fà de pi de 20 ani, la ga dito: “Quando el me omo el proa ndar in serca dei consili dela Bìblia e li mete in pràtica, mi go ancora pi voia de rispetarlo. Cossita, me sento pi tranquila e son bona de fidarme in tute le so dessision.”

6. Cossa che le done che le ze maridade le pol imparar col esémpio de Maria?

 ⁶ Maria la gavea una forte fede, la cognossea tanto ben le Scriture e sempre la se tolea tempo par pensarghe sora. (Varda la nota in Luca 1:46; Luc. 2:19, 51) Anca dopo maridada, ela la ga seità a sforsarse par gaver una forte amicìssia con Geovà. Semo sicuri che questa amicìssia la ga giutada a esser una brava dona. Cossa che le done che le ze maridade le pol imparar col esémpio de Maria? Lore le ga de far pi forte la so amicìssia con Geovà. Cossita, so omo el volerà lodarle e amarle cada volta de pi. (Pro. 31:30) Varda quel che ga sucedesto con una sorela de nome Emiko. Ela la ga dito: “Prima de maridarme, mi studiea la Bìblia e le publicassion mi sola. Ma dopo che son maridada, me omo el ga scominsià a pregar par noantri e a far la adorassion in fameia. Alora, son nicorta che sol ndea drio a me omo e no fea pi gnente par far pi forte la me amicìssia con Geovà. Cossita, go visto che me tochea far qualcossa. Adesso, me sforso de torme el tempo par pregar a Geovà, leder la Bìblia e pensarghe sora quel che ledo.” — Gàl. 6:5.

7. Cossa che un omo e una dona i pol imparar del esémpio de Giusepe e Maria?

⁷ Giusepe e Maria i savea che l’era tanto importante adorar a Geovà come fameia. (Luc. 2:22-24, 41; 4:16) Par quela, lori i se ga sforsà insieme par far pi forte la so amicìssia con Geovà. Magari, no l’era mia fàcile adorar a Geovà insieme dopo che i ze vegnesti i fioi. Se valtri gavé fioi compagno a Giusepe e Maria i gavea, fursi l’è fadiga ndar a tute le riunion e torve el tempo par far el stùdio in fameia. E pol esser ancora pi fadiga par valtri due torve el tempo par studiar la Bìblia e pregar insieme. Alora, cossa che podé imparar del bel esémpio de Giusepe e Maria? Ricordeve che quando adoré a Geovà insieme, valtri resté pi unidi e pi amighi de Geovà. Cossita, no sté desmentegarve che la vostra adorassion a Geovà la ga de esser la roba pi importante dela vostra vita.

8. Cossa quei che i ze drio infrontar problemi nel matrimònio i pol far?

⁸ Fursi valtri no gavé mia voia de far el stùdio in fameia parché sì drio infrontar problemi nel vostro matrimònio. Alora cossa che pol giutarve? Proé studiar qualcossa pìcola e che valtri due ve piaserà. Cossita, pin pianeto, ndaré far pi forte el amor intrà de valtri e voleré adorar a Geovà insieme.

9. Parché quei che i ze maridadi i ga de passar tempo insieme?

⁹ Quei che i ze maridadi anca i ga de passar tempo insieme. Cossita, i sarà boni de capir quel che i pensa e i sente e anca de seitar a gaver un forte amor intrà de lori. (Gén. 2:24) Varda quel che Lilia e Ruslan i ga capio 15 ani indrio quando i era pena maridadi. Lilia la ga dito: “Noantri semo nicorti che no gavarìssino el tempo che volarìssino par star insieme. Gaveino poco tempo par causa del laoro, dei afari casa, e dopo, dei fioi. Alora, ghemo capio che ne tochea passar pi tempo insieme, senò, ndarìssino tirarse distante un del altro.”

10. Come quei che i ze maridadi i pol meter in pràtica quel che dise Efesi 5:15, 16?

¹⁰ Alora, se valtri sì maridadi, gavé de torve el tempo par star insieme. (Ledi Efesi 5:15, 16. f) Un fradel de nome Uzondu,  che l’è de star nela Nigèria, el ga dito: “Quando penso nele robe che me toca far, sempre asso tempo par star insieme cola me dona. Mi sò che quel tempo lì l’è tanto importante.” (Fil. 1:10) Varda anca el esémpio de Anastasia, che la ze maridada con un superintendente de sircuito nela Moldàvia. Ela la ga dito: “Me sforso de far i me mestieri intanto che el me omo l’è drio far i so laori. Cossita, semo boni de passar tempo un colaltro pi tardi.” Ma cossa che pol giutarve a catar fora tempo par star insieme?

11. Cossa che Àquila e Prissila i fea insieme?

¹¹ Valtri podé imparar tanto col esémpio de Àquila e Prissila, che l’era un bravo casal de dissìpoli de Gesù. (Rom. 16:3, 4) Anca se la Bìblia no la conta sora come l’era so matrimònio, ela la mostra che lori i laorea, i predichea e i giutea i altri insieme. (Ati 18:2, 3, 24-26) Gheto belche visto che, sempre che la Bìblia la parla sora un de lori, la parla anca de quelaltro insieme?

12. Come quei che i ze maridadi i pol passar tempo un colaltro? (Varda anca la ilustrassion.)

¹² Come quei che i ze maridadi i pol far compagno a Àquila e Prissila? Pensé in tute le robe che gavé de far e proé farle insieme, invesse de ndar cada un par una banda. Par esémpio, compagno a Àquila e Prissila, sforseve de ndar predicar insieme. E anca se no gavé el medèsimo laoro, proé far insieme i laoreti casa. (Ecl. 4:9) Cossita, valtri restaré cada volta pi unidi e gavaré pi tempo par ciacolar. Varda quel che Robert, che l’è maridà con Linda fà de pi de 50 ani, el ga dito: “L’è vera che no ghemo mia tanto tempo par ndar a spasso divertirse. Ma resto tanto contento quando mi e Linda lavemo i piati insieme o quando la vien giutarme a laorar nel giardin. Queste robe le ne giuta a volerse cada volta pi ben.”

13. Cossa che i maridadi i ga de far par esser unidi?

¹³ Ma ricordeve che gavé de far de pi che sol passar tempo insieme par esser unidi. Una sorela del Brasil la ga dito: “Ancoi, ghen’è sempre tante robe de far. Alora, l’è tanto fàcile pensar che mi e me omo passemo tempo insieme sol parché semo nela medèsima casa. Magari, mi son nicorta che gavea anca de ciacolar con lu e mostrarghe che mi ghe vui tanto ben.” Varda cossa che Bruno e so dona, Tays, i fà. Lu el ga dito: “Quando semo drio passar tempo insieme, ghemo dessidio de assar de banda i nostri telèfoni e doperar ben el tempo un colaltro.”

14. Cossa che podé far se no ve piase passar tempo insieme?

¹⁴ Ma pol esser che no ve piase far le medèsime robe o che qualcossa che un el fà assa quelaltro disgustà. Se l’è cossita,  fursi no ve piase passar tempo insieme. Alora, cossa che podé far? Ricordeve che el fogo el scomìnsia a brusar pin pian. Par quela, prima te toca meter i tochi pi pìcoli de legna e sol dopo meter i tochi pi grossi. Proa far compagno nel to matrimònio. Scominsié a passar un poco de tempo insieme tuti i giorni, fé robe che ve piase tuti due e che no ndarà assarve stufi un del altro. (Tia. 3:18) Se ve sforsé de far queste pìcole robe, el vostro amor el restarà forte nantra volta.

15. Parché che l’è tanto importante mostrarse rispeto nel matrimònio?

¹⁵ L’è tanto importante che el omo e la dona i mostre rispeto un al altro. L’è compagno a quel che sucede col fogo. Se no ghen’è ossigénio, el fogo suito el se smorsa. Dela medèsima maniera, se no ghen’è rispeto nel matrimònio, el amor el pol finirse. Invesse, quando el omo e la dona i mostra rispeto un al altro, el amor intrà de lori el resta pi grando. Varda el esémpio de Penny e Aret, che i ze maridadi fà de pi de 25 ani. Ela la ga dito: “Ne piase restar insieme parché semo boni tratarse con rispeto. Mi posso sempre parlar quel che penso parché son sicura che el me omo el ndarà scoltarme, e lu el se sente dela stessa maniera.” Par quela, ti te ghè de mostrarghe rispeto a to omo o to dona, ma anca l’è importante che lu o ela se sinta cossita. Alora, cossa che te pol far? Ndemo veder quel che imparemo con Abraon e Sara.

16. Cossa che i òmini che i ze maridadi i pol imparar de Abraon? (1 Pie. 3:7) (Varda anca la ilustrassion.)

¹⁶ Abraon el mostrea rispeto a Sara parché sempre la scoltea e el proea capir quel che la sentia. Par esémpio, una volta, Sara la ga contà che la era tanto disgustada par causa de un problema. Ela ghe ga fin dato la colpa a Abraon. Sarà che Abraon ghe ga dito su? Nò! Invesse, lu la ga scoltada e el ga proà giutarla parché el savea che la era una brava dona. (Gén. 16:5, 6) Cossa che i òmini maridadi i pol imparar? Valtri gavé la autorità de far le dessision par la vostra fameia. (1 Cor. 11:3) Ma podé mostrar amor ala vostra dona quando la scolté prima de farle, ancora de pi se la ze una roba importante par ela. (1 Cor. 13:4, 5) E quando la vostra dona la ze disgustada o la vol contarve qualcossa, sforseve de scoltarla intanto che la parla dei so sentimenti. (Ledi 1 Piero 3:7. g) Varda el esémpio de Angela e Dmitry, che i ze maridadi fà quasi 30 ani. Ela la ga dito: “Dmitry sempre el  me scolta quando vui contarghe qualcossa o quando son disgustada. Lu el porta passiensa anca quando son inrabiada.”

17. Cossa che le done le pol imparar de Sara? (1 Piero 3:5, 6)

¹⁷ Quando Abraon el fea una dessision, Sara sempre ghe mostrea rispeto. (Gén. 12:5) Par esémpio, una volta, arquanti òmini i ze capitadi nela casa de Abraon, e lu li ga convidadi par magnar lì. Abraon el ga domandà che Sara la fesse una mùcia de pan par darghe. (Gén. 18:6) Alora, ela la se ga fermà de far i so laori, e suito la ze ndata far quel che so omo ghe gavea domandà. Cossa che le done le pol imparar? Se valtri rispeté el vostro omo e lo giuté quando el fà una dessision, el vostro matrimònio el sarà ancora pi forte. (Ledi 1 Piero 3:5, 6. h) Dmitry, che ghemo pena parlà, el sente che so dona lo rispeta. Lu el ga dito: “Mi resto tanto contento quando vedo che la Angela la me giuta, anca quando fao dessision che no ghe piase mia tanto. E quando quel che go dessidio no va mia ben, ela mai la me dise su.” Sicuro che l’è tanto fàcile amar a qualchedun che ne rispeta!

18. Cossa che sucede quando un omo e una dona i se sforsa de far pi forte el so amor?

¹⁸ Sàtana l’è drio far tuto quel che el pol par finir col amor che ghen’è intrà i maridadi. Lu el sà che se un omo e una dona che i ze maridadi i se ferma de amar un al altro, fursi i se fermarà de amar anca a Geovà. Ma ghemo de ricordarse che el vero amor no’l se finisse mai. Alora, valtri che sì maridadi gavé de sforsarve par gaver un amor compagno a quel che Salomon el ga parlà. Cossa ne ocore far par gaver un amor cossita? La adorassion a Geovà la ga de esser la roba pi importante nela vostra vita. Gavé de passar tempo insieme e rispetar quel che valtri senti e pensé. Cossita, valtri ndaré darghe onor a Geovà e ndaré amar un al altro par sempre.