1. Cossa che un pare e una mare i vol giutar so fioi a far?

 SE TE SÌ pare o mare, l’è sicuro che ti te vol giutar to fioi a cognosser e amar a Geovà. Ma come no podemo mia veder a Dio, cossa che te pol far par giutar to fioi a capir che i pol esser amighi de Geovà? — Tia. 4:8.

2. Cossa che un pare e una mare i pol doperar par insegnarghe so fioi sora Geovà?

² Un pare e una mare i ga de doperar la Bìblia par giutar so fioi a cognosser a Geovà. (2 Tim. 3:14-17) Ma la Bìblia la mostra che lori i pol doperar anca la creassion par giutar so fioi a imparar sora Geovà. El libro de Proverbi el parla de un pare che el ga incoraià so fiol a mai desmentegarse de quel che la creassion la insegna sora Geovà. (Pro. 3:19-21) In questo stùdio, ndaremo imparar come che i genitori i pol doperar quel che Geovà el ga creà par giutar i so fioi a cognosserlo.

3. Cossa che el pare e la mare i ga de giutar so fioi a far?

³ La Bìblia la dise che ‘le qualità de Dio che le persone no le vede le ze mostrade de maniera ciara in quel che el ga fato, dela creassion del mondo avanti.’ (Rom. 1:20) El pare e la mare i ga caro de passar tempo insieme dei fioi in meso la naturesa. Alora, doperé ben questo tempo e giuté vostri fioi a imparar dele bele qualità de Geovà par meso de quel che lu el ga creà. Par giutarve, ndemo veder come che Gesù el ga insegnà i so dissìpoli.

4. Come che Gesù el ga doperà quel che Geovà el ga creà par insegnarghe so dissìpoli? (Luca 12:24, 27-30)

 ⁴ Varda come che Gesù el ga doperà quel che Geovà el ga creà par insegnarghe so dissìpoli. Una volta, lu el ghe ga dito che i vardesse i osei nel cielo e i fiori del campo. (Ledi Luca 12:24, b 27- 30. c) Gesù el ga parlà de quel che lori i cognossea tanto ben. Fursi, intanto che lu el parlea, lori i zera boni vederle. Cossita, Gesù el ghe ga insegnà che Geovà el trata i so servi con tanta bontà e generosità, e che lu el ndarà darghe de magnar e robe de vestir compagno el fà coi osei e coi fiori del campo.

5. Che robe dela creassion el pare e la mare i pol doperar par insegnar so fioi sora Geovà?

⁵ Valtri podé far compagno Gesù quando insegné vostri fioi sora Geovà. Podé parlar de qualcossa nela creassion che ve piase de pi, come una bestioleta o una pianta, e dopo spiegarghe cossa la ne insegna sora Geovà. Te pol anca domandar a to fiol che bèstia o pianta ghe piase de pi. Cossita, te podarè parlar de qualcossa che ghe piase a lu. Sicuro che to fiol restarà ancora pi premoso de scoltarte parlar dele qualità de Geovà.

6. Cossa che imparemo dela mare de Christopher?

⁶ Ma sarà che te toca studiar tanto sora una bèstia o una pianta par insegnarghe to fioi sora Geovà? Nò. Gesù no’l ga mia spiegà tante robe sora i osei e i fiori del campo ai so dissìpoli. L’è vera che dele volte, to fiol el volarà imparar de pi sora una roba dela naturesa. Ma quando te vè insegnarghe, te pol doperar poche parole o farghe una domanda. Varda quel che un fradel de nome Christopher el ga dito: “Me mare la parlea robe fàcile de capir par insegnarne sora Geovà e quel che el ga creà. Par esémpio, quando èrino drio caminar darente una montagna ela la disea: ‘Varda come che queste montagne le ze grande e bele! Geovà l’è stà pròpio bravo de farle, mia vera?’ E quando èrino darente el mar ela la disea: ‘Proé vardé che forsa che le onde le ga! Geovà el ga tanto poder, mia vera?’ Queste robe che la nostra mare la ne disea ne ga giutà imparar tanto sora Geovà.”

7. Come che te pol insegnar to fiol a pensarghe sora la creassion?

⁷ Intanto che to fiol el vien pi grando, te ghè de giutarlo a vardar la creassion e proar capir lu stesso cossa che la ghe insegna sora Geovà. Ma come che te pol giutarlo? Te pol parlar de una dele creassion de Dio e domandarghe: “Cossa che questa roba qua la te insegna sora Geovà?” Fursi, te restarè maraveià cola so risposta. — Mat. 21:16.

8. Cossa che i genitori in Israel i podea far intanto che i era drio viaiar cola so fameia?

⁸ Intanto che i era drio caminar par strada, i pare e le mare de Israel i ghe ocorea insegnar ai fioi i comandamenti de Geovà. (Deu. 11:19) Quando i era drio far un viaio cola so fameia, i israeliti i podea  insegnarghe tanto sora la creassion a so fioi, parché in quel posto ghen’era tante bèstie, oseleti e fiori par strada. Anca ancoi tuti quei che i ga fioi i pol far la medèsima roba par insegnarghe. Vedemo come che arquante pare e mare i ze drio farlo.

9. Cossa che te ghè imparà con Punitha e Katya?

⁹ Una mama de nome Punitha, che la ze de star nte una granda cità nela Ìndia, la ga dito: “Quando ndemo visitar la fameia in colònia, mi e me omo insegnemo nostri fioi sora la bela creassion de Geovà. Cossita, vedemo che i ghe dà pi valor ala creassion de che quando semo in meso la cità, piena de gente e de bacan.” Se te sì pare o mare, te pol esser sicuro che to fioi no i se desmentegarà mai del tempo che te ghè passà insieme de lori nte un bel posto. Una sorela de nome Katya, che la ze dela Moldàvia, la ga dito: “Una dele robe pi bele che me ricordo de quando ero picinina, l’è passar tempo con me pare e me mare in colònia. Son pròpio contenta che lori i me ga insegnà a vardar la creassion de Geovà par imparar de pi sora lu.”

10. Cossa che un pare o una mare i pol far se l’è fadiga ndar in colònia par veder la naturesa? (Varda anca el quadro “ Aiuto par el pare e la mare”.)

¹⁰ Ma cossa far se l’è fadiga ndar in colònia veder la naturesa? Varda quel che un fradel e una sorela i ga contà. Amol, un fradel dela Ìndia, el ga dito: “Ndove son de star, tanti pare e mare ghe toca laora tante ore e l’è massa caro far un viaio par ndar in colònia. Ma qua intorno se pol catar un parche o nantra costrussion ndove se pol veder la creassion de Geovà e parlar sora le so qualità.” Karina, una sorela dela Alemagna, la ga dito: “Me mama ghe piase tanto de fiori, e quando ero gióvena, ela la me mostrea  tanti fiori intanto che èrino drio caminar.” Alora, se te sì atento, te catarè robe come oseleti, bisseti e piante anca ndove te sì de star, e te podarè mostrarle ai to fioi. (Sal. 104:24.) Nantra roba che pol giutarte ze i vìdei e le publicassion che la organisassion la fà par insegnar i toseti. Alora, no vol mia dir el posto ndove te sì de star o la to situassion, te pol giutar to fioi a imparar de tuto quel che Geovà el ga fato. Adesso, ndemo veder arquante qualità de Geovà che te pol insegnar ai to fioi.

11. Come che el pare e la mare i pol giutar i fioi a veder el amor de Geovà?

¹¹ Te pol giutar i to fioi a capir el amor de Geovà quando te mostri come le bèstie le tende dele so crie. (Mat. 23:37) Podé anca mostrarghe quante robe bele e difarente ghen’è nela naturesa. Karina, la sorela che ghemo parlà vanti, la ga dito: “Quando ndea caminar con me mama, ela sempre la me disea de torme tempo par vardar i fiori. Geovà li ga fati tanto bei e difarenti un del altro parché el ne ama tanto. Fin ancoi, me penso del amor de Geovà quando vedo bei fiori de tanti colori e forme difarenti.”

12. Come che te pol insegnarghe to fioi sora la sabedoria de Geovà? (Salmo 139:14) (Varda anca la ilustrassion.)

¹² Giuta i to fioi a capir la sabedoria de Geovà. (Rom. 11:33) Come? Te pol spiegarghe come che la àqua la se svampisse, la deventa nùvole e come che queste nùvole le va de un posto al altro. (Giò 38:36, 37) Proa anca parlar ai to fioi de come Geovà el ga fato el nostro corpo de una maniera tanto bela. (Ledi Salmo 139:14. d) Varda quel che un fradel de nome Vladimir el ga dito: “Un giorno, nostro fiol l’è cascà de bissicleta e el se ga fato mal. Quando lu el ga guario un per de giorni dopo, mi e me dona ghe gavemo spiegà che Geovà el ga fato nostro corpo par rangiarse lu sol. Noantri anca ghe gavemo dito che i òmini no i ze mai stati boni de far una roba compagna. Par esémpio, un auto no’l se rangia lu sol.  Cossita, nostro fiol el ga capio la sabedoria de Geovà.”

13. Come che el pare e la mare i pol giutar i fioi a veder el poder de Geovà? (Isaia 40:26)

¹³ Geovà el ne convida de vardar el cielo e pensarghe sora el poder che lu el dopera par tegner su tuti i pianeti e le stele nel so posto giusto. (Ledi Isaia 40:26. e) Se te sì pare o mare, incoraia to fioi a vardar su el cielo e pensarghe sora quel che i vede. Varda cossa che ga sucedesto con una sorela che la ga nome Tingting, de Taiwan. Ela la ga dito: “Una volta, me mama la me ga menà acampar, e semo state bone de veder tante stele de note parché no ghen’era mia le luce dela cità. In quela època, mi ero drio tribolar nela scola e ero preocupada parché no savea se saria bona de seitar leal a Geovà. Ma me mare la me ga incoraià a pensarghe sora el poder che Geovà el ga doperà par far tute le stele. E la me ga dito che lu el ndaria doperar questo poder par giutarme a dàrghene fora cole me dificoltà. Dopo de vardar la creassion in quel viaio, go cognossesto meio a Geovà e go bio pi forsa par servirlo.”

14. Come che un pare e una mare i pol giutar so fioi a capir che Geovà l’è el Dio felice?

¹⁴ Quel che Geovà el ga creà mostra che lu l’è un Dio felice e el vol che anca noantri semo felici. I studiosi i ga visto che fin bèstie come osei e pessi i giuga. (Giò 40:20) Fursi, ti te ghè belche visto to fiol rider de un gatin che el ghe core drio una bola o de due cagneti che i ze drio morsegarse. Alora, quando te vedi to fioi rider de qualcossa che una bestioleta la fà, ricòrdaghe che Geovà l’è el Dio felice. — 1 Tim. 1:11.

15. Cossa che pol giutar el pare e la mare a discorer coi fioi? (Proverbi 20:5) (Varda anca el ritrato.)

¹⁵ Dele volte, l’è fadiga che i fioi i ghe conte al pare e ala mare cossa che i pensa  o che i ze drio infrontar. (Ledi Proverbi 20:5. f) Alora, cossa che pol giutarli a discorer coi fioi? Pol esser pi fàcile parlar con lori se ndé in meso la naturesa, parché resté pi tranquili e no ghen’è altre robe par disturbarve. Masahiko, un pare che l’è de star in Taiwan el ga dito: “Quando mi, me dona e me fioi ndemo su una montagna, caminemo nela praia o semo in meso la naturesa, nostri fioi i resta pi calmi. Cossita, l’è pi fàcile saver cossa che i ze drio pensar.” Katya, la sorela che ghemo parlà vanti, la ga dito: “Dopo dela scola, me mama la me menea nte un bel parche. Cossita, mi restea pi tranquila par contarghe cossa gavea sucedesto nela scola e i pensieri che mi gavea.”

16. Cossa che la fameia la pol far par restar pi tranquila e contente?

¹⁶ Quando la fameia la varda la creassion de Geovà, la resta pi unida, pi tranquila e pi contenta. La Bìblia la dise che ghen’è “tempo par rider” e “tempo par balar”. (Ecl. 3:1, 4) Par giutarne a restar contenti, Geovà el ne ga dato tanti bei posti par far robe che assa contenti. Alora, valtri podé torve el tempo par ndar cognosser le colònie, le montagne o le praie. I toseti i ghe piase tanto de ndar giugar nte un parche, vardar le bèstie o ndar nadar nte un rio o nel mar. Sicuro che ghen’è tanti bei posti par cognosser e par goderse!

17. Parché che el pare e la mare i ga de giutar so fioi a goderse cola creassion de Dio?

¹⁷ Nel paradiso, tute le fameie le podarà goderse cola creassion de Geovà tanto de pi che adesso. No gavaremo mia pi paura dele bèstie, gnanca le bèstie le gavarà paura de noantri. (Isa. 11:6-9) Tuti gavarà tanto tempo par vardar quel che Geovà el ga fato. (Sal. 22:26) Ma no stà spetar fin che vegna el paradiso par giutar to fioi a imparar dela creassion. Cossita, come Davi, to fioi i saverà che no ghen’è gnente compagno le creassion de Geovà! — Sal. 86:8.